MWAZI G’OKUYIGA 22
Amahano m’Obwengehe m’Okurhurhabala Esiku Zoshi
“Yehova yenyine ye haana obwengehe.”—MEZ. 2:6.
OLWIMPO 89 Tii juu Ubarikiwe
OKU BUGEKEa
1. Bulagurhe rhweshi rhukenere obwengehe burhengere emwa Mungu? (Mezali 4:7)
AKABA wachigerere kurhola esimikiro y’akamaro, nta ngangane, wasalira y’opata obwengehe wanamenya bwinja echi wakola. (Yak. 1:5) Mwami Sulemani ayandika ntya: “Obwengehe che chintu ch’akamaro bwenene.” (Osome Mezali 4:7.) Nechi, Sulemani arhaliri alonza kuderha oku bwindi bwengehe burhengerere oku bantu, s’ahubwe aliri aderhera oku bwengehe burhengerere emwa Yehova Mungu. (Mez. 2:6) Aliko si, k’obwengehe burhengerere emwa Yehova bwakarhurhabala kulwisa buli chibazo rhuli rhwahurana zene? Nechi, bwakarhurhabala, nk’oku rhwabona mu gunola mwazi.
2. Njira nguma ehe yakarhurhabala kugwarha obwengehe b’okuli?
2 Njira nguma rhwakagwarha m’obwengehe b’okuli, kuli kuyiga n’okukolesa enyigirizo za balume babiri balimenyikene bwenene kugerera obwengehe bwabo. Omurhanzi rhwashambalako ali Sulemani. Ebiblia ederhere oku “Mungu alihere Sulemani obwengehe n’oburhegerezi bw’enyanya bwenene.” (1 Fa. 4:29) Owakabiri rhwaganirako ali Yesu, aligwerhe obwengehe bw’enyanya bwenene kulusha obw’abandi boshi bachigerere kubaho. (Mt. 12:42) Isaya alilebere ntya oku bilolere Yesu: “Eroho lya Yehova nji lyamubegerako, eroho lw’obwengehe n’ely’obumenyi.”—Isa. 11:2.
3. Bichi rhwaganirako mu gunola mwazi?
3 Sulemani bombi Yesu balikoleseze obwengehe Mungu ahagabo omu kuhaana empanulo zigwerhe akachiro ku buli muguma werhu. Mu gunola mwazi, rhwaganira ku bintu bisharhu balirhuhanwireko: Okugwarha amawazo makwanene oku bilolere efuranga, oku bilolere akasi n’oku birhulolere rhwewe rhwenyine.
OGWARHE AMAWAZO MAKWANENE OKU BILOLERE EFURANGA
4. Bichi biyerekene oku Sulemani na Yesu barhalilamire akalamo kali kuguma?
4 Sulemani aliri muchire bwenene analilamire omu nju ekwirire bwenene orhakalola. (1 Fa. 10:7, 14, 15) Yesu yewe arhaliri muchire nta na nju yage-yage aligwerhe. (Mt. 8:20) Aliko abola balume bombi baligwerhe amawazo makwanene oku bilolere ebintu by’omubiri, bulala obwengehe bwabo bwarhengaga hantu haguma; emwa Yehova Mungu.
5. Mawazo machi makwanene Sulemani aligwerhe oku bilolere efuranga?
5 Sulemani alirhegerere oku efuranga buli “bulanzi.” (Muh. 7:12) Nka rhugwerhe efuranga, rhwakapata ebi rhukenere, na bigeke omu birhulonzeze. Aliko, chiro akaba oku Sulemani alichirire, arhegera oku hali echintu ch’akamaro bwenene kulusha efuranga. Omufano, ayandika ntya: “Okuchishoga ezino linja (changwa “erenge linja,” mahugulo m’eshishi) kulushire obuchire bunene.” (Mez. 22:1) Sulemani alishubire kuderha oku abantu basima efuranga barhatosheka n’ebi bagwerhe. (Muh. 5:10, 12) Anahanula oku rhurhakwanene kuhira obunihire bwerhu boshi oku furanga, bulala rhube rhugwerhe zingana gurhe, zakahera juba-juba.—Mez. 23:4, 5.
