Mga Milagro kag mga Aparisyon—Mga Tanda Bala Gikan sa Dios?

“ANG mga milagro karon dapat gihapon 1.0,tamdon . . . subong isa ka sahi sang sulat sang rekomendasyon, isa ka garantiya sang masaligan nga mensahe sang Dios, sang iya labing gamhanan nga selyo sa misyon ukon tinaga nga nagagikan sa iya.” Ang mga milagro nga ginapatuhuyan diri ni Joseph Vandrisse, koresponsal sang Pranses nga pamantalaan nga Le Figaro sa Batikano, mga milagro nga gin-aprobahan sang Iglesia Katolika. Apang ano ang talaksan sang iglesia sa pagpat-od kon bala ang isa ka milagro ukon aparisyon naghalin gid sa Dios?

Dapat Bala Hukman sang Iglesia ang Iya Kaugalingon nga Kaso?

Suno sa Katoliko nga mga awtoridad, dapat matuman sang mga aparisyon ang duha ka kahimtangan. Nahauna, dapat nahisanto sila sa mga panudlo sang iglesia. Ang isa ka talalupangdon nga halimbawa amo ang aparisyon sa Lourdes, nga sa diin ang “Birhen” nagpakita sang iya kaugalingon subong “Ang Imaculada Concepcion.” Sing makawiwili, mga pila ka tuig antes sini, nagmando si Papa Pio IX nga sa tion sang pagmabdos si Maria wala sing orihinal nga sala. Sang 1933 ang palaabuton nga Pio XII nagpabutyag sang iya opinyon nga ang duha ka hitabo may kaangtanan sa isa kag isa, nga nagasiling: “Ang Imaculada nga Birhen, Iloy sang Dios kag bulahan sa mga babayi, paagi sa iya kaugalingon nga mga bibig nagpamatuod sa ginpahayag sa Roma sang iya wala nagasayop nga Supremo nga Pontifice. Ginhimo niya ini sa tapos sadto sa isa ka bantog nga aparisyon sa Massabielle Grotto [Lourdes].”

Ikaduha, dapat binagbinagon ang paggawi sang isa nga nakakita sang aparisyon. Subong ginsiling sang obispo sang ­Tours: “Ang iglesia . . . nagpati sa mga aparisyon [sa Lourdes] bangod sang pagkabalaan ni Bernadette.” Kag nagapati ang eklesiastiko nga awtoridad nga si Bernadette kag si Lucie, nga nagasiling nga nakita nila si Maria sa Lourdes kag sa Fátima, nakatuman sining kondisyon bangod nangin mga madre sila sang ulihi.

Ang mga mensahe nga ginpaliton nahisanto sa panudlo sang Katoliko. Ang pagkabuhi sang mga bisyonaryo nahisanto sa modelo nga gintukod sang iglesia. Sa sining mga kaso, indi makapakibot nga ang mga aparisyon nga ginkilala sang Iglesia Katolika nagapalig-on sang iya mga tradisyon kag mga doktrina, bisan ang mga pinakaulihi, subong sang Imaculada Concepcion.

Apang ang mga milagro bala kag mga aparisyon mga tanda gid gikan sa langit nga nagapamatuod sa mga panudlo sang iglesia? Si J. Bricout, editor sang Dictionnaire pratique des connaissances religieuses (Diksionaryo sang mga Ihibalo Tuhoy sa Relihion), nagbalikwat sa isa pa ka Katoliko nga awtor, si P. ­Buysse, nga nagsulat: “Bangod ang mga milagro sa Lourdes may espesipiko nga kaangtanan sa ‘mga pagtuluohan sang Iglesia Katolika’ (ang Imaculada Concepcion, ang paglaragway sang pontifice sa sining dogma, pagsimba sa Bulahan nga Sakramento, pagsimba kay Birhen Maria, kag iban pa), ang isa mahimo, sa baylo, dapat magkilala sa ‘mga doktrina sang iglesia nga nagaunod sang selyo sang kahamuot sang Dios.’”

Apang, indi makapangangkon ang Iglesia Katolika nga may yara sia sinang awtoridad sang Dios. Paagi sa pag-ako sang awtoridad sa pagpamat-od kon bala ang mga aparisyon (kag ang may kaangtanan nga mga milagro) gikan sa Dios ukon indi, ginahimo sini ang iya kaugalingon subong hukom sang iya kaugalingon nga kaso.

Madamo pa nga relihion ang nagasiling nga may pamatuod sila sa mga milagro kag nagapangangkon nga ginasakdag sila sang Dios. Yara bala ang Dios sa likod sang mga milagro nga ginahimo sa charismatic nga mga kahublagan (lakip ang mga indi Katoliko) ukon bisan sa di-Cristiano nga mga relihion? Mabudlay ini patihan, kay ang Biblia nagasugid sa aton nga ang Dios “Dios, indi sang kagumon, kundi sang paghidait.”—1 Corinto 14:33.

