Ang Pagtamod sang Biblia

Mabudlay Gid Bala Lab-uton ang mga Talaksan sang Dios?

“WALA GINATAKUS SANG DIOS ANG MGA TAWO SING TUL-ID.”​—DUMAAN NGA HULUBATON SA SCOTLAND.

ANG mga pasinawan sa eskwelahan, mga interbyu sa trabaho, kag medikal nga mga eksaminasyon pila lamang ka importante nga tion sa kabuhi diin ginatakus ang isa ka persona. Apang tuhoy sa adlaw-adlaw nga pagkabuhi suno sa mga talaksan sang Dios, madamo nga tawo ang nagabatyag nga basi mapaslawan sila sa paglab-ot sini. Amo man bala sina ang imo pagpati? Malab-ot mo bala ang mga talaksan sang Dios?

Sa pagsabat, tan-awon naton anay ang mga talaksan nga ginpatuman sang Dios sa iya mga sumilimba. Ginapaathag sang Biblia kon paano kita dapat maglakat sa kabuhi. (Salmo 119:​105) Ang maalamon nga manunulat sang Biblia nga si Hari Solomon naghinakop nga ang “bug-os nga katungdanan sang tawo” amo ang “magkahadlok sa matuod nga Dios kag magbantay sa iya mga sugo.” (Manugwali 12:13) Ang manalagna nga si Miqueas nagsiling: “Ano bala ang ginakinahanglan sa imo ni Jehova kundi ang paghimo sing matarong kag ang paghigugma sang kalulo kag ang paglakat sing mapainubuson upod sa imo Dios?”​—Miqueas 6:8.

Si Jesucristo, ang Anak mismo sang Dios, nagsiling nga wala na sing daku pa nga sugo sangsa “higugmaon si Jehova nga imo Dios sa bug-os mong tagipusuon kag sa bug-os mong kalag kag sa bug-os mong hunahuna kag sa bug-os mong kusog” kag “higugmaon ang imo isigkatawo subong sang imo kaugalingon.” (Marcos 12:​30, 31) Dugang pa, ginapakita naton nga ginahigugma naton ang Dios paagi sa pagtuman sang tanan niya nga sugo.​—1 Juan 5:3.

Sa simple nga hambal, dapat higugmaon kag tahuron sang tawo ang Dios, tumanon ang iya mga kasuguan, mangin makatarunganon, mangin maluluy-on sa tanan, kag likawan ang magpabugal. Indi bala naton masarangan lab-uton ang amo nga mga talaksan?

Ang Dios Nagapasunaid

Makatarunganon nga ginapaabot sang Dios nga lab-uton sang mga tawo ang iya mga talaksan. Apang, sing bunayag, may isa bala ka tawo nga nakatuman sing bug-os sa sining mga talaksan sa tanan nga tion? Wala gid, kay nakapanubli kita sing pagkadihimpit gikan sa aton amay nga si Adan. (Roma 5:12) Busa, may huyog kita nga makasala. Apang wala ini nagapugong sa aton sa pag-alagad sa Dios sing kalahamut-an.

Sa pag-ilustrar, binagbinaga ang mga problema sa pagtuon sa pagmaneho sang isa ka salakyan. Nagakinahanglan ini sing dayon nga pagkamabinantayon kag tion sa pagmaneho sing maayo agod makapasar sa isa ka pagtilaw sa pagmaneho. Sa pagkamatuod, dapat kita magpadayon sa paghanas sa pagmaneho bisan pagkatapos nga makakuha kita sing lisensia. Samtang nagadugang ang aton eksperiensia, labi kita nga nagabatid. Apang wala sing himpit nga mga drayber!

Sing makalilipay, ang Dios nagapasunaid sa aton mga kapaslawan. Indi sia dimakatarunganon, mapiliton sa kon ano ang indi naton masarangan himuon, ukon palapangita sia sing sayop. Nahangpan niya ang aton mga dikahimpitan kag mga kaluyahon. Si Hari David, nga nakasala sing daku nagtu-ad: “Wala sia maghisayo sa aton suno sa aton mga sala; ukon nagbalos sa aton suno sa aton mga kalautan.” Sa ano nga rason? “Kay subong nga ang mga langit mataas labaw sa duta, amo kadaku ang paghigugma sang [Dios] sa mga nagakahadlok sa iya.” Bisan nahibaluan ni Jehova nga nakasala kita, handa sia sa pagpahilayo sang aton mga sala “subong sa kalayuon sang sidlangan sa katundan.”​—Salmo 103:​10-14.

