MWAZI G’OKUYIGA 49
Yehova Ashubiza oku Masala Mani Si?
“Nji mwampamagala, mwanayinja munsalire, nanabayunviriza.”—YER. 29:12.
OLWIMPO 41 Nkuhemere Oyunvirize Esala Lyani
OKU BUGEKEa
1-2. Bulagurhe rhwakawaza oku Yehova arhali ashubiza amasala merhu?
“OGWARHE busime bunene mu Yehova, naye nji akuyenezeza enyifinjo z’omurhima gwawe.” (Zb. 37:4) Echola chili chilagane chisimisize bwenene! Aliko si, rhukwanene kuwaza oku Yehova arhuhereza buli choshi rhwamuhemere mw’akola kasanzi kanako? Bulagurhe bili by’akamaro bwenene okuchibaza echola chibazo? Rhuganire kw’eyila mifano ekulikireho. Mwali-werhu orhaza kushabwa ali asalira y’aja kusoma Amasomo m’Abayeneza Injili y’Obwami. Aliko myaka minene yanagera, eyi barhamuhamagere kw’amola masomo. Mwene-werhu ochili musole, ali asalira Yehova amuhereze emisi y’okulwisa obulwala bukomere y’agala kukola binene omu chibaga. Aliko amagala mage managenderera kubiha. Abazere b’Abakristu bali basalira y’omwana wabo agenderera kuyorha omu kuli. Aliko omwana wabo anachishoga kuleka kukolera Yehova.
2 Nkabaga nawe wachigerere kuhema Yehova chintu chilebe, aliko orhasaga kuchibona. Eju y’echola wakawaza oku Yehova anashubiza oku masala m’abandi aliko arhashubiza oku mawe. Nkabaga wakawaza oku hali chintu chibi wajirire. Mwali-werhu oyirikirwe Janiceb alichiyunvirhe ntyo. Yewe n’eba baliri basalira Yehova bulala kweri balilonzeze kuja kukolera oku Beteli. Mwali-werhu aderhere ntya: “Nalichizerere oku rhurhalegama kuja kukolera oku Beteli.” Aliko emyezi yahinduka myaka, n’oyola mulume na mukage barhabahamagalaga oku Beteli. Mwali-werhu Janice aderhere ntya: “Nayunva ngwerhe omugayo ntanamenyaga bichi nkwanene kujira. Nachibaza bichi najirire birhasimisize Yehova. Naliri nasalira bwenene yinja oku Beteli. Bulagurhe arhaza kushubiza esala lyani?”
3. Bichi rhwaganirako mu gunola mwazi?
3 Mango maguma rhwakachibaza akaba Yehova anayunviriza chiro amasala merhu. Balume baguma bemana b’omu mango ma mira nabo balichiyunvirhe ntyo. (Yob. 30:20; Zb. 22:2; Hab. 1:2) Bichi byakakurhabala ochizere oku Yehova nj’ashubiza oku masala mawe? (Zb. 65:2) Yirhugala kushubiza kw’echola chibazo, birhuhemere rhurhange rhushubize kw’ebila bibazo bikulikire: 1) Bichi rhwakalangalira emwa Yehova? 2) Bichi Yehova alonzeze rhujirage? 3) Bulagurhe, nkabaga birhuhemere rhusalire oku bilolere ebindi bindi bintu?
BICHI RHWAKALANGALIRA EMWA YEHOVA?
4. Nk’oku olwandiko lwa Yeremia 29:12 luderhere, bichi Yehova alaganyize oku ajira?
4 Yehova arhulaganyize oku ayunviriza amasala merhu. (Osome Yeremia 29:12.) Mungu werhu arhuzigire bulala rhunamukolera oku bwimana, bobola buli mango ayunviriza amasala merhu bwinja bwinja. (Zb. 10:17; 37:28) Aliko echola chirhayerekene oku buli mango arhuhereza buli choshi rhwamuhemere. Nkabaga byakarhuhema kulingiriza kuhika omu gulu lihya-hya yi rhuhabwa bintu bilebe rhwamuhemere.