Ano ang husto nga sadsaran sa paghukom? Ang libro nga Les signes de crédibilité de la révélation chrétienne (Mga Tanda sang Pagkamapatihan sang Cristianong Bugna) nagpaathag nga ang talaksan sa pagkabig sa isa ka milagro nga masaligan moral kag relihioso. Paano ina hangpon?

Nahisuno sa Ginpahayag?

Suno sa nanuhaytuhay nga Katolikong mga awtor, “ang Nahauna nga kinahanglanon amo nga ang mensahe nga ginapaliton dapat nahisuno sa bugna sang Ebanghelyo kag sa doktrinal nga tradisyon sang iglesia.” “Wala sing bag-o nga bugna ang makabag-o sa nauna nga bugna.” Subong man, si Papa Juan Paulo II nagpaathag nga “ang mensahe nga ginhatag sa Fátima sang 1917 nagaunod sang bug-os nga kamatuoran sang Ebanghelyo.” Ini tanan nagakahulugan nga labaw sa tanan, ang mensahe nga ginhatag sina nga mga aparisyon dapat mag-ugyon sa “bugna,” ang Balaan nga Kasulatan. Amo gid bala sini ang nagakatabo?

Ano nga mga konklusyon ang mahimo gikan sa mga palanan-awon tuhoy sa isa ka kalayuhon nga impierno nga ginhatag sa mga manugbantay sa Fátima? Maathag nga ginapakita sang Kasulatan nga ang mga makasasala wala ginasilutan sa sining paagi kon mapatay sila. Si Jesus mismo nagsiling nga dapat kita mahadlok sa Isa nga makalaglag sang kalag kag lawas, sa amo nagapakita nga ang kalag mahimo mapatay. Ang iban pa nga teksto sa Biblia maathag nga nagatudlo nga wala sing pangalibutan sa kamatayon kag nga ang paglaum nga mabuhi liwat napasad sa saad sang Biblia tuhoy sa pagkabanhaw sa palaabuton.—Mateo 10:28; Manugwali 9:5, 10; Juan 5:28, 29.

Kag ano naman ang “Imaculada Concepcion” nga ginhambal ni Ber­na­dette? Ini man isa ka daku nga pagsumpakil sa panudlo sang Biblia. Ginapakita sang Kasulatan nga si Maria, kaangay sang tanan nga kaliwat ni Adan, ‘ginpanamkon sa sala’ kag nakapanubli sing kamatayon. (Salmo 51:5; Roma 3:23) Kon si Maria ginpanamkon nga wala sing sala, ngaa naghalad sia sing halad para sa sala sa tapos matawo si Jesus? (Levitico 12:6; Lucas 2:22-24) Dugang pa, wala sing bisan isa lang ka teksto sa Biblia nga nagasakdag sa Katoliko nga doktrina nga nagasiling nga sia nahilway sa orihinal nga sala bangod sang pinasahi nga bugay. Sanglit ang pagsimba kay Maria wala sing Makasulatanhon nga sadsaran, makatarunganon magpautwas sing mga pamangkot sa kon bala ang iya mga aparisyon naghalin sa Dios.

Lain Ayhan ang Ginhalinan Sini?

Sa pagkamatuod, nahibaluan sang mga eskolar sa Biblia nga indi tanan sang milagruso nga mga tanda naghalin sa Dios. Sa tapos ginsambit ang mga milagro nga nahimo sang Egiptohanon nga mga salamangkero sa atubangan ni Paraon kag ni Moises, ang Diction­naire de la Bible, nga gin-edit ni F. Vigouroux, nagasiling nga “sa katapusan nga mga adlaw, ang dimatuod nga mga manalagna kag dimatuod nga mga Cristo, tanan ahente sang Yawa, magahimo sing madamo nga milagro tubtob sa punto nga limbungan ang matutom nga mga disipulo ni Jesucristo, kon mahimo ina.”—Mateo 24:24; Exodo 7:8-13.

Apang ano kon, subong sang natabo sa Fátima, ang aparisyon nagaagda sa katawhan nga maghinulsol kag nagapangabay sa mga tumuluo nga mangamuyo para sa pagkombertir sa mga makasasala? Sing makawiwili, ang libro nga pabor sa mga aparisyon, nga natig-uluhan Fàtima—Merveille du XX^e siècle (Fátima—Kalatingalahan sang Ika-20 nga Siglo), nagbalikwat sa pari, nga didto sadto sa Fátima, nga nagaduhaduha nahanungod sa ginhalinan sining mga mensahe walay sapayan sang unod sini. Sia nagsiling: “Mahimo nga daya ini sang mga demonyo.” Sa pagkamatuod, ginapakita sang Biblia nga si Satanas “nagapakaanghel sang kapawa” kag nga “ang iya mga alagad, man, nagapakunokuno subong mga alagad sang pagkamatarong.” (2 Corinto 11:14, 15, The Jerusalem Bible) Busa ang maayong mensahe indi pamatuod nga ang isa ka aparisyon naghalin gid sa Dios.

