“Down’s Syndrome”—Isa ka Modernong Tikang

Ang cosmetic surgery isa ka bag-ong tikang sa pagbulig sa mga nagaantos sing ­Down’s syn­drome, apang tuman kamahal ina nga pagbusbos. Ang isa ka bata sa Britanya kag ang pila ka kabataan sa Estados Unidos nakaagi sini nga operasyon. Apang ang una nga pag-opera sa 60 ka kabataan ginhimo sa Israel sang isa ka grupo sang mga manugbusbos nga ginpangunahan ni Propesor Ruben Feuer­stein.

Ano ang nadalahig? Ang sobra nga mga panit sarang malaplap agod tadlungon ang gamay nga mga mata. Ang sili­cone sarang magamit sa pagpataas sang ilong. Ang mga tul-an sa guya sarang matib-ong kag ang nagasalop nga sag-ang sarang makortehan liwat. Ang mga dulunggan sarang mapasibu agod maglapitlapit sa ulo. Kag ang tuman kadaku nga dila, kinaandan sa madamo nga may Down’s syndrome, sarang mapagamay.

“Ining kabataan,” komento ni Feuer­stein, “masami nga ginapaeskwela sa manubo nga sahi sang eskwelahan kag ang iban ginapabay-an lamang tubtob mapatay sa ospital sa tapos sila mabun-ag. Bangod sang ila bal-anon nga mga hitsura masami nga ginapakanubo ang ila masarangan.”

Nagatudlo sa makaalayaw nga mga epekto sa kaso sang isa ka bata nga babayi sa Britanya, ang Sunday Times sang London nagbalhag sing report sa idalom sang tig-ulo nga “Happiness is a brand new face.” Sa pagkamatuod, may yara mga nagamulay sa sini nga mga kaso sang plas­tic sur­gery. Kag ang Awake! wala nagasakdag ukon nagarekomendar sing espisipiko nga mga porma sang terapiya, bangod personal ini nga desisyon.