Bene-berhu Muchili Misole, Mube Balume Bakulire Ekiroho

1. Bichi omulume w’Omukristu akajira y’agala kuyiganya Yesu?

MWAMI Daudi abwira Sulemani ntya: “Okomere onabe mulume nya mulume.” (1 Fa. 2:1-3) Ebyola binwa bili by’akamaro ku bene-berhu boshi balonzeze kuyiganya Yesu zene. Yi bagala kujira ntyo, bakwanene kuyiga kukenga esheriya za Mungu n’okukolesa amakanuni me Biblia mu byoshi bali bajira omu kalamo. (Lu. 2:52) Bulagurhe bili by’akamaro bwenene ku bene-berhu bachili misole bachihangane kuba Bakristu bakulire ekiroho?

2-3. Bulagurhe bili by’akamaro ku mwene-werhu ochili musole achihangane kuba Mukristu okulire ekiroho?

² Mwene-werhu ochili musole agwerhe ngabane zinene z’akamaro akwanene kuyeneza omu mulala n’omu chibaga. Nta ngangane bene-berhu bachili misole banachibaza oku bilolere engabane bakayeneza omu mango mayinjire. Nkabaga wakasiima kuba painiya, kuba mugwasi w’akasi na buzinda kuba mushamuka omu chibaga. Nkabaga kandi olonzeze kushaba n’okuburha abana. (Efe. 6:4; 1 Ti. 3:1) Y’ohikira eyola mihigo n’okugwarha enyungu, bikuhemere obe Mukristu okulire ekiroho.b

³ Bichi byakakurhabala y’ohikira kuba Mukristu okulire ekiroho? Hali obufundi bw’akamaro okenere kuyiga n’okubumenya bwinja bwinja. Bichi okwanene kujira y’ochirheganya bwinja oku ngabane zoshi zoshi wakagwarha omu mango mayinjire, na ntyo y’ogala kuziyeneza bwinja?

EBI WAKAJIRA Y’OBA MUKRISTU OKULIRE EKIROHO

4. Ngahe wakakula emifano minja y’okuyiganya? (Olole n’efoto.)

⁴ Ochishoge emifano minja wakayiganya. Ebiblia egwerhe mifano minene minja bene-berhu bachiri misole bakayiganya. Abola balume b’omu mango ma mira, balizigiire Mungu kandi baliri bayeneza engabane zilengene omu kushishikala abantu ba Mungu. Kandi wakabona emifano minja y’Abakristu bakulire ekiroho omu mulala gwawe n’omu chibaga chawe. (Ebr. 13:7) Kandi rhugwerhe omufano g’omuntu mushinganyanya, Yesu Kristu. (1 Pe. 2:21) Ok’onali wawaza bwinja bwinja kw’eyola mifano, okengeere oku ngeso zinja osiimire z’abola balume. (Ebr. 12:1, 2) Naho ochishoge gurhe wakabayiganya.

5. Nka gurhe wakakuza obuhashe b’okuwaza, na bulagurhe echola chili ch’akamaro? (Zaburi 119:9)

⁵ Okuze “onalange . . . obuhashe bwawe b’okuwaza.” (Mez. 3:21) Omuntu oherhe obuhashe b’okuwaza, arhajira ebintu juba juba, aliko anarhanga kuwaza bwinja bwinja embere achishoge bichi akwanene kujira. Bobola oyige gurhe wakajira ntyo, na gurhe wakagenderera. Bulagurhe? Bulala misole minene zene omu gulu, bali barhola esimikiro ziyumangire oku mawazo mabo bonyine, changwa oku kuntu bali bachiyunva. (Mez. 7:7; 29:11) Kandi eteleviziyo, amafilme, oku kolesa esite z’okuganirirako n’abantu banene oku Enternete, byakabihya enkengero n’ebijiro byabo. Aliko nka gurhe wakayiga kugwarha obuhashe b’okuwaza? Ech’oburhanzi, oyige kugerera Ebiblia gurhe Yehova anawaza n’okuntu anachiyunva, wanaja wawaza bulagurhe kuli kwinja emwawe okujira ebyaderhere. Naho, okolese amola makanuni wayigire omu kurhola esimikiro zakasiimisa Yehova. (Osome Zaburi 119:9.) Okayiga gurhe wakawaza mw’eyola njira, byakurhabala bwenene obe Mukristu okulire ekiroho. (Mez. 2:11, 12; Ebr. 5:14) Rhulole gurhe obuhashe b’okuwaza bwakakurhabala mw’ezila njira ebiri: 1) okuntu onachifarha amango oli haguma na bali-berhu, n’eya 2) amango oli warhola esimikiro oku bilolere okuntu onayambala n’okuntu onabonekana.