Amo man sini ang konklusyon sang [Katoliko] nga Dictionnaire historique de la Bible ni Calmet, nga nagasiling: “Ang mga milagro kag mga kalatingalahan indi pirme sigurado nga tanda nga ang mga nagahimo sini balaan ukon nga ang ila doktrina husto, ukon nga ini sigurado nga pamatuod nga ang mga bisyonaryo nakabaton sing misyon.”

Sa pagpatuhay, si Cristo naghimo sing madamo nga milagro sang yari sia sa duta. Ano ang iya katuyuan, kag ano nga kapawa ang ginapasilak sini sa mga milagro kag mga kalatingalahan karon? Ining mga pamangkot pagasabton sa masunod nga artikulo.

[Kahon/Laragway sa pahina 6]

Disiembre 9, 1531.

Ang isa ka Mexicano nga Indian, nga nagahingalan kay Juan Diego, nagadalidali pakadto sa Mesa sa siudad sang Mexico. Sa iya dalanon nasugata niya ang isa ka babayi nga nagsugo sa iya nga pangabayon ang obispo sang siudad sang Mexico nga magpatindog sing simbahan sa duta nga iya ginatindugan. Ang obispo nagduhaduha sa mensahe sang Indian.

Sa masunod nga aparisyon, ginpakilala sang babayi ang iya kaugalingon subong iloy sang matuod nga Dios kag sa isa pa gid subong “Balaan nga Maria sang Guadalupe.” Sa paghatag sa iya sing tanda, ginsugo sang babayi si Juan Diego nga manguha sing rosas, bisan pa indi yadto panahon sang mga rosas kag indi yadto ang lugar sang mga rosas. Walay sapayan, nakakita sia sing pila ka rosas, kag ginputos ini sa iya panapton. Samtang ginadaho niya ini sa obispo, ang daw tawo kadaku nga laragway sang “Birhen” nagpakita sa iya panapton.

Ang laragway sang danyag ginapasundayag karon sa Guadalupe Basilica, malapit sa siudad sang Me­xico.

[Laragway]

Guadalupe

[Kahon/Laragway sa pahina 7]

Pebrero 11, 1858.

Ang 14 anyos nga Pranses nga lin-ay nga si Ber­na­dette Soubirous, ang iya utod nga babayi, kag ang isa ka abyan nangahoy malapit sa Lourdes, isa ka banwa sa bagatnan-nakatundan sang Pransya malapit sa dulunan sang Espanya. Sang manugtabok na si Ber­na­dette sa sapa, nagpakita sa iya ang “babayi” sa grotto. Sa iban pa nga mga okasyon, ang amo gihapon nga “babayi” nangabay sa iya magpatindog sing kapelya sa sadto gid nga duog kag nagpakiluoy sa tanan nga katawhan nga maghinulsol.

Sa isa pa ka aparisyon, nabatian ni Bernadette ang “babayi” nga nagasiling sa lokal nga dialekto: “Ako ang Imaculada Concepcion.” Nagaisahanon batok sa sibil kag relihioso nga awtoridad, si Bernadette Soubirous nagsiling nga matuod ang iya mga ginpanugid. Sang ulihi, opisyal nga ginkilala sang Iglesia Katolika ang mga aparisyon sang “Birhen.” Ang resulta amo ang santuaryo sa Lourdes.

[Laragway]

Lourdes

[Kahon/Laragway sa pahina 8]

Mayo 13, 1917.

Ang isa ka lalaki kag duha ka babayi nga manugbantay sang karnero nagabantay sang ila mga panong sa Fátima, sa sentral nga Portugal, nga sa diin nakita nila ang nahauna nga aparisyon sang “Birhen.” Sa tion sang ulihi nga aparisyon, nagdalidali sa pagkadto ang mga tawo sa sadto nga duog sa paglaum nga makabaton sila sing tanda. Nagsiling sila nga nakita kono nila ang adlaw nga nagsaot sa langit kag dayon nahulog sa duta.

Ang kabataan nakabaton man sing “mga sekreto.” Nakakita sila sing palanan-awon tuhoy sa impierno, nga sa diin nakita nila ang mga makasasala nga nagaantos sa kalayo. Nangabay man ang “Birhen” sa Rusya nga idedikar sa iya “imaculada nga tagipusuon.” Sang ulihi gintuman sang mga papa ang iya ginapangayo. Ang katapusan nga “sekreto” ginabantayan sang pinakamataas nga awtoridad sang Iglesia Katolika, nga nagadumili sa pagpahibalo sini sa publiko karon.

[Laragway]

Fátima