5. Bichi Yehova anaba eyi agwerhe omu bwenge amango ali ayunviriza amasala merhu? Fasiriya.
5 Yehova anaba agwerhe ogwage muhigo omu bwenge amango ali ayunviriza amasala merhu. (Isa. 55:8, 9) Chiguma omu bintu alonzeze chili oku, egulu lyoshi liyunjule abantu bamukengere birhengere oku murhima yewe nka Murhegesi wabo. Aliko Shetani aderhere oku abantu bakagwarha obusime nka bachiyerekeze bowe bonyine. (Mwa. 3:1-5) Omu kuyerekana oku Ibilisi ali mubeshi, Yehova alekere abantu bachiyerekeze bowe bonyine. Chiro akaba ntyo, oburhegesi bw’abantu bwalerhere bibazo binene zene. (Muh. 8:9) Rhumenyere oku Yehova arhamala ebila bibazo byoshi rhuli rhwahurana nabyo zene, nk’amalire ebyola bibazo, baguma bakaderha oku oburhegesi bw’abantu buli bwakola bwinja, oku bunagwerhe obuhashe b’okumala ebibazo byoshi by’abantu.
6. Bulagurhe rhukenere kuchizera oku ebi Yehova anajira buli mango biba by’obuzigire binakwanene?
6 Nkabaga Yehova akashubiza oku masala merhu omu njira rhurhali wazize. Omufano, amango Mwami Hezekia alilwere bwenene, alilakirire Yehova amuhema amurhabale afume obulwala bwage. Omu kumushubiza, Yehova amufumya. (2 Fa. 20:1-6) Oku bwindi, amango entumwa Paulo alakirira Yehova amukulire “omushaki omu mubiri,” nkabaga echibazo ch’amagala, Yehova arhamalaga echola chibazo. (2 Ko. 12:7-9) Rhuganire kandi oku mufano gw’entumwa Yakobo na Petro. Mwami Herode alilonzeze kubayirha bombi. Echibaga chaliri chasalira eju ya Petro na Yakobo. Aliko Yakobo ayirhwa s’aliko Petro yewe ayokolwa na malaika. (Mdo. 12:1-11) Nkabaga rhwakachibaza, ‘bulagurhe Yehova alilekere Yakobo afe, aliko Petro yewe nanga?’ Ntacho Ebiblia ebiderhereko.c Rhwakachizera oku, enjira za Yehova ‘zirhafunda kuba z’okunali haba nakatyu.’ (Kum. 32:4) Kandi rhumenyere oku Yehova alizigire Petro na Yakobo. (Ufu. 21:14) Nkabaga mango maguma, Yehova akashubiza amasala merhu omu njira rhurhali wazize. Bulala rhumenyere oku Yehova akashubiza amasala merhu omu njira y’obuzigire n’omu kunali, echola chirharhuma rhwaderha binene oku kuntu achishogere kushubiza amasala merhu.—Yob. 33:13.
7. Bichi rhuli rhwachihangana kuchilangako, na bulagurhe?
7 Rhunachihangana okurhahuzanya ehali yerhu n’ey’abandi. Omufano, nkabaga rhwakahema Yehova arhurhabale ku chintu chilebe rhwanachiderha wazi wazi omu sala, aliko nkabaga rhurhapata echishubizo oku sala lyerhu. Buzinda rhwanarhegera oku hali muntu mulebe wahemaga ebyola bintu byen’ebyo, binashushire oku Yehova ashubize oku sala lyage. Mwali-werhu oyirikirwe Anna alichibwenere ehali eli nk’eyola. Aliri asalira oku eba Matthew, afume akansere. Mw’agola mango man’amola, haliri bali-berhu babiri bashajire balilwere. Anna, asalirira bwenene eba Matthew n’abola bali berhu bombi. Abola bali-berhu bowe bafuma aliko Matthew yewe afa. Burhanzi, mwali-werhu Anna achibaza akaba abola bali-berhu bafumire bulala Yehova abarhabere. N’akaba ntyo kubili, bulagurhe arhayunvirizaga amasala mani m’okumuhema afumye bani? Okuderha okuli rhurhakamenya gurhe abola bali-berhu babiri bafumaga. Echi rhumenyere chili oku Yehova nj’amala ebibazo byoshi binarhubabaza, kandi ahigirire kufuula bera bage boshi bafire.—Yob. 14:15.