Le muswelo otumona bintu bya ku ngitu witulengejanga tukomenwe kutūla tumweno twa Bulopwe pa kifuko kibajinji mu bwetu būmi? (Olole echifungo 6-7)d
6. Mawazo machi makwanene Yesu aligwerhe oku bilolere ebintu by’omubiri? (Matayo 6:31-33)
6 Yesu naye aligwerhe amawazo makwanene oku bilolere ebintu by’omubiri. Aliri ashagalukira ebilyo n’ech’okunywa. (Lu. 19:2, 6, 7) Mango maguma alikolere edivayi nyinja bwenene, che chanaliri chisomerene chage chirhanzi. (Yoh. 2:10, 11) Amango afa, aliyambere omwambaro gw’akachiro kanene. (Yoh. 19:23, 24) Aliko Yesu arhayemeraga okw’ebintu by’omubiri birhole enafasi y’oburhanzi omu kalamo kage. Abwira abanafunzi bage mpu: “Nta muntu wakaba muja wa bawaliha babiri. Murhakaba baja ba Mungu na baja b’okuchire.” (Mt. 6:24) Yesu aliderhere oku rhukarhanga lonza eby’Obwami, Yehova naye ajira okuntu rhubone eby’omubiri rhukenere.—Osome Matayo 6:31-33.
7. Nyungu zihe mwene-werhu muguma alibwene bulala arhahebaga efuranga oku nafasi y’oburhanzi omu kalamo kage?
7 Bene-berhu na bali-berhu banene bapatire enyungu omu kukolesa amahano m’obwengehe Yehova ahaanire oku bilolere efuranga. Rhuganire oku mufano gwa mwene-werhu muguma w’omulamba oyirikirwe Daniel. Aderhere ntya: “Amango naliri omu myaka y’olubiruko, nahigirira okuheba ebintu by’ekiroho oku nafasi y’oburhanzi omu kalamo kani.” Bulala alilamire akalamo kayanguhire, agala kukolesa ebisanzi n’obufundi aligwerhe omu makasi manene m’echiteokrasi. Daniel ayongerere ntya: “Okuderha okuli, nta mango nsaga chiganya ebinachishogere kujira omu kalamo. Omu bukweri, nakapatire furanga zinene bwenene nka che chintu nahebaga oku nafasi y’oburhanzi omu kalamo kani. Aliko ntakabwene abera benja nk’abala ngwerhe. Ntakanatoshekere chiro nk’oku ndi zene bulala menyere oku ndi naheba eby’Obwami oku nafasi y’oburhanzi. Nta luganjo lw’efuranga lwakalusha emigisho Yehova ampere.” Berhu wee, rhunagwarha enyungu amango rhwamachiseza, arhali oku furanga s’oku bintu by’ekiroho.
AMAWAZO MAKWANENE OKU BILOLERE AKASI K‘OMUBIRI
8. Bichi birhuyerekere oku Sulemani aligwerhe amawazo makwanene oku bilolere akasi? (Muhubiri 5:18, 19)
8 Sulemani aliderhere oku obusime rhunagwarha burhengere oku kasi kakomeere yirhwakola, “luli luhembo lwa Mungu.” (Osome Muhubiri 5:18, 19.) Ayandika mpu: “Hali obunguke mu buli kasi kakomere.” (Mez. 14:23) Sulemani alimenyere bwinja ebi ali aderha. Naye aliri mukozi! Aliyumbakire enju, ahinga emizabizu, akwiza ebustani, n’okukola ebisima. Aliyumbakire evile. (1 Fa. 9:19; Muh. 2:4-6) Kaliri kasi kakomere, na nta ngangane, kalimulerhere obusime. Aliko Sulemani arhawazaga okw’ebyola byonyine by’ebyakamulerhere obusime b’okuli. Analikolere binene omu kasi ka Yehova. Omufano, aliyumangiire akasi k’okuyumbaka ehekalu linja bwenene ly’okuharamiza mu Yehova, n’akola kasi kalimalire myaka mushanvu! (1 Fa. 6:38; 9:1) Enyuma y’okukola kw’amola makasi mombi, ak’ekiroho n’ak’omubiri, yi Sulemani ajaga erhegera okw’akasi k’ekiroho kakagwerhe akamaro bwenene kulusha ak’omubiri. Ayandika ntya: “Bunola b’obuzinda bw’ebyaderherwe, ebintu byoshi byayunvirhwe: Oyubahe Mungu n’okukenga amarhegeko mage.”—Muh. 12:13.