6. Gurhe obuhashe b’okuwaza bwakarhabala mwene-werhu ochili musole kuyerekana obukenge ku bali-berhu?

⁶ Omuntu wayigire kuwaza kuguma na Yehova, anawaza okuntu akayerekana obukenge oku bakazi. Omufano, mwene-werhu ochili musole akalonza kumenya mwali-werhu bwinja n’okujira ntyo kurhali kubi. Aliko, mwene-werhu ochili musole ogwerhe obuhashe b’okuwaza, arhakaderha, changwa kuyandika, changwa kujira echintu choshi choshi chakarhuma mwali-werhu awaza oku ali amushambaza, nobo arhanalonzeze kumushaba. (1 Ti. 5:1, 2) Akaba ali ashambaza mwali-werhu, ajira okwage koshi yarhamuharabisiza erenge, omu kuja ahantu hali bwihunze bowe bonyine buzira okuba n’omuntu obaherekeze.—1 Ko. 6:18.

7. Gurhe obuhashe b’okuwaza bwakarhabala mwene-werhu ochili musole amango ali achishoga okuntu ayambala n’okuntu achigembesa?

⁷ Mwene-werhu ochili musole wayigire kuwaza kuguma n’oku Yehova anawaza, akayerekana echola kugerera emyambaro anachishoga kuyambala na kugerera okuntu anachishoga kugembesa. Banene mu balala banakula amamodele mahyahya m’amasono n’okumarata-rata oku bantu, barhaba bakengere Yehova. Kandi nkabaga bakaba eyibalamire akalamo k’obumaguza. Bobola bakakula omodele gw’emyambaro enanirire bwenene abantu okumubiri, changwa yakarhuma abalume babonekana nka bakazi. Amango ali achishoga emyambaro, mwene-werhu ochili musole oli washonda kukula ekiroho, akwanene kuyerekezwa n’amakanuni me Biblia n’emifano minja y’omu chibaga. Akachibaza ntya: ‘Ebinanchishoga biyerekene oku ndi muntu ogwerhe obwenge buli oku mustari onakengere abandi si? Okuntu nanyambala kunarhuma byayorohera abandi kuyemera oku ndi mukozi wa Mungu?’ (1 Ko. 10:31-33; Tit. 2:6) Mwene-werhu w’omusole ogwerhe obuhashe b’okuwaza, arhapata obukenge burhengere ku bene-berhu na bali-berhu konyine, s’aliko bunarhengere ku Darha w’embingu.

8. Gurhe mwene-werhu ochili musole akayiga kuba muntu abandi bakanihira?

⁸ Obe munihirwa. Mwene-werhu w’omusole oli munihirwa anakola bwenene omu kushishikala engabane zage zoshi. (Lu. 16:10) Rhuganire oku mufano gushinganyanya gwa Yesu. Nta mango n’amaguma achigerere aba molokazi changwa kw’afunde kuyeneza engabane zage. S’ahubwe, aliri ajira byoshi Yehova amuhemere chiro n’amango byalimukomerere kujira ntyo. Alizigiire abantu, ahanene abanafunzi bage, kandi ali haanire akalamo kage eju yabo. (Yoh. 13:1) Y’oyiganya omufano gwa Yesu, okole bwenene y’oyeneza engabane yoshi yoshi wahabirwe. N’akaba orhamenyere bwinja gurhe wakayikola, obe mwirhohye oheme oburhabale ku bene-berhu bakulire. Orhachihanganaga kukola bigeke konyine oku byalihemerwe. (Ro. 12:11) Aliko akaba omenyere oku eby’oli wakola oli ‘wabikolera Yehova, s’arhali abantu,’ wachihangana kukola bwinja bwinja n’okumala akasi koshi wahabirwe. (Kol. 3:23) Nechi, orhali mushinganyanya, bobola obe mwirhohye onayemere buli gosa wakaba wajirire.—Mez. 11:2.

