Ang Paghimud-os sing Materyal nga Kabuganaan

SANG KORESPONSAL SANG MAGMATA! SA TAIWAN

‘INDI makabakal ang kuwarta sing kalipay!’ Bisan pa nagaugyon sa sina nga pinamulong ang kalabanan nga tawo sa kabilugan, madamo gihapon sa ila ang wala nagauntat sa paghimud-os sing materyal nga manggad subong isa ka paagi padulong sa mas malipayon nga kabuhi. Kag ngaa abi indi? Kay daw subong bala nga ang solusyon sa madamo gid nga problema sang katawhan yara sa materyal nga kadalag-an kag kabuganaan.

Hunahunaa lamang kon daw ano ka tuhay ang kalibutan kon ang tagsa ka lalaki, babayi, kag bata bugana sa materyal! Madula ang kahuy-anan kag ang pag-antos sang minilyon nga nagapuyo sa mga slum sang kalibutan. Madula man ang problema tuhoy sa pagkawala mapuy-an nga nagapabug-at karon sa tagsa ka pungsod, manggaranon kag imol.

Kag kamusta naman ang maayong panglawas, nga tuman ka importante sa kalipay? Bisan pa daku ang pag-uswag sang medikal nga siensia, napamatud-an sang dugang kag dugang pa nga mga tawo nga indi nila masarangan bayaran ang pagpabulong. Sa pihak nga bahin, minilyon gihapon ang nagakagutman kag ginakulang sing masustansia nga kalan-on sa adlaw-adlaw. Kon ang bug-os nga kalibutan may kabuganaan, makatigayon ang tagsatagsa sing mas mapagros, kag sa amo, mas malipayon nga kabuhi​—indi bala?

Bisan gani ang duta makabenepisyo. Paano? Ang palibot karon sang duta ginapierdi sang makamamatay nga mga pollutant, nga ang isa sang mga kabangdanan amo ang pagsunog sa kinaugali nga mga panggatong. Apang, ang isa ka rason nga ginsambit kon ngaa wala ginapadayon ang teknolohiya nga kinahanglanon sa paggamit sing mas matinlo nga mga porma sang enerhiya amo nga tuman sini ka mahal. Ang mga kabangdanan nga pang-ekonomiya amo man ang daku nga ginabasol sa pagkapierdi sang mga rain forest (kagulangan), isa pa ka daku nga peligro sa ekolohiya.

Sanglit ang materyal nga kabuganaan daw mahimo nga makalubad sing madamo gid naton nga problema kag makapakanay sing madamo gid nga pag-antos, indi katingalahan nga ginakabig sang mga tawo ang kalipay subong isa ka resulta sang manggad. Halimbawa, samtang ang mga taga-Nakatundan nagatamyawanay sing “Malipayon nga Bag-ong Tuig! ” sa Adlaw sang Bag-ong Tuig, ang mga Intsik naman, sa panahon sang ila pagsaulog sing lunar nga Bag-ong Tuig, kinaandan nga nagasiling sing “Kung hsi fa tsai” sa isa kag isa, isa ka pagpabutyag sing paglaum nga kuntani ‘magmanggaranon’ sila! Huo, indi mapanghiwala nga nagakabuhi kita sa isa ka kalibutan diin ginahatagan sang mga tawo ang paghimud-os sing materyal nga kabuganaan sing tuman kataas, kon indi man ang pinakamataas, nga prioridad. Ang kadalag-an ukon kapaslawan masami nga ginatakus suno sa materyal nga manggad sang isa.

Samtang ang pagtigayon kag pagbenepisyo sa materyal nga mga butang indi malain sa iya kaugalingon, makagarantiya bala ini sing kalipay? Sig-ano nga importansia ang dapat ipatuhoy sa sini? Kabuganaan gid bala sa materyal ang yabi sa isa ka mas maayo nga kalibutan?