“Munkwe ne nuain jankunu”
Jesús ja nire biani ye Ngwainta Törö köbö 5 abril yete
1. ¿Jesús ja nire biani ye ñobätä ütiäte krubäte ni kräke?
1 “Munkwe ne nuain jankunu ti ngwankäre törö jai.” (Luc. 22:19). Kukwe nebiti Jesús nämene nitre ja tötikaka ben nübaire niarakwe ja nire biani ni jökrä ütiäre ye ngwenta törö jai. Jesukwe ja nire biani Ngwainta Törö jai köbö 5 abril yete, ni kökanintari ye köböire kukwe keta kabre namanina bare, ye medenbätä köbö ye bäri ütiäte ni kristiano kräke. Köbö ye jatai nökrö ja ken ye ngwane, ¿nikwe dre nuaindre debe biankäre Jehovai kukwe nuainbare kwe yebätä? (Col. 3:15).
2. ¿Jesús ja nire biani ye ütiäte ni kräke ye ni raba bämike ño?
2 Nikwe ja ükadrete. Jondron ütiäte tärä nuaindre nie angwane nita ja ükete kräke. Jesús murie ketai ye käi namanina ja ken ye ngwane dre dre namani barebätä yebätä ni raba ja tötike ni mräkätre ben aune töbiketaribätä, nita ye nuainne angwane nita ja brukwä ükete kukwe ye kräke (Esd. 7:10). Texto ruäre abokän tä blite kukwe yebätä ye raba kwen nie kalendario bätä Examinando yebätä. La Atalaya 1 febrero 2011 (página 23 bätä 24) yete kukwe mikata gare bäri aune ni nübaita kukwe ye känene tärä El hombre más grande yebätä.
3. ¿Jesús ja nire biani ni ütiäre ye ütiäte ni kräke ye ngwane nikwe dre nuaindre kukwe driekäre bäri?
3 Nikwe kukwe driedre. Nita kukwe driere bäri ye ngwane nita bämike Jesús ja nire biani Ngwanta Törö jai ye ütiäte ni kräke (Luc. 6:45). Sabado 17 marzo ja käne nikwe täräkwata döräidi kä jökräbiti tibien nitre nübaikäre Jesukwe ja nire biani Ngwanta Törö jai ye kräke. ¿Mä raba köbö denkä jai kukwe driekäre bäri o sribi prekursor ausiliar ye nuainkäre? Ja tötikadre ni Mräkätre yebe ye ngwane blita raba kukwe yebätä.
4. ¿Jesús ja nire biani Ngwanta Törö jai yebätä ni kwandre angwane kukwe meden kwin raba nemen nikwe?
4 Jesús ja nire biani Ngwanta Törö jai kä kwatire kwatire te yete nita kwen ye köböire kukwe keta kabre kwin tä nemen nikwe. Jehová mantiame ye medenbätä monso itibe kwe yebiti ni kökanintari kwe. Nikwe töbikadre kukwe yebätä angwane kä rabai juto nibätä aune ni rabai Ngöbö tarere bäri (Juan 3:16; 1 Juan 4:9, 10). Tä ni töi mike nüne niara mikakäre täte (2 Cor. 5:14, 15). Arato ye käkwe ni mikai Jehová käikitekä nitre jökrä okwäbiti (Sal. 102:19-21). Jehovakwe kukwe nuainbare yebätä ni törba debe biain ie, aisete Jesús ja nire biani ngwainta törö jai köbö 5 abril yete, ye nita ngübare ne kwe nikwe kukwe ütiäte ye “bä mik[adre] batire batire” (1 Cor. 11:26, Kukwe Kuin Ngöbökwe [WBT]).