Kalipay—Ginagarantiyahan!
“MALIPAYON ang mga mahunahunaon sang ila espirituwal nga kinahanglanon,” siling ni Jesucristo. (Mateo 5:3) Batok sa kinaandan nga kaalam, ginpatalupangod ni Jesus ang pagpaayaw sa espirituwal nga kinahanglanon sang isa sa baylo sang pagpaayaw sa materyal nga mga handum subong amo ang isa ka kinahanglanon nga ingrediente agod magmadinalag-on sa pagpangita sing kalipay. Inang mga pulong ni Jesus, kon sundon, isa ka garantiya sang kalipay.
Apang, ang pagkamahunahunaon sa espirituwal nga kinahanglanon sang isa, nagakahulugan sing kapin pa sa pagkahibalo lamang nga ina nga kinahanglanon nagaluntad. Sa masami gid, ang isa ka kinahanglanon nga wala mapaayawan amo ang ginatunaan sang kabalaka kag hinakit sa baylo sang kalipay. Ginpabutyag ini sang isa ka hulubaton sa Biblia sing subong sini: “Ang paglaum nga napalantang nagapasakit sang tagipusuon.” (Hulubaton 13:12) Sa amo, ang kalipay nagapamukadkad samtang ang isa nagahimo sing mga tikang sa pagkilala kag dayon sa pagpaayaw sang iya espirituwal nga kinahanglanon. Paano ini mahimo?
Sa amo sini nga ang Biblia nagaaman sang kon ano ang kinahanglanon. Ngaa? Bangod amo lamang ini ang makahatag sing mga sabat sa mga pamangkot nga madugay na ginapalibugan sang madamo apang wala gihapon makakita sing makaalayaw nga mga sabat. Halimbawa, ginpalibugan mo na bala kon, ‘Ano ang katuyuan sang kabuhi? Ngaa yari ang tawo sa duta? Ano ang ginatigana sang palaabuton?’ Luwas nga nagaaman sing makaalayaw nga mga sabat sa sini kag madamo pa nga mga pamangkot, nagahatag man ang Biblia sing panuytoy para sa pagkabuhi nga nakabulig na sa minilyon sa paglandas sang madamo nga problema nga nagaatubang sa aton tanan karon kag sa masami nagaupang sa aton pagpangita sing kalipay. “Ang pulong [sang Dios] suga sa akon mga tiil, kag kapawa sa akon banas,” siling sang salmista. (Salmo 119:105) Huo, ang Biblia isa ka sigurado nga panuytoy nga makabulig sa imo nga magmadinalag-on sa pagpangita sing kalipay. Binagbinaga ining duha ka natabo gid nga mga halimbawa.
Halin sa Paghinakit Padulong sa Malipayon nga Pag-asawahay
Ang pag-asawahay mahimo mangin kabangdanan sang kalipay ukon pag-antos. Sing makapasubo, ang naulihi amo ang nagakatabo sa madamo. Apang, ang laygay sang Biblia, sang gin-aplikar, nakabulig sa madamo sa pagsapo sing kalipay sa isa anay ka dimakalilipay nga pag-asawahay.
Amo sina ang naeksperiensiahan nanday Yungk’un kag Meihsiu. “Indi makalilipay ang una nga pito ka tuig sang amon pag-asawahay,” panuaron ni Yungk’un. “Diutay lamang nga tion ang ginahinguyang ko upod sa akon asawa kag duha ka bata nga babayi. Sa kamatuoran, masunson ako nagatulog sa akon ginatrabahuan.” Bisan pa may yara sila sang tanan nga materyal nga kinahanglanon, indi sila malipayon. Ang iya asawa nagdugang pa: “Luwas sa pag-aman sa amon sing materyal, ako na ang ginpaatipan sang akon bana sang tanan nga butang sa pamilya. Naghinakit gid ako sa sini.” Nagplano pa gani sila nga magbulagay.
Si Yungk’un may iban pa nga mga problema tuhoy sa pamilya. Bangod sang nagligad nga mga problema sa pamilya, pito ka tuig na nga wala niya ginabugno ang iya magulang nga babayi. Amo sini walay sapayan sang kamatuoran nga wala pa sa isa ka gatos ka metro ang kalayuon sang ila ginapuy-an gikan sa isa kag isa. Apang, sa karon, malipayon na sia sa ila pag-asawahay kag maayo na ang iya kaangtanan sa iya utod nga babayi. Paano natabo ining daku nga pagbag-o?
“Ako kag ang akon asawa nagsugod sa pagtuon sing Biblia upod sa mga Saksi ni Jehova kag sa pagtambong sa ila semanal nga mga miting tuhoy sa Biblia,” paathag ni Yungk’un. Amo man ang ginhimo sang iya utod nga babayi. Ginsugdan nila nga iaplikar ang mga butang nga ila ginatun-an kag nagdayaw sila sa mga resulta. Si Yungk’un nakakita sing trabaho nga nagtugot sa iya sa pag-atipan indi lamang sang materyal nga mga kinahanglanon sang iya pamilya kundi sang ila man espirituwal kag emosyonal nga mga kinahanglanon. Isa na sila karon ka malipayon kag nahiusa nga pamilya.
