Kapitulo 14
‘Nagapakigkatipan Ako sa Inyo Para sa Isa Ka Ginharian’
1 Sang gab-i antes si Jesus ginpatay ginsilingan niya ang iya matutom nga mga apostoles: ‘Sa balay sang akon Amay may madamung hulot. Magakadto ako agod mag-aman sa inyo sing duog, agod nga kon diin ako didto man kamo.’ Dugang pa nga nagsiling sia sa ila: “Nagapakigkatipan ako sa inyo, subong nga ang akon Amay nagpakigkatipan sa akon, para sa isa ka ginharian.” (Juan 14:2, 3; Lucas 22:29) Daw ano ka dalayawon nga paglaum ang ginpahamtang sa atubangan nila!
2 Apang, indi buot silingon ni Jesus nga ang mga apostoles lamang ang magahari upod sa iya sa langitnon nga Ginharian. Sang ulihi ginpakilala nga ang 144,000 nga gintubos gikan sa duta makatigayon sinang dungganon nga pribilehiyo. (Bugna 5:9, 10; 14:1, 4) Ginatinguhaan bala karon sang iban nga malab-ot ini?
Pagtipon sa mga Manunubli sang Ginharian
3 Sa tapos ginbilanggo si Juan Bautista ni Herodes Antipas, si Jesus mabaskog nga nagbantala sa publiko nga sa diin iya ginpatalupangod “ang ginharian sang mga langit.” (Mateo 4:12, 17) Ginpahibalo niya ang katawhan nga may yara sila kahigayunan nga makasulod sa sina nga Ginharian, kag ang iya mga disipulo hanuot nga nagtinguha para sa sina nga padya.—Mateo 5:3, 10, 20; 7:21; 11:12.
[Mga Pamangkot]
1. Sang gab-i sa wala pa mapatay si Jesus, ano nga paglaum ang ginpahamtang niya sa atubangan sang iya mga apostoles?
2. Pila ang magapakigbahin upod kay Cristo sa iya langitnon nga Ginharian?
3. Sa iya ministeryo sa publiko, anong kahigayunan ang ginpatalupangod ni Jesus?