Yehova Anasimiswa Nawe Si?

1. Bichi bakozi baguma ba Yehova baliri bachibaza?

BISIMISIZE okubona Yehova anasimiswa n’abantu bage bowe nka chigusho! Ebiblia ederhere ntya: “Yehova anasimiswa n’abantu bage.” (Zb. 149:4) Aliko, baguma bakavunika omurhima, omu kuchibaza akaba Yehova anabayemera bwago bwago. Banene omu bantu baganirirwe omu Biblia balikolere Yehova oku bwimana, hali amango baliri bachibaza akaba Yehova anabayemera.—1 Sa. 1:6-10; Yob. 29:2, 4; Zb. 51:11.

2. Bande Yehova anayemera?

² Ebiblia eyerekene bwinja bwinja okw’abantu barhali bashinganyanya bakayemerwa na Yehova. Nka gurhe? Rhukwanene kugwarhwa obwemere mu Yesu Kristu n’okubatizwa. (Yoh. 3:16) Omu kujira ntyo, rhwanayereka abandi oku rhwahungamire ebyaha byerhu n’oku rhwalaganyize Mungu oku rhwajira obulonza bwage. (Mdo. 2:38; 3:19) Yehova anasimiswa nerhu bwenene amango rhwamajira ebyola bintu yirhugwarha obwira bukomere haguma naye. Nka rhujirire okwerhu koshi rhugalire yirhugenderera kuyeneza echilagane cherhu ch’okumukolera, Yehova arhuyemera, n’okugenderera kurhubona nka bera bage ba hofi.—Zb. 25:14.

3. Bibazo bihe 3 rhwaganirako?

³ Bulagurhe bantu baguma bakawaza oku Mungu arhabayemerere? Gurhe Yehova anayerekana okw’arhuyemerere? Na gurhe Omukristu akachizera okw’ayemererwe na Mungu?

BULAGURHE BANTU BAGUMA BAKAWAZA OKU YEHOVA ARHABAYEMERERE?

4-5. Chiro n’amango rhwamachiyunva oku ntacho rhumalire, bichi rhukwanene kuchizera?

⁴ Kurhenga rhuchiri bana, banene murhwabo baliri bachiyunva oku ntacho bamalire. (Zb. 88:15) Mwene-werhu oyirikirwe Adrián aderhere ntya: “Buli mango nagendaga na chiyunva oku ntacho malire. Inyibukire gurhe nasaliraga amango nalichili mwana, ok’omulala gwani nji gulame omu Paradizo, chiro akaba oku nyono ntaliherhe obulangalire b’okulamamo.” Mwene-werhu oyirikirwe Tony, wakuliraga omu mulala gurhali gw’Abahamirizi ba Yehova, aderhere ntya: “Nta lusiku n’oluguma abazere bani bambwirire oku banzigire changwa oku ndi w’akachiro. Echola chaliri chanshunika ngenderere kukola ebinja kulusha.”

⁵ Akaba hali amango rhunalwisa amawazo m’okuchiyunva oku ntacho rhumalire, rhwakayibuka oku Yehova yenyine yiwarhukulwire emwage. (Yoh. 6:44) Anabona engeso zerhu zinja, ezi rhwabo rhurhakabona, anab’amenyere omurhima gwerhu. (1 Sa. 16:7; 2 Ny. 6:30) Bobola, rhwakachizera Yehova amango amaderha oku rhuli bantu b’akachiro.—1 Yo. 3:19, 20.

6. Gurhe entumwa Paulo aliri achiyunva oku bilolere ebyaha byage bya mira?

⁶ Embere rhuyige okuli, baguma murhwabo balijirire ebintu bibi bichiri byabalumisa omurhima. (1 Pe. 4:3) Abantu bakolere Yehova oku bwimana bakachigenderera kulwisa obuzamba. Gurhe si woyo? Hali amango onachiyunva oku Yehova arhakakubabalira? Akaba ntyo ku biri, byakakuheba omurhima okumenya okw’abandi bakozi ba Yehova bemana, baliri balwisa enkengero zili nk’ezola. Omufano, entumwa Paulo aliri achiyunva kubi amango aliri awaza oku kurhashinganana kwage. (Ro. 7:24) Kweri, Paulo alihungamire ebyaha byage anabatizwa. Chiro akaba ntyo, aderhere oku yiwaliri “mudorho oku zindi ntumwa” n’okw’aliri munyabyaha “w’oburhanzi.”—1 Ko. 15:9; 1 Ti. 1:15.