OYIGE OBUFUNDI BWAKAKURHABALA OMU KALAMO

9. Bulagurhe mwene-werhu ochili musole akwanene kukuza obufundi bw’akamaro?

⁹ Y’oba Mukristu okulire ekiroho, wakenera kugwarha obufundi bw’akamaro bwakakurhabala omu kalamo kawe. Obola bufundi bwakurhabala oyemere engabane omu chibaga, opate akasi n’okukakola bwinja, kwakurhabala opate ebyokenere, changwa eby’omulala gwawe gukenere, kandi wagwarha obwira bukomeere haguma n’abandi. Lekaga rhuganire ku bulebe m’obola bufundi bw’akamaro.

10-11. Gurhe mwene-werhu ochili musole akapata enyungu yewe yenyine n’echibaga amango ali ayiga kusoma n’okuyandika bwinja? (Zaburi 1:1-3) (Olole n’efoto.)

¹⁰ Okuyiga bwinja kusoma n’okuyandika. Ebiblia ederhere oku omuntu ogwerhe obusiime ali olala onayisoma buli lusiku n’okuyikengerako bwenene. (Osome Zaburi 1:1-3.) Omuntu onasoma Ebiblia buli lusiku, ahikira kumenya okuntu Yehova anawaza, n’okuyiga gurhe akakolesa bwinja Amandiko omu kalamo kage. (Mez. 1:3, 4) Abantu banajira ntyo bakenerwe omu chibaga. Bulagurhe?

¹¹ Bene-berhu na bali-berhu bakenere oburhabale bw’abalume bagwerhe obuhashe b’okuyigiriza n’okuhaana amahano marhengere omu Biblia. (Tit. 1:9) Akaba wakagala kusoma n’okuyandika bwinja, wagala kurheganya amajambo n’ebishubizo byalerhera abandi enyungu n’oku komeza obwemere bwabo. Kandi wagala kuyandika ebinwa bigwerhe akamaro amango oli wachiyigiriza woyo wenyine, amango oli wakulikira amajambo oku mbuganano z’echibaga, n’oku mbuganano zikulu. Ebyola wayandikaga byakurhabala okomeze obwemere bwawe n’okuheba abandi omurhima.

12. Bichi byakurhabala obe muntu onaganira bwinja n’abandi?

¹² Oyige kuganira bwinja n’abandi. Omulume okulire ekiroho akwanene kuyiga kuganira bwinja. K’okuderha oku bimuhemere kuyunviriza n’okumenya amawazo m’abandi n’okuntu bali bachiyunva. (Mez. 20:5) Akayiga kurhegera eby’abandi bantu balonzeze kuderha kugerera omulenge gwago, okuntu bali bashaganya amalanga, changwa omubiri goshi. Orhakagala kuyiga ebyola buzira kugeza ebisanzi haguma n’abandi. Akaba onakolesa ebikoleso by’echieletronike buli mango omu kuganira, nk’okurhuma amaruba kugerera Enternete, okuyandika amamesaje, echola chakarhuma waheza obuhashe bwawe b’okuganira n’abantu masu oku masu. Bobola, ochihangane kulonza orozo l’okuyinja waganira n’abandi masu oku masu.—2 Yo. 12.