Indi Mag-ampo

“Kon ginapung-awan ako,” paathag sang isa ka sinsero nga sumilimba sang Dios, “nagahinakop ako kon kaisa nga indi ko gid mahimo ang magkabuhi suno sa mga talaksan sang Dios. Apang sang mapalambo ko ang mas positibo nga pagtamod, nabatyagan ko nga masarangan ko ang magkabuhi suno sa luyag sang Dios nga himuon ko. Apang indi ini mahapos!” Indi maluyahan sing buot kon subong sini ang nabatyagan mo. Indi lamang ikaw ang nahauna, ukon ang katapusan nga may amo sina nga balatyagon.

Ang Cristianong si apostol Pablo prangka nga nagbaton: “Kon luyag ko maghimo sing maayo, ang malaut malapit gid. Kay nagakalipay ako sa kasuguan sang Dios sa akon nasulod gid nga kaugalingon, apang nakita ko ang tuhay nga kasuguan sa akon mga bahin nga nagapakig-away batok sa kasuguan sang akon hunahuna kag nagadala sa akon sa kabihagan sa kasuguan sang sala . . . Kailo ako nga tawo!” Apang wala sia maghinakop nga ang ginapaabot sa iya sang Dios tuman kabudlay, kay nagdugang sia: “Sin-o bala ang magaluwas sa akon sa sining lawas sang kamatayon? Nagapasalamat ako sa Dios paagi kay Jesucristo nga aton Ginuo! Gani nian, ako gid sa hunahuna nagaalagad sa kasuguan sang Dios, apang sa unod nagaalagad ako sa kasuguan sang sala.” (Roma 7:​21-25) Busa nabatyagan niya nga masarangan niya nga pahamut-an ang Dios walay sapayan nga isa sia ka makasasala.

Si Jehova, ang aton mahigugmaon nga Manunuga, nagapatawad sang aton mga sala kag kasaypanan paagi sa bili sang halad nga gawad sang iya pinalangga nga Anak, si Jesus. “Kon ang bisan sin-o makasala,” sulat ni apostol Juan, “may mananabang kita upod sa Amay, si Jesucristo nga matarong. Kag sia amo ang katumbasan tungod sa aton mga sala.” (1 Juan 2:​1, 2) Ang sablag nga ginbutang sang sala kag nagaupang sa aton sa paglab-ot sa mga talaksan sa pagpakig-abyan sa Dios ginkuha ukon ginguba sang gahom sang halad ni Cristo. Gani napasag-uli na ang pagpakig-upod sa Dios.

Ang mapainubuson nga pagbaton sining mahigugmaon nga kahimusan nagadala sing kapatawaran, kay ang Dios nagapuyo “upod sa isa nga may mahinulsulon kag mapainubuson nga espiritu.” (Isaias 57:15) Makasalig kita sa Iya sa pagpasag-uli sang aton espiritu. Nangako sia nga ‘bangunon niya ang imol gikan sa yab-ok.’ Indi na kita dapat magpabilin nga napung-awan kon mapaslawan kita sa pagtuman sing bug-os sa Dios. Sa baylo, makasalig kita nga wala gid ginasikway sang Dios ang aton mga panikasog sa pagkabuhi suno sa iya mga talaksan.​—Salmo 113:​7; Hebreo 6:​10-12.

Bisan pa nga isa ini ka paghimakas, masapwan mo nga mangin mas malipayon ikaw sa paghimo sang kon ano ang kalahamut-an sa Dios. Ang debosyon sa Dios nagahimo sa kabuhi nga mahulas para sa imo kag sadtong sa palibot mo. Hunahunaa man ang palaabuton. Ang pagtinguha sa pagkabuhi suno sa mga talaksan sang Dios sa karon nagadala sing paglaum nga kabuhi nga walay katapusan sa idalom sang paraiso nga mga kahimtangan.​—Isaias 48:​17; Roma 6:​23; 1 Timoteo 4:8.

Nahibaluan sang eksperiensiado nga mga manugtaklad sa bukid nga kon didto na sila sa putukputukan, tungatunga pa lang ang ila nahimo. Dapat pa sila manaug nga hilway sa katalagman. Sing kaanggid, kinahanglan nga lab-uton sadtong mga nagakahadlok sa Dios ang Iya mga talaksan kag padayon nga magkabuhi nahisuno sa sini.​—Lucas 21:​19; Santiago 1:4.

Magtigayon sing kaumpawan gikan sa ihibalo nga ang mga talaksan sang Dios indi tuman kabudlay lab-uton. Kon mapaslawan ikaw kon kaisa sa pagsunod sing bug-os sa sini, mangayo sing patawad sa iya. Magsalig sa iya mahigugmaon nga bulig. (Salmo 86:5) Busa, upod kay Jehova kag sa iya Anak subong imo mga Kabulig, malab-ot mo ang mga talaksan sang Dios kag matigayon ang iya kahamuot.​—Hulubaton 12:2.