7. Bichi rhukwanene kuyibuka oku bilolere ebyaha byerhu bya mira?

⁷ Darha w’embingu arhulaganyize oku rhukahungama arhubabalira. (Zb. 86:5) Bobola, nkarhwamachiyunva kubi eju y’ebyaha rhwakolaga mira, rhukwanene kuyibuka okw’ebyaderhere biri by’okuli, k’okuderha arhubabalira.—Kol. 2:13.

8-9. Gurhe rhwakahima enkengero z’okuwaza okurhurhakachigala kukola binene byakarhuma Yehova arhuyemera?

⁸ Rhulonzeze kujira okwerhu koshi yirhukolera Yehova nk’oku byakanagalikana. Aliko, baguma bakachiyunva oku barhakachigala kujira bintu binene byakarhuma bayemerwa na Yehova. Mwali-werhu oyirikirwe Amanda aderhere ntya: “Naliri nazigana kuwaza oku yimpereza Yehova ebintu byani by’akachiro, byalimpemere nkole binene kulusha obuhashe bwani. Bobola naliri nachihangana kujira binene kulusha ebi nakagala kujira. Amango naliri ‘nagambwa,’ naliri nabona oku Yehova ambwene oku ntacho malire na naliri navunika enzoka.”

⁹ Gurhe rhwakajira yirhuhima enkengero z’okuwaza oku rhurhakachigala kujira binene yirhusimisa Yehova? Oyibuke oku Yehova ajira engeso y’olugero. Nta mango arhuhema kujira ebirhalukire obuhashe bwerhu. Anasimiswa na byoshi rhunamukolera, akaba rhwabikolere n’obuhashe bwerhu boshi. Kandi, rhuwaze oku mifano y’abantu baganirirwe omu Biblia balikolere Yehova n’omurhima gwabo goshi. Omufano, waza oku bilolere Paulo. Alikolere n’obushiru mu myaka minene, abalama ebihumbi by’ebilometre anahwanzisa bibaga binene. Aliko, amango ebintu bihindamuka omu kalamo kage, arhakachigalire kuhubiri nk’okwaliri ajira embere. Echola chaliyerekene oku Yehova arhachisimisizwe naye si? Nanga. Aligenderere kukola ebyakanagala, na Yehova amugisha. (Mdo. 28:30, 31) Intyo konoko, okuntu rhulirhwakolera Yehova, hali amango kwakahindamuka. Aliko ech’akamaro bwenene emwa Yehova, buli bushiru rhuli rhwayekana omu kumukolera. Lekaga rhuganire ku njira ziguma Yehova anarhuyerekamo kw’arhuyemerere.

GURHE YEHOVA ANARHUYEREKA OKW’ASIMISIZWE NERHU?

10. Gurhe “rhwakayunva” Yehova y’arhubwira okw’arhuyemerere? (Yohana 16:27)

¹⁰ Arhuhere Ebiblia. Yehova analonza enjira z’okuyereka abantu bage kw’abazigire n’okw’asimisizwe nabo. Ebiblia eyerekene turu 2, aha Yehova y’abwira Yesu okw’ali Mugala muzigirwa anamuyemerere. (Mt. 3:17; 17:5) Nka wakasima oyunve Yehova y’akubwira okw’akuyemerere? Yehova arhaganira nerhu bunu oku bwindi, aliko rhunaganira naye kugerera Ebiblia. Amango rhwamasoma ebinwa by’obuzigire Yesu abwiraga abanafunzi bage, rhwanaba nka rhuli rhwayunva Yehova arhubwira ebyola binwa. (Osome Yohana 16:27.) Yesu aliyigire oborhere bw’Eshe oku bushinganyanya. Bobola, amango rhwamasoma okuntu Yesu aliyemerere abanafunzi bage bemana barhali bashinganyanya, rhwakachapa omu bwenge nka rhwabo rhu Yehova yarhubwira ebyola binwa.—Yoh. 15:9, 15.

11. Bulagurhe okuhurana ebibazo arhali k’okuyerekene oku rhurhachiyemererwe na Yehova? (Yakobo 1:12)

¹¹ Anarhuhereza ebirhulagirire. Yehova agwerhe enyorha y’okurhurhabala omu kurhuhereza ebintu by’omubiri rhukenere. Aliko, mango maguma Yehova analeka ebintu bibi birhuhikire, nk’oku byahikiraga Yobu. (Yob. 1:8-11) Amango rhuherhe ebibazo, echola chirhayerekene oku rhurhayemererwe na Mungu. Aliko, rhugwerhe orozo l’okuyereka Yehova kangana gurhe rhumuzigire, na kangana gurhe rhumulangalire. (Osome Yakobo 1:12.) Kandi amango yirhwahurana ebigeregezo, rhwabona kangana gurhe Yehova arhuzigire na kangana gurhe ali arhurhabala yirhugala kulembera.

