¿Tita kukwe ribere Jehovai ye tä mike nemen bare ti kräke?

1, 2. ¿Ñobätä nita kukwe ribere Jehovai ye ñaka mike nemen bare ni raba kite nütüre?

“MÄKWE Jehová käi ngwan juto krubäte jabätä aune mä brukwä tö dre dre ie ye biain kwe mäi” (Sal. 37:4). Kukwe kwin käbämikata, ¿ñan ererea? Akwa, ¿nita dre ribere Jehovai ye jökrä mikadi nemen bare kwe ni kräke ye ai gärätä? Nikwe kukwe ne ngwandretari jai ye kwin krubäte. ¿Ñobätä? Töbike kukwe nebätä: Meri testiko kaibe tö rikai Kwela Nitre Gobran Ngöbökwe Kukwei Driekä kräke yebätä tä niere Jehovai, akwa käta niken ta niara nübai ñaka jire. Ja mräkä bati iti tä bren krubäte ye tä ribere Jehovai niara rabadreta kwinta ne kwe sribidre bäri kwe konkrekasionte, akwa niara täbe bren jankunu. Nitre rüne iti tä orare ne kwe monso kwe ñaka kukwe metre tuadremetre, ye erere ñan tä nemen bare.

² Mäkwe kukwe ribebare Jehovai akwa niara ñaka mike nemen bare mä kräke. Yebätä niara tä orasion nitre madakwe kukwe nuin aune ñan orasion mäkwe kukwe nuin o mäkwe kukwe blo nuainbare yebätä ñan mä kukwe nuin mä raba kite nütüre. Meri testiko kädekata Janice ie ja namani ruin kore.b Niara aune muko kwe tö namanintre niken Betel niebare kwe Jehovai. Janice tä niere: “Nun nübai bengwairebe Betelte yei ti nämä tö ngwen kwatibe”. Sö nikani ta, kä nikani ta, ñaka niaratre nübaibare. Niara tä niere: “Ti rababa ulire aune tikwe dre nuaindre ñan rababa nüke gare tie. Tikwe dre nuainbare blo ye ti rababa ngwentari jai, ñobätä ñan aune tikwe kukwe ribeba metre ta Jehovai aune se ñobätä ñan namani mike nemen bare ti kräke ye ti rababa ngwentari jai”.

3. ¿Dre rabai gare nie kukwe ja tötikara nekänti?

³ Jehová tä orasion nikwe kukwe nuin ya, ye ni raba kite ngwentari jai. Nitre Ngöbö mikaka täte kirabe käkwe kukwe ne erere ngwanintari jai arato (Job 30:20; Sal. 22:2; Hab. 1:2). ¿Mätä dre ribere orasionte Jehovai ye niara tä mike nemen bare mä kräke ye ñokänti raba nemen gare mäi? (Sal. 65:2). Kukwe ne mikakäre gare jai käne ani blite kukwe nebätä: 1) nikwe dre ngübadre Jehovabätä, 2) Jehová tä dre ngübare nibätä, 3) kukwe ribeta Jehovai ye ruäre ngwane ni rabadre kwite ye ñobätä ütiäte krubäte.

¿DRE NGÜBA RABA JEHOVABÄTÄ?

4. ¿Jehová tä dre käbämike nie Jeremías 29:12 yete?

⁴ Jehová orasion nikwe kukwe nuadi ye käbämikata kwe (ñäkädre Jeremías 29:12 yebätä).c Ngöbö tä orasion ni niara mikaka tätekwe ye kukwe nuin aune ñaka käi kwitekä jire jabiti (Sal. 10:17; 37:28). Akwa, nita kukwe kärere Jehovai ye jökrä ñan mikai nemen bare kwe ni kräke gwäune. Ñakare aune nikwe kä mrä bä nuäre ye ngübadre ne kwe kukwe ruäre nita ribere ie ye mikai nemen bare kwe ni kräke.

5. ¿Dre ngwanta törö jai Jehovakwe tä orasion nikwe kukwe nuin ye ngwane?

⁵ Nita dre ribere orasionte Jehovai ye mikakäre nemen bare niara töita ño ye tä ngwen törö jai (Is. 55:​8, 9). Kukwe keteiti niara tö nuain ye abokän nitre brare aune merire tädre nüne kä jökräbiti tibien aune gobran kwe ye kadre ngäbiti kwe aune mikadre täte kwe. Arato, tädre nüne keteitibe aune kä jutobiti ye ie niara tö. Ni kä tibienbätä ja gobraindre ngwane, rabadre nüne bäri kwin Satanakwe niebare (Gén. 3:​1-5). Satanakwe kukwe niebare ye ngwarbe mikakäre gare metre, Jehovakwe nitre kä tibienbätä tuanimetre ja gobraine yebätä kukwe tare keta kabre ben nita ja tuin kä nengwane (Ecl. 8:9). Kukwe tare tä nemen bare ye Jehová ñaka ükaite gwäune gare nie. Ñobätä ñan aune nuaindre kwe ngwane, nitre kä tibienbätä raba gobrane kwin krubäte aune kukwe tare ye ükete ye nitre ruäre raba nütüre.