8. a) Nk’oku olwandiko lwa Isaya 43:2 luderhere, gurhe Yehova ali arhushigikira? b) Nka gurhe esala lyakarhurhabala amango rhuli rhwahurana ebigeregezo bikomere? (Olole evideo Sala Inatusaidia Tuvumilie (Esala Linarhurhabala Rhugale Kulembera).
8 Buli mango Yehova arhurhabala. Yewe nka Darha muzigirwa, Yehova arhasima kurhubona yirhwalibuka. (Isa. 63:9) Chiro akaba ntyo, arharhulanga oku bigeregezo byoshi byakahuzanywa n’enyinji changwa n’ebirimi by’omuliro. (Osome Isaya 43:2.) Aliko, arhulaganyize oku arhurhabala “rhubiyambuke.” Kandi chiro akaba rhugwerhe ebigeregezo bili gurhe zene, Yehova arhurhabala rhugenderere kumukolera. Kandi Yehova anarhuhereza eroho lyage lichesibwa ligwerhe emisi yirhugenderera kulembera. (Lu. 11:13; Flp. 4:13) Naho rhwanaja rhwachizera oku buli mango nj’arhuhereza kweri, ebi rhukenere yirhugenderera kuyorha bemana emwage.d
BICHI YEHOVA ALONZEZE RHUJIRE?
9. Nk’oku olwandiko lwa Yakobo 1:6, 7 luyerekene, bulagurhe rhunachizera oku Yehova arhurhabala?
9 Yehova alonzeze rhumulangalire. (Ebr. 11:6) Mango maguma rhunachiyunva oku ebibazo byerhu birhukomerere omu kuntu rhurhakagala kubilwisa. Nkabaga rhwakagwarha engangane oku Yehova arharhurhabala. Aliko Ebiblia erhubwirire oku kugerera emisi ya Mungu rhwakagala “kushona echibambazi.” (Zb. 18:29) Bobola ahali h’okugwarha engangane, rhukwanene kusalira n’obwemere boshi, eyi rhuchizerere oku Yehova ashubiza oku masala merhu.—Osome Yakobo 1:6, 7.
10. Lerha omufano guyerekene obushiru rhukenere kugwarha enyuma y’okuhema Yehova oburhabale omu sala.
10 Yehova alonzeze rhukole nk’oku rhwamuhemere omu masala merhu. Omufano, mwene-werhu akahema Yehova amurhabale apate oruhusa l’okuja oku mbuganano ye eneo. Gurhe Yehova akashubiza kw’elyola sala? Yehova akahereza oyola mwene-werhu obushiru akenere y’agala kuja kuhema omukulu wage w’akasi oruhusa. Aliko oyola mwene-werhu agenderera kuja emw’oyola mukulu wage w’akasi kuja kuhema oruhusa. Nkabaga kandi, byamuhema kujirantyo turu zinene. Changwa nkabaga byakamuhema agombolane n’owindi muntu esiku z’okukola. Kandi akaba ntyo kubihemere, akarhola ekonje nji barhamulipa.
11. Bulagurhe birhuhemere kusalira kanene oku bilolere ebirhulazize?
11 Yehova alonzeze rhumusalire kanene omu kumubwira ebirhulazize. (1 Te. 5:17) Kuguma n’oku Yesu aderhaga omu binwa byage, maguma omu masala merhu marhashubizwa aho han’aho. (Lu. 11:9) Bobola, omenye wavunika omurhima! Rhusalire ebirhengere oku murhima na turu zinene. (Lu. 18:1-7) Amango rhwamagenderera kusalira oku bilolere chintu chilebe, rhwanayereka Yehova oku echola chintu chili ch’akamaro bwenene emwerhu. Kandi rhwanayerekana oku rhugwerhe obwemere oku akarhurhabala.
BULAGURHE, NKABAGA BIRHUHEMERE RHUSALIRE OKU BILOLERE EBINDI BINDI BINTU?
12. a) Chibazo chihe chiguma rhukwanene kuchibaza oku bilolere ebi rhuli rhwahema, na bulagurhe? b) Gurhe rhwakachizera oku amasala merhu mayerekene obukenge ku Yehova? (Olole echisanduku “Ebi Nampema Binayerekana Obukenge ku Yehova?”)
