Mä raba ja töi gobraine kukwe käme yebätä

1. ¿Ni jökrä tä ja tuin dre ben?

¿KUKWE tuin käme Jehovái ye medei törö nemen mäi? Ye ngwane, mä aibe tä ja tuin kukwe yebe raba kite ruin mäi yebätä mä raba kite di nekä. Akwa Biblia tä kukwe ne niere: “Kukwe käme käme tä kite ni jökrä nuente ja käne, kwrere arato kite mun rüere” (1 Cor. 10:13). Kukwe nebiti nüke gare mäi mä ñaka tä kaibe; kukwe ye erere ben ja mräkätre jökrä tärä ja tuin. Mä ñan tä ja tuin kaibe kukwe yebe ñakare aune Jehová tä mä dimike, yebätä mäkwe kukwe ye ganandi ngwen törö jai.

2. ¿Kukwe meden tä nitre kristiano aune nitre ja tötikaka Bibliabätä ye nuinte? (Üai mikadre ñärärä).

² Biblia tä ne niere arato: “kukwe kämekäme käta ni nuente ja käne, ye abko kukwe käme mdei ni töibtä tä ni nuente ja käne, käta ni näkwite ja kukwäre” (Sant. 1:14). Ni jökrä ñan nuateta kukwe ja erebebiti. Ñodre, nitre kristiano ruäre aune nitre ja tötikaka ruäre töita nemen rababätä ni ja erebe ben o brare meri ben aune meri brare ben. Ruäre abokän nämene üai butiere tuin akwa ñan nuainne täta nemen tuabätä bäbukäre. Ni mada kräke droga duadre aune ye ñaka nemen nuäre ribiakakäre ietre. Kukwe ño erere ben nikwe ja tuai, akwa ja raba nemen ruin nie apóstol Pablo käkwe kukwe niebare ne erere: “Ti töta nebe jändrän kuin nuein akwa, kukwe kämekäme ara jire tä nebe käne ti jiete” (Rom. 7:21).

3. ¿Ni iti tä nemen matete ben kukwe arabe te ye köböire tä kite töbike ño?

³ Bati bobu nita nemen mateta kukwe arabe te yebätä ni di ñaka niena kukwe ye tuanmetrekäre raba ruin nie aune kukwe blo nüke ni töite ye köböire Jehová ñaka ni kain ngäbiti ruin nie. ¡Akwa, töbikata kore ye ñan era! Ñobätä nita ye niere, kukwe ngwantarita ketebu nebiti mika raba gare jai: 1) ¿ño köböire jata nemen ruin käme nie? 2) ¿kukwe käme tä nüke ni töite ye ni raba ganaine ño?

JA RABADRE RUIN ÑO NIE IE SATANA TÖ

4. a) ¿Satana tö ni tuai dre nütüre? b) ¿Ni di tärä kukwe käme tä nüke ni töite ye ganainkäre ye ñokänti gare nie?

⁴ Kukwe käme rabai ni jiete ngwane, ni di ñaka töi ñakare niekäre ye Satana tö ni tuai nüture. Nikwe ja di kärädre krörö ni rün kä kwin ie niebare Jesukwe: “Ñan nun mike ja mike ngite ñakare aune, nun mike kwäre Satana yebätä” (Mat. 6:13). Arato kukwe käme rabai ni jiete aune ni töi juto biare ja mikakäre ngite Jehová rüere, Satanás tä niere nibätä (Job 2:​4, 5). Tö ni bämikai käme, akwa metrere niara ara di ñaka nükani kukwe kwin nuainkäre, ñakare aune Jehová ñaka mikani täte kwe aune kukwe blo nuainbare kwe. Nikwe ja ngwandi niara kwrere ye nütüta kwe. Akwa ye ñan ngörä: ¡Ngöbö monsoi ja ngwen metre yekäre ja mikai ngite ngütü nämä kwe yebätä nuaninte kwe kukwe blo yebiti! (Mat. 4:​8, 9). Akwa ¿bäkänä ni di ñan nüke ja ngwankäre kwin kukwe käme tä nüke ni töite ngwane? Ni di tärä, ñobätä ñan aune Pablokwe niebare krörä: “Ti di tärä jondron jökrä kräke nireta ja di bien tie ye köböire” (Filip. 4:13).

