Ang Pagtamod sang Biblia

Terorismo—Ngaa Madasig nga Nagadugang?

“Bisan pa kon palukpon mo ang katunga sang kontinente kag magpatulo sing isa ka dagat sang dugo agod laglagon ang bahin sang kapintas, indi matublag sa paghimo sini.”—Karl Heinzen, Aleman nga rebolusyonaryo, 1809-80

ANG mga libro kag ang iban pa nga mga butang hinali nga naglinupad sang maglupok ang bomba sa isa ka balaligyaan sa Dortmund, Alemanya. Walo ka bumalakal ang nasamad, ang iban grabe. Isa bala ka malaut nga buhat sang politikal nga mga kaaway? Indi. “Lahog lamang yadto,” siling sang 20-anyos nga sa wala madugay gindakop. Apang, bisan pa wala sia sing politikal nga motibo, ang iya ginbuhat isa gihapon ka terorismo.

Sa sulod lamang sang siam ka adlaw—kutob sang Pebrero 28 tubtob sang Marso 8, 1985—ang Naaminhan nga Irlandiya, Lebanon, Espanya, kag ang Republika Pederal sang Alemanya nakasaksi sa duguon nga kamut sang terorismo nga nagpatay sa 72 ka tawo, kag naghalit sa 245. Kag sugod sadto, ang gamo, kahadlok, kag pagkatublag nga gintuga sang mga kriminal nagpadayon nga wala sing latid.

Ngaa ang mga tawo sa isa ka sibilisado nga kalibutan nagagamit sing kasingki sa pagtigayon sang ila mga tulumuron? Mapunggan ayhan ini? Ang Biblia nagahatag sing masaligan nga mga sabat.

Ngaa may Terorismo?

“Dili ka magkaakig bangod sang mga manughikot sing malaut. . . . Untati ang kaakig kag bayai ang kasingkal; dili magkaakig sa paghimo lamang sing malaut.” “Ang paglugos nagapabuang sa maalam.”—Salmo 37:1, 8; Manugwali 7:7.

Kon ang mga pangulohan makapila na nga napaslawan sa paglandas sang mga palaligban subong sang kakulang sing paghidait, indi maayo nga palibot, ukon inhustisya sa katilingban ukon ekonomiya, kon ginatugutan nila ukon ginapalig-on ang pagpamigos kag pagdampigdampig, halangpunon nga ‘maakig’ ang katawhan. Sila nagasiling: ‘Dapat nga may himuon, kag kon indi karon, san-o pa? Kon indi ako, sin-o pa?’

Kon kaisa bangod sang kapaslawan ang ‘maalam nagabuang.’ Nagakabig sang iya kaugalingon subong maalam, mahimo nga sa primero ang katuyoan sang mahidaiton nga manugprotesta amo ang paghimo lamang sing indi masingki nga mga buhat sang paglalis. Apang, daw ano kadasig nga ini mangin mga buhat sang kasingki! Tan-awa, halimbawa, ang isa ka pungsod sa Aprika nga nabahinbahin sa rasa kag ekonomiya. Ang nagsugod subong mahidaiton nga mga martsa sang pagprotesta nagdul-ong sa masingki nga pagpamatok. “Sa karon, pagligad sang duha ka pulog-lima nga pagpakig-away kag walay sapayan sang mga ginpanaad kasan-o lang nga mga reporma,” siling sang Time nga magasin, “ang kasingki nagaluntad gihapon sa nabahinbahin nga pungsod.”

“Bangod nga ang paghukom batok sa malaut nga buhat wala ginahikot sing madali, busa ang tagipusuon sang mga anak sang mga tawo natuhoy sing bug-os sa ila sa paghimo sing malaut.”—Manugwali 8:11.

Mabudlay hangpon ang mga nagahimo sing malaut kag ipaatubang sila sa hustisya. Sa iban nga mga duog, ang mga korte nangin sobra ka hugak sa pagpakig-angot sa mga akusado nga nagahimo sing malaut. Idugang sa sini ang madamo nga hilikuton sang korte nga nagapugong sa awtoridad sa “paghukom batok sa malaut nga buhat . . . sa madali,” kag may yara kita mga kabangdanan nga ang tagipusuon sang mga nagahimo sing malaut “matuhoy sing bug-os sa ila sa paghimo sing malaut.” Sanglit ang mga pangulohan wala makasapo sing madinalag-on nga paagi sa pagsumpo sang “normal” nga krimen—labi na sang internasyonal nga terorismo—madamo nga tawo ang nasulay sa pag-eskapar sa sini.

Apang Ngaa Madasig nga Nagadugang Karon?

