Aborsion—Sin-o ang Husto?

DUHA ka espesyalista ang nagsiling sa imo nga 0.1 porsiento lamang ang tsansa sang imo bata nga mabuhi. Kon matawo sia nga buhi, makatigayon ini sing serioso nga mga abnormalidad kag mahimo mapatay sa sulod sang pila ka adlaw. Ano ang imo himuon? Magpasimpalad? Ukon ipahulog ang bata?

Malayo ina matabo, mahimo batyagon mo. Apang mahimo ini matabo, kag natabo gid matuod, sa London, Inglaterra. Sing makalilipay, ginsakdag sang ospital ang desisyon sang mga ginikanan nga padayunon ang pagmabdos. “Wala gid kami ginsilingan nga ipahulog ang bata,” paathag sang amay. May yara na sila karon isa ka bata nga lalaki, nga wala sing pisikal nga depekto.

“Nalipay gid kami,” siling sang isa ka palamangkutan sa medisina, nga nagdugang: “Ang mabudlay amo nga wala sing bisan ano sa biolohiya ang 100 por siento.” Matuod, apang ang sayop nga paghukom sang doktor (ukon sang ginikanan) isa lamang ka bahin sang problema sa aborsion karon.

Nagasumpakilay nga mga Kabangdanan

Ang medikal kag etikal nga mga hulusayon pabor kag batok sa aborsion puno sing emosyon. Ang nagaipit nga mga grupo gikan sa duha ka bahin nagapautwas sing sinsero nga mga tingog nga luyag mabatian kag hangpon, kag ang baisay masami nga mainit. Sin-o ang husto?

Ang mga ginikanan nga ginsambit kaina maathag nga nakahimo sing husto nga desisyon. Apang ano kon ang mga doktor nangin sibu sa ila pagpangusisa? Sa idalom sina nga mga kahimtangan, husto ayhan para sa iloy nga magpaaborsion?

Kon nasapwan mo ina nga pamangkot subong mabudlay, ukon imposible sabton, indi ikaw isahanon. Apang, may yara nagatuytoy nga mga prinsipio nga makabulig, subong aton makita pa. Apang binagbinaga anay ang pagkadaku sang problema nga aborsion sa bug-os nga kalibutan.