Isa ka Kalibutan nga Wala sing Inaway sa Indi Madugay

TAN-AWA liwat ang tagna sa Biblia sa Isaias nga nagasiling: “Salsalon nila ang ila mga espada nga mga punta sang arado, kag ang ila mga bangkaw nga mga galab nga inughagbas: ang pungsod indi magbayaw sing espada batok sa pungsod, kag indi na sila magtuon sing inaway.” Talupangda gikan sa konteksto nga yadtong nagsalsal sang ila mga espada nga mga punta sang arado amo ang “madamo nga tawo” nga nagalakat sa mga banas sang Dios. (Isaias 2:​2-4, King James Version) Nagakahulugan ini nga ginasimba sining mga tawo si Jehova nga Dios kag ginatuman ang iya mga kasuguan. Sin-o sila?

Mahimo nga naggikan sila sa nagkalainlain nga mga pungsod nga wala lamang nagsikway sa mga hinganiban sa inaway kundi nanikasog nga dulaon gikan sa ila mga hunahuna kag mga tagipusuon ang mga panimuot kag mga huyog nga nagadul-ong sa pagbinangig kag inaway. (Roma 12:⁠2) Sa baylo nga patyon ang ila isigkatawo, ginahigugma nila sia. (Mateo 22:​36-39) Nakabati ka na bala sing kaangay sina nga mga tawo?

Ayhan nabatian mo na nga ang mga Saksi ni Jehova nakatigayon sing isa ka internasyonal nga paghiliutod kag nagdumili sa pag-uyat sing mga armas sa pagpatay sa iban. Hunahunaa ini: Kon ang tagsatagsa sa duta may kaangay sina nga panimuot, indi bala nga ining planeta isa na kuntani ka duog sang paghidait kag kalig-unan?

Sa pagkamatuod, indi tanan may kaangay sina nga panimuot. Kasubong ini sa ginsulat ni Hari Solomon sang nagligad nga 3,000 ka tuig: “Nian nagbalik ako kag nakita ang tanan nga pagpigos sa idalom sang adlaw, kag, yari karon! ang mga luha sang mga ginpigos, apang wala sila sing manuglipay; kag sa bahin sang ila mga manugpigos may gahom.”​—⁠Manugwali 4:⁠1.

Pagtawag sa mga Mahigugmaon sang Paghidait

Magaluntad pa bala ang isa ka kalibutan nga wala sing inaway? Huo. Magaabot bala ini paagi sa panikasog sang mga tawo? Indi. Magaabot bala ini paagi sa pagkumbertir sa mga tawo sa matuod nga relihion? Indi. Ang tulun-an sang Salmo sa Biblia nagasabat: “Kari, tan-awa ang mga binuhatan ni Jehova . . . Sia nagapatunong sang mga inaway tubtob sa ukbong sang duta.”​—⁠Salmo 46:​8, 9.

Paano ina himuon ni Jehova nga Dios? Ang tulun-an sang Hulubaton nagasabat: “Ang matadlong magapuyo sa duta, kag ang himpit magapabilin sa sini. Apang ang malauton [yadtong nagasikway sa mga kasuguan sang Dios], utdon gikan sa duta; kag ang maluib gabuton sa sini.”​—⁠Hulubaton 2:​21, 22.

Ang isa ka pangunang rason kon ngaa wala maghikot ang Dios tubtob karon amo: Ginahatagan niya ang mga tawo sing kahigayunan nga makatuon tuhoy sa iya mga dalanon agod makalakat sila sa iya mga banas. Si apostol Pedro nagsulat: “Si Jehova wala nagapalantang nahanungod sa iya saad, suno sa pagbanta sang iban nga pagpalantang, kundi mabinatason ayon sa inyo, nga wala nagahandum nga mawala ang bisan sin-o kundi nga ang tanan makadangat sa paghinulsol.” (2 Pedro 3:⁠9) Busa, mahigugmaon nga ginabuligan sang katawhan sang Dios ang iban sa pagtuon tuhoy kay Jehova. Subong sang ginpabutyag ni Isaias, nagapanawag sila: “Kari kamo, magataklad kita sa bukid ni Jehova, . . . kag tudluan niya kita sang iya mga dalanon.”​—⁠Isaias 2:⁠3.

“Ang Ulihing mga Adlaw”

Gintagna man sang kasulatan sa Isaias nga ang pagtudlo sa mga tawo sa mga dalanon sang paghidait mahanabo “sa ulihing mga adlaw.” (Isaias 2:⁠2) Nagakabuhi kita sa sinang panahon karon mismo. Sa wala ginapaabot, ang mga inaway sining siglo nagapamatuod sini.

