**Mäkwe diri bäri kwin: mäkwe tärä Dre drieta ye drie**

Ñobätä ütiäte. Tärä Dre drieta yebiti nita kukwe driere bäri. Akwa ni tö nitre mada tötikai tärä yebiti angwane, käne nikwe driedre nitre ie. Ye medenbätä, nita kukwe driere ye ngwane nikwe ja di ngwandre tärä ye driekäre kwin (Prov. 22:29). Ni raba kukwe keta kabre nuainne driekäre, nita kukwe driere yekänti kukwe meden bäri kwin ye erere nikwe nuaindre.

Nuaindre ño:

Mäkwe kukwe ngwantari keteiti nitre töi mikakäre kapitulo keteitibätä tärä yebätä. Kapitulo kwatire kwatire yekänti kukwe ngwantarita kena yebätä mä raba blite. Nitre käkwe dre niedi ye mäkwe kukwe nua, ye bitikäre mäkwe ñäkä texto keteitibätä, aune minuto braibe te párrafo keteiti tä blite kukwe yebätä ye mäkwe kädrie ben.
Arato página kena ye mika raba tuare nitre ie töi mikakäre kukwe mike gare bäri jai aune Biblia tä dre mike gare kukwe yebätä ye mikadre tuare ie tärä yebätä. Ñodre, kukwe tare namani bare kädrieta noticia yete yebätä mäkwe blita, ye bitikäre página 3 yekänti kukwe ngwantarita ye erere nitre kwati tärä ngwentari jai mäkwe nie ie. O mätä nitre nünanka mä bäre ye tuinbiti blitakäre ben kukwe kwin tä ja känenkäre ni kräke yebätä mäkwe nie ietre. Jondron bämikata página 4 bätä 5 ye mäkwe mika tuare ie, aune mäkwe ngwantari ie: “¿Kukwe käbämikata nete ne meden mä törba tuai nemen bare?”. Mä raba niere arato nunta näin jötrö ngwarbe blitakäre ni jökrä tä kukwe ütiäte ngwentari jai yebätä. Kukwe ngwantarita tä mrä página 6 yekänti ye mäkwe mika tuare ie aune meden tuin bäri ütiäte ie ye mäkwe niemana ie.
Mäkwe ja di ngwan blite metre ta nitre ben ja tötika Bibliabätä ye kömikakäre. Mä raba niere krörö: “Nunta tärä ne driere nitre nünanka nere yei ja tötikakäre Bibliabätä. ¿Mä tärä tuin? [Mäkwe tuanmetre blite.] Kä tärä chi mäi angwane, mä raba ja tötike ño Biblia mäkwe yebätä tärä nebiti ye ti raba mike gare mäi”.

Mäkwe kukwe ne nuain sö krati:

Ngöbö mikadre täte ni mräkäbe yete mäkwe ja kita nuainkäre
Mäkwe kukwe drie ja mräkä madabe ye ngwane, mäkwe kukwe meden niedi blita kömikakäre ye mäkwe nie ietre (Prov. 27:17). Kukwe yebiti kukwe kwin ñaka nemen bare raba tuin mäi angwane, mäkwe kwita.