Ni rabaira umbre akwa kä täi juto nibätä

1, 2. ¿Ja mräkätre niena umbre sribibare kä kwati te Jehová kräke ye tuin ño Jehovai? (Salmo 92:​12-14; üai kena täräkwatabätä).

KÄ RUÄRE känti nita niken umbre ye tä nemen ütiäte krubäte. Akwa kä ruäre känti abokän nitre tä kukwe ruäre nuainne ne kwe tä niken umbre ye ñaka jutuadre bätätre. Ñodre, dokwä druen tä kite ngwen kratibe ye bengwairebe tä denkä jai ne kwe tä kite umbre ye ñaka jutuadre bätätre. Akwa, tä denkä jai yebiti ta, tä kite umbre yei ñaka raba ketebätä jire. Kukwe bämiri nebiti nita kite umbre ye ñaka nuäre ka ngäbitikäre nibi gare nie.

² Akwa, ¿ja mräkätre kite umbre ye tuin ño Jehovai? (Prov. 16:31). Jehová tä kete kri bä nuäre yebätä (ñäkädre Salmo 92:​12-14 yebätä).a Kukwe bämikani kwe ye nemen kwin krubäte. Ñobätä ñan aune, kribätä kä tä kabre aune blü bä nuäre aune rä mane tä nuin kä kabre te. Ñodre, kri keteiti tä ni töi mike ñan krütare aune bä nuäre krubäte ye abokän kädekata cerezo de flor japonés, kri ye raba nuin kä 1.000 jire te. Kri tä nuin kä raire te, ye erere arato ja mräkätre umbre ye tuin bä nuäre krubäte Jehovai. Ja mräkätre ye dokwä druen ngwen ye ñan ai mikata ñärärä Jehovakwe, ñakare aune, niaratre tä ja ngwen metre aune kukwe keta kabre kwin tuin bätätre ie bätä tä ja töi mike kukwe kwin o kukwe tare nemen bare bätätre aune kä nikanina kabre ta niaratre ie, akwa täbe sribire jankunu Jehová kräke yebätä tä ja töi mike.

3. ¿Nitre Jehová mikaka täte namanina umbre yebiti niarakwe ja töi mikani nemen bare ño?

³ Nita kite umbre, akwa ni täbe ütiäte krubäte Jehová kräke.b Bä kabre niarakwe nitre umbre dianinkä niara töi nämä ño ye mikakäre nemen bare. Ñodre, Sara namanina bichore manchire ye ngwane niara monsoi rabai aune yekri juta rabai kri krubäte bätä niarakri Mesías jatai niebare ie (Gén. 17:​15-19). Arato, Moisés jatanina ruare ye ngwane niarakwe nitre israel ye dianinkä Egipto ye ribebare ie (Éx. 7:​6, 7). Ne madakäre, Juan namanina ruare ye ngwane niarakwe tärä ketarike tä Bibliabätä ye tikani üai deme köböire.

4. Proverbios 15:15 tä niere erere, ¿töi kwin meden raba ja mräkätre umbre dimike ja tuakäre kukwe tare ben? (Üai mikadre ñärärä).

⁴ Nita kite umbre ye ngwane, kukwe tare keta kabre ben ja tuata. Nita kite umbre ye ñan nuäre niebare meri testiko iti kwe, akwa töi kwin keteiti raba ja mräkätre umbre ye dimike ja tuakäre kukwe tare ben, ye abokän kä jutoc (ñäkädre Proverbios 15:15 yebätä).d Kä juto tädre käre ja mräkätre umbre yekwe yekäre dre nuaindre kwe ye ani mike gare jai. Arato ja mräkätre jökrä konkrekasionte raba ja mräkätre umbre ye dimike ño ne kwe kä juto tädre käre kwetre. Akwa käne ñobätä ñaka nuäre ne kwe ja mräkätre umbre bätä kä tädre juto käre ye ani mike gare jai.

NITA KITE UMBRE YE RABA KÄ JUTO GAINKÄ NIBÄTÄ

5. ¿Nita kite umbre ye ngwane dre raba ni di gainkä?