5. ¿Ni töi käme yebätä ni raba ja gobraine ye ñobätä gare Jehovai?

⁵ Jehová ñan töita Satana ye kwrere nibätä: Jehová kräke ni di raba nuke kukwe käme tä nuke ni töite ye ganainkäre. ¿Ñokänti ye gare nie? Ñobätä ñan aune nitre kwati ja ngwanka metre rabaite kwäre ja tare nikadi kri yebitikäre käbämikani Jehovakwe. Gare metre nie Jehovákwe ye ñaka ni ngökö, nitre braibe ye ñan aibe ñakare aune nitre kwati näin kä bänuäre yete ye abokän käkwe “dän ngwenbrere kitai jabätä”, ye rabadi mrebe Jehová okwä känti ye kwrere bämikani ye nieta metre kwe (Apoc. 7:​9, 13, 14). Aisete, kukwe blo tä nuke ni töite ye ni raba ganaine gare kwin Jehovai.

6, 7. ¿Dre mada rabadre era ni kräke ie Satana tö?

⁶ Ni töi ngite yebätä kukwe blo tö nuke ni töite aisete Jehová ñaka raba ni kain ngäbiti aune ja nire kärekäre ye ñan raba nemen nikwe nütüdre ie Satana tö. Akwa niara ara bobre ñobätä ñan aune töi ngwankrä ñan niena kwe ñaka nünain kärekäre kwe kukwe ükaninante ben aune gaite täte yebätä tä kukwe nuaine käre nibätä (Gén. 3:15; Apoc. 20:10). Kukwe kwin raba nemen nikwe ja känenkäre yebätä Satana tä bätä ngwen nibätä tödekara ñaka kwe ja känenkäre ye kwrere nemen bare nibätä nikwe nütüdre ie tö. Akwa Jehová tö ni kain ngäbiti yebätä tö ni dimikai köböire nünain kärekäre raba nemen nikwe mikata gare Bibliabätä. Ñobätä ñan aune 2 Ped. 3:9 tä niere krörö “Ni jökrä kukwe nuainkä kämekäme Ngöbö rüere ye abokän käkwe tödekadre jökrä Jesubiti aune ñan rikadre ja tare nike Ngöbö okwä bäre mento ie Ngöbö tö”. Kukwe ñaka tärä kwin Sataná kräke ja känenkäre. ¡Akwa tödekara kwin tärä nikwe!

⁷ Kukwe käme nuke ni töite yebätä, Jehová ñaka ni kain ngäbiti ye nikwe nütüte ie Satana tö. Kukwe ye ngwandre törö jai ye köböire ni di ñan riaikä kukwe käme nüke ni töite ye ganainkäre. ¡Aune ñaka ja ngökamana jire Satana ie! (1 Ped. 5:​8, 9).

NI TÖI NGITE YEBÄTÄ JA RUIN ÑO NIE

8. ¿Jehová ñan ni kain ngäbiti dre madabätä ni raba töibike ye kwrere? (Salmo 51:5; “Kukwe ütiäte” mikata gare ye mikadre ñärärä).

⁸ Satana tä ni dikainkä aune kukwe madabätä ni ñan raba ja töi käme gobraine aune Jehová ñan ni kain ngäbiti ye nütü raba. ¿Ye dre? Ye abokän ni ngite Adán aune Eva köböire yebätäa (Job 14:4; ñäkädre Salmo 51:5 yebätä).b

9, 10. a) ¿Adán aune Eva töi namani ngite ye ngwane, ja namani ruin ño ietre? (Üai mikadre ñärärä). b) ¿Ni töi ngite yebätä ja ruin ño nie?

