Ja nire käre rabadre nikwe yekäre dre nuaindre

1. ¿Nünandre kärekäre ye tuin ño nitre ie?

NITRE kwati tä ja ngübare mrö ño kwetadre kwe yebätä aune tä ejercicio nuainne krubäte nekwe tädre kwin ngrabare. Akwa nünain kärekäre kwe ye ñan tä ngübare. Ñobätä ñan aune jatai bren o jatai umbre yebätä ñan töita nünanbätä kärekäre. Akwa, nikwe “nünain kwin kärekäre” ye Jesukwe mikani gare kwin Juan 3:16 aune 5:24 yekänti.

2. ¿Ja nire kärekäre yebätä Juan capítulo 6 tä dre niere? (Juan 6:​39, 40).

² Jesukwe kukwe ñan tuabare nuainbare gwa aune ban döräibare kwe nitre kwati biti ye ngwane.a Akwa ye bitikäre kukwe nuainbare kwe ye bäri jire käkwe nitre töi mikani ñan krütare. Nitre kwati nikani jiebiti nemen mren Galilea ye kräbätä kä Capernaúm ye känti, ye ngwane nitre krütanina rükaita nire ye raba nüne kärekäre ye niebare kwe ietre ye käkwe nitre töi mikani ñan krütare (ñäkädre Juan 6:​39, 40 yebätä). Ja mräkätre o ja ketamuko tare mäkwe krütani yebätä töbike. Kukwe niebare Jesukwe yebiti ni mräkätre aune ni rabadi nüne kärekäre kä jutobiti nemen gare nie. Akwa, Juan kapitulo 6 yekänti, Jesukwe kukwe ruäre niebare ye ñaka nüke gare nitre ie. Ani ja kite kukwe yebätä.

3. Juan 6:51 yekänti, ¿ Jesukwe dre gäräbare jabätä?

³ Jesukwe nitre ie ban biani bätä Jehovakwe mana biani nitre kirabe israelita yei ye bäsi ja erebe namani tuin nitre Capernaúm ye ie. Biblia ara tä mana ye kädeke “ban kä kwinbiti” (Sal. 105:40; Juan 6:31). Jesukwe blitabare mana yebätä nitre ben yebiti tö namani kukwe mada ütiäte driei. Ngöbökwe kukwe ñan tuabare nuainbare mana ye biani kwe regalo ye kwrere ngwane, akwa nitre käkwe kwetani ye ñaka namani kwäre gata yebätä (Juan 6:49). Ne madakäre, Jesús arabe käkwe ja kädekani “ban era metre kä kwinbiti”,“ban Ngöbökwe” aune “ban ja nire kärekäre kräke” (Juan 6:​32, 33, 35). Ye bitikäre, Jesús ye ja erebe mana yebe o ñakare ye mikani gare kwe kukwe nebiti: “Ti abko ban kä käinbti jatani kä nebtä ara tä nete amne nire nire käkwe ban ne kwetadre abko ñan krütadre kärekäre” (ñäkädre Juan 6:51 yebätä). Kukwe niebare Jesukwe ne käkwe nitre judío töi ganinte ñan namani nüke gare ietre. ¿Ñobätä Jesukwe ja biani bäri ütiäte maná Jehovakwe biani nitre kirabe ie ye kräke namani ngwentari jai? Jesukwe kukwe ne niebare ie kukwe ye mikakäre gare ietre: “Ban biani tikwe kwetadre […] ye abokän ti ngätä tikwe ne biandi tikwe”. ¿Dre gärä nämäne Jesukwe? Ni mräkätre aune nikwe nünain kärekäre kukwe ne köböire ye medenbätä ni tö kukwe ne mikai gare jai. Aisete, Jesukwe dre gäräbare ye ani mikai gare bäri kwin jai.

“BAN JA NIRE KRÄKE” AUNE NIARA NGÄTÄ YE DRE GÄRÄTÄ

4. ¿Jesukwe kukwe niebare yebätä ñobätä kä namani nokwre nitrekwe?

⁴ Jesukwe ja nire bian nitre kä jökräbiti tibien kräke niebare kwe ye ngwane, nitre namani töi ñan krütare aune kä namani nokwre jabätä kwetre. Ñobätä ñan aune Jesús ngätä ye kwetai kwe namanintre nütüre ye abokän ni nire tä ni nire mada kweteta ye kwrere niaratre rabai (Juan 6:52). Akwa, Jesukwe kukwe ütiäte ne niebare ietre: “Nire nire tä kite tie, ye abko tä ti ngätä kwete kwrere amne nire nire tä tödeke tibti, ye abko tä ti därie ñaen kwrere. Angwane ti Ni Kä Nebtä Ngobo ye munkwe ñan ngätä kwetadre amne munkwe ñan därie ñadre angwane, munkwe ñan nünandre kärekäre” (Juan 6:53).