⁵ Ni kite umbre yebätä kukwe ruäre raba ni mike ja tebaire krubäte. Ñodre, kukwe ruäre ñan raba nemen nuäre ni kräke nuainkäre ye raba ni mike ulire krubäte. O nita kite umbre yebätä ni töita nemen ja tuabätä bati aune dite ta (Ecl. 7:10). Meri testiko kädekata Ruby tä niere: “Ja ngwäkitadre ye tä nemen tare krubäte ti kräke ñobätä ñan aune ti kwata aune ti krä ye bren tie aune tä nemen tare krubäte tie. Kukwe nuäre nuainkäre ñodre media kite ja ngotobätä bätä ye tä nemen ribi ti kräke nuainkäre. Ne madakäre ti kise nikraninkä artrosis kisete yebätä kukwe kia kia ñan tä nemen nuäre ti kräke nuainkäre”. Harold, käkwe sribibare Betelte tä niere: “Ti ara ie ja ñan nüketa gare, yebätä ti motota nemen jabätäta. Käre ti niaka kwin aune jadaka béisbol ye nämä tuin kwin tie. Ti nämä ja denkä ye ngwane, nitre jökrä nämä niere ‘¡Bola ye bien Harold ie ñobätä ñan aune niara abokän okwä metre!’. Akwa nengwane ja ñan nüke törö tie bola ye kitakäre”.

6. a) ¿Dre mada raba ja mräkätre umbre ye ngwen di nekä? b) ¿Nitre umbre rabadre jankunu carro ngwen o ñakare ye mikakäre gare jai rabadre dre nuaindre? (Kukwe “¿Tikwe carro ngwandre neen jankunu ye kwin?” tä tärä nebätä ye mikadre ñärärä).

⁶ Ni ñan raba jondron nuaine kaibe au jakrä ye raba ni dikainkä. Nita kite bren yebätä ni iti käkwe ni ngibiadre o ni rabadre niken nüne monso iti nikwe ben ye ribeta jai. O ni bren aune kä ñan niena tuin nie yebätä ni ñan raba carro ngwen kä mada känti kaibe. ¡Ye raba ni mike ulire krubäte! Kukwe ne erere nemen bare nibätä, akwa ni täbe ütiäte krubäte Jehová aune ja mräkätre kräke ye ngwandre törö jai. Arato, ja ruin ño nie ye nüke gare kwin Jehovai ye ngwandre törö jai. Jehová tare nikwe ja mräkätre tare nikwe aune tita ja di ngwen kukwe kwin nuaine ye ai mikata ñärärä Jehovakwe ye bäri ütiäte (1 Sam. 16:7).

7. ¿Kä käme ne ngwain krüte ye ngwane mä ñan täira nire jabätä ruin mäi ye tä mä mike ulire ye ngwane dre raba mä dimike?

⁷ Kä käme Satanakwe ne gaite ye ngwane, mä ñan täi nire tuakäre ruin mäi yebätä ja raba nemen ruin ulire mäi. Ja ruin kore mäi ngwane, Jehová tä kä ngwen nüke jai kä käme Satanakwe ne gatekäre ye mä ngwandre törö jai ye raba mä dimike (Is. 30:18). Jehová tä kä ngwen nüke jai ye köböire nitre kwati raba niara mike gare jai aune mike täte (2 Ped. 3:9). Aisete nitre kwati ye ngätätite mä mräkätre tä arato abokän raba Jehová mike gare jai kä jämi krüte ye känenkri ye mä ngwandre törö jai ja raba nemen ulire mäi ye ngwane.

8. ¿Nitre tä umbre o tä bren ye ngwane raba kite ja ngwen ño?

