¿Ni raba kukwe driere derekri?
1. Tärä keteiti tä niere ye erere, ¿ora nuäi ngwane apóstol Pablo nämene niken kukwe driere ju ju te?
1 Tärä keteiti tä niere, Pablo nämene kukwe driere ju ju te “ñänä okwä kräbokä dere nememe kä nämene kite diore ye ngwane” (Daily Life in Bible Times). Pablo nämene kukwe driere ora ye erere te o ñakare ye ñaka gare metre nie, akwa niara nämene juto biare “Ngöbö kukwei kuin Jesubtä” driekäre yebrä gare nie (1 Cor. 9:19-23, Kukwe Kuin Ngöbökwe). Niara nämene kukwe ükete kwin jai nänkäre ju ju te ne kwe kä dianka nämene kwe jai kukwe driekäre yete kukwe kwin rabadre kwe.
2. ¿Ñobätä kä derekri ye bäri kwin kukwe driekäre?
2 Kä keta kabre känti, nitre kukwe driekä tätre käre kukwe driere ju ju te dekä bämän kratire kratire. Akwa ¿ora ye aibe ngwane nitre raba kwen nie kä kukwe driekäre yekänti? Ni sribikä prekusor käkwe niebare: “Nitre ñaka tä kwen krubäte gwi nuen rare, akwa deu abokän nitre tä kwen gwi nuen”. Ora ye ngwane, nitre nünanka ni bäre ye töita bäri jäme aune juto blitakäre nibe. Ora ye ngwane ni raba blite bäri nitre brare yebe arato. Raba nemen nuainbare angwane, nitre umbre rabadre kukwe ükete ne kwe gätä nuaindre kukwe driekäre derekri.
3. ¿Ni tädre kukwe driere deu ye ngwane nikwe töbikadre ño kwin?
3 Nikwe töbikadre kwin. Nikwe kukwe driedre deu ye ngwane töbikadre kwin. Ñodre, nitre tädre mröre dere ye ngwane ni rükadre angwane, ni rükaita niaratre känti blitakäre bentre nikwe niedre ietre. Kä rabadrera drüne angwane, nikwe ja mikadre käträ tuin yekänti ne kwe ni jutuadre nitre gwi yei, nikwe ja mikadre gare drekebe ngwarbe aune ñokäre nita näin ye nikwe niedre nitre gwi yei. Nikwe kukwe driedre nibu nibu jabe o nitre mada tädre kukwe driere ye ken aune ñotra trä tädre kwin ji ngrabare yekänti aune ñaka nuaindre kä kaibe känti ye ribeta nie. Kä rabadrera raire deu ye ngwane, nikwe ñaka ñäkädre jukwebätä nitre gwi yei, ñobätä ñan aune nitre gwi tärä nemen ja mike juto kübiakäre (2 Cor. 6:3). Kä känti nitre käme krubäte, yekänti kukwe driedre kä jämi nemen drüne ye känenkri (Prov. 22:3).
4. ¿Kukwe driedre derekri ye köböire dre dre kwin raba nemen nikwe?
4 Kukwe kwin rabai nikwe. Nitre tä kwen gwi nie ye ngwane kätä nemen bäri juto nibätä kukwe driekäre ietre. Kä rabadi bäri nie kukwe driekäre ye ngwane, nitre kwati bäri ie kukwe metre ye rabai gare aune rabaite kwäre (1 Tim. 2:3, 4). ¿Ni raba ora ükete ño jai kukwe driekäre ne erere?