Hali Ebi Wakachiyunguka omu Nyigirizo z’Omusinji ze Bibliya Si?

1. Gurhe enyigirizo ze Bibliya zahindamwire akalamo kawe kurhenga amango oyunva obukweri ob’oburhanzi?

ENYIGIRIZO z’omusinji ze Bibliya zahindamwire akalamo kerhu. Omufano, amango rhumenya okw’ezino lya Mungu ye Yehova, rhwarhola entambu y’okuba bera-bage. (Isa. 42:8) Amango rhumenya obukweri oku bilolere omuntu wafire, rhurhachigendereraga kuchibaza akaba abazigirwa berhu bafire baba eyi bali bateseka. (Muh. 9:10) N’amango rhumenya oku bilolere e Paradizo oku gulu Mungu alaganyize, rhurhachigendereraga kuyubaha oku bilolere amango gerhu gayinjire. Rhwachizera oku rhwakalama siku zinene, s’arhali kasanzi kageke konyine k’okuderha myaka 70 changwa 80; s’ahubwe esiku n’amango.​—Zb. 37:29; 90:10.

2. Nka gurhe olwandiko lwa 2 Petro 1:12, 13 luyerekene oku chiro n’Abakristu bakulire ekiroho bakayunguka n’enyigirizo z’omusinji ze Bibliya?

² Rhurhakwanene kuyibagira kangana gurhe enyigirizo z’omusinji ze Bibliya zili z’akamaro. Omu maruba mage ma kabiri, entumwa Petro ayandikiraga Abakristu “babaga eyi baserere omu kuli.” (Osome 2 Petro 1:12, 13.) Aliko agola mango, haliri abantu babi omu chibaga baliri balonza kuhabusa bene-berhu na bali-berhu barhenge omu kuli. (2 Pe. 2:1-3) Petro alilonzeze kukomeza bene-babo na bali-babo omu kuntu abarhabale bagale kulwisa amawazo m’obubeshi g’abola bantu babi. Omu kujira ntyo, abayibusa ziguma omu nyigirizo babaga bayigire. Ezola nyigirizo zakabarhabere bagale kuyorha bemana ku Yehova kugera oku buzinda.

3. Fasiriya bulagurhe Abakristu boshi bakwanene kugenderera kuwaza oku nyigirizo z’omusinji ze Bibliya.

³ Chiro akaba rhwamamala myaka minene eyi rhuli omu kuli, hali ebintu bihyahya rhwakachiyigaccp kugerera enyigirizo z’omusinji ze Bibliya. Rhurhole omufano: Omuntu okomere akasi k’okuvuya n’oliwayiga, boshi bakakolesa bulunge buguma yi bavuya bilyo bilebe. Aliko okw’esiku yizanagera, oyola muntu okomere akasi k’okuvuya akaba ey’ayigire kukolesa obola bulunge bon’obola omu njira zirhali kuguma y’avuya ebilyo bilokere omu njira zihyahya. Intyo kon’okola, abamamala siku zinene yibakolera Yehova bakayiga ebintu bihyahya bilengene omu nyigirizo z’omusinji ze Bibliya kulusha balala bachirhondera kuziyiga. Bula gurhe? bulala ehali yerhu n’engabane rhuli rhwakola omu kasi ka Yehova byakashobokana oku zahindamukire kurhenga rhubatizwe. Amango rhwamawaza oku nyigirizo ze Bibliya rhwayigaga mira, rhwakarhegera oku hali enjira zihyahya zakarhurhabalamo zene. Leka rhulole bichi Abakristu bamamala myaka minene bali bakolera Yehova bakayiga kugerera nyigirizo esharhu z’omusinji ze Bibliya.

YEHOVA YE MULEMI

4. Gurhe okumenya oku Yehova ye Mulemi kwahumire oku kalamo kerhu?

⁴ “Owayumbakaga ebintu byoshi ali Mungu.” (Ebr. 3:4) Rhumenyere okw’egulu na byoshi bilamiremo byakolagwa n’Omulemi w’obwengehe boshi n’obuhashe bukulu bwenene. Arhulemere, bobola arhumenyere bwinja bwenene na kulusha. N’echindi, anarhulagako. Ayinji ebili binja ku rhwewe. Okufa cha kumenya obola bukweri, oku Yehova ye Mulemi, kwarhuhumire bwenene oku murhima, kwarhuma akalamo kerhu kagwarha echi kamalire.

