Ngöbö kä Jehová, ¿ye ütiäte mä kräke?

1, 2. ¿Jesús kräke Jehová kä ye nämäne ütiäte ye ñokänti gare nie?

JESÚS kräke Rün kwe kä ye ütiäte krubäte. Yebätä niara tä ja mike käne blitakäre dokwäre. Nikwe ja kitaba kukwe ja tötikara ne känenkribätä erere, Jesukwe ja nire biani ne kwe blitadre kwin Jehová kä yebätä (Mar. 14:36; Heb. 10: 7-9). Gobrandi Kwe Kä Mil te ye bitikäre gobran ye biandita kwe Rün ie ja jiebiti. Ye ngwane Jehová kä ye täi mikani deme (1 Cor. 15: 26-28). Erametre Jesukwe dre nuainbarera aune dre nuaindi ja käne yebiti tä bämike Jehová ye tare kri kwe.

² Jesús nükani kä tibienbätä Jehová kä ye driekäre aune töi ño ye mike gare nitre kwatí ie (Juan 5:43; 12:13). Jesukwe Rün kä ye mikani gare kwe nitre ja tötikaka kwe ie (Juan 17:​6, 26). Jondron ñan tuabare nuainbare kwe aune diribare kwe Jehová kä yebiti (Juan 10:25). Bati Jesukwe orabare nitre ja tötikaka kwe ye kräke Rün ie aune niebare kwe: “Mä kä ütiäte kri yebätä mäkwe niaratre ngibia kwin” (Juan 17:11). Jesús kräke Jehová kä ye nämäne ütiäte yebätä käre nämäne ngwen kadate. Nitre kwatí ja bianka kristiano amarebiti Jehová kä ye ñan gare ie aune ñan kädekete.

3. ¿Dre rabai gare nie kukwe ja tötikara nebätä?

³ Jesús kräke Jehová kä ye nämäne tuin ütiäte nämäne tarere aune ye erere ni kristiano erametre rabadre mike tuin jai (1 Ped. 2:21). Ni bike blite kukwe ja tötikara nete kukwe nebätä nire nire kätä blite kukwe kwin Gobran Ngöbökwe yebätä ye tä Jehová kä ye ngwen jabätä matare (Mat. 24:14). Aune Jehová käi ji ngwandre jabätä ye dre gärätä ni itire itire kräke yebätä blitai arato.

NITRE DIANINKÄ KWE MIKAKÄRE JUTA JAKWE KWRERE

4. a) ¿Jesús jababare niken kä kwinbiti ye ngwane dre niebare kwe nitre ja tötikaka kwe ie? b) ¿Kukwe ngwantarita meden mikadi gare jai?

⁴ Jesús jämi niken kä kwinbiti aune niebare kwe nitre ja tötikaka ie: “Ngöbö üai deme rükadi nüne munbtä. Aune mun rabai testiko tikwe kwrere. Kä näin kukwe kwin tibätä ye niere juta Jerusalente, aune kä Judeate aune kä Samariate” (Hech. 1:8). Ñan juta Israelte aibe kukwe kwin ye driedi ñakare aune käbiti tibien ne kwe nitre jökrä rabadre nemen ja tötikaka Jesukwe (Mat. 28:​19, 20). Jesukwe niebare: “Mun rabadi testiko tikwe”. ¿Yebiti niara aibe mikadre gare jai tö namani niere? ¿O Jehová mikadre gare jai arato? Hechos kapitulo 15 käkwe ni dimikai ye mike gare jai.

5. ¿Jehová kä ye mikadre gare jai ye ütiäte krubäte kukwe ye bämikani ño nitre apóstol aune nitre umbre konkrekasion Jerusalente yekwe? (Üai mikadre ñärärä).

⁵ Nitre apóstol aune anciano kä Jerusalén ja tötikani krubäte kukwe keteiti mikadre gare jai kä 49 yete. Nitre tö rabadre ja mike kristiano judío o ñan judío yebätä. Santiago kukwe ne niebare: ‘Simón Pedro käkwe kukwe meden kädekaninte ye ngwani törö kwe. Ngöbö abokän ja okwä mikani käbiti tibien juta keteiti ye diankäre niara kä ye ngwankäre’. Arato Amoskwe kukwe niebare ye kädekaninte kwe: ‘Nire nire tö rabadre Jehová mikai täte ye raba nuainne kä ketare ketare tibien niaratre kädekai Jehová kä ye ngwanka’ (Hech. 15:​14-18). Aisete nire nire tö rabadre näin Jesús jiebiti käkwe Jehová kä ye mikadre gare jai blitadre kwe kä yebätä aune niaratre kädekai Jehová kä yebiti ye rabadre mike gare jai.

