Ara sa Prisuhan Bangod sa Ila Pagtuo—Russia

Ang kasaysayan sang mga Saksi ni Jehova sa Russia, isa ka istorya sang kapintas kag paghingabot. Sa daku nga bahin sang ika-20 nga siglo, ginpintasan kag ginmaltratar sang mga awtoridad sang Russia ang mga Saksi, bisan pa kilala sila nga mga pumuluyo nga nagatuman sa kasuguan kag wala nagapanggamo. Gusto sang gobierno sang Soviet Union nga pasundon sila sa mga pagpati sang Soviet. Wala sila gintugutan nga magpanag-iya sang mga Biblia ukon sang mga balasahon parte sa relihion. Pirme ginabantayan ang ila hulag kag ginahiwat nila ang ila mga miting sing sekreto. Kon madakpan sila, ginakastigo sila kag ginasentensiahan nga mapriso sing malawig. Gintapok sang gobierno ang linibo sa Siberia.

Nagbag-o ina sang 1991 sang ginkilala sang gobierno sang Russia ang mga Saksi ni Jehova. May kahilwayan na sila sa pagsimba kag wala na sila ginabantayan sang mga awtoridad. Pero wala ini nagdugay.

Sang 2009, nagsugod liwat ang pagpamatok kag mga restriksion sang ginsuportahan sang Russian Supreme Court ang desisyon sang isa ka lower court nga tawgon nga “extremist” ang isa ka kongregasyon sang mga Saksi ni Jehova. Pagkatapos sang tinuig nga kaso sa korte, sang Abril 2017, nagdesisyon ang Russian Supreme Court nga ipasira ang legal nga mga korporasyon sang mga Saksi bangod kuno sa extremist nga hilikuton. Ginkumpiskar dayon sang mga awtoridad sang Russia ang ila mga propiedad, ginpasira ang ila mga lugar para sa pagsimba, kag gindeklarar nga “extremist material” ang ila mga balasahon parte sa relihion.

Indi lang legal nga mga korporasyon ang ginatarget sang mga awtoridad sang Russia, kundi pati man ang indibiduwal nga mga Saksi ni Jehova. Ginpasobrahan nila ang pag-aplikar sa kasuguan kag nagsiling sila nga ang ginahimo nga pribado nga pagsimba sa balay sang mga Saksi may labot gihapon sa gin-ban nga organisasyon. Gina-raid sang mga pulis ang mga balay sang mga Saksi. Ginkastigo sila kag mapintas nga gin-interogar. Gin-aresto, gin-house arrest ukon ginbutang sa pre-trial detention, ginsentensiahan, kag ginpriso ang mga Saksi, lalaki man ukon babayi, kag bisan ano man ang ila edad.

Halin sang pag-ban sang Abril 2017, ginatos ka Saksi ang ginbutang sa pretrial detention ukon ginpriso bangod sa kaso nga extremism. Asta sang Hulyo 20, 2025, ara sa prisuhan ang 157 ka Saksi.

Mga Reklamo Batok sa Kapintas sang Russia sa mga Saksi ni Jehova

Padayon nga ginapriso sang mga awtoridad sang Russia ang mga Saksi bangod sa extremist nga hilikuton bisan pa sa reklamo sang madamo nga pungsod nga untaton sini ang sigesige nga paghingabot. Ang mga tawo kag mga korte nga nakahibalo sini sa gua sang Russia nagpakalain sa gobierno sang Russia bangod sa grabe nga pagpamigos sini sa mga Saksi ni Jehova.

European Court of Human Rights: Sang Hunyo 7, 2022, ang European Court of Human Rights nagpagua sang importante nga desisyon batok sa Russia, nga nagakondenar sa ila paghingabot sa mga Saksi ni Jehova (Taganrog LRO and Others v. Russia, num. 32401/10 kag 19 ka iban pa). Nagsiling ang Korte nga ilegal ang pag-ban sang Russia sa mga Saksi ni Jehova sang 2017. Ginmanduan sini ang Russia nga “maghimo sang tanan nga kinahanglanon nga tikang para mauntat ang tanan nga naka-pending nga kaso batok sa mga Saksi ni Jehova . . . kag paguaon . . . [ang mga] Saksi ni Jehova [nga ginpriso].” Dugang pa, ginmanduan ini nga ibalik ang tanan nga ginkumpiskar nga mga propiedad ukon magbayad sing sobra 60 ka milyon ka dolyar bilang danyos sa ginkumpiskar nga mga propiedad. Ginapabayad man ini sang sobra 3 ka milyon ka dolyar bilang danyos para sa mga Saksi nga ginkasuhan ukon sa ila mga organisasyon nga gin-ban.