12 Akaba rhurhabwene ebi rhwahemaga omu sala, rhwakachibaza rhwenyine ebila bibazo bisharhu. Ech’oburhanzi, ‘Nansalira oku bilolere ebintu bikwanene si?’ Kanene, rhunawaza oku rhumenyere ebyakarhubera binja bwenene. Aliko, nkabaga kweri ebintu rhunahema birhakarhulerhera enyungu zinja bwenene. Akaba rhuli rhwasalira oku bilolere echibazo, nkabaga hakaba echishubizo chinja bwenene kulusha echi rhwaliwazize. Nkabaga kandi ebintu bilebe rhwahemere birhafarhene n’obulonza bwa Yehova. (1 Yo. 5:14) Rhuganire oku mufano gw’abazere rhwabaga rhwashambereko embere. Balihemere Yehova arhabale omwana wabo ayorhe omu kuli. Elyola lili nka sala lyago lyago. Aliko ntaye Yehova aheberemo akamba mpu amukolere. Yehova alonzeze oku buli muguma werhu, kuhebamo n’abana berhu, rhuchishoge kumukolera. (Kum. 10:12, 13; 30:19, 20) Bobola, abazere bakasalira bahema Yehova abarhabale bahume oku mirhima y’abana babo, echola chabashunika bazigire Yehova banabe bera bage.—Mez. 22:6; Efe. 6:4.
13. Nk’oku olwandiko lwa Waebrania 4:16 luderhere, mangochi Yehova arhurhabala? Fasiriya.
13 Echibazo chaka biri chili oku, ‘nka kali kasanzi ka Yehova ko kushubiza oku binamuhemere?’ Nkabaga rhwakawaza oku Yehova akashubiza oku masala merhu ahohan’aho. Kweri, chiro akaba ntyo, Yehova yewe amenyere akasanzi kenja bwenene k’okurhurhabala. (Osome Waebrania 4:16.) Amango rhurhapatire ebi rhwahemaga aho han’aho, nkabaga rhwakawaza oku Yehova ‘alahire kurhushubiza.’ Aliko byakaba eyi akasanzi k’okurhushubiza ‘karhaza kuhika.’ Omufano, rhurhange rhuwaze ku mwe-werhu ochili musole wasaliraga afume obulwala bwage. Nka Yehova amufumyaga omu bulyo bw’echisomerene, Shetani akaderhere oku oyola mwene-werhu ali agenderera kukolera Yehova bulala amufumize obulwala bwage. (Yob. 1:9-11; 2:4) Omu kuyongera, Yehova ahebere h’akasanzi nj’afumya buli mbero y’obulwala. (Isa. 33:24; Ufu. 21:3, 4) Oku akola kasanzi kanahika, rhulindire okuntu Yehova arhufumya omu njira y’echisomerene. Bobola, oyola mwene-werhu akahema Yehova emisi y’agwarha omurhula g’omu bwenge, y’agala kulembera obulwala bwage n’okugenderera kukolera Mungu oku bwimana.—Zb. 29:11.
14. Bichi rhwayigire kugerera ebi mwali-werhu Janice agereremo?
14 Owaze oku mufano gwa mwali-werhu Janice, wahemaga omu sala yaja kukola oku Beteli. Hagerere myaka 5 mwali-werhu arhegera oku Yehova ashubize oku masala mage, aliko omu yindi yindi njira arhalilangalire. Aderhere ntya: “Yehova akoleseze eyola njira omu kunyingiriza bintu binene n’okuntabala imbe Mukristu mwinja bwenene. Byalihemere obulangalire bwani bukule. Byalimpemere menye kuyinja nayiga e Biblia bwinja bwinja bwenene. Kandi byalimpemere menye oku nakagwarha omwishingo hoshi nakaba ndi nakolera Yehova.” Buzinda, mwali-werhu Janice n’eba bahabwa olukengo l’okuja omu kasi k’obwimangizi b’omuzunguluko. Amango amayibuka ebyagerere, mwali-werhu Janice aderhere ntya: “Yehova ashubize oku masala mani, aliko arhali omu njira nalilangalire. Byalimpemere bisanzi bilebe yintengera oku echishubizo Yehova ampere eli mpano nyinja bwenene, ingwerhe shukrani nene bwenene y’okubona napatire orozo l’okuchiyunva nzingirwe n’okubona anyerekere akababaro kage.”
