MWAZI G’OKUYIGA 23
Bazere Wee, Murhabale Abana Benyu Bazigire Yehova
“Okwanene ozigire Yehova Mungu wawe n’omurhima gwawe goshi n’obugumaguma bwawe boshi n’obwenge bwawe boshi.”—MT. 22:37.
OLWIMPO 134 Watoto ni Zawadi Yenye Mungu Anatupatia
OKU BUGEKEa
1-2. Bulagurhe mandiko maguma makagwarha akamaro bwenene amango hali ebyamahindamuka omu kalamo kerhu?
OKU lusiku l’obuhya bwabo, omuhya mulume n’omuhya mukazi basimisize bali bayunviriza bwinja-bwinja ejambo liyumangire oku Biblia lili lyaderhera obuhya. Amakanuni m’amandiko bali bashambalako mw’elyola jambo, marhali mahyahya emwabo. Lero amola mandiko Makala magwerhe kamaro kanene emwabo. Bulagurhe? Bulala bakala hwanza kumakolesa omu kalamo kabo nka mulume n’omukazi bashabene.
2 Konakuguma oku Bakristu bashabene amango bamaba bazere. Mu myaka minene, nkabaga bayunvirhe majambo manene mashambere oku bilolere okulemba abana. Lero, amakanuni mali mw’amola majambo makala mabagwerhere akamaro. Bakala kugwarha omwana bachilembera bowe bonyine. Akola kali kasi kakomeere bwenene! Amango ebintu byamahindamuka omu kalamo kerhu, mandiko maguma managwarha akamaro bwenene emwerhu. Eyola eli nguma omu mpanvu zinarhuma abanaharamya Yehova basoma amandiko nka kulala abami b’omu Izraeli balibwirirwe oku bamakengereko “esiku z’akalamo kabo zoshi.”—Kum. 17:19.
3. Bichi rhwaganirako mu gunola mwazi?
3 Bazere, mugwerhe lukengo lunene Omukristu akagwarha, k’okuderha, okuyigiriza abana benyu oku bilolere Yehova. Aliko mulonzeze kujira binene olekere okubayigiriza bintu binene oku bilolere Mungu werhu. Mulonzeze kubarhabala bamuzigire bwenene. Bichi wakajira y’orhabala abana bawe bazigire Yehova? Mu gunola mwazi, rhwashambala ku makanuni mane me Biblia makakurhabala woyo nka muzere. (2 Ti. 3:16) Rhwashuba kubona nka gurhe bazere baguma b’Abakristu bayungukire omu kukolesa amahano me Biblia.
MAKANUNI MANE MAKARHABALA ABAZERE
Nka gurhe wakarhabala abana bawe akaba onazigana kulonza obwerekezi bwa Yehova n’okubayereka omufano gwinja? (Olole echifungo cha 4, 8)
4. Kanuni kahe kakarhabala abazere bayigirize abana babo kuzigira Yehova kurhenga oku murhima? (Yak. 1:5)
4 Akanuni ka 1: Olonze obwerekezi bwa Yehova. Oheme Yehova akuhe obwengehe okenere y’ogala kurhabala abana bawe bamuzigire. (Osome Yakobo 1:5.) Ye Muntu yenyine okwanene kuhaana amahano. Hali empanvu ziguma zirhumire rhwaderha ntyo. Rhushambalage kw’ebiri. Ey’oburhanzi, Yehova ye muzere murhanzi wagerere mu binene. (Zb. 36:9) N’eya kabiri, empanulo z’obwengehe anahaana buli mango zinalerha enyungu.—Isa. 48:17.
5. a) Bichi olubaga lwa Yehova luli lwahaana omu kurhabala abazere? b) Nk’oku evideo eyerekene, bichi wayigire kugerera okuntu Mwene-werhu na Mwali-werhu Amorim balembere abana babo?
5 Kugerera Echinwa chage n’olubaga lwage, Yehova ali ahereza abazere myazi minene eyumangiire oku Biblia y’okubarhabala balembe abana babo n’okubayigiriza kuzigira Yehova. (Mt. 24:45) Omufano, wakapata amahano menja wakakolesa mali omu myazi ekulikirene ederhere: “Oburhabale oku Mulala” yakulwaga mu myaka minene omu gazeti Amuka! na zene ekal’eli yabonekana oku site yerhu ye Enternete. N’oku jw.org kuli mavideo manene n’enganiro zakarhabala abazere bakolese amahano ma Yehova omu kulemba abana babo.b—Mez. 2:4-6.