9. Bichi biyerekene oku Yesu alihirire akasi k’omubiri oku nafasi yako?
9 Yesu aliri mukozi bwenene. Omu myaka yage mirhanzi hanola oku gulu, aliri muranda-mpaho. (Mk. 6:3) Nta ngangane, abazere bage baligwerhe eshukurani oku burhabale aliri abahereza amango baliri bachihangana kukola bwenene omu kushishikala omulala gwabo gugalihire. Na bulala aliri muranda mpaho w’omushinganyanya, hakwanene kuba eyi haliri bantu banene balisimire kugula ebintu akolere! Bibonekene oku kweri Yesu alisimire akasi kage. Aliko, chiro akaba oku aliri mukozi ogwerhe obushiru, buli mango aliri achihangana agwarhe ebisanzi by’okukola akasi ka Yehova. (Yoh. 7:15) Yewe nka muhubiri w’amango moshi, ahanula abonviriza bage ntya: “Mumenye mwakolera ebilyo byakabola, aliko mukolere bilala byakagenderera byalerha akalamo k’esiku n’amango.” (Yoh. 6:27) Ashuba derha ntya oku mahubiri mage m’oku musozi: “Muchibikire enguli omu mbingu.”—Mt. 6:20.
Nka gurhe rhwakagenderera kugwarha amawazo makwanene oku bilolere akasi k’omubiri n’ak’ekiroho? (Olole echifungo che 10-11)e
10. Chibazo chihe baguma bakahurana nacho omu kasi kabo k’okuhubiri?
10 Obwengehe burhengere emwa Mungu bunarhurhabala kugwarha amawazo makwanene oku bilolere akasi k’omubiri. Rhwewe nka Bakristu, rhukwanene “kukola bwenene. . . , akasi kenja.” (Efe. 4:28) Abakulu berhu b’akasi banazigana kubona oku rhuli banihirwa n’oku rhunakola bwenene. Bakanarhubwira oku basimisizwe bwenene n’akasi kerhu, echola chakarhuma rhwayinja rhwakola sa zinene mpu y’omukulu werhu w’akasi agwarha amawazo menja oku bilolere abahamirizi ba Yehova. Aliko nka rhwamajira ntyo, rhwakabula akasanzi k’okugeza haguma n’omulala gwerhu changwa k’okujira ebintu by’ekiroho. Bihemere rhuhindamuke yi rhubona akasanzi k’okukola ebintu by’akamaro bwenene.
11. Bichi mwene-werhu muguma ayigire oku bilolere okuhira akasi k’omubiri oku nafasi yako?
11 Mwene-werhu muguma ochili musole oyirikirwe William achibwenere akachiro k’okuhira akasi k’omubiri oku nafasi yako. Aderhere ntya oku bilolere mwene-werhu w’omushamuka walimuhere akasi: “[Oyula mwene-werhu] ali mufano gwinja g’omuntu onaheba akasi k’omubiri oku nafasi yako. N’abakiliya bage banamusima bulala anabakolera ebintu binja. Aliko enyuma w’akasi, anaja geza ebisanzi haguma n’omulala gwage n’okuharamya Yehova. Onamenyere si? Ali muguma omu bantu menyere bagwerhe omwishingo omu kalamo!”b
