Nitre Tä Kukwe Ngwentari

Davidkwe Ngöbö kä kwe käikitaikä “kärekäre” tikani kwe Salmos 61:8 yebätä ngwane, ¿kukwe ngwarbe niebare kwe o nämäne kukwe niere bäri?

Ñakare. Davidkwe kukwe tikani ye namani bare metre.

Kukwe tikabare kwe bersikulo yete aune bersikulo mada ja erebebätä, yebätä töbike. Niebare kwe: “Kärekäre tikwe kantai mä kä ye käikitakakäre. Tikwe ja kukwei kitaninkä ye erere ti täi nuainne köbö kwatire kwatire ye ngwane”, “Jehová Ngöbö tikwe, tita mä käikitekä ja brukwä tätebiti, tikwe mä kä ye käikitaikä kärekäre” aune “Tikwe mä kä ye mikai ütiäte kärekäre” (Sal. 61:8; 86:12; 145:1, 2).

Davidkwe kukwe niebare ye ngwane ñan kukwe niebare biti chi kwe. Niara krütai ye nämäne gare ie ñobätä ñan aune ni ngite yebätä nita krüte. Niara ngite ye mikani gare metre kwe (Gén. 3:3, 17-19; Sal. 51:4, 5). Nitre Jehová kukwei mikaka täte metre kirabe, ñodre Abrahán, Isaac aune Jacob ye krütani nämene gare ie. Ne madakäre, niara krütai ye nämäne gare metre ie (Sal. 37:25; 39:4). Akwa kukwe tä tikani Salmo 61:8 ne tä mike gare metre niara nämäne ja töi mike kwatibe Ngöbö käikitakakäre käre tädre nire ye ngwane (2 Sam. 7:12).

Ruäre ngwane David nünanbare ño ye tikabare kwe, encabezamiento tä Salmos kapitulo 18, 51 aune 52 yebätä erere. Salmo 23 yete tä Jehová ye bämike ni oveja jie ngwanka, mikaka jäme aune kriemikaka ye kwrere. Davidkwe oveja jakwe ngübabare ye erere aune yebätä töi nämäne sribibätä Jehová kräke köbö kwatire kwatire tädre nire ye ngwane (Sal. 23:6).

Üai deme Ngöbökwe köböire Davidkwe kukwe tikabare ye nikwe ngwandre törö jai. Kukwe tikabare kwe yete profecía ruäre rabai bare ja känenkäre ye tikani kwe. Ñodre, Däkien kwe rabai täkäni Ngöbö kise ruinkri kä kwinbiti aune die rabai krubäte ye köbö rükai niebare kwe Salmo 110 yekänti. Die ye köböire nitre jökrä ja mikaka Ngöbö rüere ye ganaindi kwe aune “kukwe ükaite juta jökrä ye rüere”. Mesías ye jatani David yekri, Mesías ye rabai gobrane kä kwinbiti aune rabai “sacerdotere kärekäre” (Sal. 110:1-6). Profecía tä Salmo 110 ye nämäne blite Jesubätä aune kukwe ye rabai bare ja känenkäre niebare Jesukwe (Mat. 22:41-45).

Nibira gare nie erere, Jehovakwe David jie ngwani üai demebiti, köböire kukwe namani bare niara näire aune kukwe rabai bare ja känenkäre gaikröta ngwane aune rabai Jehová käikitekä kärekäre yebätä kukwe tikabare kwe. ¿Kukwe ne tä ni dimike ño Salmo 37:10, 11, 29 ye mikakäre nüke gare jai? Nitre Israel kirabe käkwe nünanbare ño ye bersikulo ne tä mike gare aune nikwe nünandi ño ja känenkäre Ngöböta käbämike mikai nemen bare kwe ye ngwane, ye mikata gare arato (párrafo 8 tä kukwe ja tötikara “Mä täi tibe kä bä nuäre yete” tä täräkwata nebätä ye mikadre ñärärä).

Ye medenbätä, Salmo 61:8 aune bersikulo mada ja erebe ne tä ni dimike mike gare jai David tö nämäne Jehová käikitaikä nämäne nire Israel kirabe ye ngwane. Ne tä mike gare metre niara käkwe dre nuaindi Jehovakwe gaikröta ye ngwane.