⁹ Adán aune Eva ja mikani ngite yebätä töi ñaka namanina metre ye ngwane ja namane ruin ño ietre yebätä töbike. Niaratrekwe ja mikani ngite ye bitikäre namani ja budie jue mike. ¿Ñobätä nuainbare kore kwetre? Tärä Perspicacia para comprender las Escrituras tä niere: “Töi ñaka namanina metre yebätä ja namani ruin ngite ietre, namanintre jakaire aune töi namani nike”. Ani bämike ne kwrere: ju keteiti abokän tä ketaninkä ta aune terikri aibe tä ñäkäninbiti. Adán aune Eva ye neketaninkä ju ye teri ye kwrere yebätä ñaka raba ngitie ngite yebätä.

¹⁰ Ni ñaka ja erebe Adán aune Eva yebe. Ñobätä ñan aune ni kökanintari ye köböire ni namaninte kwäre ngite yebätä, ye medenbätä ni töi raba nemen mrebe (1 Cor. 6:11). Akwa ni kite Adan yekri yebätä, jata nemen ruin ngite nie, nita nemen jakaire aune ni töi tä ni nike. Biblia tä niere ngite ye tä ni jökrä bätä aune ni ñan “ja mikani ngite Adánbe kwrere” yebiti arato (Rom. 5:14). Jehová ñaka raba ni kain ngäbiti aune ni di ñaka raba nüke ja tuakäre kukwe blo yebe ye ñaka nütüdre. ¿Dre raba ni dimike? ye ani mike gare jai ja känenkäre.

11. Kukwe blo tä nüke ni töite ye ni ñaka raba tuenmetre ruin nie ngwane, ¿Romanos 6:12 ye tä dre ngwen törö nie?

¹¹ Ni töi ngite ye medenbätä, kukwe ne kwrere raba nuke ni töite: “Kukwe blo nüke mä töite ye kräke, mä di ñaka rukai ja gobrainkäre”. ¡Ni töi rabai ne erere ngwane, ñaka töbikadre krubäte bätä! Ñobätä ñan aune nikwe ñaka ja “gobramana” ngite ye ie ye Biblia tä niere nie ye ngwandre törö jai (ñäkädre Romanos 6:12 yebätä). Aisete, kukwe blo tä nuke ni töite ye ngwane, ni ñaka rabadre mike nemen bare ñobätä ñan aune ni raba ja töi mike ñaka nuainne (Gál. 5:16). Ni di raba nuke kukwe blo ye ganainkäre ye gare metre Jehovai. Ye medenbätä, tä kukwe ye ribere nie (Deut. 30:​11-14; Rom. 6:6; 1 Tes. 4:3). Yebätä gare metre nie: ni di raba nüke kukwe blo ye ganainkäre.

12. ¿Jehová ñaka ni kadi ngäbiti raba nemen ruin nie ye ngwane nikwe dre nuaindre aune ñobätä?

¹² Ni töi ngite yebätä ni töi raba nemen krärä jabätä: “Ti töi blo ye medenbätä Jehovakwe ñaka ti kadi ngäbiti jire”. ¡Akwa kukwe ye ñaka mikadre era jai! Ñobätä ñan aune nita därere ngite ye gare Jehovai nieta Bibliakwe ye ngwandre törö jai (Sal. 103:​13, 14). Kukwe kia kia “gare kwin nibätä” Jehovai yebätä, ñobätä kukwe blo tä nuke ni töite ye gare ie (1 Juan 3:​19, 20). Akwa nikwe ja di ngwen jankunu ja gobrainkäre kukwe blo yebätä aune nikwe ñaka nuaindi ye ngwane, ni Töi täi mrebe Jehová okwä känti. ¿Akwa ñobätä kukwe ye raba era ni kräke?

13, 14. ¿Kukwe käme tä nüke ni töite yebätä Jehovakwe ñaka ni kadi ngäbiti? Ma raba kukwe ye mike gare bäri.