6. ¿Jehovakwe ni tare aune niara käre kukwe nuainne metre ta ye ñobätä tädre gare metre nie?

⁶ Ni itire itire raba kukwe ja erebe ribere Jehovai, akwa Jehová ñan tä mike nemen bare ja erebe ni itire itire kräke. Ñodre, rei Ezequías namani bren tare krubäte ye ngwane, Jehovakwe mikadreta räre ye ribebare kwe ie aune ye erere Jehovakwe nuainbare (2 Rey. 20:​1-6). “Kri tukwä”aune bren nämäne Pablobätä ye diandrekä Jehovakwebätä ribebare kwe, ye erere Jehová ñan nuainbare (2 Cor. 12:​7-9). Apóstol Pedro aune Santiago bätä kukwe namani bare ye ani ngwenta törö jai. Rei Herodes tö namani niaratre murie ketai. Ye ngwane, ja mräkätre orabare kräketre, akwa Santiago murie ketani. Aune Pedro kräke Jehová kukwe ñan tuabare nuainbare rabadrete kwärekäre (Hech. 12:​1-11). Ñobätä Jehová iti mikaninte kwäre aune iti ñaka kriemikani kwe ni raba ngwentari jai. Mika ñaka gare Bibliakwe dre namani bare o ñobätä nuainbare kwe, akwa gare nie Jehová “ñaka kukwe nuainne nierare”. Ñobätä ñan aune Santiago aune Pedro nämäne tare krubäte Jehovakwe (Deut. 32:4; Apoc. 21:14).d Kukwe ribeta Jehovai ye ñan mike nemen bare ruäre ngwane. Akwa, ni ñaka tä nemen romon kukwe nuainta kwe ni kräke. Jehovakwe ni tare aune tä kukwe nuainne metre gare nie yebätä (Job 33:13).

7. ¿Dre ñaka nuainta nikwe aune ñobätä?

⁷ Kukwe ben nita ja tuin ye ni ñaka ketadre kukwe ni madakwe yebätä. Ñodre, nita kukwe niere metre ta Jehovai, akwa niara ñaka mike nemen bare. Ja känenkäre mada, ni iti käkwe kukwe ara ribebare Jehovai aune Jehová mikani nemen bare kräke rabadre gare nie. Ye erere namani bare meri testiko kädekata Anabätä. Niara muko Matthew yebätä cáncer nämäne. Niarakwe orabare Matthew rabadreta räre yekäre. Ye ngwane, meri testiko nibu umbre madabätä cáncer nämä, Ana nämäne orasion nuainne nimä ye kräke. Ja käne mada meritre testiko umbre nibu ye namaninta räre, akwa Matthew krütani. Meritre umbre nibu ye Jehovakwe mikaninta räre ne ngwane, ñobätä Ana muko ñan mikaninta räre kwe ye niara namani ngwentari jai. Metrere, meritre umbre nibu ye ñobätä namaninta räre ñan gare metre nie, akwa kukwe keteiti gare metre nie: köbö rükai ngwane, Jehovakwe kukwe tare ye diainkä kärekäre aune nitre niara mikaka täte tare kwe ye niara tö gaikröbätä kisere (Job 14:15).

8. a) ¿Jehová tä ni dimike ño mikata gare Isaías 43:2 yebätä? b) ¿Nita ja tuin kukwe tare ben ngwane orasion tä ni dimike ño? (Video Orasion tä ni dimike ja tuin kukwe tare ben ye mikadre ñärärä).

⁸ Käre Jehovakwe ni dimikadi. Ni Rün Jehová yekwe ni tare aune ñaka töta nemen ni tuai ja tare nike (Is. 63:9). Jehová ñan tä ni mike kwäre kukwe tare bätä, ye Biblia tä kädeke “ñö kri” tä nen o “ñukwä jutra” ye kwrere (ñäkädre Isaías 43:2 yebätä).e Jehovakwe ni dimikai ja tuin kukwe tare ben tä käbämike. Aune ñaka ni tuainmetre ja tare nike käre kwe. Arato, niara üai deme dite krubäte yebiti tä ni dimike ja tuin kukwe tare yebe (Luc. 11:13; Filip. 4:13). Yebätä nita dre ribere jai kä ngwankäre nüke jai aune ja ngwankäre metre ye tädi käre nibe ye gare nie.f

¿JEHOVÁ TÄ DRE NGÜBARE NIBÄTÄ?