6. Nka gurhe muzere muguma achiyunvirhe oku bilolere obwerekezi yewe na mukage bapatire kugerera olubaga lwa Yehova?
6 Bazere banene baderhe oku bagwerhe eshukurani nene oku burhabale Yehova abahere kugerera olubaga lwage. Eshe w’abana muguma oyirikirwe Joe aderhere ntya: “Okulemba bana basharhu omu kuli, karhali kasi kayorohere. Buli mango nyono na mukani, rhunahema Yehova arhurhabale. Kandi rhunazigana kuchiyunva ok’omwazi changwa evideo yarhengere omu kasanzi kakwanene y’arhurhabala rhuhime ehali rhuli rhwageramo. Omu kalamo kerhu, rhunazigana kuhema Yehova amahano.” Joe na mukage babwene oku eyola myazi n’ezola video binarhabala abana babo bayegere Yehova.
7. Bulagurhe kuli kw’akamaro abazere bajire okwabo koshi bayerekane omufano gwinja? (Waroma 2:21)
7 Akanuni ka 2: Obe mufano gwinja. Abana banalolereza abazere babo bwenene kandi banazigana kubayiganya. Kweri nta muzere mushinganyanya obaho. (Ro. 3:23) Aliko chiro akaba ntyo, abazere bagwerhe obwengehe, banajira okwabo koshi yi balekera abana babo omufano gwinja. (Osome Waroma 2:21.) Oku bilolere abana, eshe w’abana muguma aderha ntya: “Abana bali nka shifo enamira buli choshi-choshi.” Ayongerere ntya: “Barhubwira amango rhuli rhwajira ebintu bipingene n’ebi rhunabayigiriza.” Che chirumire akaba rhulonzeze abana berhu bazigire Yehova, obuzigire bwerhu kuye bukwanene bukomere bunabonekane.
8-9. Bichi wayigire kugerera ebinwa bya Andrew n’ebya Emma?
8 Hali njira zinene abazere bakayigiriza mw’abana babo kuzigira Yehova. Yunva ebi mwene-werhu oyirikirwe Andrew okala agwerhe myaka 17 aderhere: “Buli mango abazere bani baliri bambwira oku bili by’akamaro bwenene okusalira. Buli budufu, Darha aliri asalira haguma nani, chiro akaba oku nabaga nasalirire nyenyine. Abazere bani baliri bazigana kunyibusa ntya: ‘Wakasalira Yehova kanene nk’oku onashondere.’ Echola checharhumire nabona okw’esala lili ly’akamaro bwenene emwani, na zene bikala biyorehere okusalira n’okuchiyunva oku Yehova ali Darha onzigiire.” Bazere wee, muyibuke buli mango oku, obuzigire mugwerhe ku Yehova bwakarhabala abana benyu nabo bamuzigire.
9 Rhulole oku mufano gwa Emma. Amango eshe ajahika omulala gwabo, alilekere madeni manene nyina yenyine alikwanene kujuha. Emma aderhere ntya: “Mango manene mama aliri alwisa bwenene mpu y’apata olufuranga, aliko buli mango, aliri ashambala okuntu Yehova anashishikala abakozi bage. Naliri nabona okw’akalamo kage kayerekene oku kweri ayemerere echola. Mama aliri akolesa eby’anahubiri.” Bichi echola chirhuyigirize? Abazere bakayigiriza kugerera omufano gwinja chiro akaba bali omu bibazo.—Gal. 6:9.
10. Kasanzi kahe kanene abazere ba Baizraeli baligwerhe k’okuganira haguma n’abana babo? (Kumbukumbu la Torati 6:6, 7)
10 Akanuni ka 3: Oganire n’abana bawe oku kahunda. Yehova alibwirire Abaizraeli ba mira oku bakwanene kuyigiriza abana babo oku kahunda oku bimulolere. (Osome Kumbukumbu la Torati 6:6, 7.) Abola bazere baligwerhe rozo lunene omu lusiku l’okuganira n’abana babo n’okubarhabala bazigire Yehova n’emirhima yabo yoshi. Omufano, omurhabana w’Omuizraeli akagezeze sa zinene haguma n’eshe omu kasi k’okubyala n’okushalula emyaka. Mwali-wabo naye akagezeze kasanzi kanene omu lusiku omu kurhabala nyina omu kasi k’okuhanga, okusuka, n’okujira amandi makasi m’omu nju. Amango abazere baliri bakola haguma n’abana babo, balikwanene baganire ku myazi minene y’akamaro. Omufano, bakashambere oku ngeso nyinja ya Yehova y’obwinja, n’okuganira oku kuntu aliri abarhabala omulala gwabo.