¹³ Kukwe blo nuke ni töite aune kukwe blo nuainne ye ñan ja erebe mikata gare Bibliabätä. Dre dre rukai ni töite ye ni ñaka raba ketebätä, akwa nikwe dre dre nuaindi yebrä tä gare nie. Ñodre, nitre corintios jämi ja mike kristiano ye känenkri ruäre namani nemen kämekäme nitre ja erebe ben. Akwa Pablokwe niebare bätädre: “Mun ruäre nämane nüne kore”. Akwa ye bitikäre ¿nitre kristiano ye töi ñaka namaninta käre? Ni ñaka töbikadre ye kwrere, kukwe käme ye kwrere nuainda ye ñan tä nekä jötrö ni töite. Akwa nitre kristiano nämändre ja töi gobraine aune kukwe käme nämä nuke töite ye ñaka nuainne ye ngwane, namanintre “bätäninte” ye kwrere aune Jehovakwe niaratre kani ngäbiti (1 Cor. 6:​9-11). Kukwe ye kwrere ni raba mäbätä.

¹⁴ Kukwe käme medei raba nemen mäi, akwa mä raba ja gobraine ñaka nuainkäre ye mä ngwan törö jai. Kukwe käme medei tä nemen ni ngätäre ie aune ni töi ie ye dianinkä ñaka raba jötrö ja töite akwa ja töi gobrain raba (Efes. 2:3). Akwa, ¿dre nuaindre kukwe käme ye diankakäre ja töite? Ani mike gare jai.

DRE MÄ DIMIKAI ÑAKA KUKWE BLO NUAINNE

15. Ni tö kukwe käme ye ganainti ngwane, ¿ja ngökadre akwle ye ñobätä ñaka kwin?

¹⁵ Mä tö kukwe blo ye ganaindi ngwane, ñan ja ngökö akwle ñan ñobätä aune ni töi ngite yebätä ja mika raba ngite ye ngwandre törö jai. Ye medenbätä, ja ngübadrebiti ne kwe nikwe ñaka “ja ngökadre akwle” (Sant. 1:22). Ni ruäre raba nemen töbike ne kwrere: “Nitre mada ye tä dö ñain bäri tikrä” o raba ngite kite ni madabiti aune raba niere “Ti muko tädre ti tarere bäri akräke ti töi ñan rabadre pornografia (üai butiere) ye tuin”. Kukwe nuainta ye ñan nierare ye kwrere raba bämike aune ye ngwane bäri rabai nuäre ja mikakäre ngite. Aisete ñan kukwe mike jabiti ni mada ngökakäre aune ja ngökakäre akwle. Kukwe blo nuainta mäkwe yebätä aune mä ara tä kukwe ye nuainne mä ngwan törö jai (Gál. 6:7).

16. ¿Mäkwe ño ja töi mikadre kwatibe kukwe kwin nuainkäre?

¹⁶ Ñaka ja ngökamana akwle aune kukwe jämi nemen bare mäbätä ye känenkri ja töi mike kwatibe ñaka kukwe blo ye nuainne (1 Cor. 9:​26, 27; 1 Tes. 4:4; 1 Ped. 1:​15, 16). Arato dre tä mä töi mike kukwe blo ye nuainkäre yebätä töbikatari mäkwe. Ñodre, rabai bäri nuäre ja mikakäre ngite käta nemente ngwarbe nie ye ngwane o raire deu. Kukwe blo tä nuke mä töite ye ngwane mäkwe dre nuaindi yebätä mäkwe ja kita. Yebätä töbikadre käne aune ye mä dimikai ñaka ja mike ngite mäkwe ja kitadre käne ye köböire mä ñaka rakai kö ökwä yete ye kwin krubäte nibira gare nie (Prov. 22:3).

17. ¿Dre nemen gare nie José yebätä? (Génesis 39:​7-9; Üai mikadre ñärärä).

¹⁷ Potifar muko tö namani José tuai nemen jabe ye ngwane Josekwe ja ngwani ño yebätä ani töbike ñan töbikabare krubäte kwe ñakare niekäre ie (ñäkädre Génesis 39:​7-9 yebätä).c José ja ngwani ño yebiti nemen gare nie niarakwe töbikabare kwin käne dre niei kwe yebätä aune töi nämane kwatibe ñan ja mikakäre ngite meri muko nämenena yebe. ¿Dre nemen gare nie José yebätä? Nikwe dre nuaindi yebätä töbikadre kwin käne aune ja töi mikadre kwatibe ñaka ja mikakäre ngite. Aisete, kukwe blo ye rukai ni töite ye ngwane, rabai bäri nuäre ñaka kain ngäbitikäre aune ñakare niedi töi kwatibe biti.