9. ¿Jehovakwe ni dimikai ye ie tö ngwandre kwatibe ye ñobätä ütiäte krubäte mikata gare Santiago 1:​6, 7 yebätä?

⁹ Nikwe tö ngwandre Jehovabiti ye ngübata kwe nibätä (Heb. 11:6). Kukwe tare ben nita ja tuin ye ngwane raba tuin tare krubäte nie aune Jehová ñaka raba ni dimike ye kwrere ni raba kite nütüre. Akwa Biblia tä mike gare Ngöbö diebiti ni raba “niken kibätä kunkwane” kukwe tare yebätä ye kwrere (Sal. 18:29). Aisete, kukwe ñan tä nemen tuin era nie yei ñaka ja tuanemetre ganaindre. Ñakare aune nikwe oradre töi kwatibebiti aune Jehovakwe orasion ye kukwe nuai ie tö ngwandre (ñäkädre Santiago 1:​6, 7 yebätä).

10. Nita orare ye bitikäre nikwe kukwe ruäre meden nuaindre ye mä raba mike gare.

¹⁰ Nita orare Jehovai ye bitikäre ni ñan rabadre kwekebe ye ngübata Jehovakwe. Ñodre, ja mräkä iti tä orare Jehovai ne kwe niara rabadre permiso kärere jefe kwe ie nänkrä gätä kribätä yebätä töbike. ¿Kukwe ribeta kwe ye mikakäre nemen bare Jehová rabadre dre nuainne? Jehová ni dimikai ñan kä jürä ngwen jabätä. Ja mräkä ye rabadre blite jefe kwe yebe, bä kabre yebiti ta. O raba blite nitre mada tä sribire ben ne kwe rabadre sribire niara täte. Arato raba niere jefe kwe ie köbö diandi ngwarbe kwe jai ye ñan ütiä biandre ie.

11. ¿Ñobätä nikwe oradre kisere Jehovai?

¹¹ Dre tä ni mike töbike krubäte yebätä nikwe oradre bä kabre Jehovai ngübata kwe (1 Tes. 5:17). Nita orare Jehovai ye ruäre ñaka bengwairebe mikadi nemen bare kwe ni kräke niebare Jesukwe (Luc. 11:9). Aisete, nikwe oradre töi kwatibebiti aune jankunu (Luc. 18:​1-7). Nita orare bä kabre kukwe keteitibätä Jehovai ye ngwane, nita bämike erametre nita kukwe ye ribere jai aune niara raba kukwe ye mike nemen bare yei nita tö ngwen.

¿NITA KUKWE RIBERE JEHOVAI YE RUÄRE NIKWE KWITADRE YE ÑOBÄTÄ KWIN?

12. a) ¿Kukwe meden ngwandretari jai aune ñobätä? b) ¿Dre ngwandre törö jai ne kwe oradre Jehovai niara töita ño ye ererebätä? (Recuadro “¿Tita kukwe ribere Jehovai yebiti tita bämike ie niara ütiäte ti kräke?”).

¹² Nita orare ye bitikäre Jehová ñaka kukwe mike nemen bare ni kräke rabadre tuin nie ngwane, nikwe kukwe ketamä ne ngwandretari jai. Kena, “¿Kukwe ne abokän bäri kwin?”. Metrere, nita kukwe ribere ño ye abokän bäri kwin ni raba nütüre, akwa ñaka nuai raire. Kukwe ükadrete ño ye nita ribere Jehovai, akwa ye ükate raba bäri kwin ñan gare nie. O nita kukwe ribere Jehovai ye abokän ñaka niara töita ño ye ererebätä (1 Juan 5:14). Ani töbike ja mräkätre bätä blitani párrafo 1 yebätä. Niaratre käkwe orabare ne kwe monso kwe ñaka kukwe metre ye tuadremetre. Kenanbe kukwe ribebare ye kwin krubäte raba nemen tuin. Akwa, Jehová ñaka ni mike ja dibiti niara mike täte. Jehová tö ni jökrä aune monsotre tuai ja töi jeñebiti mike täte (Deut. 10:​12, 13; 30:​19, 20). Aisete, ¿nitre rüne ye raba dre ribere Jehovai? Rabadre monsotre kwe tötike aune kukwe metre ye rabadre neketete töite aune brukwäte ye köböire rabadre ja kete Jehovabe aune tarere jankunu (Prov. 22:6; Efes. 6:4).