11. Mango mahe abazere b’Abakristu bakashambala n’abana babo zene?
11 Akalamo ka zene karhali kuguma n’aka mira. Mu bihugo binene, abazere n’abana barhali bapata akasanzi k’okuba haguma omu lusiku. Abazere bakaba bali oku kasi, n’abana nabo bakaba bali oku masomo. Bobola abazere bakwanene kulonza ebisanzi by’okuganira haguma n’abana babo. (Efe. 5:15, 16; Flp. 1:10) Bakagwarha akasanzi k’okujira ntyo, amango m’obuharamye b’omulala. Musole muguma oyirikirwe Alexander aderhere ntya: “Darha anazigana kujira emipango elolere obuharamye b’omulala, na nta nachintu aleka chirhubuze okugeza akasanzi haguma. N’enyuma w’okuyiga, rhwanaganira oku bindi by’akamaro.”
12. Bichi erhwe ly’omulala akwanene kuchihangana kujira amango m’obuharamye b’omulala?
12 Akaba oli rhwe ly’omulala, bichi wakajira y’abana bawe bayinja basiimira obuharamye b’omu mulala? Wakayiga haguma n’abana bawe echitabu cherhu chihyahya chikwirire Siimira Akalamo Esiku n’Amango! Echola chitabu chakabarhabala bibayorohere muganire haguma. Olonzeze abana bawe baganire okuntu bali bachiyunva n’ebi balazize, bobola orhakolesaga akasanzi k’obuharamye b’omulala omu kubadubulira kw’ebinwa changwa kubagorora. Kandi, omenye wayunva oburhe amango abana bawe bamaderha chintu chilebe chirhafarhene n’amakanuni me Biblia. S’ahubwe, ogwarhe eshukurani bulala bali bakubwira kweri okuntu bali bachiyunva ona bahebe omurhima bachiyunve huru okuderha okuntu bali bachiyunva koshi-koshi. Wakagala kurhabala bwinja abana bawe amango wamamenya kweri okuntu bali bachiyunva.
Nka gurhe abazere bakakolesa obulemi omu kuyigiriza abana babo oku bilolere engeso zinja za Yehova? (Olole echifungo che 13)
13. Kandi kasanzi kahe abazere bagwerhe bakarhabala mw’abana babo bayegere Yehova?
13 Bazere wee, mulonze ebisanzi omu lusiku mwakarhabala mw’abana benyu bayegere Yehova. Birhahemere mp’olingirize amango muli mwayiga Ebiblia ku mamango monyine okwanene kubayigiriza oku bilolere Mungu werhu w’obuzigire. Yunva ebi nyina w’abana muguma oyirikirwe Lisa aderhere: “Rhunakolesa buli chintu chili eburhambi bwerhu omu kuyigiriza abana berhu oku bilolere Yehova n’obulemi. Omufano, amango embwa yerhu yaliri yajira chintu chilebe ch’okushekesa abana, rhwaliri rhwababwira oku Yehova ali Mungu w’omwishingo. Arhurhabere nerhu rhugwarhe omwishingo rhunasiimire ebintu bisomeze.”
Bazere wee, ka mumenyere abera b’abana benyu? (Olole echifungo 14)d
14. Bulagurhe kuli kw’akamaro abazere barhabale abana babo bachishoge abera n’obwengehe? (Mezali 13:20)
14 Akanuni ka 4: Orhabale abana bawe bagwarhe abera benja. Echinwa cha Mungu chiyerekene wazi okw’abera bakarhushunika rhujire ebintu binja changwa ebibi. (Osome Mezali 13:20.) Bazere wee, ka muyinji abera b’abana benyu? Ka wachigerere kuba haguma nabo muhanze mwageza akasanzi haguma? Bichi wakajira y’orhabala abana bawe bajire obwira haguma na balala bazigiire Yehova? (1 Ko. 15:33) Wabarhabala bachishoge bwinja abera omu kuhamagala bene-berhu changwa bali-berhu bagwerhe obwira bukomere haguma na Yehova, babe haguma nenyu n’abana benyu amango muli mwajira bintu bilebe omu mulala.—Zb. 119:63.
15. Bichi abazere bakajira yi barhabala abana babo bagwarhe abera benja?
15 Eshe w’abana muguma oyirikirwe Tony, ashambere oku biyewe na mukage bajirire omu kurhabala abana babo bagwarhe abera benja. Aderhere ntya: “Mu myaka minene, nyono na mukani rhwahamagere bene-berhu na bali-berhu, emisole n’abashaja barhengere omu micho elengene. Rhwanasangira akalyo haguma nabo n’okujira obuharamye b’omulala haguma nabo. Y’enjira nyinja eyola y’okumenya abantu bazigiire Yehova banamukolera n’omwishingo. Rhwapatire omugisho g’okubera omu mwerhu haguma n’abemangizi b’omuzunguluko, bamisyonere n’abandi. Ebi bagereremo, obushiru bwabo, n’engeso yabo y’okuchihaana, byarhabere abana berhu bayegere Yehova.” Bazere wee, muchihangane bwenene kurhabala abana benyu bagwarhe abera benja.
