¿Blitadre kena ye ngwane ja tötika Bibliabätä drie raba ño?
Ja tötika Bibliabätä drieta nitre madai, ye ngwane ruäre ñan töta nemen ja tötikai o niena ja tötike iglesia kwe yete nieta kwetre. Iglesia ye kätä niaratre tötike ño ye aibe gare ietre, akwa ja tötika Bibliabätä ye kätä ni mike töi ngitiekä bätä kä mike juto nibätä ye abokän ñaka gare ietre. Metrere mätä ja tötika ye driere nitre madai, akwa ¿mä raba kä denkä ja tötika nuainta ño ye bämikakäre jötrö ngwarbe ietre? Ni raba kukwe ye bämike krörö: Mäkwe niedre ni iti ie mrö ria gare kwin mäi, akwa mäkwe mrö biandre bengwairebe ie ye bäri kwin, ¿ñan ererea? Ja tötika drie raba ño jötrö ngwarbe mikata gare Nuestro Ministerio del Reino enero 2006, página 6 yekänti.
“¿Kukwe nieta nete ye erere rabai bare raba ruin mäi? [Ñäkä Isaías 33: 24 yebätä, biti mäkwe tuanmetre blite.] Kukwe kwin nieta kukwe yebätä ye ti tönibi mikai gare mäi.” Mäkwe tärä Enseña ye bian ie bätä mäkwe nübai página 36 ye känene, párrafo 22 yebätä. Mäkwe ñäkä kukwe ngwantarita yebätä aune mäkwe nie ie kukwe ye mikata gare párrafo ye arabebätä. Ye bitikäre, mäkwe kukwe ngwantari bobukäreta ie bätä dre niedre kwe ye mäkwe kukwe nua. Ñäkädre gwairebe texto madabätä. Mäkwe kukwe ngwantari ie mikakäre gare köbö madate aune kukwe ükadrete kwin tuabitikäre. Kukwe ne erere mäkwe nuaindi angwane mä nibira ni iti tötike Bibliabätä.