6, 7. a) ¿Dre kräke Jesús nükani kä tibienbätä? b) ¿Kukwe meden bäri ütiäte köböire Jesús nükani kä tibienbätä?

⁶ Jesús kä ye abokän “Jehová ni mikaka kwäre” meden gärätä. Ye ngwandre törö jai: Nire nire kätä tö ngwen Jehovai niarata mike kwäre. Yekäre Jesukwe ja nire biani nitre kwatí ye ütiäre (Mat. 20:28). Jesukwe ja nire biani yebiti ni kökanintari ye köböire ngite kita raba ta nibiti aune nüna kärekäre raba nemen nikwe (Juan 3:16).

⁷ Ni mikadre kwäre ye ni nämä ribere jai ñobätä ñan aune jardín Eden yete Adán bätä Eva käkwe ja mikani Jehová rüere köböite ja nire kärekäre ngianinte kän namani gare nie kukwe ja tötikara känebätä nie erere (Gén. 3:​6, 24). Metrere ni mikadrete kwäre ye ñan aibe ribe nämäne. Kukwe bäri ütiäte ye abokän Jehová ye kä mikadre deme ñobätä ñan aune kukwe ngwarbe niebare Satanakwe niara yebätä (Gén. 3:​4, 5). Ye medenbätä Jehová ye ñaka kukwe ngwarbe niekä ye Jesukwe mikani gare kwin krubäte ñobätä ñan aune niara jatani blite Jehová dokwäre aune Jehová tö namani dre ie ye nuainbare jökrä kwe.

8. ¿Nitre tö rabadre näin Jesús jiebiti rabadre dre mike gare jai aune dre kain ngäbiti?

⁸ Nitre jökrä tö rabadre ja mike Jesukri, judío o ñan judío, ye ie rabadre gare Jehová raba ja nire bien ietre Jesús ye köböire (Juan 17:3). Jesús erere, niaratre ye kädekai Jehová käbiti arato. Jehová kä ye mikadre deme ye tädre ütiäte niaratre kräke. Aune ye köböire niaratre mikadi kwäre (Hech. 2:​21, 22). Ye medenbätä nire nire tö namani näin Jesús jiebiti käkwe Jesús aune Jehová ye mikadre gare jai. Orasion nuainbare kwe tä Juan 17 yete ye mikani krüte krörö kwe: “Tikwe ma mikanina gare ietre, akwa tikwe ma mikadi gare janknu ietre ma Üai köböire, ye köböire abko nita ja tarere kwärikwäri, ye kwrere jire niaratre käkwe ja taredre kwärikwäri arato amne, ti ara jire rabadre nüne niaratrebtä” (Juan 17:26).

MUN YE ABOKÄN TESTIKO TIKWE

9. ¿Jehová kä ütiäte ni kräke ye ni raba bämike ño?

⁹ Nükebe nete nikwe turira erere Jehová kä tädre ütiäte aune deme ni kräke (Mat. 6:​9, 10). Jehová kä tädre deme yekäre nikwe mikadre käne jai. Nita ja ngwen ño yebiti ni rabadre bämike. ¿Ni raba dre nuainne Jehová kä mikakäre deme aune mrebe kukwe ngwarbe niebarebätä Satanakwe yebätä?

10. ¿Jehovakwe dre nuaindi mikata gare Isaías 42-44 yebätä? (Isaías 43:9; 44:​7-9; üai mikadre ñärärä).

¹⁰ Isaías 42 nemen 44 yete nikwe dre nuaindre Jehová kä mikakäre deme ye mikata gare yete. Aune ye bämikata kukwe ükateta kridobo ngwärekri kwrere abokän känti nire abokän Ngöbö metre ye mikadre gare, känti nitre ja bianka ngöbö ye Jehovata kärere ja ngwärekri ye kwrere. Aune nire ñaka niara mike täte ye tä kärere ne kwe ngöbö kwe ye metre o ñakare ye rabadre mike gare. Akwa metrere Jehová ye erere ngöbö mada ñaka jire ye rabai gare (ñäkädre Isaías 43:9a; 44:7-9 yebätä).b

