Kantiko mrä mrä Jehová käikitakakäre
1 Watch Tower Bible and Tract Society of Pennsylvania tätre gätäre kä kwatire kwatire abokän namani bare bitinkä köbö 4 octubre 2014 yete, ye näire tärä kantakäre nie ye ükaiteta mikani gare. Erametre, kukwe kwin krubäte mikani gare. Ne madakäre, kantiko Ngöbö käikitakakäre ye ütiäte krubäte Ngöbö mikakäre täte ye ngwaninta törö nitre nämene ja ükaninkrö ye jökrä ie (Sal. 96:2).
2 Akwa, ¿ñobätä tärä kantakäre nie ye ükadreteta? Kukwe keta kabrebätä. Kena, texto ruäre Bibliabätä ye nüke gare bäri kwin nie kä nengwane, yebätä kukwe ruäre tä kantiko ruärebätä ye kwitadre (Prov. 4:18). Ketebukäre, Biblia Traducción del Nuevo Mundo ye ükateta kukwe keta kabrebiti, yebätä kukwe nämene Biblia käne yebätä abokän mikani kantiko nikwe yebätä ye ruäre kwitadreta. Ne madakäre, kukwe keta kabre kwitai tärä kantakäre nie yebätä, ye medenbätä bengwaire arato kantiko mada mrä mrä mikai.
3 ¿Tärä kantakäre nie ye imprimidreta ye nikwe ngübadre kantiko mrä mrä ye kantaikäre? Ñakare, ñobätä ñan aune sö ja känenkäre yebätä kantiko ruäre ye mikai jw.org yete. Kantiko mrä mikai gare ye bitikäre, nikwe kantiko ye kantai Gätä Sribi Ngöbökwe Nuainkäre yete gätä mikakäre krüte. Bämän ye kräke kantiko ye kädekata ño ye täi tikani aune “kantiko sribebare mrä” ye täi tikani yete arato.
4 Ñokänti kantiko mrä mrä ye raba nemen gare töbiti nie. Kantiko mikadre gare keteiti töbiti jai ye ñaka nuäre. Akwa yebiti ta, ni tö ja ngwain salmista ye erere, niarakwe niebare: “Tikwe kantadre mäi aune ti ñaka rabadre kwekebe” (Sal. 30:12). Kukwe nieta nete ne käkwe ni dimikai kantiko mrä mrä ye mike gare töbiti jai aune kantaire ja brukwä tätebiti.
Kantiko grababare abokän mikai jw.org yete ye nikwe kukwe nuadre bä kabre. Ye köböire kantiko ngö ño ye rabai gare drekebe nie.
Nikwe kantiko yebätä ja tötikadre aune nikwe mikadre gare töbiti jai.
Nikwe Ngöbö Mikadre Täte Ni Mräkä Yebe ye ngwane nikwe ja kitadre kantiko yebätä ne kwe ni mräkä jökrä rabadre kantaire töi jämebiti.
5 Sö ja käne yebätä, kantiko mrä ye mikai Gätä Sribi Ngöbökwe Nuainkäre ye mikakäre krüte angwane, käne kantiko grababare ye mikai kukwe nuadre konkrekasionte. Biti kantiko ye kantai nuainta käre ye erere.
6 Erametre, kantadre gätäte ye abokän ütiäte krubäte, ñobätä ñan aune nita gwaire ja kukwei yebiti Jehová käikitekä. Yebätä, kä rükadre kantakäre gätäte ye ngwane ni ñaka tädre ja näkwite jondron madabätä.
7 Ni raba kukwe mada nuainne arato ne kwe kantiko ye ütiäte krubäte ni kräke ye nikwe bämikadre. Gätä krikri kömika jämi ye känenkri kantiko ngö mikata kukwe nuadre nie. Nita kantiko kantaire Ngöbö mikakäre täte ye grabakäre ja mräkätre kä jökräbiti tibien tätre ja di ngwen krubäte. Kä kwatire kwatite tätre niken bobu Patterson (Nueva York), aune niaratre arabe tätre ngwian kitekä ja ütiäre. Ye medenbätä, ni gätä kri kömikaka käkwe ni nübaidre täke tibien kantiko kukwe nuakäre ye ngwane nikwe nuaindre bengwairebe. Ye käkwe ni brukwä ükaite kukwe kädriei ja känenkäre ye kukwe nuakäre (Esd. 7:10).
8 Gätä matare ye mika bike krüte kantiko mrä kädekata “¡Que venga el Reino establecido por Dios!” yebiti. Gätä nuainta kä kwatire kwatire abokän nuainbare bitinkä ye näire kantiko ye mikani gare, kantiko ye ükaninte Gobran Ngöbökwe namani gobrane kä kwinbiti abokänbiti kä nikanina 100 ta ye käi ngwankäre juto jabätä.
9 Jehová tä ‘jondron kwin’ bien nie ye ngätäite kantiko mrä mrä ye tä arato (Mat. 12:35a). Nikwe ja töi mikadre kwatibe mike gare töbiti jai kantaikäre ja brukwä tätebiti. Ye erere nikwe Ngöbö käikitaikä aune mikai ütiäte jai (Sal. 147:1).