Pagretiro​—Isa Bala ka Ganhaan Para sa Dugang nga Hilikuton?

¹ Madamo sang nagapangabudlay sing lakas nga mga tawo ang nagahandum sing tion nga hilwayon sila sang pagretiro gikan sa kabudlayan kag mga pag-ipit sang sekular nga trabaho. Apang, masami nga ang pagretiro nagaresulta sa pagluya, kataka, kag hinali nga pagtigulang. Bangod wala sing may katuyuan nga hilikuton, pirme na lang ginakabalak-an sang isa ang iya kaugalingon. Ang isa ka pamantalaan sa Brazil nagreport nga ang nagretiro nga mga empleyado sa gobierno nagreklamo sang mga problema nga ‘pagkadinaayawan, mainiton, walay kalig-unan, kag pagkawala sing pulos, subong man sang depresyon kag pagbatyag nga wala sing katuyuan ang ila kabuhi.’

² Sa kabaliskaran, madamo nga mga Cristiano ang nagatamod sining bag-o nga kahimtangan sang ila kabuhi subong isa ka ganhaan para sa dugang nga hilikuton sa espirituwal. Ang isa ka utod nga lalaki nga nagsugod sa pagpayunir duha ka semana antes makalab-ot sa edad nga 65 nagsiling: “Wala gid ako makaeksperiensia sa isa ka hut-ong sang akon kabuhi nga ginpakamaayo sing bugana kaangay sa nagligad nga napulo ka tuig nga ako payunir.” Ang isa ka mag-asawa nagsiling: “Nagsugod ang amon maayo gid nga mga tinuig sang nagpayunir kami.” Huo, para sa madamo, ang pagretiro nagatanyag sing isa ka ekselente nga kahigayunan agod mapasangkad ang ila ministeryo kag maagom ang bugana nga mga pagpakamaayo gikan kay Jehova.

³ Pagpabilin nga Masako kag Mabungahon: Madamo sang mga nagretiro na ang nagdalalagku nga wala makaeksperiensia sang mga kasulhayan nga kinaandan karon kag nakatuon nga magpangabudlay sing lakas kutob sang bata pa sila. Bisan pa nga wala na sila sing kusog sang isa ka pamatan-on, mabungahon gihapon sila nga mga manugpangabudlay. Sa isa ka sanga talatapan, 22 porsiento sang mga payunir​—mga 20,000 ka utod​—ang di-magkubos 60 ka tuig ang edad. Ining mga tigulang amo ang may daku nga bahin sa pagbantala nga hilikuton. Ang ila eksperiensia kag diosnon nga mga kinaiya nagapauswag sang kongregasyon nga ila ginaalagaran.​—Sant. 3:17, 18.

⁴ Ang pagpabilin nga masako sa Cristianong ministeryo nagabulig sa maayo nga panglawas kag maayo nga kalidad sang kabuhi. Ang isa ka 84-anyos nga utod nga babayi nga nagsugod sa pagpayunir sang nagretiro sia nagsiling: “Ang pagtigayon sing madamo nga pagtuon sa Biblia upod sa interesado nga mga tawo nakabulig sa akon nga mangin aktibo sa hunahuna. Wala ako sing salakyan, gani pirme ako nagalakat. Bangod sini, mapagros ako.” Ang isa ka tigulang na nga payunir nga mag-asawa nagkomento: “Ang pag-alagad nagahupot sa amon nga mangin mapagros sa mental kag pisikal. Nagaupdanay kami pirme. Pirme kami nagakadlaw kag malipayon sa kabuhi.”

⁵ Pag-alagad Kon Diin Daku ang Kinahanglanon: Ang pila ka nagretiro nga mga Cristiano nga maayo ang kahimtangan sa pinansial nagsaylo kon diin mas daku ang kinahanglanon para sa mga manugbantala sang Ginharian. Ang iban nagpasangkad sang ila ministeryo paagi sa pag-alagad sa tuhay sing lenguahe nga teritoryo. Kaangay ni apostol Pablo, ining makugi nga mga manugbantala “naghimo sang tanan nga butang para sa maayong balita, agod [sila] mangin manugpaambit sini sa iban.”​—1 Cor. 9:23.

⁶ Ang isa ka mag-asawa nagsugod sa pagpayunir sang mapadaku na nila ang ila duha ka anak nga lalaki. Pagkatapos sang pila ka tuig nga pagpayunir, nagtuon sila sang Inintsik. Sa karon nga malapit na mag-otsenta, nalipay sila nga makita sining karon lang ang isa ka grupo sang nagahambal sing Intsik nga ila ginpangabudlayan nga nangin isa na ka kongregasyon. Daw ano gid nga pagpakamaayo ining mag-asawa!

⁷ Wala Sing Pagretiro sa Ministeryo: Samtang ang kalabanan nga tawo nagaretiro sa ulihi sa ila sekular nga trabaho, wala sing bisan sin-o nga Cristiano ang nagaretiro sa pag-alagad sa Dios. Ang tanan dapat magpadayon nga matutom “tubtob sa katapusan.” (Mat. 24:13, 14) Sa pagkamatuod, bangod sang katigulangon, ang pila indi na makahimo sang ila sadto masarangan sa pag-alagad kay Jehova. Apang daw ano ka makapalig-on nga makita nga ginahimo nila ang ila masarangan sing bug-os tagipusuon! Ginapasalig sila sang Pulong sang Dios nga indi malimtan ni Jehova ang ila binuhatan kag ang gugma nga ila ginapakita tungod sa iya ngalan.​—Luc. 21:1-4; Heb. 6:10.

⁸ Kon malapit ka na magretiro, ngaa indi pagbinagbinagon sing mapangamuyuon kon paano mo magamit sing bug-os ang imo nagabag-o nga mga kahimtangan? Paagi sa bulig sang Dios, sarang mo masapwan nga ang pagretiro nagabukas sa imo sing isa ka ganhaan padulong sa dugang nga hilikuton nga nagadala sing kadayawan kay Jehova kag madamo nga mga pagpakamaayo.​—Sal. 148:12, 13.