“JA TRÄ TUADRE KWIN JANKUNU”

18. ¿Kukwe blo tä nüke ni töite ye ganainkäre dre nuaindre? (2 Corintios 13:5).

¹⁸ Kukwe käme tä nüke ni töite ye ñaka mikakäre nemen bare ni rabadre ja trä tuin jankunu (ñäkädre 2 Corintios 13:5 yebätä). Ye köböire, ja ngwanda ño o töbikata ño yebätä ja töi kwitadre o ñakare ye rabai gare nie. Ñodre, kukwe blo tä nüke mä töite akwa mä ñaka tä nuainne ye bitikäre mäkwe kukwe ne ngwentari jai: “¿Tikwe ñakare niebare bengwairebe?”. Ñan namani nuäre mä kräke ñakare niekäre bengwairebe ye ngwane ñan ja di ngwan nekä, akwa mä nuadrete bobutata ye ngwane mäkwe dre nuaindi ñakare niekare bengwairebe yebätä mäkwe töbika kwin. Aune mä raba kukwe ne kwrere ngwentari jai: “¿Drebätä tita ja nokwite ye tä ti töi mike bäri kukwe blo ye jiebiti? ¿Ja mika gure ngwarbe üai mikata tuare ye ngwane tita kämikekä bengwairebe? ¿Ruäre ngwane ñan tä nemen nuäre ti kräke ja gobrainkäre, akwa kukwe biani Jehovakwe ja jie ngwankäre ye tikwe mikadre täte ye kwin ti kräke ye nüke gare tie?” (Sal. 101:3).

19. ¿Kukwe kia bätä kukwe ñan kwin diandre jai ngwane ye ñobätä blo krubäte?

¹⁹ “Ni brukwä ye bäri ni ngökö jondron mada yebiti ta aune käme krubäte” ye ngwandre törö jai (Jer. 17:9). Ne madakäre Jesukwe niebare “kukwe ngwarbe nieta aune blita blo krubäte ye kite ni brukwäte” (Mat. 15:19). Aisete ñan ja ngöka akwle aune kukwe mike jabiti. Ñodre, ni iti tä pornografía ye tuenmetre ngwane, ja känenkäre raba nemen nütüre ja mikata gure ngwarbe üai mada nukai, akwa ñaka butiere ye ngwane ñaka blo. O raba nemen töbike: “Kukwe käme käme bämikata ja töite jerekäbe, akwa ñaka nuainda ye ngwane ñaka blo raba nemen nütüre”. Töbikata käre ye abokän ni brukwä tä dre ie ye erere nuainda (Rom. 13:14). ¿Akwa mä ñan rakadre clo okwä yete yekäre mä raba dre nuainne? Mäkwe ñaka kukwe kwin diandre jai kukwe kia bätä ye ngwane ja känenkäre mä raba kukwe bäri blo den jai kukwe bäri krikri bätä ye mä ngwan törö jai.d Aisete ‘kukwe käme käme nüke ni töite’ abokän köböire kukwe blo diain raba jai yebätä ja ngübadrebiti.

20. ¿Nengwane nire tä ni dimike? ¿Kä bä nuäre yete kukwe blo täi nüke ni töite?

²⁰ Nibira gare nie erere, Jehovakwe ni dimikai ja tuakäre kukwe blo tä nüke ni töite yebe. Ne madakäre, ni kökanintari ye köböire nita tödeke nünankäre kä bänuäre yete kärekäre. ¡Köbö ye näire ni töi Jehová mike täte kä juto biti aune kukwe blo ñaka rabaira nüke ni töite! Akwa köbö ye jämi nüke ye känenkri nikwe ja di ngwandre jankunu Jehovakwe ni dimikai kukwe blo tä nüke ni töite ye ganainkäre aune kukwe kwin mikai nemen bare kwe ni kräke.