“Sa katapusan nga mga adlaw magaabot ang makahalanguyos nga mga tion nga mabudlay pakigbagayan. . . . Ang mga tawo magamahigugmaon sa kaugalingon, . . . dimapinasalamaton, dimatutom, wala sing kinaugali nga gugma, dimalugpayan, . . . wala sing pagpugong sa kaugalingon, mabangis, wala sing gugma sa kaayohan.”—2 Timoteo 3:1-3.

Ginapakita sang kronolohiya sang Biblia kag sang katumanan sang mga tagna sa Biblia nga ang aton kaliwatan nagakabuhi sa “katapusan nga mga adlaw” nga ginatandaan sang “makahalanguyos nga mga tion nga mabudlay pakigbagayan.” Indi ka bala magsiling nga ang mga lalaki kag mga babayi nga may yara sang mga kinaiya subong sang nasambit sa ibabaw posible nga mga kandidato sa paghimo sing terorismo? Sanglit ang ila kadamuon nagadugang samtang ang “katapusan nga mga adlaw” nagapadulong sa ila katapusan, indi kita dapat makibot nga ang kasingki padayon nga nagalatom sang tagsa ka bahin sang katilingban sang tawo.

“Kag ang duta nalaglag sa panulok sang matuod nga Dios kag ang duta napuno sing kasingki.” “Subong sang mga adlaw ni Noe, amo man ang pag-abot sang Anak sang tawo.”—Genesis 6:11, 13; Mateo 24:37.

Sang adlaw ni Noe, ang espiritu nga mga anak sang Dios nga naghimo sang ila kaugalingon nga mga demonyo nagtungod sing daku nga papel sa pagdaya sa kalibutan nga napuno sing kasingki. (Genesis 6:1-5) Ining malauton nga mga tinuga indi na makamateryalisar sing tawhanon nga mga lawas agod mag-impluwensia sa katawhan sing direkta, subong sang ila ginhimo sadto. Apang karon ang ila indi direkta, indi makita nga mga pagsalakay makamamatay man.

Bangod nagakabuhi kita karon sa mga adlaw sang “presensia sang [nahimaya] nga Anak sang tawo,” si Jesucristo, mapaabot naton nga ang kalibutan mabulit sing dugo sang pareho nga sahi sang kasingki. Sa pagkamatuod, makita naton, subong gintagna ni Jesus, ang ‘pag-uswag sang pagkamalinapason.’ (Mateo 24:12) Matuod ini bangod ‘ang isa nga ginatawag Yawa kag Satanas . . . natagbong na sa duta, kag ang iya mga anghel . . . kaupod niya.’ Ano ang resulta? “Kailo sa duta kag sa dagat, kay ang Yawa nagpanaug sa inyo sa dakung kasingkal, kay sia nakahibalo nga may malip-ot na lamang sia nga tion.” (Bugna 12:7-12) Indi bala ini ang daku nga rason kon ngaa ang terorismo nagadugang karon sa kadasigon nga wala sing tupong?

Mga Kasakit sang Pagpanganak

Si Jesus nagtagna sing nanuhaytuhay nga mga hitabo nga matabo sa tion sang panahon sang pagbalhin sa tapos ang iya Ginharian matukod na kag sa wala pa niya malaglag ining malaut nga sistema. (Mateo 24; Marcos 13; Lucas 21) Sia nagsiling, subong narekord sa Marcos 13:8, nga may yara “mga kasakit.” Subong nga ang literal nga mga kasakit sang pagpanganak nagadamo kag nagabaskog samtang nagahilapit na ang pagpanganak, subong man ang mga kasakit nga ginlaragway ni Jesus subong tanda sang “katapusan nga mga adlaw” magadamo kag magabaskog samtang nagahilapit ang tion sang indi mapamatokan nga paggahom ni Cristo.

Indi katingalahan, nian, nga ang “mga kasakit” sang terorismo nagadugang. Mahimo nga bangod sini ang wala sing ihibalo nga mga tawo, sa katumanan sang tagna ni Jesus ‘mapunaw sa kahadlok kag sa kalangkag sa magaabot sa napuy-an nga duta.’ Apang indi ini matabo sa mga nakahibalo sang kahulugan sang iya masunod nga mga pulong: “Kon ining mga butang magsugod sa pagkahanabo, maghangad kamo kag bayawa ang inyo mga ulo, kay ang pagtubos [lakip ang pagtubos gikan sa terorismo] sa inyo nagapalapit.”—Lucas 21:26, 28.

[Kapsion sa pahina 14]

Kon ang mga pangulohan mapaslawan sa paglandas sang mga palaligban, ang mga tawo ‘nagakaakig’

[Kapsion sa pahina 15]

Sang adlaw ni Noe, ang mga demonyo nagtungod sing daku nga papel sa pagtuga sing isa ka kalibutan nga puno sing kasingki