Inaway—Paglandas sa Resulta Sini
PAANO makalandas ang mga tawo nga ginatublag gihapon sang inaway? Agod mahangpan ining tema, gin-interbyu sang Magmata! ang pila ka biktima sang inaway.
Si Bob Honis lakip sa linibolibo ka U.S. Marines nga nagpakig-away sa ikaduha nga inaway kalibutanon sa inaway sang Iwo Jima sa nakatundan nga Pasipiko. Ang iya sugilanon ginbalhag indi agod magpahadlok kundi agod ipakita nga ang iban mahimo makapanumbalik gikan sa pinakamasakit nga mga handumanan.
Ang Masakit nga Handumanan
“Ginsugdan namon ang pagpalapit sa Iwo Jima sang alas 8:30 s.a. sang Pebrero 19, 1945. Ang dalagku nga mga kanyon sang bapor-de-guerra nga Tennessee mahipos sa likod namon, kag dayon ang amon salakyan pa takas gin-uyog sang mga bomba gikan sa mga kanyon sang kaaway sa baybay. Ang emosyon nagbaskog kag nag-init para sa masunod nga aksion, kag nagsinggit ako sa tunga sang tanan nga kagahod, ‘Ibilin ang iban para sa amon!’ samtang ginasundan namon ang nahauna nga tropa nga nagsalakay.
“Sang makalab-ot na kami sa takas, ang mapanimahuan ko lamang amo ang baho sang pulbura sang kanyon, ang bulkaniko nga abo, kag ang nagakasunog nga mga kasangkapan. Naigo ang amon salakyan pa takas. Ang tsuper napatay dayon, kag naguba tanan nga armas namon.
“Indi ko gid malipatan ang patay nga mga marino nga nakita ko. Ang isa nagakulob sa balas. Ang iya bota para sa inaway, nga nahul-ab ang dapadapa, nahigot pa tubtob sa iya tuhod, sa mga batiis nga sang una bata pa kag mabakod. Pagtulok ko sa tuo samtang nagakamang ako pakadto sa isa ka buho nga ginkutkot sing madasig, nakita ko ang isa ka marino nga nagasiuktot kag ang iya riple yara gihapon sa iya dughan apang wala na sia sing ulo. Naglinapta ang patay nga mga marino sa baybay, nga ang utod-utod nga kalawasan sang madamo indi malaragway. Pamuno lamang ini.
“Sang ikaduha nga adlaw ginpadala ako agod usisaon ang isa sang amon posisyon. Daw ano ka makangilidlis nga danyag ang nag-atubang sa akon! Gin-utod sang bomba ang mga tiil kag mga kamot sang una nga marino nga nakita ko. Ang iya pandong kag higot sa sag-ang yara pa gihapon. Ang iya mga mata nagamuklat, nga nagatulok sa unhan nga subong bala daw nagapamalandong sia. Kaangay sang nautod-utod nga mga hampanganan nga nagalinapta sa palibot, ang iban nga mga katapo sang grupo sa pagbomba nangin utod-utod na lamang nga mga unod nga nagalapta sa mahumok kag itom nga abo gikan sa bulkan.
“Ang pagpatyanay nagpadayon tubtob sa ikatlo nga adlaw. Nian ang mga bangkay madasig nga naghagas. Ang baho indi maagwanta. Naghil-ob ini bisan diin. Indi ini malikawan.
“Sa tapos sang apat ka adlaw sang mabangis nga pag-inaway, sang Pebrero 23 ginhiwat ang kilala karon nga pagpasaka sang bandera sang mga Amerikano sa Bukid Suribachi. Sa baylo nga maghugyaw, nadulaan ako sing paglaum. May patay bisan diin. Daw ka barato gid sang kabuhi. Ang mapintas nga pag-inaway nagpadayon tubtob sang Marso 26, sang madaug sang ulihi ang Iwo Jima, pagligad sang duha ka semana nga walay untat nga pagpatyanay. Daw ano nga dugo ang napaagay—sa kabilugan 26,000 ka Amerikano kag Hapones ang napatay sa isa ka isla nga beinte kilometros kuwadrados lamang sa kadakuon!
Ang Resulta
“Dapat kuntani ako malipay gid sang makahalin na ako sa Marines kag nakabalik liwat sa akon pamilya. Apang, sa baylo, ang nagatubo sa sulod nakon nangin hayag karon—ang pagbatyag sing pagkawalay unod kag pagkawalay pulos.
“Ginatormento ako sang mga pamangkot. Kon ang kabuhi barato gid, ano pa ang katuyuan sang pagkabuhi? May yara gid bala nagaulikid nga Dios? Indi bala ako pagpalinungon sang akon mga inagihan sa nabilin nga bahin sang akon kabuhi? Bisan sa tapos ko mapakaslan ang akon asawa nga si Mary, ang tormento nagpadayon. Wala ako sing ginalauman nga dayon kag malipayon nga palaabuton, kundi inaway lamang kag kapin ka walay kaluoy nga pagpatyanay tubtob, sa ulihi, malaglag ang duta kag ang tanan nga kabuhi sa sini.
