Kantiko ye tä ni mike dite

Pablo aune Silas nämene ngite ye ngwane kantabare kwetre Jehovai (Hch 16:25). Aune ni näire arato, ja mräkätre kantabare kantiko yebätä nämene ngite Sachsenhausen, juta Alemania aune Siberia yete ye ngwane. Ye tä mike gare nie kantiko ye raba nitre kristiano tä ja tuin kukwe tare krubäte ben ye dimike ja ngwankäre dite.

Kantiko mrä kädekata Ani kantare kä jutobiti Jehovai, ye köböra nemen kukwe keta kabre yebiti. Rabaira nikwe angwane nikwe kantiko ye kantadre Ngöbö mikata täte ni mräkäbe yebe ye ngwane, ne kwe tärä okwä rabadre gare töbiti nie (Ef 5:19). Ye köböire, kukwe tare kri ye rabadre bare nibätä angwane üai deme Ngöbökwe käkwe ni dimikai tärä okwä kantiko yebätä ye ngwenta törö jai. Kantiko ye tä ni dimike ja töi mike kwatibe kukwe käbämikata nie yebätä. Tä ni mike dite ja tuakäre kukwe kri yebe. Aune ni tä kwin ye ngwane arato, tärä okwä nuäre ye tä ni mike “kantare kä jutobiti”, kätä nemen juto krubäte nibätä yebätä (1Cr 15:16; Sl 33:1-3). Yebätä, käre nikwe kantadre kantiko nikwe yebiti.

MÄKWE VIDEO KANTIKO KÄKWE NITRE SRIBIKÄ MIKANI DITE YE TUA BITI MÄKWE KUKWE NGWANTARITA NE MIKA GARE:

• ¿Dre käkwe ja mräkä Frost töi mikani kantiko ye tike?

• ¿Kantiko ye käkwe ja mräkätre nämene ngite Sachsenhausen ye dimikani ño?

• ¿Ñongwane kantiko ye raba mä mike dite arato?

• ¿Kantiko meden meden mä tö raba mikai gare töbitibe jai?