13. Bichi bindi mwene-werhu ochili musole akwanene kuyiga? (1 Timoteo 5:8) (Olole n’efoto.)

¹³ Oyige gurhe wakachilonzeza wenyine ebyokenere. Omulume w’Omukristu okulire ekiroho, akwanene kugwarha obuhashe b’okuchilonzeza yenyine ebyakenere n’omulala gwage. (Osome 1 Timoteo 5:8.) Mu bihugo biguma, bene-berhu bachili basole bakayiga obwindi bufundi kugerera b’eshe changwa abandi bantu b’omu milala yabo. Omu bindi bihugo, emisole yakayiga bufundi bulebe buzira kukenera kuja oku masomo makulu. Chiro akaba ntyo, amango moshi kunaba kwinja okuyiga obwindi bufundi bwakakurhabala kupata akasi. (Mdo. 18:2, 3; 20:34; Efe. 4:28) Okole bwenene onachizere oku wamalire ebi wahwanzaga, abandi bachibonera echola n’okusimiswa bwenene n’okuntu onakola. Okajira ntyo wagwarha orozo lunene l’okupata akasi n’okukakola bwinja. Obufundi n’engeso rhwaganirireko kandi bili by’akamaro oku mulume w’Omukristu, y’agala kukola ezindi ngabane omu mango mayinjire. Lekaga rhuganire kuziguma mw’ezola ngabane z’amango mayinjire.

OCHIRHEGANYE OKU NGABANE Z’AMANGO MAYINJIRE

14. Nka gurhe mwene-werhu ochili musole akachirheganya yaja omu kasi k’amango moshi?

¹⁴ Akasi k’amango moshi. Bakristu banene bakulire ekiroho, barhonderaga kukolera Yehova omu kasi k’amango moshi, amango balichili misole. Okuba painiya kunarhabala omuntu ochili musole ayige gurhe akakola n’abantu bagwerhe oborhere burhali kuguma. Kandi kunamurhabala kuyiga okuntu akakolesa oku bwengehe efuranga apatire, n’okurhakolesa furanga zinene kulusha ez’agwerhe. (Flp. 4:11-13) Enjira nyinja y’okuhwanza akasi k’amango moshi, kuli kuba painiya mugwasi. Banene banakola nka bapainiya bagwasi mu bisanzi bilebe, n’echola chanaja chabarhabala bahwanze akasi k’obupainiya b’oku kahunda. Okuba painiya kwakafungula omulyango g’okukola orhwindi rhwasi rhw’amango moshi, nk’okukola omu kasi k’okuyumbaka changwa okukola oku Beteli.

15-16. Bichi byakarhabala mwene-werhu ochili musole yaba mugwasi w’akasi changwa mushamuka omu chibaga?

¹⁵ Omugwasi w’akasi changwa omushamuka. Abalume boshi b’Abakristu bakwanene kugwarha omuhigo g’okuchihangana kukolera bene-babo na bali-babo eyi bali bashamuka omu chibaga. Ebiblia ederhere oku omulume oli wachihangana kuhikira ogola muhigo, ahola eyali “achifija akasi kenja.” (1 Ti. 3:1) Embere y’okukola nka mushamuka omu chibaga, mwene-werhu akwanene kuchihangana kuyeneza ebihemerwe y’akola nka mugwasi w’akasi. Omugwasi w’akasi anarhabala abashamuka kushishikala bene-babo na bali-babo omu chibaga. Abashamuka n’abagwasi b’akasi banarhabala bene-babo na bali-babo oku bwirhohye n’okurhabala omu kasi k’amahubiri oku bushiru. Bene-berhu bachili misole bakayeneza ebihemerwe yi bakola nka bagwasi b’akasi chiro n’amango bachili omu myaka 17 ne 19. Kandi mwene-werhu oli mugwasi w’akasi oli wakola engabane yage bwinja, hali amango akashimikwa kuba mushamuka w’echibaga ey’anagwerhe myaka 20 kugenderera.