5. ¿Jesús ñaka ja därie metre ye ñamana ye ñokänti gare nie?

⁵ Noe ye näire, ja käne Ngöbökwe däri ye ñäkäibare (Gén. 9:​3, 4). Ye bitikäre nitre israelita ie däri ye ñakaibareta kwe. Nire nire käkwe däri ye kwetadre ngwane “gadrete” (Lev. 7:27). Kukwe biani Moisés ie ye Jesukwe mikani ütiäte (Mat. 5:​17-19). ¿Se ño amarebiti Jesús ja ngätä kwetamna aune ja därie ye ñamana nitre judío ye ie? Metrere ja nire rabadre ño kwetre ye Jesús nämäne driere ietre kukwe niebare kwe nebiti (Juan 6:54).

6. ¿Jesús ngätä kwetadre aune därie ñadre niebare kwe ngwane, nämäne kukwe bämike jerekäbe ye kukwe meden mada tä mike gare nie?

⁶ Jesús nämäne kukwe driere kukwe bämika nämäne kwe yebiti. Ye erere nämänena nuainne ñodre, Blitabare kwe meri samaritana ben ñö okwä ken ngwane niebare krörö kwe: “Akwa ñö bianta tikwe ye abko nire nire käkwe ñadre abko ie tomna ñan rabadreta jire mda, ñobtä ñan angwane tikwe ñö biandre abko ñadre kwe, ñö ye abko rabadi neen kärekäre btä, aune mikadi nüne kärekäre, niebare kwe meri yeye” (Juan 4:​7, 14).b Ñö okwä kä keteiti känti ye meri samaritana käkwe ñadre ngwane, nünain kärekäre kwe ye ñan ai gäräbare Jesukwe. Aune nitre kwati Capernaúm ben Jesús blitabare käkwe niara ngätä kwetadi aune därie ñadi yekwe nünain kärekäre ye ña ai gäräbare kwe.

DÄNKIEN MROBARE DEU YE AIBÄTÄ BLITA NÄMÄNE KWE

7. ¿Jesukwe kukwe niebare Juan 6:53 yebätä nitre ruäre tä dre niere?

⁷ Jesukwe niebare niara ngätä kwetadre aune därie ñadre tä Juan 6:53 ye ngwane, nämäne blite niarakwe mröbare deu jämi krüte yebätä nütüta nitre iglesiate ruärekwe. Ñobätä ñan aune ye ngwane kukwe bä kwrere niebare kwe (Mat. 26:​26-28). Dänkien Jesús mrö biani deu ye ngwanta törö jai ngwane nire nire tä niken ye jökrä rabadre ban kwete aune vino ñain nütüta kwetre. ¿Ye era ya? Kukwe meden metre rükadre gare kwin nie ye ütiäte krubäte ñobätä ñan aune kä kwatire kwatire ni kwati tädre ja ükekrö nunbe gätä ütiäte ne ngwankäre törö jai. Dänkien Jesús mrö biani deu ye ngwane dre niebare kwe ye ñaka ja erebe kukwe niebare kwe Juan 6:53 yebätä ye ani mike gare jai.

8. ¿Ñobätä kukwe ketebu namani bare ne ñaka ja erebe mäkwe mika gare? (Üai mikadre ñärärä).