5. Bukweri buhe bwakarhurhabala kukuza engeso y’obwirhohye? (Isaya 45:9-12)

⁵ Okumenya obukweri buyerekene oku Yehova ye Mulemi, kandi kwakarhuyigiriza oku rhukwanene kuba berhohye. Omufano, mango maguma Yobu aderha binwa bilebe bibihire oku bilolere Yehova, ayibagira bichi bili by’akamaro kanuni, ahwanza kuchiseza k’obwenge n’okulonza kuyerekana oku agwerhe esheriya. (Yob. 38:1-4) Aliko Yehova amuyibusa oku ye Mulemi ogala byoshi. Echola charhabala Yobu arhegere oku buli chintu Yehova anajira esiku zoshi chiba chinja. Buzinda omu kuwaza kw’ebyola, omulebi Isaya ayandika ntya: “Ebumba lyakabwira oli walibumba: ‘Mpu bichi oli wajira?’”​—Osome Isaya 45:9-12.

6. Mangochi byakaba eyi bili by’akamaro bwenene okuwaza oku bwengehe n’obukulu b’Omulemi werhu? (Olole n’efoto.)

⁶ Amango omuntu amamala myaka minene ey’ali akolera Yehova, hali oku akarhondera kulangalira amawazo mage yewe yenyine ahali h’okulangalira Yehova n’obwerekezi ali arhuha. (Yob. 37:23, 24) Bobo si nka gurhe okuwaza oku bwengehe bwa Yehova burhaherhe lugero, obukulu bwage, n’okuyibuka oku ye Mulemi kwakarhabala omuntu? (Isa. 40:22; 55:8, 9) Okurhegera oku amawazo ma Yehova ma menja kulusha amage kwamurhabala ayorhe mwirhohye.

7. Bichi Rahela alijirire y’agala kuyemera obwerekezi buhyahya?

⁷ Rahela olamire omu Slovenie, abwene k’okuwaza oku bilolere Omulemi wage kwamurhabere agale kuyemera obwerekezi buhyahya bwahanirwe omu lubaga lwa Yehova. Aderhere ntya: “Hali amango birhaliri byanyorohera kuyemera esimikiro abali bayerekeza barholere. Omufano, chiro akaba oku nali nalolere Eraporo ya 8 ye Baraza Lirhambwire ya 2023, Oburhanzi nabonaga mwene-werhu ageza ejambo anaherhe endevu byalindumire bwenene oku murhima. N’eju y’echola nahema Yehova antabale ngale kuyemera obola bwerekezi buhyahya.” Rahela ayemera ok’Omulemi w’embingu n’egulu Yehova, aherhe obuhashe bushinganene b’okuyerekeza olubaga lwage omu njira ekwanene. Akaba obwene oku bikukomerere kuyemera amafasiriyo mahyahya oku bwirhohye, chakarhuma orhawaza oku bwengehe n’obuhashe Omulemi werhu aherhe?​—Ro. 11:33-36.

BULAGURHE MUNGU ALEKERERE AMALIBUKO?

8. Okumenya bulagurhe Mungu alekerere amalibuko kwarhulerhere nyungu zihe?

⁸ Bulagurhe Mungu alekerere amalibuko? Bantu baguma bagambirwe kupata echishubizo kw’echola chibazo, bayunvirhe oburhe bunene n’okuwaza oku Mungu arhabaho chiro! (Mez. 19:3) Aliko, woyo wayigire okw’echaha rhwashokolaga n’okurhashinganana bye birhuma rhwalibuka s’arhali Yehova. Kandi wayigire k’okulembera kwa Yehova kwarhabere amamiliyoni m’abantu bamumenye n’okuchibonera bowe bonyine gurhe Yehova nj’amala amalibuko loshi-loshi. (2 Pe. 3:9, 15) Obola bukweri bwakurhulirize n’okurhuma waba hofi-hofi naye.

9. Mu hali zihe birhuhemere kuyibuka empanvu zirhumire Yehova alekerera amalibuko?

⁹ Omu kulindira oku Yehova amala amalibuko, birhuhemere rhulembere. Chiro akaba ntyo, rhwewe changwa omuzigirwa werhu amango rhwamahurana ebinjira, rhwamakolerwa kubi, changwa rhwafisize, hali oku rhwakachibaza bulagurhe Yehova arhajirire ech’ajira juba-juba. (Hab. 1:2, 3) Omu bihe bili nk’ebyola, kuli kwinja okuwaza bichi birhumire Yehova ayemera abantu benja balibuke.a (Zb. 34:19) Kandi kuli kwinja okuwaza oku muhigo gwa Yehova g’okumala amalibuko liguma na liguma.