Akaba owazize oku Yehova arhashubize oku masala mawe, waza gurhe wakasalira oku bilolere ebindi bindi bintu (Olole echifungo che 15)f
15. Bulagurhe nkabaga mango maguma birhakarhuhema rhuderhe bwinja bwinja ebi rhukenere omu sala? (Olole n’efoto.)
15 Echibazo cha kasharhu chakaba, ‘Ka nakasalira oku bilolere echindi chindi chintu?’ Kwakaba kwinja kuderha bwinja-bwinja echintu rhulonzeze amango rhuli rhwasalira. Aliko amandi mango kurhakaba kwinja okuderha bwinja-bwinja omu masala merhu ebirhulonzeze yirhurhegera ebi Yehova arhulonzeze. Rhuganire oku mufano gwa mwali-werhu ochili mulamba waliri wasalira oku bilorere okuja kusoma amasomo m’Abayeneza Injili y’Obwami. Alilonzeze kuja kusoma amola masomo y’agala kuja kukolera ahakenere oburhabale. Bobola okw’analiri angenderera kusalira y’ahamagalwa kw’amola masomo, akanahemere Yehova amurhabale arhegere ngahe handi hakaba hakenere oburhabale bunene bwenene omu kasi ka Yehova. (Mdo. 16:9, 10) Enyuma w’okumala kusalira eju y’echola, akajire abaza omwimangizi wabo w’omuzunguluko akaba hali echibaga ch’ahola hofi chikenere bapainiya banene. Changwa akayandikire ebiro by’omurhabi y’abaza akaba hali ahakenere bahubiri banene b’Obwami.e
16. Bichi rhwakachizera?
16 Kuguma n’oku rhwayigire, rhwakachizera oku Yehova ashubiza oku masala merhu omu njira y’obuzigire enakwanene. (Zb. 4:3; Isa. 30:18) Mango maguma nkabaga rhurhakabona echishubizo nk’oku rhwalilangalire. Aliko Yehova arhakajahika habanakatyu amasala merhu. Arhuzigire bwenene loshi. Kandi arhakanarhulekelera habanakatyu. (Zb. 9:10) Bobola, rhugenderere “kumulangalira amango moshi,” n’okumubwira byohi birhuli oku murhima kugerera esala.—Zb. 62:8.
OLWIMPO 43 Esala ly’Okuderha Koko
a Gunola mwazi gwafasiriya bulagurhe rhwakachizera oku Yehova ashubiza oku masala merhu amango moshi, omu njira y’obuzigire enakwanene.
b Mazino maguma mahindamwirwe.
c Olole omwazi “Ochizerere oku ebi Yehova Anajira Buli Mango Biba by’Okunali Si?” omu Munara g’Omulanzi, Mwezi gwa 2, 2022, chifungo cha 3-6.
d Y’omenya myazi minene oku bilolere okuntu Yehova anarhurhabala rhugale kulembera ebigeregezo bikomere, olole evideo oku site yerhu ya jw.org Sala Inatusaidia Tuvumilie (Esala Linarhurhabala Rhugale Kulembera).
e Akaba olonzeze kumenya binene oku bilolere okuntu wakahana oburhabale omu eneo y’omurhabi gwenyu, olole echitabu Tengenezo Yenye Kufanya Mapenzi ya Yehova (Olubaga Luli Lwajira Obulonza bwa Yehova), sura ye 10, chifungo cha 6-9.
f AMAFASIRIYO M’EFOTO: Bali-berhu babiri bali basalira embere bajaze eformilere y’okuja kusoma Amasomo m’Abayeneza Injili y’Obwami. Buzinda muguma bamuhamagala aliko owindi barhamuhamagere. Ahali h’okuvunika omurhima, oyola mwali-werhu barhahamagere kuja oku masomo, y’asalira Yehova amurhabale arhegere eyindi njira akachihanamo omu kasi kage. Naho amayandikira ebiro by’omurhabi amaruba, omu kubabwira oku ali tayari kuja kukolera ahakenere oburhabale.