RHUGWARHE AMAWAZO MAKWANENE KU RHWEWE RHWENYINE
12. Nka gurhe Sulemani aliyerekene oku agwerhe amawazo makwanene oku bimulolere na gurhe aliyinjire bivuruga?
12 Amango alichili mukozi mwimana wa Yehova, Sulemani alichigwerheko amawazo makwanene. Amango alichili musole, alimenyere bwinja emipaka yage anahema Yehova obwerekezi. (1 Fa. 3:7-9) Amango aliri arhegeka, alishubire kuba ey’amenyere obuhanya b’okugwarha ekiburi. Aliyandikire ntya: “Omwibone gogunarhengerera embere y’okusherera, n’engeso y’okuchihala embere y’okusirhala.” (Mez. 16:18) Ech’okugayisa, buzinda Sulemani agambwa kukolesa elila hano lyage. Hagera amango ekiburi charhuma ahwanza kusuzagura amarhegeko ma Mungu. Omufano, hali amarhegeko maliderhere oku, omwami w’Omuizraeli arhalikwanene “kushaba bakazi banene y’omurhima gwage gurhahehwa.” (Kum. 17:17) Sulemani avuna elyola rhegeko n’okurhola bakazi 700 na bera-kazi 300 na banene mu bo baliri bapagani! (1 Fa. 11:1-3) Nkabaga Sulemani aliri achibwira “okw’ebintu byoshi bili omu fune zage.” Koshi-koshi byakaba, buzinda Sulemani aliyinjire kulibuka n’engaruka z’okola kuchihenula ku Yehova.—1 Fa. 11:9-13.
13. Bichi rhwakayiga amango rhwamawaza bwenene oku bwirhohye bwa Yesu?
13 Yesu aligenderere kugwarha amawazo makwanene n’obwirhohye oku bimulolere. Chiro n‘amango arhaliza yinja kunola gulu, aliri akola akasi ka Yehova n’obushiru. Kugerera Yesu, “ebindi bintu byoshi by‘embingu n’oku gulu byalemwa.” (Kol. 1:16) Amango abatizwa, bibonekene oku aliyibukire ebintu byoshi akolaga haguma n’Eshe. (Mt. 3:16; Yoh. 17:5) Aliko birharhumaga agwarha omwibone. Ahubwe, nta lusiku achigerere kuchiheba enyanya z’owindi muntu yeshi-yeshi. Alibwirire abanafunzi bage oku ayinjaga oku gulu, “arhali mpu bamukolere, s’aliko kukolera abandi n’okuhaana akalamo kage nka nchungu ahaali habanene.” (Mt. 20:28) Ashuba kuderha oku bwirhohye oku ntacho akagala kujira oku misi yage yenyine. (Yoh. 5:19) Kweri, aliri mwirhohye! Yesu arhulekere omufano gwinja bwenene rhwakayiganya.
14. Bichi omufano gwa Yesu gwakarhuyigiriza oku bilolere okugwarha amawazo menja ku rhwewe rhwenyine?
14 Yesu aliyigirize abanafunzi bage oku bakwanene bagwarhe amawazo makwirire ku bowe bonyine. Mu mango maguma, abwira bo ntya: “Enviri zili okw‘irhwe lyenyu zoshi ziganjirwe.” (Mt. 10:30) Ebila binwa bihebere omurhima, ahanene amango rhwamahwanza chigwarha kw’amawazo mabihire. Biyerekene oku Darha w’embingu arhulagireko bwenene; rhuli b’akachiro embere zage. Rhurhalonzeze haba n’ehityu rhukacha olubanja ahali ha Yehova omu kuyinja rhwawaza oku rhurhakwanene kuba bakozi bage, changwa mpu rhurhakwanene akalamo k’esiku n’amango omu gulu lihyahya.
Migisho ehe rhwakaheza nka rhwamachigwarha k’wamawazo marhakwanene? (Olole echifungo che 15)f
15. a) Mawazo mahe makwanene Omunara g’Omulanzi gurhuhanwire rhukwanene kuchigwarhako? b) Nk’oku efoto eli oku bukurasa bwa 24 eyerekene, nka rhuvire rhwachiwazako bwenene, migisho ehe rhwakachiyima?
