Mga Milagro kag mga Aparisyon—Sang Nagligad kag Karon

Sang koresponsal sang “Magmata!” sa Pransya

GUADALUPE, Fátima, kag Lourdes—ano ang kahulugan sa imo sina nga mga ngalan? Para sa madamo mga banwa lamang sila sa Mexico, Portugal, kag Pransya. Apang para sa minilyon ka sinsero nga mga Katoliko, mga santuaryo sila, tatlo sang labing bantog nga altar ni Maria sa kalibutan. Ang debosyon sang mga Katoliko sa sini nagbaskog gid sa sining ika-20 nga siglo. Halimbawa, sang 1982 mga 4,500,000 ka bisita ang nagdugok sa Lourdes, samtang mas madamo ang nagginutok sa Guadalupe.

Para sa Iglesia Katolika, ining mga altar amo kono ang danyag sang milagruso nga mga pag-ayo. Amo gid sini labi na sa Lourdes, nga ginlaragway ni Papa Pio X subong “ang sentro sang pagsimba kay Maria kag trono sang misteryo sang Eucharist, daw labaw sa himaya sa tanan nga kaanggid nga mga sentro sa bug-os nga kalibutan sang mga Katoliko.” Linibolibo ka tawo ang nagsiling nga nabulong sila sa tion ukon sa tapos sang paglakbay padulong sa Lourdes. Apang, tubtob sa karon 65 lamang ka “milagro” ang ginakilala sang iglesia.

Nagapati ka man sa Dios ukon wala, may kinamatarong ikaw sa pagpamangkot sing mga pakiana. Ano ining mga aparisyon, labi na ni Maria, sa bug-os nga kalibutan? Ang milagruso bala nga mga pagbulong kag iban pa nga mga hitabo nga naangot sa sini pamatuod sang kahamuot sang Dios? Sa isa ka komperensya nga ginhiwat sa Lourdes sang 1986, ginpalig-on sang obispo sang ­Tours ang iya mga tagpalamati nga ‘magpamalandong sa kahulugan sang mga aparisyon’ agod ‘matukod ang importante nga mga kinatuhayan sang dimatuod kag matuod nga mga aparisyon.’ Kon Katoliko ka, mahimo interesado ka man sa pag-usisa sini nga tema.

Mga Aparisyon—Matuod Ukon Dimatuod?

Ang Iglesia Katolika Romana wala sing opisyal nagapahayag sang iya kaugalingon nahanungod sina nga mga aparisyon, ukon wala nagaobligar sa iya mga katapo nga magpati sa sini. Apang ano ang ihinakop sang sinsero nga mga Katoliko kon makita nila si Papa Juan Paulo II nga nagainom sing tubig gikan sa grotto sa Lourdes ukon nagapakighambal kay Lucie, ang lamang nga tawo nga buhi pa nga nakakita sang aparisyon sa Fátima? Indi bala ini maathag nga pagpakita sang iya opisyal nga kahamuot (kag sang iya iglesia)? Dugang pa, sa tion sang iya mga paglakbay, wala gid nagapalya ang papa sa pagduaw sa mga santuaryo ni Maria, subong sang altar sang ­Black Vir­gin of Cze­sto­chowa sa Po­land.

Ang iban sang mas maugdang nga mga altar gin-aprobahan sang iglesia, subong sang Beau­raing kag Ban­neux sa Bel­gium. Kon kaisa ang pagsimba ginatugutan sa lokal lamang, subong sang ginahimo sa Tre Fon­tane, Italya, kag Marien­fried, Alemanya.

Apang, kutob sang katapusan sang ika-19 nga siglo, madamo ang nagsiling nga nakakita sila sing mga aparisyon. Ginabanta sang libro nga Vraies et fausses apparitions dans l’Église (Matuod kag Dimatuod nga mga Aparisyon sa Iglesia) nga may yara kapin sa 200 ka kaso kutob sang 1930 tubtob 1976. Ngaa pila lamang ang opisyal nga ginkilala samtang, suno sa awtor, “ang mensahe, luwas sa pila lamang ka eksepsion, indi walay pulos kag, sang gin-usisa, halos palareho”?

Ang Pranses nga magasin nga L’Histoire nagahatag sing paathag sa isa ka artikulo tuhoy sa mga aparisyon ni Maria sang ika-19 nga siglo sa Loire sa sidlangan sang sentral nga Pransya. Suno sa awtor, wala ini pag-usisaa sang iglesia kag ginpabay-an lamang agod likawan ang “paindisanay” sa ginakilala na nga mga altar.

Sa karon, ang iban nagasiling nga ang kabangdanan sang indi pagtingog sang iglesia amo ang kabalaka sini kasan-o lang sa “sientipiko” nga pagkasibu. Si René Laurentin, Pranses nga Katolikong awtoridad sa sining mga butang, nagasiling pa gani nga ang mga aparisyon kaangay sang mga sa Lourdes mahimo nga indi pagkilalahon sing opisyal karon. Apang indi bala ang mga tanda—kon gikan gid sa Dios—dapat batunon subong amo sa bisan ano nga tion sa maragtas?

Dugang pa nga mga Aparisyon Karon

May mga aparisyon nga nagakatabo gihapon. Sa San Damiano, Italya, madamo nga peregrino ang nagapanong sa duog nga sa diin si Mamma Rosa (nga napatay sang 1981) nagsiling nga nakita niya “ang Birhen.” Ang iglesia nagahipos tuhoy sini, apang ang iban sang mga matutom nagalaum sa pagbalhin sa panimuot pagkatapos sang mga pagkombertir nga kuno natabo didto.

Sa diutay nga minuro sang Med­ju­gorje, Yu­go­slavia, ang mga kabataan kag mga tin-edyer nagreport kasan-o lang sing kapin sa isa ka libo ka aparisyon sang “Birhen.” Diri liwat, walay sapayan sang desisyon sang iglesia, ang pila ka grupo nagapakig-away para sa opisyal nga pagkilala sa natabo. Apang, mahimo nagapalibog ang mga Katoliko kon ano nga panimuot ang huptan samtang ginahulat ang desisyon sang eklesiastiko nga awtoridad. Samtang wala pa ina, dapat bala nila tuohan ina nga mga pamatuod?

Sa pagkompleto sa laragway, may yara man mga aparisyon nga ginsikway sang iglesia, subong sang natabo sa Palmar de Troya, Espanya. Tuhoy sini, ginpaandaman sang obispo sang Seville ang mga matutom nga indi “paggatungan ang pagkadali magpati sang publiko tuhoy sa mga hitabo nga wala ginakilala sang iglesia kundi ginapakamalaut pa gani.” Walay sapayan sang paandam, natabo ang pagbinahinbahin, nga nagdul-ong sa pag-eks­ko­munikar sa isa ka arsobispo kag pila ka pari, nga, bilang pagbato sa iglesia, nagsiling nga ang mga aparisyon masaligan.

Paano pamat-uran kon bala ang mga aparisyon masaligan ukon indi? Binagbinagon sang masunod nga artikulo ina nga pamangkot sing detalyado.