Käre kukwe driedrebiti

1. ¿Täräkwata Kukwe metre raba ni dimike ño?

¹ Täräkwata ¿Mä törba kukwe metre ye mikai gare jai? ye raba ni dimike ja tötika Bibliabätä kömike, akwa yebiti ni raba kukwe metre ye mike gare käbiti tibien arato (Ecl. 11:6). Täräkwata ütiäte yebiti ni raba sribire ño ye mikata gare nete.

2. ¿Täräkwata Kukwe metre yebiti blita kömika raba ño?

² Blita kömikakäre. Mä raba täräkwata ye bien ni madai, kukwe keta ti ngwantarita página kena yebätä ye mäkwe mika tuare ie biti mäkwe nie: “¿Meden abokän mä tärä ngwentari jai?”. Dre niedre kwe ye kukwe nuadre, biti täräkwata yebiti kukwe ye mikadre gare ie aune ñäkädre texto keteitibätä. Ye bitikäre mäkwe ñäkä página mrä yebätä aune täräkwata Ngöbö tö ye driedre. Täräkwata ye ñaka kadre ngäbiti kwe, akwa täräkwata Kukwe metre ye rabaira kisete, aune kukwe metre nieta yete ye raba mate brukwäte (Mat. 13:23).

3. ¿Nitre tädre jondron nuainne ye ngwane nikwe dre nuaindre?

³ Tädre jondron nuainne. Mä raba niere krörö: “Mä ñaka tä ngwarbe nibi tuin tie, akwa ti tönibi täräkwata ne mikaite mäi. Kukwe keta ti ngwantaritabätä; ruäre ngwane ni tärä kukwe ye ngwentari jai aune Biblia tä kukwe ye mike gare. Köbö mada ngwane ti jataita mäkänti aune kukwe ye tuin ño mäi ye mä raba niere tie”.

4. ¿Nikwe dre niedre täräkwata driekäre ji ngrabare?

⁴ Kukwe driekäre ji ngrabare. Kukwe ne nie raba: “Ñantörö. ¿Mä tärä kukwe ne erere ngwentari jai? [Mäkwe tuanmetre blite.] Biblia tä dre niere kukwe yebätä ye mikata gare kwin aune merebe täräkwata nebätä”. Nitre ñaka näin jura raba tuin mäi, angwane mä raba kukwe ngwantarita täräkwata yebätä ye mike gare ietre aune tärä Enseña driere arato.

5. ¿Nitre ñaka tä kwen gwi ye ngwane täräkwata yebiti ni raba dre nuainne?

⁵ Ñaka tädre gwi. Nitre ñaka tä kwen gwi ye ngwane ja mräkätre ruäre tätre täräkwata mikete jukwebätä, akwa nitre mada ie ñaka rabadre tuin yekänti tätre mikete. Ye erere konkrekasion mäkwe tä nuainne angwane, ruäre ngwane mä raba täräkwata Kukwe metre ye mikete arato. Mä rikata känti angwane, mä raba niere ie: “Mä ñaka kwanba gwi nunye, akwa nunkwe täräkwata ne mikateba jukwebätä mäi. ¿Kukwe keta ti ngwantarita yete ye mä törba mikai gare jai?”.

6. ¿Ñobätä ni raba niere täräkwata Kukwe metre ye ütiäte krubäte?

⁶ Täräkwata Kukwe metre ye tä kukwe Bibliabätä ye mike gare nuäre aune merebe. Nitre töita jene jene aune nitre tä iglesia madabätä yei täräkwata ye raba nemen tuin kwin krubäte. Täräkwata ye nuäre driekäre, monsotre bätä nitre kukwe driekä mrä raba nuainne arato. ¿Mätä käre kukwe driere täräkwata yebiti?