11. Isaías 43:​10-12 yete, ¿Jehová tä dre niere ni niara mikaka täte ie?

¹¹ (Ñäkädre Isaías 43:10-12 yebätä).c Nitre Jehová mikaka täte ie niara tä niere: “Mun testiko tikwe nieta Jehovakwe aune ti abokän Ngöbö”. Niara tä kukwe ne kwrere ngwentari nie: “¿Ngöbö mada tärä ti kwrere?” (Is. 44:8). Kukwe ngwantarita kwe ye nikwe mikadre gare ye ütiäte krubäte ni kräke. Kukwe nuainta nikwe aune kukwe nieta nikwe yebiti Jehová, niara aibe Ngöbö metre aune niara kä ye bäri ütiäte ye nita mike gare. Aune nita nüne ño yebiti niara tare nikwe nita bämike. Kukwe ño ño ben nikwe ja tuai akwa yebiti ta nun töi käre Jehová kä ye mike mrebe.

12. ¿Kukwe nieta Isaías 40:​3, 5 ye namani bare ño?

¹² Isaías blitabare ni iti käkwe ji mikanintubu Jehovakwe ye mikai juto yebätä (Is. 40:3; nota). ¿Ye namani bare ño? Juan Bautista jatani Jehová kä yebiti blitabare kwe Jehová kä yebätä arato. Ne mada ji mikaninte kwe juto Jesús käne (Mat. 3:3; Mar. 1:​2-4; Luc. 3:​3-6). Isaiakwe niebare mada: “Kä trä Jehovakwe mikadi gare” (Is. 40:5). Jehová tä ja ngwen ño ye Jesukwe bämikabare kwin krubäte nükani kä tibienbätä ye abokän Jehová nükani kä tibienbätä ye kwrere bämikani yebiti kukwe niebare Isaiakwe namani bare (Juan 12:45).

13. ¿Jesús ye erere ni raba ja ngwen ño?

¹³ Nita blite kwin Jehová kä yebätä ngwane nita ja ngwen Jesús ye erere. Niara ye erere, ni abokän testiko Jehovakwe. Kukwe ñan tuabare nuainbare Jehovakwe yebätä nita blite nitre ben ñobätä ñan aune nita Jehová kä ye ngwen jabätä. Akwa ye nuainkäre bäri kwin ni rabadre blite Jesukwe dre nuainbare aune dre nuaindi ja känenkäre Jehová kä mikakäre bäri deme yebätä nitre ben (Hech. 1:8). Aune Jesús ye blitaka bäri kwin Jehová kä yebiti aune nita näin niara tä ye jiebiti (Apoc. 1:5). Jehová kä ye tädre ütiäte ni itire itire kräke yekäre, ¿dre mada nuaindre?

JEHOVÁ KÄ YE ABOKÄN DRE GÄRÄTÄ NI KRÄKE

14. Salmo 105:3 tä niere erere, ¿nita Jehová kä ngwen jabätä yebätä ja ruin ño nie?

¹⁴ Jehová kä ngwanta nikwe ye ütiäte krubäte ni kräke (ñäkädre Salmo 105:3 yebätä).d Nikwe blitadre Jehová kä yebätä kä jutobiti aune dikaidre ye ie tö (Jer. 9:​23, 24; 1 Cor. 1:31; 2 Cor. 10:17). Nita dikaire yebätä nita blite nitre ben ni tö Jehová kä ye mikai gare nitre madai aune niara Ngöbö nikwe ye mikadre gare. Metrere ni tö Jehová kä yebätä blitadi kwin aune kä kwe ye tädre deme aune mrebe ye ütiäte ni kräke. Aisete ni testiko ye niekäre ni ñaka rabadre ja gaire jire nita sribi känti, nita kä nikwe yekänti o kä medenkänti nita, akwa käre ni rabadre ja mike gare testiko Jehovakwe ye erere. Nikwe ñaka Jehová kä ye mikadre gare nitre ie ye ie Diablu tö (Jer. 11:21; Apoc. 12:17). Satanás aune nitre ja mikaka niarakri ye tö ni tuai Jehová käi kwitekä jabiti (Jer. 23:​26, 27). Akwa Jehová tare krubäte nikwe ye medenbätä ni tö käikitaikä mantre jetebe (Sal. 5:11; 89:16).

15. ¿Jehová kädekadrete ye abokän dre gärätä?