⁸ Ni bati o ni niena umbre, akwa ja ñan ruin kwin nie ye ngwane, ni raba kukwe tare niere o nuainne, akwa bitikäre ñobätä nikwe ja ngwabare kore ye ni raba ngwentari jai (Ecl. 7:7; Sant. 3:2). Ye erere namani bare ni ja ngwanka metre Jobbätä. Job nämä ja tare nike krubäte yebätä kukwe tare niebare kwe (Job 6:​1-3, nota). Ne madakäre, ni ta bren yebätä ni raba kukwe ruäre niere o nuainne ni ñan nuainbare o niebare jire ye erere. Metrere, ni ñan tä kwin o ni niena umbre yebätä nikwe kukwe tare niedre o nitre mada mikadre jadibiti kukwe ruäre nuainne o ngradrete biti ye ñan kwin. Aisete, nikwe ja ngwandre blo ni iti ben rükadre gare jabätä nie ye ngwane, bengwairebe töi jäme biti nikwe ja töi mikadre ngite kitamana ta jabiti ietre (Mat. 5:​23, 24).

KÄ TÄDRE JUTO ÑO KÄRE NIBÄTÄ

9. ¿Nitre mada tuadremetre ja dimike ye ñobätä kwin? (Üai mikadre ñärärä).

⁹ Nitre mada tö ni dimikai ye kadre ngäbiti (Gál. 6:2). Kenanbe, ñan raba nemen nuäre ni kräke ka ngäbitikäre. Ñodre meri testiko kädekata Gretl tä niere: “Ti dimikadre ye ñan nemen nuäre ti kräke ñobätä ñan aune yebiti tita sribi mada mike nitre kisete tä nemen ruin tie yebätä. Nikwe ja töi mikadre bobre aune ti dimikadre tita ribere jai ye ka ngäbitikäre kä nikanina kwati ta”. Akwa metrere, nitre mada tuadremetre ja dimike ye ngwane niaratre bätä käta nemen juto ni dimikabätä (Hech. 20:35). Aune nitre mada tä ni tarere bätä tä ni töibikaire krubäte tä nemen tuin nie ye tä kä mike juto krubäte nibätä.

10. ¿Nikwe debe biandre ye ñobätä ñaka käi kwitadrekä jabiti? (Üai mikadre ñärärä).

¹⁰ Nita debe bien ye nikwe bämikadre (Col. 3:15; 1 Tes. 5:18). Nitre mada tä jondron nuainne o kukwe nuainne ni kräke ye ngwane, kätä nemen juto nibätä aune ni töta debe bianbätä, akwa käi ta nikwitekä nibiti. Kä mikadre kätäre ja ngwärebätä aune “debe biandre” yebiti ni raba nitre mada ye dimike aune mike gare ietre niaratre ye ütiäte aune tare nikwe kukwe nuainta kwe nikrä yebätä. Meritre umbre tä Betelte ye Leah tä ngübare aune tä niere: “Meri testiko umbre tä tärä tike chi tie debe biankäre tie aune tä mikete ti kräke. Ñan kukwe tike krubäte, akwa yebiti tita dimike tä mike tuin ütiäte krubäte jai tä nemen gare tie. Ye tä kä mike juto tibätä arato”.

11. ¿Dre dre nuain raba nitre umbrekwe ja mräkätre mada dimikakäre? (Üai mikadre ñärärä).

¹¹ Ja töi mike nitre mada dimike. Nita ja töi mike kä nikwe aune ni die yebiti nitre mada dimike ye köböire kukwe ben nita ja tuin yebätä nikwe ñaka ja töi mikai krubäte. Kä Africa ye känti nitre umbre ye ketata tärä bätä kukwe töbätä raba nemen gare nie yebätä. Akwa, tärä ye tädre ükani ngwane, kukwe ütiäte aune töbätä ñan raba nemen gare nie. Ye erere arato, ñan blitadre aune kukwe niedre monsotre bati jie ngwane kukwe töbätä ye ñaka raba nemen gare ietre. Ye medenbätä, ja töi mikadre kukwe ngwentari ie aune kukwe nuin. Ye bitikäre, Jehová mikadre täte ye ñobätä kwin krubäte aune tä kä mike juto nibätä ye mikadre gare ietre. Monsotre dimikadre aune töi mikadre jäme yekwe kä mikai juto krubäte nitre umbrebätä (Sal. 71:18).

12. ¿Ja mräkätre umbre tä Jehová mike täte ye ie dre käbämikata Jehovakwe Isaías 46:4 yete? (Üai mikadre ñärärä).