⁸ Kukwe ketebu ne ñaka ja erebe ye ari mike gare jai. Kena ¿kukwe niebare Jesukwe tä Juan 6:​53-56 ye ñongwane niebare kwe aune medente? Niarakwe kukwe ne niebare nitre kwati ie Galilea kä 32 ye ngwane. Ye bitikäre kä nikani kwati ta angwane Dänkien Jesús mrö biani deu ye ükaninte kwe Jerusalén. Ketebu, ¿nire nire ie Jesukwe kukwe ne niebare? Nitre Galileabu kräke, jondron ja ngätäre ye nämäne bäri ütiäte aune ñan kukwe ja üaire mika nämä ütiäte kwetre jai (Juan 6:26). Aune kukwe niebare Jesukwe ye ñan nükani gare ietre ngwane ñan namani tödeke jankunu Jesubiti. Aune nitre ja tötikaka kwe ruäre kämikaninkäbätä arato (Juan 6:​14, 36, 42, 60, 64, 66). Akwa kukwe namani bare kä 32 ye ñaka ja erebe Dänkien Jesús mrö biani deu ükaninte kä 33 yebe. Köbö ye ngwane nitre ja tötikaka ni jätä biti iti nämäne Jesús ben, kukwe ñan nämäne nüke gare täte ietre akwa, niaratre ñan nitre Galileabu erere. Niaratre nämäne ja ngwen metre tödeke aune Jesús Ngöbö monsoi jatani kä tibienbätä ye niaratre nämene mike era jai (Mat. 16:16). Jesukwe kukwe kwin niebare ietre: “Tikwe ja tare nikaba angwane, käre mun nämä ketetibe tibe” (Luc. 22:28). Kukwe ketebu nebiti nüke gare metre nie Jesukwe kukwe niebare tä Juan 6:53 ye ngwane ñan nämäne blite niarakwe mrö bare deu yebätä. Kukwe mada tä kukwe ne mike gare metre ye ari mike gare jai.

JESUKWE KUKWE NIEBARE YE MÄ KRÄKE

9. ¿Dänkien Jesús mrö biani deu ye ngwane niarakwe kukwe niebare ye nire nire kräke?

⁹ Dänkien Jesús mrö biani deu ye ngwane, ban te levadura ñakare biani kwe nitre ja tötikaka kwe ie ye abokän nämäne niara ngätä bämike niebare kwe niaratre ie. Ye bitikäre vino döräibare kwe niaratre ie ye abokän “däriebiti kukwe ükaite” bämika nämäne kukwe yebiti niebare kwe (Mar. 14:​22-25; Luc. 22:20; 1 Cor. 11:24). Kukwe mrä nieta nete ye ütiäte. Kukwe ükaninte bitin ye ñan nitre jökrä kä tibienbätä kräke, ñakare aune nitre “Israel mräkä” ye kräke ye abokän, nitre israel ja üaire näin kä kwintibi gobrankäre Jesús ben “Gobran Ngöbökwe yete” (Heb. 8:​6, 10; 9:15). Dre gärä nämäne kukwe yebiti ye ñan nükani gare ietre ben gwairebe. Akwa ye bitikäre üai deme namani bititre angwane dianinkä nekwe kukwe ükaninte bitin rabadre niaratre kräke aune ye köböire niaratre rabai gobrane Jesús ben kä kwinbiti (Juan 14:​2, 3).

10. ¿Jesukwe blitabare nitre kwati ben Galilea aune blitabare kwe deu nitre ja tötikaka ben mröbare kwe ye ngwane ye ja erebe ya? (Üai mikadre ñärärä).

¹⁰ Dänkien Jesús mrö biani deu ngwane, blitabare “obeja braibe” yebätä ye ütiäte krubäte nikwe mikadre ñärärä kwin. Grupo braibe ne abokän nitre ja tötikaka Jesukwe käkwe mröbare ben deu ye (Luc. 12:32). Nitre nänkä Jesús jiebiti ne aune mada ye käkwe ban bätä vino ye kwetadre köbö ye näire deu. Niaratre jökrä ye näin kä kwintibi sribikäre gwairebe Jesube. Aisete kukwe niebare Jesukwe nitre ja tötikaka kwe ie ye ñaka ja erebe kukwe niebare kwe Galilea ye ngwane, ñan ñobätä aune Galilea yete nitre kwati ben blitabare kwe aisete kukwe ne ni kwati kräke.

11. ¿Jesús nämäne Galilea ye ngwane ñaka blitabare nitre braibe aibe ben kwe ye ño känti gare nie?

¹¹ Jesukwe blitabare kä 32 Galilea ye ngwane nämäne blite nitre judío tö namani ban metre kwetai ye ben. Akwa, Jesús ñan nämäne blite ban metre yebätä, ñakare aune jondron bäri ütiäte yebätä blitabare kwe abokän: ja nire metre bien ietre. Ne madakäre, Jesús niebare nire krütadre ye gaikröta kä mrä näire nünankäre kärekäre. Akwa ye ngwane Jesús ñan nämäne blite nitre braibe ben namani bare deu mröbare kwe ye ngwane ñakare aune nitre kwati ben, jondron kwin ye abokän rabai nitre jökrä kwe. Niebare kwe kä Galilea yete: “Nire nire käkwe ban ne kwetadre abko ñan krütadre kärekäre. [ . . . ] Akwa ban biandi tikwe kwetadre nekwe nitre nünandre, ye abko ti ngätä tikwe ne biandi tikwe” (Juan 6:51).