¹⁵ Ni täi jankunu Jehová kädekete (Joel 2:32; Rom. 10:​13, 14). Akwa Jehová kädekaite ye ñan jerekäbe nita niara kä ye mike gare jai aune niara kädekete kä kwe yebiti, ñakare aune Ngöbö abokän ño ye nita mike gare jai, nita tö ngwen niarabiti aune nita ja di kärere ne kwe niarakwe nun jie ngwandre (Sal. 20:7; 99:6; 116:4; 145:18). Arato ni madai Jehová kä ye nita mike gare ietre aune niara töi kwin keta kabre ye niere ietre aune kukwe käme ye tuadremetre kwetre aune ja töi kwitadre kwetre ne kwe Ngöbökwe niaratre kadre ngäbiti ye kräke nita niaratre dimike (Is. 12:4; Hech. 2:​21, 38).

16. ¿Satana ye ni ngökö ye ni raba bämike ño?

¹⁶ Nita juto biare ja tare nikakäre Jehová kä yebätä (Sant. 5:​10, 11). Metrere nikwe ja tare nikai yebiti ta ja ngwandi metre nikwe ye ngwane, Satana ye ni ngökö nikwe bämikai. Ñodre, Job näire ni Jehová mikaka täte ye jökräbätä Satana käkwe kukwe ne niebare: “Ni nire käkwe jondron jökrä kwe ye biain ja nire kwe mikakäre kwäre” (Job 2:4). Metrere niebare kwe nibätä, nire abokänbätä kukwe blo tä nemen ngwane tä trö kwite Jehovai aune nirebätä kukwe kwin tä nemen ngwane tä käre Jehová mike täte ye niebare kwe nibätä. Akwa Job ja ngwanbare metre kukwe tare yebiti ta ye ngwane, Satana ye ni ngökö bämikani kwe. Ye erere arato kukwe ñokwä tare Satanakwe mikai ni jiete akwa yebiti ta nikwe ja ngwain metre aune nikwe ja ngwain metre Job ye erere ngwane Satana ye ni ngökö nikwe bämikai siba. Metrere Jehová täi jankunu ni ngibiare nita kä kwe ngwen jabätä yebätä (Juan 17:11).

17. 1 Pedro 2:12 tä niere erere, ¿ni raba dre mada nuainne Jehová käi kitakakäre?

¹⁷ Jehová kä ye ütiäte krubäte ni kräke (Prov. 30:9; Jer. 7:​8-11). Nita Jehová kä ye ngwen yebätä nita blite niara kä yebiti aune nita ja ngwen ño yebiti ni raba niara kä ye mike deme o mike käme (ñäkädre 1 Pedro 2:12 yebätä). Ye medenbätä nikwe ja di ngwen krubäte Jehová kä ye käikitakakäre nita dre nuainne aune dre niere yebiti. Ni ngite yebiti ta ni täi siba Jehová käikitekä.

18. ¿Drebiti mada Jehová kä ütiäte ni kräke ye ni raba bämike? (Nota mikadre ñärärä arato).

¹⁸ Jehová kä ye bäri ütiäte ni kräke ni mada tä ni mike tuin ño jai yebätä (Sal. 138:2). Jehová tare nikwe ye medenbätä nita ja di ngwen dre tuin kwin ie ye nuainne. Nitrekwe ni kötaidre o ñäkädre tare nibätä yebiti ta.e Metrere Jesús nämäne juto biare ja tare nikakäre aune krüte ñobätä ñan aune niara tö nämäne Jehová kä ye mikadre ütiäte. Tärä Hebreos 12:​2-4 tä niere erere, niara nämäne juto biare ja tare nikakäre kötai nämäne yebiti ta. Nitre mada käkwe töbikadre ño niarabätä ye ñan ai töibikaibare kwe. Rün kwe töi nuaindre ye nämäne bäri ütiäte kräke (Mat. 26:39).

19. ¿Mäkwe Jehová kä ngwandre jabätä yebätä ja ruin ño mäi aune ñobätä ja ruin kore mäi?

¹⁹ Nitre kwatí ngätäite ni kädekadrete testiko Jehovakwe ye kätä kä mike juto nibätä. Ni mikai yakrä jai o kukwe tare nie nie akwa Jehová kä ye täi bäri ütiäte töbikai ño nibätä yebiti ta. Satanakwe kukwe keta kabre mikai ni jiete akwa nikwe ja di ngwain jankunu Jehová käi kitakakäre käre. Jehová kä ye nämäne ütiäte Jesús kräke. Erere nikwe nuaindi ye ngwane, niara kä ye täi ütiäte ni kräke.