Pagsapo sa Solusyon
“Wala madugay sa tapos kami ginkasal, ang akon asawa kag ako ginduaw sang duha ka Saksi ni Jehova. Naghatag ini sa akon sing kahigayunan nga mamangkot sing nagapangusisa nga mga pamangkot nahanungod sa inaway, pag-antos, kag sa katuyuan sang kabuhi. Ang mga sabat sa akon mga pamangkot madasig nga ginkuha sa Biblia.
“Huo, may yara mahigugmaon nga Dios nga nagaulikid kag sa dili madugay remedyohan niya ang tanan naton nga kasakit kag kasubo. (Salmo 83:18; Bugna 21:1-4) Indi, wala ginakahamut-an sang Dios ang mga inaway sa paglab-ot sang politikal nga mga tulumuron sang tawo. (Salmo 46:9; Isaias 2:4; Juan 18:36) Indi, ang duta indi malaglag sa isa ka nukleyar nga sunog. Magapabilin ini sing dayon, subong isa ka paraiso nga puluy-an para sa tanan nga makasunod sa mga ginapatuman sang Dios.—Salmo 37:29; Isaias 45:18; Bugna 11:17, 18.
“Samtang nagapadayon ang pagtuon ko sang makalilipay nga mga saad sa Biblia, ang pagkawalay unod sa sulod nakon amat-amat nga nasudlan. Nagdugang ang akon pagsalig nga ang Ginharian sang Dios amo lamang ang realistiko nga paagi sa pagpaluntad sang paghidait kag kalig-onan sa duta. Dulaon sa ulihi sang inaway sang Armagedon sang Dios ang tanan nga kalautan sa duta.—Daniel 2:21, 22; Mateo 6:10; Bugna 16:14-16.”
Pabaskuga ang Paglaum sa mga Saad sang Dios
Ang iban pa nagapamatuod nga ang pagtuon sang katuyuan sang Dios para sa duta kag sang Iya mga rason sa temporaryo nga pagtugot sa kalautan nangin amo ang labing mabaskog nga butang nga nagabulig sa ila sa paglandas sang masakit nga handumanan sang inaway.
Wala ini nagapahangop nga ang propesyonal nga medikal nga bulig mahimo nga indi kinahanglanon kon kaisa. Apang ang matuod nga paglaum, nga napasad sa masaligan nga mga saad sang Dios sa Biblia, nagahatag gid sing nasulod nga kusog sa pagbatas sang mabug-at nga mga problema.
Apang, mahimo nga wala ikaw naapektohan sing personal sang masakit nga handumanan sang inaway. Apang mahimo nga may kilala ka nga subong sini. Ano ang imo mahimo agod makabulig ka? “Mangin mahinangpanon kag makapalig-on sa mga nagaantos sa sining paagi,” siling sang isa ka biktima sang masakit nga handumanan sang inaway, nga si Mary C__. “Buligi ang subong sina nga mga tawo sa paglaum sa palaabuton, sa paghunahuna sang mga saad sang Dios, indi sang nagligad nga mga trahedya,” laygay niya. Huo, mangin mapailubon kag maluluy-on. Mangin mahinangpanon. Kag buligi sila sa pagpabaskog sing paglaum para sa palaabuton.
‘Apang,’ mahimo masiling ka, ‘paano mangin solusyon ang isa pa ka inaway, ang Armagedon, sa mga nag-antos sang masakit nga handumanan sang inaway?’ Ang Armagedon, ang inaway sang Dios batok sa tanan nga kalautan, mangin isa ka inaway nga wala sing inosente nga mga biktima. Himuon ini ‘sa pagkamatarong,’ nga sa diin ang mga malauton lamang ang mapatay.—Bugna 19:11; Hulubaton 2:20-22.
Ang Armagedon wala sing makahaladlok nga mga resulta, wala sing nagabalikbalik nga malain nga mga damgo ukon iban pa nga halit sa hunahuna. Tumanon sang bag-ong kalibutan sang Dios ang matagnaon nga laragway nga ginsambit sa Isaias 65:17-19: “Ang una nga mga butang indi na pagdumdumon, . . . kag indi na gid mabatian . . . ang tingog sang paghibi ukon ang tingog sang pagtangis.”
Ang tanan nga biktima sang inaway kag kasingki, bisan ang mga patay, magabenepisyo gikan sa sining inaway. (Salmo 72:4, 12-14; Juan 5:28, 29) Hunahunaa ini—isa ka pagpasag-uli sang Paraiso sang paghidait nga amo ang katuyuan sang Dios sa ginsuguran.
“Ining paglaum nga ginahatag sang Biblia,” siling ni Bob Honis, “amo ang sekreto sa paglandas sa resulta sang inaway. Ang tanan nga nahalitan sang masakit nga handumanan sang inaway makabenepisyo gikan sa sina nga paglaum. Ini nga sahi sang paglaum, suno sa ginasiling sang Biblia, amo ‘ang angkla sang kalag.’”—Hebreo 6:19.
[Mga Laragway sa pahina 7]
Sang nagapakadto kami sa Iwo Jima, gintun-an namon ang mga modelo sang isla
Si Honis amo ang sa ibabaw sa tuo nayon
[Piktyur sa pahina 8]
“Ang nagatubo sa sulod nakon nangin hayag karon—ang pagbatyag sing pagkawalay unod kag pagkawalay pulos”
[Ginkuhaan]
U.S. Marine Corps
[Laragway sa pahina 9
Sanday Bob kag Mary Honis karon