Okuntu Wakashuba Kukomeza Obwira Bwawe Haguma na Yehova.

BULI MWAKA, ntama zinene z’akamaro zinagaluka omu chibaga che Chikristu. Waza ku mwishingo gunene gunaba omu mbingu amango buli muguma amagaluka! (Lu. 15:7, 10) Akaba wamagaluka, ochizere oku Yesu, ba malayika, na Yehova yenyine basimire bwenene okubona wamashuba galuka omu chibaga. Aliko, ok’oli washuba komeza obwira bwawe haguma na Yehova wakahurana n’ebibazo. Bibazo bihe biguma mw’ebyola na bichi byakakurhabala?

BIBAZO BIHE ABAGALUKIIRE YEHOVA BANAHURANA NABYO?

Bene-berhu na Bali-berhu banene banachiyunva bavunikire omurhima chiro akaba bagalukire. Nkabaga oyunvirhe okuntu Omwami Daudi aliri achiyunva. Chiro n’enyuma y’okubabalirwa ebyaha byage, aderha ntya: “Amagosa mani manchubukire” (Zb. 40:12; 65:3) Omuntu wagalukiire Yehova, akachigenderera kuchiyunva munyamagosa changwa kuyunva eshonyi n’enyuma wa myaka minene. Izabela alimalire myaka makumyabiri ey’achibirwe omu chibaga.a Aderhere ntya, “Birhali binyorohere okuyunva oku Yehova ambabalire.” Amango wamavunika omurhima, ehali yawe y’ekiroho yanazamba. (Mez. 24:10) Omenye waleka echola chakuhikira.

Abandi banayubaha oku barhakagala kukola buli chintu choshi chihemerwe yibashuba gwarha obwira bukomere haguma na Yehova. Enyuma y’okugaluka omu chibaga, Antoine aderhere, “Nalinyunvirhe nka nayibirire buli chintu choshi oku bilolere akalamo k’Omukristu nalilamire mira.” Bulala abantu banachiyunva ntyo, barhajira okwabo koshi bagalire omu kasi ka Yehova.

Omufano, omuntu echiyaga chashandire enju yage bwenene akachiyunva oku bimuchubukire amango amawaza oku kasi n’emisi byamuhema kushuba kuyiyumbaka. K’onakuguma, amango Obwira bwawe bwashandukire eju y’echaha chikomere wajirire, wakachiyunva oku bikuhemere kasi kanene y’oshuba kukomeza obwira bwawe haguma na Yehova, aliko birhakuhemere oku ojire ntyo oku misi yawe wenyine.

Yehova arhuhamagere ntya: “Mujage mwayinja, rhuhebe ebintu oku mustari” (Isa. 1:18) Wakolere bwenene okuheba ebintu oku mistari. Yehova akuzigire bulala wakolere akola kasi. Bulala wagalukiire Yehova, akakukolesa nka mufano g’okuyerekana oku Shetani ali mubeshi!—Mez. 27:11.

Omu kujira ntyo, wayegerere Yehova, naye akulaganyize oku akuyegera. (Yak. 4:8) Aliko, okwanene kujira binene olekere okumenyikana konyine oku washubire galuka omu chibaga. Okwanene kugenderera kukomeza obwira bwawe ku Yisho na mwira wawe Yehova. Gurhe wakajira ntyo?

OCHIHEBERE EMIHIGO WAKAHIKIRA AMANGO OLI WASHUBA KUKOMEZA OBWIRA BWAWE

Ochihangane ochihebere emihigo wakahikira. Nkabaga ochiyibukire enyigirizo z’omusinji wayigaga oku bilolere Yehova n’omuhigo gwage gw’eparadizo. Aliko zene bikuhemere ochihebere eprograme y’okuja oku mbuganano oku kahunda n’okuhubiri buli mango, n’okugeza akasanzi haguma na bene-berhu na bali-berhu. Rhuganire oku mihigo ekulikireho.

Oganire na Yehova buli mango. Yisho ayinji oku okagenderera kuchiyunva munyamagosa oku bilolere ebibi wajirire, byaka kukomerera kumusalira. (Ro. 8:26) Aliko, “ogenderere kusalira,” obwire Yehova kangana gurhe olonzeze kuba mwira wage. (Ro. 12:12) Andrej ayibukire ntya: “Nalichiyunvirhe munyamagosa bwenene n’okuyunva eshonyi. Buli kumala kusalira, naliri nachiyunva bwinja. Naliri nayunva omurhula g’omu bwenge gunene.” Akaba orhenji bichi wakaheba omu masala mawe, olole amasala m’Omwami Daudi mali omu chitabu cha Zaburi ya 51 n’eya 65.

Oyige e Biblia oku kahunda. Okujira ntyo kwakurhabala okomeze obwemere bwawe n’okukurhabala okuze obuzigire bwawe ku Yehova. (Zb. 19:7-11) Felipe aderhere ntya, “Bula ntaligwerhe eprograme y’okujira efunzo lyani ly’e Biblia n’okuyisoma oku kahunda naba muzamba ekiroho nanagayisa Yehova “Ntalilonzeze nkashuba kugayisa Yehova, bobola naja najira okwani koshi y’inyinja najira efunzo lyani nyenyine oku kahunda.” Nawe wakajira ntyo. Akaba okenere oburhabale okuntu wakachishoga emyazi y’okuyiga omu funzo lyawe-lyawe, wakahema mwira wawe ogwerhe obwira bukomere haguma na Yehova akurhabale

Oshube okomeze obwira bwawe haguma na bene-benyu na bali-benyu. Bantu baguma bagalukire omu chibaga, banayubaha oku abandi babona kubi. Larissa aderhere ntya: “Naliri nayunva eshonyi. Naliri nawaza oku nagayisize n’okuvuna omurhima bene-berhu na bali-berhu omu chibaga. Nalingenderere kuchiyunva ntyo mu myaka minene.” Ochizere oku abashamuka n’abandi omu chibaga balonzeze kukurhabala y’oshuba kukomeza obwira bwawe haguma na Yehova. (Olole echisanduku “Bichi Abashamuka Bakajira?”) Bagwerhe omwishingo bulala wagalukire, banalonzeze ogwarhe obusime!—Mez. 17:17.