12. Bichi rhwayigire oku bilolere ebi mwene-werhu Dmitrii agereremo?

¹² Rhuganire oku mufano gwa mwene-werhu Dmitrii olamire omu Asie. Akasi kali muhwerere, amala myezi minene buzira kupata akandi. Ayerekana okw’alangalire Yehova omu kuchihana omu kasi k’amahubiri. Myezi minene yagera arhanapata akandi kasi. Naho alwala obulwala bukomere arhakachigalire kurhenga omu buliri. Arhondera kuwaza okw’arhachiri mulume mwinja changwa muzere mwinja, n’okuchibaza akaba Yehova arhamuyunvirhire oburhe. Egolo liguma, omwali ayandika oku karatasi ebinwa by’olwandiko lwa Isaya 30:15 luderhere ntya: “Mwagwarha emisi mukagenderera kurhulera n’okugwarha obulangalire.” Ahekera eshe ebyola binwa ahalyamire amubwira ntya: “Papa, amango moshi ochiyunvirhe kubi, wakayibuka ebinwa by’olula lw’andiko.” Dmitrii ayibuka oku kugerera oburhabale bwa Yehova, omulala gwage gugwerhe eby’okulya, emyambaro n’ahokulama. Aderhere ntya: “Ebinalikwanene kujira kwaliri kurhulera n’okugenderera kugwarha obulangalire mu Mungu.” Akaba oli wahurana echigeregezo chili k’echola, wakachizera oku Yehova akulagako, anakurhabala ogenderere kulembera.

13. Bande Yehova anakolesa omu kurhuyereka kw’arhuzigiire n’okw’arhuyemerere na nka gurhe?

¹³ Arhuhere bene-berhu na bali-berhu. Yehova anakolesa bene-berhu na bali-berhu omu kurhuyereka kw’arhuyemerere. Omufano, akakolesa abandi omu kurhuheba omurhima amango rhuvunikire omurhima. Ebyola bye byahikiraga mwali-werhu muguma w’omu Asie amango aliherhe ebibazo binene. Alilwere bwenene n’akasi kamuhwera, naho eba akola echaha chikomere arhanachigendereraga kukola nka mushamuka w’echibaga. Aderhere ntya: “Intalimenyere bulagurhe ebyola byoshi byaliri byarhengerera. Nahwanza kuwaza ku nkabaga hali chintu chibi najirire, n’echola cherhumire Yehova arhagenderera kunyemera.” Oyola mwali-werhu alakirira Yehova omu sala, amuhema ashube amuyereke okw’amulagireko. Gurhe alijirire? Aderhere ntya: “Abashamuka b’echibaga balintabere mbone oku Yehova achinzigiire.” Hagerere bisanzi bigeke ashuba kuhema Yehova amuyemeze akaba anamuzigiire. Aderhere ntya: “Olola lusiku lonolo, napata amaruba bene-berhu na bali-berhu banene b’omu chibaga chani banyandikire. Amango naliri nasoma ebinwa byabo bihebere omurhima, narhegera oku Yehova ayunvirhe esala lyani.” Nechi, mango manene Yehova anayerekana kw’arhuyemerere, kugerera ebinwa binja by’abandi.—Zb. 10:17.

14. Mu yindi njira ehe Yehova anayerekanamo kw’arhuyemerere?

¹⁴ Kandi Yehova anayerekana kw’arhuyemerere omu kukolesa aberhu Bakristu barhuhereze amahano, amango rhumakenere. Omufano, omu kagana kaburhanzi, Yehova alikoleseze entumwa Paulo ayandikire ababo Bakristu amaruba mafuhererwe 14. Mw’amola maruba, Paulo alihere bene-babo na bali-babo amahano mali wazi, manali m’obuzigire. Bulagurhe Yehova ayerekezaga Paulo ahane amahano mali ntyo? Yehova ali Darha mwinja, anahereza abana bage “azigiire” obuhane. (Mez. 3:11, 12) Bobola, amango muntu mulebe amarhuha ehano lirhengere omu Biblia, ebyola birhayerekene oku Yehova arhuyunvirhire oburhe, s’aliko biyerekene okw’achigenderere kurhuzigira. (Hes. 12:6) Bichi bindi binayerekana oku Yehova arhuyemerere?