OMENYE WAHEZA OBULANGALIRE!
16. Gurhe byakaba nk’omwana arhalonzeze kukolera Yehova?
16 Gurhe si, chiro akaba oku wajirire okwawe koshi wakagala, mwana wawe muguma anaderha oku arhalonzeze kukolera Yehova? Woyo nka muzere, orhawazaga oku wagambirwe. Yehova arhuhere rhweshi kuheba han’omwana wawe oluhembo l’obuhuru b’okuchishoga, k’okuderha obuhashe b’okuchishoga akaba rhwakolera Mungu changwa nanga. Akaba omwana wawe alekere Yehova, omenye waheza obulangalire oku lusiku luguma nj’amugalukira. Oyibuke omufano g’omwana w’engaligali changwa w’echirara. (Lu. 15:11-19, 22-24) Oyola musole alijirire bintu binene bibi aliko buzinda, ayinja galuka. Bantu baguma bakaderha “ok’ogola gwaliri mufano konyine.” “K’echola chakarhengerera kweri omu kalamo kerhu?” Nechi kweri, chakarhengerera! Echola chalihikire musole muguma oyirikirwe Elie.
17. Nka gurhe ebi Elie ageragamo byakuhebere omurhima?
17 Oku bilolere abazere bage, Elie aderhere ntya: “Balijirire okwabo koshi omu kuntabala yi nzigira Yehova n’Echinwa chage Ebiblia. Aliko omu myaka yani y’olubiruko, nahwanza kuba chigamba.” Elie ahwanza kujira ebintu bibi omu bwibisho omu kalamo kage, abazere bage bachihangana kumurhabala agenderere kuzigira Yehova, aliko arhabayunvirizaga. Amalire kurhenga ahamwabo, agenderera kujira ebintu bibi bwenene. Aliko chiro akaba ntyo, mango maguma aliri aganira oku bilolere Ebiblia na bera bage. Elie aderhere ntya: “Oku naliri nagenderera bwenene kuderha eju ya Yehova, ku nanaliri nagenderera kumuwazako. Kubuyabuya aliko bwinja-bwinja, emburho ze Biblia z’okuli zalilyamire omu murhima gwani, emburho abazere bani bayinjaga bachihangana kubyala omu murhima gwani zahwanza kukula.” Mu kasanzi kaguma ntya, Elie agaluka omu kuli.c Waza mwishingo gungana gurhe abazere bage baligwerhe bulala balichihanganire kumuyigiriza kuzigira Yehova kurhenga achili mwana mudorho!—2 Ti. 3:14, 15.
18. Gurhe ochiyunvirhe oku bilolere abazere banakola bwenene omu kuyigiriza abana babo bazigire Yehova?
18 Bazere wee, Yehova abahere olukembo lwinja bwenene, k’okuderha, l’okulemba echizazi chihyahya ch’abanaharamya Yehova. (Zb. 78:4-6) Akola karhali kasi kayorohere, rhunababwirire koko okuntu muli mwachihangana bwenene kurhabala abana benyu! Mukagenderera kujira okwenyu koshi omu kurhabala abana benyu bazigire Yehova n’okubayigiriza bamukenge, mwachizera oku Darha w’obuzigire w’embingu asimiswa.—Efe. 6:4.
OLWIMPO 135 Yehova Anakuomba “Ukuwe na Hekima”
a Abazere b’Abakristu banazigira bwenene abana babo. Banakola bwenene omu kushishikala abana babo bagwarhe ebi bakenere banagwarhe n’obusime. Ech’akamaro kulusha, abola bazere bali barhabala abana babo bazigire Yehova bwenene. Gunola mwazi gwaganira ku makanuni mane makarhabala abazere bahikire ogola muhigo.
b Olole oku jw.org evideo Yehova Arhuyigirize Kulemba Abana Berhu.
c Olole omwazi “Ebiblia Enahindamula Akalamo k’Abantu” omu Munara g’Omulanzi gwa Lusiku 1, Mwezi gwa 4, 2012.
d AMAFASIRIYO M’EFOTO: IY’ahikira kumenya bwinja abera b’omwana wage, eshe w’abana ali asharha e basket haguma n’omugala n’abera bage.