12. ¿Ja nire kärebätä Jesukwe blitabare kä Galilea te ye rabadre nikwe yekäre dre nuaindre?

¹² Ja nire kärekäre ye rabai jötrö ngwarbe nitre däredi yekwe o nitre krütani kira yekwe ye ñan ai gäräbare Jesukwe nitre judío ie kä Galilea yete. Ñakare aune nire käkwe ban ye kwetadi abokän tä tödeke tä bämike yekwe ja nire rabai meden gärätä. Nitre kwati tä ja bien kristiano ye abokän tä nütüre nire tödekadre Jesubiti o Jesús tuadre aune mikadre tuin kwe jai ni Ni Mikaka Kwäre ye erere ye aibe ngwane rabaite nire (Juan 6:​29, Nueva Versión Internacional). Kenanbe nitre kwati nämäne tödeke Jesubiti akwa biti Jesús tuanimetre kwe. ¿Ñobätä kukwe ye namani bare?

13. ¿Dre ribe nämäne nänkäre Jesús jiebiti?

¹³ Nitre kwati bukani Jesukwe ye nämäne juto nänkäre Jesús jiebiti Jesukwe jondron biandre ie ye ngwane. Metrere niaratre ye mikadreta räre, mrö biandre ngwarbe ie aune kukwe meden kwe nua tö namani kwetre ye driedre ie ye ie tö namanintre. Akwa niaratre ye rabadre nänkä metre Jesús jiebiti yekäre kukwe ruäre nuaindre kwe ye Jesukwe bämikani okwäbiti. Jesús ñan jatani kä nebätä jondron kwin nuainkäre nitre kräke ja ngätärebiti aibe. Metrere rabadre “nänkä” Jesús jiebiti yekäre rabadre niara kai ngäbiti, aune dre drie nämä kwe ye rabadre mike täte (Juan 5:40; 6:44).

14. ¿Jesús ja ngätä aune ja därie biani köböire kukwe kwin raba nemen nikwe yekäre nikwe dre nuaindre?

¹⁴ Jesukwe mikani gare niaratre rabadre tödeke. Akwa tödeke ¿drebiti? Niarakwe ja ngätä aune ja därie biandre yebiti ye köböire ja nire käre rabadre nikwe. Tödeka ye nämäne ütiäte nitre judío ye kräke, ye erere nengwane ni kräke arato (Juan 6:40). Jesús ja därie aune ja ngätä biani ni kräke bätä blitata Juan 6:​53, ye köböire kukwe kwin raba nemen nikwe yekäre nita tödeke ni kökanintari kwe yebiti ye nikwe bämikadre. Kukwe ne tä ni jökrä kräke (Efes. 1:7).

15, 16. ¿Kukwe meden kwin ngwanta törö nie Juan capítulo 6 yebätä?

¹⁵ Juan kapítulo 6 ye ütiäte krubäte ni jökrä kräke. Ni jökrä tare Jesukwe ye mikata gare yete. Kä Galilea yete nitre mikaninta kwin kwe, blitabare kwe Gobran Ngöbökwe yebätä nitre ben aune nitre kwati bukani kwe (Luc. 9:11; Juan 6:​2, 11, 12). Ye ñan ngörä, niara “ban käta ni mike nüne kärekäre” ye driebare kwe arato (Juan 6:​35, 48).

¹⁶ Jesús ja nire biani ngwanta törö jai kä kwatire kwatire yete “obeja mada mada” niebare Jesukwe ye ñan raba ban kwete aune vino ñain (Juan 10:16). Akwa kukwe kwin raba nemen kwe Jesús ja därie aune ngätä biani ye köböire. Yekäre rabadre tödeke Jesús ni kökanintari yebiti (Juan 6:53). Akwa nire kätä ban kwete aune vino ñain ye tä kukwe ükaninte mrä Jesukwe yete. Niaratre ye käkwe gobrandi ben Gobran Ngöbökwe yete. Yebätä, Juan capítulo 6 ye ütiäte krubäte ni jökrä kräke, nitre dianinkä nänkäre kä kwinbiti aune nitre obeja mada mada kräke. Nikwe tödekadre ye ütiäte krubäte nekwe ja nire kärekäre rabadre nikwe ye tä mike gare.