EZINDI NJIRA ZAKARHUYEKA OKU YEHOVA ARHUYEMERERE

15. Bande Yehova anaha eroho lyage lichesibwa, na bulagurhe echola chakarhuhereza obwizere?

¹⁵ Yehova anahana eroho lyage lichesibwa oku bantu ayemerere. (Mt. 12:18) Rhwakachibaza ntya: ‘Inanyerekana ziguma omu ngeso z’eroho lichesibwa omu kalamo kani si?’ Okala oyerekana engeso y’okulembera kulusha okuntu byaliri amango orhaliza kumenya Yehova si? Ok’onali wagenderera kukuza engeso ze roho lya Mungu, kuwanagenderera kuchizera oku Yehova asimisizwe nawe!—Olole echisanduku “Etunda ly’Eroho . . .”

16. Bande Yehova anakolesa omu kuhubiri emyazi minja, n’okola kunarhuma wachiyunva gurhe? (1 Watesalonike 2:4)

¹⁶ Yehova anasima kuha balala ayemerere akasi k’okuhubiri emyazi minja. (Osome 1 Watesalonike 2:4.) Mwali-werhu oyirikirwe Jocelyn aliyemerere echola amango aliri ahubiri emyazi minja oku bandi. Lusiku luguma azuka ey’ali achiyunva avunikire omurhima. Aderhere ntya: “Nta misi naligwerhe na naliri nachiyunva nka ndi wabusha. Aliko, naliri painiya n’olola lwaliri lusiku lwani lw’amahubiri. Naho, nava nasalira nagenda oku mahubiri.” Mw’elyola sezi, Jocelyn abuganana na Mary, mukazi mwinja wayemeraga efunzo lye Biblia. Myezi milebe yagerere, Mary aderha okw’aliri asalira Mungu amurhabale amango Jocelyn akongorha oku mulango gwage. Bichi ebyola byaliyigirize mwali-werhu Jocelyn? Aderhere ntya: “Naliri nachiyunva nka Yehova y’ambwira, ‘inkuyemerere.’” Kweri, abantu boshi barhakayemera emyazi minja rhwababwirire. Aliko rhwakachizera oku Yehova anasima amango rhuli rhwajira okwerhu koshi rhugalire, yirhubwira abandi emyazi minja.

17. Bichi ebinwa bya mwali-werhu Vicky birhuyigirize oku bilolere enchungu? (Zaburi 5:12)

¹⁷ Yehova anakolesa akamaro k’enchungu oku b’ayemerere. (1 Ti. 2:5, 6) Aliko si, gurhe byakaba nka rhugenderere kuchiyunva oku Yehova arharhuyemerere chiro akaba oku rhugwerhe obwemere omu nchungu rhwanabatizwe? Oyibuke oku rhurhakwanene kulangalira enkengero zerhu amango moshi, si rhukwanene kulangalira Yehova. Yehova anabona boshi bagwerhe obwemere omu nchungu, oku bali banyakunali omu masu mage, analaganyize okw’abagisha. (Osome Zaburi 5:12; Ro. 3:26) Okukengera oku nchungu kwalirhabere mwali-werhu Vicky. Lusiku luguma amalire kukengera bwenene oku bilore enchungu, aderha ntya: “Yehova abaga andembere mu mango manene. . . . Naba nk’oli abwira Yehova ntya: Orhakasima omuntu oli kuguma nani. Enchungu ya Mugala wawe, erhakafunika ebyaha byani.” Okukengera oku mpano y’enchungu kwalimurhabere abone oku Yehova amuzigire. Nerhu rhunachiyunva rhuzigiirwe n’okumenya oku rhuyemererwe na Yehova omu kuwaza oku nchungu.

18. Bichi rhwakachizera nka rhugenderere kuzigira Darha w’embingu?

¹⁸ Chiro akaba rhwakajira okwerhu koshi yirhukolesa ebirhwayigire mu gunola mwazi, rhwakagera amango rhwachiyunva rhuvunikire omurhima n’okuchibaza akaba rhuchiyemererwe na Mungu. Nka wamagera amango wachiyunva ntyo, oyibuke oku Yehova anayemera “balala bagenderere kumuzigira.” (Yak. 1:12) Bobola, ogenderere kuba hofi na Yehova n’okugenderera kulola enjira zoshi ali akuyerekamo kw’akuyemerere. Orhanahira okayibagira oku Yehova “arhali hale na buli muguma werhu.”—Mdo. 17:27.