Sang ginpamangkot si Jesus sang iya mga disipulo kon ano ang magatanda sa katapusan sining sistema sang mga butang, gintagna niya ang “mabaskog nga mga linog, kag sa nagakalainlain nga mga duog mga tiggulutom kag mga kamatay.” (Lucas 21:11; Mateo 24:⁠3) Nagsiling man sia: “ ‘Kag kon makabati kamo sing mga inaway kag mga kinagubot, dili kamo magkakugmat. Kay ini kinahanglan mahanabo anay, apang ang katapusan indi pa sa gilayon.’ Nian nagsiling sia sa ila: ‘Ang pungsod magatindog batok sa pungsod, kag ang ginharian batok sa ginharian.’ ”​—⁠Lucas 21:​9, 10.

Walay sapayan nga may mga inaway sa sulod sang linibo ka tuig, ining siglo lamang ang nakasaksi sing duha ka inaway kalibutanon kag, suno sa pila ka pagbulubanta, literal nga may ginatos ka magamay nga inaway. Makakulugmat ang kamatuoran nga tignapulo ka minilyon ka tawo ang napatay sa mga inaway sa sining siglo. Suno sa World Watch nga magasin, sa sulod sang 2,000 ka tuig antes sang ika-20 siglo, isa ka milyon ka tawo ang napatay sa inaway sa sulod sang promedyo nga 50 ka tuig. Sa sining siglo, isa ka milyon ka tawo ang napatay sa inaway sa promedyo nga kalawigon nga isa ka tuig.

Isa ka Kalibutan nga Wala sing Inaway

Ang makakulugmat nga mga inaway sa aton siglo, upod sa iban madamo pa nga hitabo nga gintagna sa Biblia, nagapakita nga yara na kita sa talakdangan sang isa ka bag-ong kalibutan nga paluntaron sang Dios. Pagadulaon ang magamo nga daan nga kalibutan kag pagabuslan sang isa ka “bag-ong duta,” diin ang paghidait kag pagkamatarong magaluntad. (2 Pedro 3:13) Ang Pulong sang Dios nagasiling: “Utdon ang mga manughikot sing malaut, apang ang mga nagahulat kay Jehova magapanubli sang duta. Apang ang mapainubuson magapanubli sang duta, kag magakalipay sila sa kabuganaan sang paghidait.”​—⁠Salmo 37:​9, 11.

Sa bug-os nga duta karon, dimaisip nga minilyon ang nagahandum sing isa ka kalibutan nga wala sing inaway. Sa pagpakita nga pat-od gid nga tumanon sang Dios ang iya saad sa pagtuga sinang kalibutan, ang manalagna sang Dios sang una nagsulat: “Ang palanan-awon naigo pa sa pinat-od nga tion, kag nagadalidali sa katapusan, kag indi ini magbutig. Bisan magpalantang, hulata ini; kay sa pagkamatuod magaabot ini. Indi ini magpalantang.”​—⁠Habacuc 2:⁠3.

Busa, sing maalamon, magsalig ka sa Dios kag aguma ang katumanan sang iya saad: “Ang Dios gid magaupod sa [iya katawhan]. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”​—⁠Bugna 21:​3, 4.

[Kahon/Mga piktyur sa pahina 9, 10]

Ang Ginasaad sang Biblia sa Sinang Bag-ong Kalibutan:

Wala sing Krimen, Kasingki, Ukon Kalautan

“[Ang Dios] nagapatunong sang inaway tubtob sa ukbong sang duta.”​—⁠Samo 46:⁠9.

“Utdon ang mga manughikot sing malaut . . . Kay sa diutay pa nga tion, kag ang malauton wala na.”​—⁠Salmo 37:​9, 10.

Tanan nga Katawhan may Paghidait

“Kay sa aton natawo ang isa ka bata, sa aton ginhatag ang isa ka anak nga lalaki; kag ang pagbulut-an mangin sa iya abaga. Kag tawgon ang iya ngalan . . . Prinsipe sang Paghidait. Nahanungod sang pagdugang sang iya pagbulut-an kag sang paghidait walay katapusan.”​—⁠Isaias 9:​6, 7.

Ang Bug-os nga Duta Isa ka Paraiso

Nagsiling si Jesus: “Mangin kaupod ka nakon sa paraiso.”​—⁠Lucas 23:⁠43.

“Ang mga matarong magapanubli sang duta, kag magapuyo dira sa gihapon.”​—⁠Salmo 37:⁠29.

Isa ka Mahigugmaon Bug-os Kalibutan nga Paghiliutod

“Ang Dios walay ginapasulabi sa mga tawo, apang sa tagsa ka pungsod ang nagakahadlok sa iya kag nagahimo sang katarungan kalahamut-an sa iya.”​—⁠Binuhatan 10:​34, 35.

Pagkabanhaw sang Napatay nga mga Hinigugma

“Ang takna magaabot nga ang tanan nga yara sa mga lulubngan magapamati sang tingog [ni Jesus] kag magaguwa.” —⁠Juan 5:​28, 29.

Wala Na Sing Balatian, Pagtigulang, Ukon Kamatayon

“Pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” ​—⁠Bugna 21:⁠4.