15 Hamagera myaka 15, Omunara g’Omulanzi gurhuhanwire rhugwarhe amala mawazo menja ku rhwewe rhwenyine: “Omu bukweri, birhahemere mpu rhuleme rhwachiwazako bwenene omu kuntu rhugwarhe omwibone; oku bwindi, rhurhakwanene kuva rhwachilekerera n’okurhawaza chiro n’echintu oku birhulolere. S’ahubwe, rhukwanene kugwarha amawazo m’olugero oku birhulolere, eyi rhunamenyere oku hali ebi rhwakagala kukola n’ebi rhurhakagala. Mwali-werhu muguma abishambereko ntya: ‘Intavire naba mubi bwenene; aliko kandi ntanali mwinja kulusha abandi. S‘aliko kandi mperhe n’obuzamba.’”c Orhabwene kangana gurhe kuli kwinja rhuchigwarhe kw’amawazo makwanene?
16. Bichi birhuma Yehova arhuha amahano?
16 Yehova ali arhuha amahano m’obwengehe kugerera Echinwa chage. Arhuzigiire, analonzeze rhugwarhe obusime. (Isa. 48:17, 18) Omuhigo gwinja bwenene rhwakarhola gon’ogola gwakarhulerhera obusime b’okuli, kuli kugenderera kujira ebintu byakasimisa Yehova. Amango rhwamajira ntyo, rhurhahikirwa n’ebibazo binene binahikira balala banaseza obwenge bwabo bwenene oku furanga, oku kasi k’omubiri, na ku bowe bonyine. Buli muguma werhu ajage ahigirira okuba mwengehe n’okusimisa omurhima gwa Yehova!—Mez. 23:15.
OLWIMPO 94 Aksanti Yehova kwa Kutupatiya Neno Yako
a Sulemani na Yesu baligwerhe bwengehe bunene. Yehova Mungu yi wahagabo obola bwengehe. Mu gunola mwazi, rhwabona bichi rhwakayiga kugerera ebinwa biyerekezwe n’eroho lya Mungu Sulemani na Yesu baderhaga oku kuntu rhwakagwarha amawazo makwanene oku bilolere efuranga, akasi, na kurhwewe rhwenyine. Rhwashuba kulola gurhe bene-berhu baguma bayungukire omu kukolesa amahano m’obwengehe mali omu Biblia mw’ezola hali.
b Olole omwazi “Okuntu Wakashagalukira Kukola Bwenene” guli omu Munara g’Omulanzi gwa Lusiku 1, Mwezi gwa 2, 2015.
c Olole omwazi “Ebiblia Yakakurhabala Ogwarhe Omwishingo” guli omu Munara g’Omulanzi gwa Lusiku 1, Mwezi gwa 8, 2005.
d AMAFASIRIYO M’EFOTO: John na Tom bali bene-berhu bachili misole bali mu chibaga chiguma. Joh ali ageza kasanzi kanene omu kushishikala omutugari gwage. Tom ali akolesa omutugari gwage omu kurhabala abandi baje omu mahubiri n‘okuja oku mbunganano z’echibaga.
e AMAFASIRIYO M’EFOTO: John y’akola sa zinene enyuma w’akasi. Arhalonzeze akagayisa bose wage. Bobunola amango moshi bose wage amamubwira oku akole enyuma w’akasi, John anayemera. Tom, oli mugwasi w’akasi aherekeze mushamuka muguma omu ntangulo y’obulagizi. Embere, Tom abaga abwirire bose wage oku, egolo lya siku zinene anakola amakasi malolere obuharamye bwage emwa Yehova.
f AMAFASIRIYO M’EFOTO: John y’achiwazako bwenene. Aliko Tom ohebere eby’Obwami embere omu kalamo kage, amabona abera bahyahya banene okw’ali arhabala oku kasi k’okukwiziza Echumbi ly’Embuganano Zikulu.