10. Bichi byarhabere Anne apate echirhulirizo enyuma y’okufisa nyina?

¹⁰ Okumenya obukweri oku bilolere amalibuko kunarhabala kulembera. Anne, olamire oku chizimba che Mayotte omu Océan Indien, aderhere ntya: “Mu myaka migeke echizindire kugera okufisa mama kwalingayisize bwenene. Aliko, naligenderere kuyibuka okw’arhali Yehova yerhumire haba amalibuko. Aherhe enyorha y’okumala buli buko bw’amalibuko, n’okufula abazigirwa berhu. Okuwaza k’obola bukweri kunazigana kumpa omurhula g’omu bwenge n’okumpira omurhima.”

11. Nka gurhe okumenya empanvu zirhumire Yehova alekerera amalibuko kwakarhurhabala rhugenderere kuhubiri?

¹¹ Okumenya obukweri oku bilolere bulagurhe Mungu alekerere amalibuko kwakarhurhabala rhugenderere kuhubiri. Amalire kuyandika ok’okulindira kwa Yehova kunalerha obuchunguke bwa balala boshi bahungamire, Petro ayandika ntya: “Muwaze bwenene mukwanene kuba bantu nyabachi omu bijiro by’olugenzi luchere n’ebijiro by’okuchihana bwenene emwa Mungu.” (2 Pe. 3:11) Mw’ebyola bijiro “by’okuchihana emwa Mungu” hali akasi kerhu k’amahubiri. Kuguma na Darha, rhuba rhuzigire abantu. Rhulonzeze balame omu gulu lihyahya lya Mungu lili mw’ehaki. Yehova achili alindira y’aha abantu b’omu eneo yenyu orozo l’okumuharamya. Luli lukengo lunene okukola haguma na Mungu n’okurhabala bantu banene koshi byakashobokana bamumenye embere obuzinda buyinje!​—1 Ko. 3:9.

RHULAMIRE OMU SIKU Z’OBUZINDA”

12. Nka gurhe okumenya oku rhulamire omu siku z’obuzinda kwarhulerhere enyungu?

¹² E Bibliya efasiriye bwinja-bwinja gurhe abantu bakabere omu “siku z’obuzinda.” (2 Ti. 3:1-5) Omu kulola gurhe abantu barhuzungulukire bali bachiheka, rhuli rhwachibonera gurhe obola bulebi buli bwayenera. Amango rhwamabona gurhe abantu bali bagenderera kubiha, byanashuba kurhuyemeza bwenene ok’Echinwa cha Mungu chiba ch’okuli.​—2 Ti. 3:13-15.

13. Bibazo bihe rhwakachibaza omu kuwaza oku mufano gwa Yesu guli omu Luka 12:15-21?

¹³ Okumenya oku rhulamire omu siku z’obuzinda kunarhurhabala rhushube rhuseze obwenge bwerhu oku bintu by’akamaro bwenene. Rhwakabona bulagurhe bili by’akamaro okujira ntyo kugerera omufano gwa Yesu guli omu Luka 12:15-21. (Osome.) Bichi byarhumaga bayirika omulume w’omuchire okw’ali “chinganyi”? Arhali mpu bulala aligwerhe ebirugu binene, s’ahubwe bulala alisezeze obwenge oku birhali by’akamaro bwenene. Alichilundikire “ebirugu aliko ey’arhali muchire emwa Mungu.” Okukolesa ebisanzi ntyo buzira bwengehe lyaliri gosa linene bwenene bulala arhalichigwerhe siku zinene z’okulama. Mungu amubwira ntya: “Obudufu bwa zene waheza akalamo kawe.” Zene, ok’obuzinda bwa linola gulu libi buli bwayegera, rhukwanene kuchibaza ntya: ‘Emihigo yani enayerekene oku ndi nakolesa akasanzi kani oku bwengehe? Mihigo nyabachi ndi narhabala abana bani bachihebereho? Ndi nakolesa emisi yani, ebisanzi byani, ebirugu byani omu kuchilundikira obuhirhi nyono nyenyine changwa si omu kuchibikira obuhirhi omu mbingu?’