¹² Ja di kärädre Jehovai. Ruäre ngwane ni die ñan tärä nemen aune ni töita nemen nainte krubäte, akwa Jehová “abokän ñaka nemen nainte aune ñaka di nekä jire” (Is. 40:28). Niara dite krubäte yebiti tä kukwe keta kabre nuainne aune ye ngätäite tä ni niara mikaka täte niena umbre ye tä mike dite di kwe yebiti (Is. 40:​29-31). Jehová tä käbämike nitre umbre ye ketaibätä krö kwe (ñäkädre Isaías 46:4 yebätä).e Jehová tä kukwe käbämike ye jökrä tä mike nemen bare (Jos. 23:14; Is. 55:​10, 11). Jehovata ja die kri ye mike tuare nie, ni tare kwe aune kukwe ruäre tä nemen bare tä tuin nie ye käkwe kä ngwen juto krubäte nibätä.

13. ¿Nikwe dre ngwandre törö jai nieta 2 Corintios 4:​16-18 yete? (Üai mikadre ñärärä).

¹³ Nita umbre aune bren ye ñaka nuadi raire ngwandre törö jai. Kukwe tare ben nita ja tuin ye riaikä yebätä töbikata angwane, tä ni dimike kä ngwen nüke jai. Ni ñan rabaira bren aune umbre käbämikata Bibliakwe nie (Job 33:25; Is. 33:24). ¡Kukwe tare ben nita ja tuin ngwäune ye jämi niken ta, akwa ja känenkäre kukwe kwin rabai bare ni kräke gare nie ye tä kä mike juto krubäte nibätä! (Ñäkädre 2 Corintios 4:​16-18 yebätä). Akwa, ¿nitre mada konkrekasionte ye raba ja mräkätre umbre ye dimike ño? Ani mike gare jai.

¿JA MRÄKÄTRE UMBRE YE DIMIKE RABA ÑO?

14. ¿Ja mräkätre niena umbre tä konkrekasionte ye kärädre aune tuadrebiti ye ñobätä ütiäte krubäte?

¹⁴ Ja mräkätre umbre ie basadre o kärädre telefonobiti batire batire (Heb. 13:16). Ja tärä nemen ruin kaibe nitre tä kite umbre ye ie. Ja mräkä iti kä Pierre f tä niere: “Ti ñan raba dikekä kwäräkwärä ye köböire tita nemen nainte krubäte gwi. Ruäre ngwane, ja tärä nemen ruin kwra león nibira unsuline aune tä kitani kä teri kwrere aune bätä kä jurä tä bätä nainte krubäte”. Nita niken basare ja mräkätre umbre tä konkrekasion nikwe te ie ngwane, niaratre ütiäte ni kräke aune tare nikwe nita bämike ietre. Konkrekasion nikwe te ja mräkä umbre tärä aune nikwe kä diankä jai basakäre ietre o niaratre käräkäre nikwe nieba jai, biti nikwe ñan nuainbare ye tärä nüke törö nie. Kukwe keta kabre tä nuaindre nie, ye medenbätä, ¿dre käkwe ni dimikai kä denkä jai “kukwe […] bäri ütiäte” kräke ñodre, niken basare ja mräkätre niena umbre ye känti? (Filip. 1:10). Ja mräkätre umbre ye ie mensaje juandre, llamadre o kä ükadrete jai tuabitikäre ye ñaka niedre jerekäbe ja töite ñakare aune mikadre nemen bare akwa kukwe keteiti raba ni dimike ye abokän kä ükadrete jai aune tikadre calendariobätä ne kwe ñaka käi kwitadrekä jabiti.

15. ¿Nitre bati aune nitre umbre raba dre nuainne gwairebe jabe?