¹⁶ Nka gurhe wakakuza engeso zihemerwe y’okola nka mugwasi w’akasi na buzinda nka mushamuka omu chibaga? Ebiblia ehanire eliste konyine y’engeso okwanene kuyeneza. Aliko, oyibuke oku ezola ngeso zoshi ziyumangiire oku Biblia n’obuzigire ku Yehova, omulala gwawe, n’okuchibaga. (1 Ti. 3:1-13; Tit. 1:6-9; 1 Pe. 5:2, 3) Ochihangane kuyunva bwinja buli chiguma omu bibakuhemere. Osalire Yehova akurhabale oyeneze ebyola bihemerwe.c

17. Nka gurhe mwene-werhu ochili musole akachirheganya yi nj’aba mulume oshabire na rhwe ly’omulala? (Olole n’efoto.)

¹⁷ Omulume oshabire n’erhwe ly’omulala. Nk’oku Yesu ayerekene, balume baguma bakulire ekiroho banagenderera kuyorha balamba. (Mt. 19:12) Aliko, akaba wachishogere kushaba, ezindi ngabane zachiyongera, nk’okuba eba wa lebe n’erhwe ly’omulala. (1 Ko. 11:3) Yehova ahemere omulume azigire mukage n’okumuyenezeza eby’akenere, okuba mwira wage mwinja, n’okumurhabala agwarhe obwira bukomeere haguma na Yehova. (Efe. 5:28, 29) Engeso n’obufundi rhwabaga rhwashambereko mu gunola mwazi, nk’okukuza obuhashe b’okuwaza, oku kenga abakazi, okuba munihirwa, by’akurhabala kuba mulume mwinja. Waba ey’ogwerhe byoshi okeneere y’oyeneza engabane zawe nka mulume oshabire na rhwe ly’omulala.

18. Gurhe mwene-werhu ochili musole akachirheganya yi nj’aba eshe w’abana?

¹⁸ Eshe w’abana. Enyuma y’okushaba, nkabaga wakaba eshe w’abana. Bichi omufano gwa Yehova gw’akakuyigiriza y’oba muzere mwinja? Hali binene wakayiga. (Efe. 6:4) Yehova abwira Omugala, Yesu, embere z’abantu oku amuzigiire anamuyemerere. (Mt. 3:17) Nka wamaba eshe w’abana, ochihangane kubwira abana bawe buli mango oku obazigiire. Buli mango ogende wababwira koko oku bintu binja bakolere. B’eshe w’abana banayiganya omufano gwa Yehova, banarhabala abana babo bakuze engeso z’Echikristu zarhuma baba balume changwa bakazi bakulire ekiroho. Wakachirheganya zene oku ngabane y’okuba muzere mwinja, omu kuyerekana obuzigire oku bantu b’omulala gwawe, omu chibaga, n’omukubashishikala. Kandi oyige kubabwira oku obazigiire n’oku bali bakachiro emwawe. (Yoh. 15:9) Ebyola nji byakurhabala obe mulume na muzere mwinja w’omu mango mayinjire. Waba w’akachiro emwa Yehova na burhabale bunene omu mulala gwawe n’omu chibaga oku akola kasanzi kanahika.

BICHI WAJA WAJIRA KURHENGA ZENE

19-20. Bichi byarhabala bene-berhu bachili misole yi baba balume b’Abakristu bakulire ekiroho? (Olole efoto oku chiganda.)

¹⁹ Bene-berhu muchili misole, byabahema obushiru yi muba balume bakulire ekiroho. Bikuhemere ochishoge emifano minja wayiganya, y’okuza obuhashe bwawe b’okuwaza, okuba munihirwa n’okuyiga obufundi bwakakurhabala omu kalamo, onachirheganye oku zindi ngabane z’omu mango mayinjire.

²⁰ Amango wamawaza oku bintu byoshi okwanene okole, nkabaga wakachiyunva oku bikomeere bwenene. Aliko wakabigala. Oyibuke oku kweri Yehova alonzeze kukurhabala. (Isa. 41:10, 13) Kweri, bene-benyu na bali-benyu omu chibaga nabo bakurhabala. Amango wamahikira omuhigo gwawe g’okuba mulume w’Omukristu okulire ekiroho, wagwarha akalamo kenja kanasimisize. Rhubazigiire, bene-berhu muchili misole! Yehova ajage agenderera kubagisha bwenene oku munali mwakola yi muba balume b’Abakistu bakulire ekiroho.—Mez. 22:4.