14. Nka gurhe ebi Miki ageragamo, byakarhurhabala kubona akamaro k’okuyibuka oku rhulamire omu siku z’obuzinda?

¹⁴ Amango rhwamayibuka oku kweri rhulamire omu siku z’obuzinda echola chakarhurhabala rhumenye gurhe rhwakolesa akalamo kerhu. Ebyola by’ebyahikiraga mwali-werhu muguma oyirikirwe Miki. Aderhere ntya: “Amango imala kusoma universite, omurhima gwani gwahwanza kunshunika inkole akasi kakampere orozo l’okuyiga oku bilolere enyama. Kandi naliherhe omuhigo g’okukola akasi k’obupainiya n’okuja kurhabala ahali obulagirire bunene bw’abahubiri. Bera-bani bakulire ekiroho bampanula imbwaze bwinja, indole akaba akola kasi ndi nalonza kukola kakanyemerera kweri inyeneze emihigo yani y’ekiroho. Banyibusa oku linola gulu rhulamiremo hano hofi lyahikira obuzinda. Bashuba kunyibusa, oku omu gulu lihyahya, nji nayiga oku bilolere enyama esiku n’amango. Eju y’echola nachishoga kurhagenderera kulonza akasi kampema ingenderere kusoma binene. Ahubwe nachishoga kujira eformasiyo erhantola bisanzi binene, yanantabala impate obufundi nakakolesa.” Echola charhuma napata akasi k’okuntabala kugenderera n’obupainiya na buzinda nahamira omu Equateur emunda haliri obulagirire bunene bw’abahubiri. Zene Miki n’eba bali bakola akasi k’omuzunguluko mw’echola chihugo.

15. Nka gurhe omufano gwa Yakobo guyerekene oku rhurhakwanene kuleka kurhabala abantu barhaza kuyerekana oku basimisizwe n’emyazi minja? Ohane omufano. (Olole n’efoto.)

¹⁵ Rhurhakwanene kuvunika omurhima amango abantu barhali bayunviriza emyazi minja. Abantu banahindamuka. Waza oku mufano gwa mwene-wabo Yesu yekola Yakobo. Yakobo alibwene gurhe Yesu akula, gurhe aba Masiya, n’okuyigiriza omu kuntu nta windi muntu yeshi-yeshi wayigirize nka yewe. Chiro akaba ntyo, myaka minene yagera na Yakobo arhabaga mwanafunzi wa Yesu. Yesu amalire kufuka, Yakobo aja aba mwanafunzi wage ogwerhe obushiru!b (Yoh. 7:5; Gal. 2:9) Orhalekereragaho kurhabala abantu b’omulala gwawe barhaza kuyerekana oku basimisizwe, na balala oli wahubiri barhanalonza kukuyunviriza. Oyibuke oku rhulamire omu siku z’obuzinda che chirhumire akasi kerhu kali k’okukola juba-juba. Eby’oli wababwira zene hali oku nji byakabarhabala agandi mango, nkabaga enyuma w’amalibuko makulu okurhondera.c

OGENDERERE KUGWARHA ESHUKRANI OKU NYIBUSO ZA YEHOVA

16. Gurhe wayungukire n’enyibuso za Yehova? (Olole echisanduku “Obikolese omu Kurhabala Abandi.”)

¹⁶ Biguma omu bilyo by’ekiroho rhunahabwa biba birheganyizwe abantu barhasaga kuyunva obukweri b’omusinji bwe Bibliya. Omufano, amajambo me Bibliya ma buli boso, evideo, myazi miguma y’oku jw.org, n’amagazeti g’abantu boshi, biba birheganyizwe ahanene abantu barhali Bahamirizi. Chiro akaba ntyo, rhunayunguka n’ezola nyibuso. Zinakomeza obuzigire bwerhu ku Yehova, obwemere bwerhu omu Chinwa chage, n’okurhurhabala rhugale kuyigiriza bwinja abandi obola bukweri b’omusinji.​—Zb. 19:7.

17. Mu hali zihe wakawaza oku nyigirizo z’omusinji ze Bibliya?

¹⁷ Rhwewe Bahamirizi ba Yehova, rhunasima bwenene amango rhwamapata emyangaza mihyahya oku bukweri bwe Bibliya. Aliko chiro akaba ntyo, rhujira eshukrani nene oku nyigirizo z’omusinji ze Bibliya zarhurhabalaga rhuyegere Yehova ob’oburhanzi. Nka bigerere amango rhwahanzika oku mawazo gerhu rhwenyine ahali h’okuyemera obwerekezi burhengere oku lubaga lwa Yehova, oku bwirhohye rhukwanene kuyibuka oku Yehova Omulemi werhu ogala byoshi, na Mungu w’obwengehe yeli ayerekeza olubaga lwage. Amango rhwabo changwa omuzigirwa werhu, rhuli rhwahurana n’ebibazo rhwakagenderera kulindira n’okuyibuka empanvu zirhumire Yehova alekerera amalibuko. Amango rhuli rhwachishoga gurhe rhwakolesa ebisanzi byerhu n’ebirugu byerhu, rhwakayibuka oku rhulamire omu siku z’obuzinda n’eju y’echola ebisanzi biyorhere bikola bigehere. Leka enyibuso za Yehova zigenderere kurhukomeza, kurhuha obushiru, n’okurhujira bengehe.