¹⁵ ¿Mä bati ngwane? Mä raba drebätä blite ni umbre yebe aune mä raba dre nuaindre ye mä raba ngwentari jai. Ñan töbika krubäte kukwe yebätä. Mä raba nemen ja ketamuko kwin kwe aibe (Prov. 17:17). Ni raba blite ben gätä känenkri aune gätä bitikäre. Mä raba ribere ie texto meden tuin kwin ie aune arato nämäne chi ngwane, kukwe meden nuäre namani bare bätä ye mikadre gare kwe mäi. Mada abokän mä raba nübaire programa JW Broadcasting^® ye tuin jabe. Arato mä raba dimike kukwe ruärebätä ñodre teléfono actualizare kräke, täräkwata mrä mrä tä ja tötikara tä yete ye descargare kräke arato. Carol niena bichore, akwa tö täbe jondron ruäre nuainkäre kä jutobiti ñodre tä niken jondron kökö, mröre ju bäre, aune niken kä bänuäre ye mrüsaire yebätä tä niere: ni bati töita dre nuainbätä ye rabare nitre umbre nübaire jabe nuainne arato. Maira tä mike gare: “Ja ketamuko iti kwe biti kä niena 90, niarabiti kä 33. Akwa ñan töbiketre kukwe yebätä ñakare aune tätre keteitibe kä jutobiti kötödre, video tuendre gwaire jabe. Aune kukwe ruärebätä tätre ja di ribere ngwane tädre biarbe ja dimike kwärikwäri”.

16. ¿Ni rikadre nitre umbre ben doctor känti ye ñobätä kwin?

¹⁶ Nitre umbre ye jänrikadre doctore känti. Akwa ye ñan ngöräbe ñan mikadrete kaibe yete ñakare aune ni rabadre ben, doctore tä ja ngwen kwin ben kräkä ño bien ie ye mikakäre gare jai (Is. 1:17). Mä raba dimike doctor tä dre niere ye tikadre täräbätä jai ni umbre ye kräke. Meri testiko kädekata Ruth tä niere: “Ti tä niken kaibe doctor känti ngwane tita ja drie doctor ye ngwane ñan tä mike era jai. Tita töbike kukwe ngwarbe bätä nieta kwe. Akwa, ja mräkätre tä niken tibe ngwane tä ja ngwen jene tibe. Yebätä ja ngwaintre aune ja etebatre tä niken tibe yebätä tita debe bien krubäte ietre”.

17. ¿Dre dre nuain raba kukwe driekäre nitre umbre ben?

¹⁷ Mäkwe kukwe driedre niaratre ben. Ruäre ngwane ñan tä nemen nuäre ja mräkätre umbre kräke kukwe driekäre ju ju te. Yebätä mäkwe ja töi mika nitre umbre nübaire kukwe driere jabe carrito yebiti. Aune mä rika täkrä ngwena kräke. Arato mä raba nitre ye nübaire nitre tötike jabe o ja tötikaka mäkwe ye ngwena nitre umbre ye känti ja tötikakäre ben. Nitre umbre ji ngwanka konkrekasionte raba gätä kukwe driekäre ye mike nuaindre nitre umbre ye gwirete ye köböire rabai bäri nuäre kräketre kukwe driekäre. Kukwe keta kabre nuaindre nitre umbre mikakäre tuin ütiäte jai ye rabai ütiäte krubäte kräketre (Prov. 3:27; Rom. 12:10).

18. ¿Kukwe ja tötikara ja känenkäre yebätä dre rabai gare nie?

¹⁸ Jehová aune ja mräkätre konkrekasionte ye kräke nitre umbre ye ütiäte ngwini törö kukwe ja tötikara nebätä. Metrere nita kite umbre ye ñaka nuäre akwa Jehová diebiti kä juto ye tadi nitre umbre yekwe (Sal. 37:25). ¡Nita bati ngwane nita kukwe kwin nuainne, akwa ye ñan ngäräbe kä ja känenkäre yete bäri nikwe kukwe kwin ye nuaindi nemen gare nie ye tä kä mike juto nibätä! Ne madakäre, ni ara kisete ni mräkätre umbre tä ngübare nie monso nikwe o ja ketamuko nikwe tä bren tä ngübadre nie ngwane. ¿Dre raba ni dimike ne kwe kä juto ye ñan riadrete nikän? Kukwe ne rabai gare nie kukwe ja tötikara ja känenkare yebätä.