Nakasapo Sia sing Katuyuan sa Kabuhi
Ang mga nakatuon sing kinaugali sang tawo nagsiling nga agod magmalipayon dapat nga may rason kita sa pagkabuhi, isa ka katuyuan sa kabuhi. Ang kabuhi nga nasentro sa makagod nga paghimud-os sing materyal nga mga butang wala nagapaayaw sini nga kinahanglanon. Napamatud-an ini sang 26-anyos nga si Lini.
“Nagatrabaho anay ako sing 12 ka oras kada adlaw, sa pito ka adlaw kada semana,” siling niya. “Ang akon tulumuron amo ang makabukas ako sing daku nga parlor.” Bisan pa malapit na niya matuman ang iya damgo, may kulang sa iya kabuhi. “Ginapaligban ko anay kon ano ang katuyuan sang kabuhi. Amo lamang bala ang magtrabaho kag mangita sing kuwarta?”
Nian isa ka adlaw may isa nga nagkadto sa iya parlor kag ginpamangkot sia sang pakiana gid nga ginpalibugan na niya anay. Ginsugiran sia nga masabat sang Biblia ina nga pamangkot. Bisan pa wala pa gid sia anay makabasa sing Biblia, nagsugot sia nga magpain sing isa ka oras kada semana agod usisaon ini.
Gikan sa iya semanal nga pagtuon, natun-an ni Lini nga gintagna na sang Biblia ang madamo sang mga butang nga iya ginasaksihan sa kada adlaw. Nakibot sia sa sibu gid kag abanse nga paglaragway sang Biblia sa mga panimuot sa palibot niya, nga nagatagna nga ang mga tawo mangin “mahigugmaon sang kaugalingon, mahigugmaon sing kuwarta, bugalon, palabilabihon, mapasipalahon, malalison sa mga ginikanan, dimapinasalamaton, dibalaan, wala sing kinaugali nga gugma, indi tampad sa bisan anong kasugtanan, mapatupatuon, wala sing pagpugong sang kaugalingon, mabangis, wala sing gugma sa kaayuhan, maluib, dasudaso, nagahabok sa pagpadayaw, mahigugmaon sa kinasadya sa baylo sang sa Dios.” Natun-an niya ang iban pa nga mga tagna nga nagatudlo sa wala tupong nga pag-antos nga resulta sang mga inaway, tiggulutom, kag kinaugali nga mga kalamidad nga makita sa bug-os nga kalibutan.—2 Timoteo 3:1-5; Mateo 24:7, 12.
Nian may natun-an si Lini nga nagpahalipay gid sa iya—nga ining mga kahimtangan sa kalibutan nga masami nagadingot sing kalipay sa katawhan isa ka patimaan nga malapit na ang isa ka bag-ong dag-on sa maragtas sang tawo. (Mateo 24:3-14) Nabasa man niya sa Biblia nga ang Manunuga sang katawhan nagatuyo sa pagtukod sing isa ka bag-ong kalibutan diri sa duta, diin ang materyal nga kabuganaan nga wala pa maagom sang dihimpit nga tawo magaluntad sa bug-os nga kalibutan. (Salmo 72:16; Isaias 65:17, 18, 21, 22) Ining bugana nga katilingban sa palaabuton indi pagmusingan sang kadalok, kakagod, kag materyalismo, upod ang tanan malaut nga resulta sini. (Salmo 37:9-11, 29; 1 Corinto 6:9, 10) Nakunyag sia sang mabasa niya ining mga pulong sa Biblia: “Suno sa iya saad nagahulat kita sing bag-ong mga langit kag bag-ong duta, kag sa sini magapuyo ang pagkamatarong.”—2 Pedro 3:13.
Nagahulat sa Imo ang Kalipay
Sa baylo nga ihinguyang ang iya bug-os nga tion sa paglab-ot sa materyal nga mga tulumuron, ginahinguyang karon ni Lini ang daku nga bahin sang iya tion sa pagsugid sa iban nahanungod sa iya natun-an. Luyag mo bala makahibalo sing dugang pa nahanungod sining matahom nga mga saad? Luyag mo bala tukibon kon paano ang Biblia makabulig sa imo sa pagsapo sing kalipay nga nasapwan ni Lini, ni Yungk’un, ni Meihsiu, kag sang minilyon nga iban pa? Handa gid ang mga Saksi ni Jehova sa pagbulig sa imo.
[Retrato sa Pahina 8, 9]
Katuyuan sang aton Manunuga nga magtukod sing isa ka dutan-on nga paraiso