Sulat halin sa Secretary General sang Council of Europe: Amo sini ang ginsiling sang sulat nga napetsahan Disiembre 9, 2022, nga ginpadala sa Russian Minister of Foreign Affairs, nga si Marija Pejčinović Burić: “Sa mga kaso sang Jehovah’s Witnesses of Moscow and Others and Krupko and Others, parte sa pagdula sang isa ka relihioso nga komunidad paagi sa pag-ban sang mga hilikuton sini, pagpauntat sang malinong nga seremonya sa relihion kag sa pagpriso sang pila nga nagapakigbahin sa mga hilikuton sini, ginapangabay gid sang Committee ang mga awtoridad nga kuhaon ang ban sa tanan nga organisasyon sang mga Saksi ni Jehova kag untaton ang tanan nga kriminal nga kaso kontra sa ila.”

Ang Desisyon sang Committee of Ministers of the Council of Europe: Sa ila ginhiwat nga miting sang Septiembre 2023, ang Committee of Ministers [CoM] nagsiling nga “nabalaka gid sila kay maathag nga ginpresentar sang [European Court of Human Rights’] base sa Article 46 of the Convention kag sa desisyon nga ginpatuman sa Taganrog LRO and Others nga hungod nga wala gintuman sang mga awtoridad sa Russia, ilabi na ang . . . pagpagua sang napriso nga mga Saksi ni Jehova.” Bangod wala ini gintuman sang Russia, ang CoM “nagdesisyon nga ipalab-ot ini nga mga kaso sa United Nations Human Rights Committee, sa Working Group on Arbitrary Detention of the UN Human Rights Council, kag sa iban pa nga internasyonal nga mga organisasyon nga nagaasikaso sa ginahimo nga paghingabot sa mga Saksi ni Jehova sa Russian Federation, para siguraduhon nga masunod ang ginapatuman nga mga desisyon.”

Halimbawa sang Mapintas nga mga Desisyon

Sang Marso 27, 2025, gindesisyunan nga guilty sang Konakovo City Court of the Tver Region ang 4 ka Saksi nga sanday: Oleg Katamov, Aleksey Kuznetsov, Aleksandr Shchetinin, kag Aleksandr Starikov. Ano ang ila kaso? Ginatudluan nila sang Biblia ang ila mga kaingod kag nagahiwat sang mga miting. Ining apat ka lalaki ginsentensiahan sing 6 ka tuig nga pagkapriso kag gindala sila dayon sa prisuhan halin sa korte.
Sang Abril 3, 2025, gindesisyunan nga guilty sang Sovetskiy District Court of the City of Chelyabinsk si Khamatshin kag ginsentensiahan sing 6 ka tuig nga pagkapriso. Gin-akusaran si Maksim nga nagahiwat sang mga miting kag gindala sia dayon sa prisuhan halin sa korte.
Sang Mayo 30, 2025, ginsentensiahan sang Leninskiy District Court of Tambov ang 60 anyos nga si Oleg Sirotkin sing anom ka tuig nga pagkapriso sa penal colony. Napangasawa ni Oleg si Nataliya kag may duha sila ka bata nga babayi. Ang iya kaso nagsugod sang Septiembre 2021 sang gin-raid sang mga pulis ang ila balay sa Tambov. Gin-akusaran si Oleg nga nagaorganisar kag nagapartisipar sa mga miting sang mga Saksi ni Jehova, nga ginkabig sang mga awtoridad nga hilikuton sang isa ka extremist nga organisasyon. Gindala sia dayon sa prisuhan halin sa korte.

Padayon nga mga Panikasog Para Mauntat ang Indi Makatarunganon nga mga Pagpriso

Nabalaka gid ang mga Saksi ni Jehova sa bilog nga kalibutan bangod sa mapintas nga pagtratar sa ila mga kauturan sa Russia. Minilyon ka Saksi sa bilog nga kalibutan ang nagpadala sang mga sulat sa mga Russian nga mga opisyal sang gobierno, agod magpangabay para sa ila napriso nga mga kauturan. Ang mga abogado sining ginpriso nga mga Saksi nag-apelar sa tanan nga korte sa Russia kag nagpasaka sang mga application sa European Court of Human Rights. Nagpadala man ang mga Saksi ni Jehova sing reklamo sa UN Human Rights Committee kag sa UN Working Group on Arbitrary Detention kag naghatag man sila sang mga report sa mga international organization nga nagabantay sang mga pag-abuso sa kinamatarong sang mga tawo. Padayon nga himuon sang mga Saksi ni Jehova ang tanan nga paagi nga ipahibalo ang ginaantos sang ila mga kauturan sa Russia para mauntat ining mapintas nga paghingabot sa relihion.

