May Sekreto Bala ang Malawig nga Kabuhi?
TUBTOB san-o ginapaabot mo nga mabuhi ka? Ang kalabanan nga tawo sa industriyalisado nga kalibutan magasiling, “Tubtob 70 ukon ayhan 80.” Apang sang ginpamangkot sang isa ka manunulat sang National Geographic ang pila sang mga pumuluyo sang Soviet Abkhaz Republic, malapit sa Black Sea, ang natural nga sabat amo, “Tubtob sa 100.”
Ano ang pila ka kabangdanan sang malawig nga kabuhi? Si Yuri Dadivanyan, Chief Geriatrician sang Armenian Ministry of Health nagapati nga ang daku nga kabangdanan amo ang genetiko nga kodigo nga napanubli gikan sa mga katigulangan sang isa. Apang, may ginsambit sia nga isa pa ka kabangdanan: “Importante man ang regular nga pisikal nga pagpangabudlay. Ang kalabanan sang malawig sing kabuhi nga mga tawo nagapadayon sa pagpangabudlay sing lakas nga mahimo nila sa tapos makalab-ot sa edad sang pagretiro bisan pa wala sila ginakulang sa kuwarta.”
Nagdugang man sia: “Sa Armenia ang mga tigulang ginatahod sang tanan. . . . Ang ila eksperiensia sa kabuhi ginaapresyar sing daku. . . . Mahimo nga ang pagtahod sa ubanon nga ulo kag sa katigulangon ang ginapalig-on sa tanan kutob sa pagkabata ang nagahimo sa mga tigulang nga tipigan ang ila pagbatyag sing dungog kag ang ila batan-on nga espiritu.”
Ang isa ka komento talalupangdon gid sa ginsambit kaina nga isa ka artikulo sang National Geographic: “Sa tatlo ka komunidad [nga gin-usisa tuhoy sa kalawigon sang kabuhi] wala sing isa nga ginapilit sa pagretiro, kag ang mga tigulang wala ginapauntat, subong amo ang nagakatabo sa kalabanan sang industriyalisado nga mga katilingban.”
Ang Biblia nagahambal tuhoy sa mas malawig nga kabuhi sa palaabuton, “kalawigon sang mga adlaw tubtob sa tion nga wala sing latid, tubtob sa walay katubtuban.” (Salmo 21:4) Inang kabuhi nga walay katubtuban sa isa ka himpit nga duta mangin katunayan sa dili madugay.—Bugna 21:1-4; Lucas 21:10, 11, 25-33.
[Mga Laragway sa pahina 31]
Tatlo ka aktibo nga mga manugpangabudlay sa bug-os kalibutan nga ulong-talatapan sang Watch Tower—edad: 80, 92, kag 88