13. Hebreos 4:16 tä mike gare erere, ¿ñongwane Jehovata ni dimike?

¹³ Kukwe ngwantarita ketebu “¿Nita kukwe ribere Jehovai ye mikadre nemen bare bengwairebe kwe ie ni tö ye erere tuin Jehovai?”. Ruäre ngwane nita orare ye ngwane, mikadre nemen bare bengwairebe kwe ie ni tö. Akwa, ñongwane mikadre nemen bare kwe bäri kwin ye gare ie (ñäkädre Hebreos 4:16 yebätä). Nita kukwe ribere orasionte ye Jehová ñan mike nemen bare bengwairebe ni kräke ngwane, niara tä “ñakare” niere ni raba kite nütüre. Metrere “ngübare ken” ye kwrere tä niere nie. Monso bati nämäne bren mikadreta räre ribebare kwe Jehovai yebätä Ani töbike. Jehovakwe niara mikadreta räre bengwairebe ye ngwane, mike täte jankunu ñobätä ñan aune mikaninta räre kwe, Satanakwe niedre Jehovai (Job 1:​9-11; 2:4). Ne madakäre, Jehovakwe köbö dianinkä, bren aune kukwe tare jökrä ye diankakäre (Is. 33:24; Apoc. 21:​3, 4). Aisete, nengwane ni ñaka ribere Jehovai rabadre ni miketa räre o kukwe ñan tuabare ye nuaindre kwe ni kräke. Yebätä, ¿monso bati ye raba dre ribere Jehovai? Jehovakwe ja di biandre ie aune töi mikadre jäme ne kwe sribidre kwe jankunu Jehová kräke töi kwatibebiti bren yebiti ta ye gärädre kwe (Sal. 29:11).

14. ¿Kukwe namani bare Janicebätä ye tä dre driere mäi?

¹⁴ ¿Janice orabare ne kwe kärädre betelte ye törö mäi? Kä nikani krärike ta ye ngwane, dre ribebare kwe orasionte Jehovai ye mikani nemen bare kräke ye nükani gare ie. Niara tä niere: “Kä ye ngwane, Jehovakwe ti tötikaba aune ti dimikaba töi kwin keta kabre ye ererebätä ja ngwen. Ñodre, tikwe tö ngwandre kwatibe Jehovabiti aune ja tötike kaibe ye ti raba nuainne ño bäri kwin. Arato, kukwe keta kabre tä nemen bare ye ñan ai köböire kätä nemen juto nibätä rababa gare tie”. Ja käne mada, Janice aune muko kwe nübaibare ni circuito tuabitikä. Niara tä niereta: “Metrere, tikwe dre ribeba Jehovai ye erere mikani nemen bare kwe ti kräke. Akwa, ti töi nämä ño ye ñan erere nuainbare kwe. Kä rikaba kwati ta ne kwe Jehovakwe sribi biani tie ye kwin krubäte rükaba gare tie. Yebätä tita debe bien krubäte ti tare Jehovakwe aune tä kukwe kwin mike nemen bare ti kräke yebätä”.

15. ¿Ñobätä nikwe ñaka kukwe kärädre metre ta orasionte ruäre ngwane ye bäri kwin? (Üai mikadre ñärärä).

¹⁵ Kukwe ngwantarita ketamä ye abokän “¿Nita käre kukwe ribere metre ta orasionte?”. Kukwe niedre metre ta ye kwin, akwa ruäre ngwane ñaka nuaindre ñobätä ñan aune Jehová töita ño ni kräke ye nikwe mikadre nüke gare jai. Ani töbike meri bati nübaidre Kwela Nitre Gobran Ngöbökwe Kukwe Driekä kräke tä orare krubäte yebätä. Niara tö rikai kwela yebätä ne kwe medente nitre ribeta yekänti rikadre kukwe driere. Akwa, niara tä orare kukwe yebätä ngwane, ¿dre mada ribedre kwe Jehovai? Rabadre dre nuainne sribidre bäri kwe Jehová kräke ye ribedre kwe (Hech. 16:​9, 10). Oradre kwe ye bitikäre, raba blite ni circuito tuabitikä yebe ne kwe medente prekursor ribeta konkrekasion nemenkä no yekänti juandre yekäre. Arato raba kukwe tike sukursal ie ne kwe medente nitre ribeta kukwe driekäre bäri ye mikakäre gare jai.g

16. ¿Dre tädre gare metre nie?

¹⁶ Nibira gare nie erere, Jehovakwe orasion nikwe ye mikadi nemen bare ni kräke ni tare kwe aune kukwe metre yebiti ye tädre gare metre nie (Sal. 4:3; Is. 30:18). Ruäre ngwane, nita kukwe ribere ño ye erere ñaka tä nuainne, akwa niara ñaka orasion nikwe ye käi kwitekä jabiti. Ni tare Jehovakwe aune ñaka ni mikaite kaibe kwe (Sal. 9:10). Aisete, nikwe tö ngwandre jankunu kä jökrä ngwane Jehovabiti aune ja brukwä tökadrete Jehová ngwärekri orasion yebiti (Sal. 62:8).