Kon Paano Ikaw Mabuhi sing Dayon

SANGLIT maathag nga ang tawhanon nga lawas may ikasarang para sa mas malawig nga kabuhi sangsa ginaagom karon sang mga tawo, ang iban nagpahamtang sang ila pagsalig sa siensia nga makatukib ini kon paano kita mabuhi sing dayon. “Samtang nagatigayon kita sing kapin ka kompleto nga ihibalo tuhoy sa mga kemikal sang lawas kag sang mga reaksion sini sa isa kag isa,” si Dr. Alvin Silverstein nagsulat, “matukiban naton ang kinaugali sang kabuhi. Mahangpan naton . . . kon paano nagatigulang ang tawo.”

Upod ang ano nga resulta? Magadul-ong ini sa “isa ka bag-ong dag-on sa maragtas sang tawo,” siling ni Silverstein. “Wala na sing ‘tigulang’ nga mga tawo, kay ang ihibalo nga magatugot sa pagdaug sa kamatayon magadala man sing dayon nga pagkapamatan-on.”

Mahimo ayhan ini sang tawo? “Dili kamo magsalig sa mga dungganon, ukon sa anak sang dutan-on nga tawo, nga sa iya wala sing kaluwasan,” panugyan sang Biblia. “Ang iya espiritu nagaguwa, nagabalik sia sa iya duta; sa amo nga adlaw nagakawala ang iya mga hunahuna.” (Salmo 146:​3, 4) Napaslawan ang tawo nga hibaluon, kag labi na nga tadlungon, ang duna nga sayop nga nagadul-ong sa pagtigulang kag kamatayon, nga nakita gid naton. Ang aton lamang Manunuga ang makahimo sina.

Apang, katuyuan gid bala sang Dios nga mabuhi sing dayon ang mga tawo sa duta?

Katuyuan sang Dios

Sa diin ginpapuyo ni Jehova nga Dios ang unang tawhanon nga mag-asawa? Sa isa anay ka dutan-on nga paraiso. Kag ginsugo sila nga “magmabungahon kag magbuad kag tugbon ang duta kag gamhan ini.” (Genesis 1:28) Huo, katuyuan sang Dios nga sa ulihi, ang bug-os nga duta mapuy-an sang isa ka matarong nga tawhanon nga pamilya nga nagapuyo sa paghidait kag kalipay.​—Isaias 45:18.

Bisan pa ginpamatbatan sing kamatayon si Adan bangod sang iya pagkamalalison, ang orihinal nga katuyuan sang Dios para sa mga tawo nga magkabuhi sing dayon sa Paraiso sa duta wala magbag-o. (Genesis 3:​17-19) “Ginpamulong ko ini,” siling sang Dios, “pahanabuon ko ini.” (Isaias 46:11; 55:11) Ginpakita sang Dios nga ang iya katuyuan wala magbag-o tuhoy sa duta sang magsiling sia: “Ang mga matarong mismo magapanag-iya sang duta, kag magapuyo sa sini sing dayon.”​—Salmo 37:29.

Subong Manunuga naton, yara ang Dios sa posisyon sa pagtadlong sang depekto nga ginabangdan sang pagtigulang kag pagkapatay sang mga tawo. Sa anong sadsaran ginahimo niya ini? Sanglit ina nga depekto napanubli gikan sa una nga tawo, si Adan, gin-aman sang Dios subong isa ka halad nga gawad ang himpit tawhanon nga kabuhi sang iya Anak, si Jesucristo, “agod nga ang bisan sin-o nga magpakita sing pagtuo sa iya indi mawala kundi may kabuhi nga walay katapusan.”​—Juan 3:16; Mateo 20:28.

Sa epekto, ginbuslan ni Jesucristo ang orihinal nga si Adan subong aton amay, ukon manughatag sing kabuhi. Amo kon ngaa ginatawag si Jesus sa Biblia nga “katapusan nga Adan.” (1 Corinto 15:45) Gani sa baylo nga pakamalauton nga mapatay subong mga anak sang makasasala nga si Adan, ang matinumanon nga mga tawo mahimo kabigon nga takus sa pagbaton sing kabuhi nga walay katapusan subong mga anak sang ila “Dayon nga Amay,” si Jesucristo.​—Isaias 9:6.

Sa pagkamatuod, “ang Hari nga dayon” kag “ang Amay sang aton Ginuong Jesucristo” amo si Jehova nga Dios. (1 Timoteo 1:17; Bugna 15:3; Colosas 1:3) Apang si Jesucristo, luwas nga gin-aman subong aton “Dayon nga Amay” kag “Manluluwas,” amo man ang “Prinsipe sang Paghidait.” (Lucas 2:11) Subong tiglawas sang iya Amay, gamiton ni Cristo ang prinsipenhon nga awtoridad sa pagdala sing paghidait sa duta.​—Salmo 72:​1-8; 110:​1, 2; Hebreo 1:​3, 4.

Sa idalom sang paggahom ni Jesucristo, ang dutan-on nga Paraiso nga nadula matigayon liwat. Mahanabo ini, siling ni Jesus, “sa pagpanuga liwat, kon ang Anak sang tawo maglingkod sa iya mahimayaon nga trono.” (Mateo 19:28) Ang matutom nga mga sumulunod ni Cristo​—144,000 sila tanan​—magagahom kaupod niya sa ibabaw sang Paraiso nga duta. (2 Timoteo 2:​11, 12; Bugna 5:10; 14:​1, 3) Minilyon ang magabenepisyo gikan sa sinang matarong nga paggahom paagi sa pagtigayon sing kabuhi sa duta sa Paraiso. Malakip sa ila amo ang kriminal nga napatay sa tupad ni Jesus nga ginsaaran niya: “Mangin kaupod ko ikaw sa Paraiso.”​—Lucas 23:43.

Sa amo, bisan ang dimatarong nga mga patay pagabanhawon kag pagahatagan sing kahigayunan nga mangin takus para sa kabuhi nga walay katapusan sa duta. (Binuhatan 24:15) Matahom nga ginalaragway sang Biblia ang pagkadula sang balatian, pagtigulang, kag kamatayon, nga nagasiling: “Ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”​—Bugna 21:​3, 4.

Kon Paano Mabuhi sing Dayon

Sa pagkamatuod handum mo nga malakip sa mga magapanag-iya sang duta kag magpuyo sa sini sing dayon. Kon amo, dapat mo lab-uton ang mga tulumanon agod magkabuhi sing dayon sa Paraiso. Sang mangamuyo sa iya langitnon nga Amay, ginsambit ni Jesucristo ang isa ka sadsaran nga tulumanon, sa pagsiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”​—Juan 17:3.

Malipay ang mga Saksi ni Jehova nga buligan ikaw sa pagkuha sining nagahatag sing kabuhi nga ihibalo. Pangabaya lamang sila kag sa walay bayad, magaduaw sila sa kombenyente nga tion kag ipaathag ang katuyuan sang Dios nga bayawon ang katawhan sa espirituwal kag lawasnon nga kahimpitan. Saligi nga ang aton labing gamhanan nga Manunuga sangkol gid sa pagtadlong sang duna nga sayop nga ginabangdan sang pagtigulang kag kamatayon. Ang tion nagapakari, kag malapit na, nga ang kabuhi indi na mangin malip-ot. Pakamaayuhon ni Jehova ang iya katawhan sing “kabuhi nga walay latid.”​—Salmo 133:3.

[Retrato sa Pahina 10]

Sa idalom sang “prinsipenhon nga paggahom” ni Cristo, ang pagtigulang kag kamatayon pagadaugon