Bichi byakakurhabala oyegere abandi omu chibaga? Oje oku mbuganano z’echibaga zoshi haguma na bene-benyu na bali-benyu n’okuja nabo oku mahubiri oku kahunda. Felix aderhere ntya: “Bene-berhu na bali-berhu baliri balingiriza oku nyorha okubona gurhe nagaluka. Nalinchiyunvirhe nzigiirwe. Boshi bantabere nchiyunve oku ndi muguma w’omu mulala, nchiyunve oku nababalirwe, nangenderere embere”—Olole echisanduku “Bichi wakajira”

ORHALEKAGA CHIRO N’AKATYU!

Shetani agenderera kukulerhera bibazo binene, akujira muzamba amango oli wachihangana kukomeza obwira bwawe haguma na Yehova. (Lu 4:13) Obe tayari kushuba kukomeza obwira bwawe haguma na Yehova zene.

Okubilolere entama zage, Yehova aderhe intya: “Eyaherere nayilonza, eyatarukire nayigalula, eyavunikire nayilunga, n’ezambire nayiheba emisi.” (Eze. 34:16) Yehova arhabere bantu banene bashube bakomeze obwira bwabo haguma naye. Ochizere oku ashondere kukurhabala ogenderere kushuba kukomeza bwenene obwira bwawe haguma naye.

Bichi Abashamuka Bakajira?

Abashamuka bakajira binene omu kurhabala omuntu wagalukire ashube akomeze obwira bwage haguma na Yehova. Hala ebibakakolera abagalukiire Yehova.

Mubarhabale bachizere. Entumwa Paulo alimenyere oku omuntu wakolere echaha aliko wahungamire “anagwarha mugayo gunene bwenene.” (2 Ko. 2:7) Akayinja ayunva eshonyi buli mango n’okuvunika omurhima. Paulo ahanula echibaga ntya: “Mube tayari kumubabalira n’okumurhuliriza.” Abantu bagalukiire Yehova bakenere ow’okubabwira bachizere oku Yehova na bene-babo na bali-babo babazigire bwenene. Amango abashamuka bali bababwira koko buli mango n’okubarhabala, echola chakabarhabala bamenye bavunika omurhima.

Musalire haguma nabo. “Esala ly’okulakirira ly’omunyakunali lijira emisi.” (Yak. 5:16) Larissa, rhwashambalagako burhanzi, aderhere ntya: “Naliri nabwira abashamuka engangane zani n’obuba bwani. Basalira eju yani. Naja namenya oku abashamuka barhambikiraga omujinya. Balilonzeze kuntabala nshube kukomeza obwira bwani haguma na Yehova.” Theo aderhere ntya: “Amasala m’abashamuka mali ntabere nchizere oku kweri Yehova anzigiire anabwene ebinja omu murhima gwani, s’arhali ebibi byonyine.”

Ojire obwira haguma nabo. Abagulukire omu chibaga bakenere kugwarha abera omu chibaga. Mushamuka muguma oyirikirwe Justin, aderhere ntya: “Olonze akasanzi k’okubahamagala bagende nawe omu mahubiri, n’echakamaro bwenene obalambagirire emwababo. Kuli kw’akamaro bwenene obe mwira wabo!” Owindi mushamuka oyirikirwe Henry aderhere ntya: “Amango abandi omu chibaga bamabona abashamuka bali bajira obwira n’abantu bagalukiire Yehova, nabo banachihangana kujira ntyo.”

Mubarhabale bayinje bayiga. Omukristu okulire ekiroho akarhabala omuntu wagalukiire Yehova ajire eprograme nyinja y’okuyiga oku kahunda. Mushamuka muguma oyirikire Darko aderhere ntya: “Nansima kuganira n’abandi oku bilolere obuhirhi bw’ekiroho nabwene kugerera efunzo n’okubayereka okuntu nabo bakajira yi basimira efunzo lyabo lye Biblia. Kandi nampanga rhuyige myazi miguma haguma nabo.” Owindi mushamuka oyirikirwe Clayton, aderhere ntya: “Nambahira omurhirma balonze engani omu Biblia ziganirire abantu bahuranaga ebibazo bili nk’ebyabo n’okulola bichi eyola ngani yakabayigiriza.”

Mube bangeri benja. Abantu bagalukiire Yehova babwene oku abashamuka bali nka bazuzi. Lero, kulusha amandi mango moshi, bakenere kubabona nka bangeri. (Yer. 23:4) Obe tayari kuyunviriza n’okuderha koko. Oganire nabo buli mango. Hala ebi mushamuka muguma oyirikirwe Marcus anajira amango amaja omu kasi k’okulagira: “Rhunashambala oku Mandiko, rhunababwira koko, n’okubarhabala bachizere oku rhuchivugire bo bulala bajirire okwabo koshi yi bagalukira Yehova n’oku Yehova naye achivugire bo. Na buli kumala kuganira, rhunarheganya amandi mango rhwashuba kugaluka.”

a Amazino mahindamwirwe mu gunda mwazi.