Impormasyon Parte sa Isa nga Napriso Bangod sa Konsiensia

Anatoliy Marunov

Sang Oktubre 2021, ang isa ka Saksi ni Jehova sa Moscow, nga mabuot nga ulo sang pamilya kag maayo gid nga bana sa sulod sang halos singkuenta na ka tuig, gulpi lang nga gin-akusaran nga nagaorganisar sang mga hilikuton sang isa ka extremist nga organisasyon.

Si Anatoliy natawo sang Nobiembre 1953 sa siudad sang Izmail (Ukraine) kag bugtong lang sia nga anak. Sang nagaeskwela pa sia, nagahimo sia sang mga model sang barko, kag nakaeskwela man sia sa isa ka music school. Ang iya pamilya nag-istar man sing pila ka tuig sa Tallinn (Estonia).

Sa tapos sia magserbisyo sa militar, nagsaylo si Anatoliy halin sa Tallinn pakadto sa Moscow para mag-eskwela pa gid. Sa tapos sang tatlo ka tuig nga pag-eskwela, napilitan sia nga mag-untat sa university para atipanon ang iya pamilya. Sa sulod sang halos 40 ka tuig, nag-obra si Anatoliy sa Krasnaya Zvezdar nga amo ang opisyal nga newspaper sang Ministry of Defense. Lakip sa trabaho ni Anatoliy ang prepress nga amo ang pag-typeset kag pag-layout sang mga letra kag mga piktyur. Retired na sia subong. Kon may tion sia, nanamian sia mangay-o sang mga salakyan.

Sang nagaeskwela si Anatoliy sa Moscow, nakilala niya si Alevtina. Nagpakasal sila sang 1975 kag may duha sila ka bata nga lalaki. Si Alevtina interesado gid sa relihion kag wala madugay, nagpa-Bible study sia sa mga Saksi ni Jehova. Nabawtismuhan sia sang 1994, kag si Anatoliy naman sang 1999. Nagdayaw si Anatoliy kay nagaugyunay gid ang mga ginasiling sa Biblia kag nagakatuman gid ang mga tagna sini.

Nagbag-o gid ang kabuhi sang pamilya Marunov bangod sa kaso kay Anatoliy. Ara si Anatoliy sa prisuhan subong kag mapriso sia sa sulod sang anom ka tuig kag tunga kag paguaon sia sa Hulyo 2028.

Time Line

Hulyo 20, 2025

May 157 ka Saksi nga ginpriso.
Marso 6, 2025

Ang European Court of Human Rights (ECHR) nagpagua sang desisyon sini sa kaso nga Loginov and Others v. Russia, nga nagasiling nga ginlapas sang Russia ang kinamatarong sang 9 ka Saksi nga ilegal nga ginpriso (ang pito sa ila gin-torture) sang gin-raid ang ila mga balay sa Surgut sang Pebrero 15, 2019.
Oktubre 24, 2023

Nagpagua sang duha ka View ang UN Human Rights Committee (CCPR) parte sa Local Religious Organization sa Elista kag Abinsk. Sa pareho nga kaso, nagsiling ang CCPR nga ginlapas sang Russia ang mga kinamatarong sang mga Saksi base sa Article 18.1 (“right to freedom of thought, conscience and religion”) kag Article 22.1 (“right to freedom of association”) of the International Covenant on Civil and Political Rights. Ginkompirmar sang mga desisyon nga wala sing pagdumot ukon pagpamintas nga mabasa sa mga publikasyon nga ginagamit sang ila relihion.
Hunyo 7, 2022

Ginpagua sang ECHR ang importante nga desisyon sini, sa Taganrog LRO and Others v. Russia nga kaso, nga nagakondenar sa Russia bangod sa pagmaltrato sa mga Saksi ni Jehova.
Enero 12, 2022

Ginlakip sang Ministry of Justice of the Russian Federation sa Federal List of Extremist Materials ang JW Library application. Amo ini ang una kag lamang nga app nga gin-ban sa Russia bangod gindeklarar nila ini nga extremist.
Septiembre 27, 2021

Ginbasura sang Saint Petersburg City Court ang pag-apelar sa Marso 31, 2021, nga desisyon sang korte nga nagdeklarar nga extremist ang JW Library app. Gin-ban ang paggamit sini sa bilog nga Russian Federation kag sa Crimea. Ginpatuman gilayon ang una nga desisyon sang Korte.
Abril 26, 2019

Nakita sang UN Working Group on Arbitrary Detention nga ginlapas ang mga kinamatarong ni Dmitriy Mikhailov kag ginpakamalaut sini ang paghingabot sang Russia sa mga Saksi ni Jehova.
Abril 20, 2017

Ang Supreme Court sang Russian Federation nagdesisyon nga ipasira ang branch office sang mga Saksi ni Jehova kag ang 395 ka Local Religious Organizations.