Kapitulo 4
Nagakari si Jesus nga may Pagpalig-on
Ang masunod dapat mangin makawiwili gid sa tanan nga nagapakig-upod sa mga kongregasyon sang katawhan sang Dios karon. Yari ang isa ka serye sang mga mensahe. May pinasahi sila nga aplikasyon samtang nagahilapit “ang gintangdo nga tion.” (Bugna 1:3) Para sa aton walay katapusan nga kaayuhan nga pamatian naton inang mga kapahayagan. Ang rekord mabasa: “Si Juan sa pito ka kongregasyon nga yara sa distrito sang Asia: Kabay nga may dibagay nga kaluoy kag paghidait kamo gikan sa ‘Isa nga amo karon kag amo anay kag nga magakari,’ kag gikan sa pito ka espiritu nga yadto sa atubangan sang iya trono, kag gikan kay Jesucristo.”—Bugna 1:4, 5a.
2 Ginapatuhuyan diri ni Juan ang “pito ka kongregasyon,” kag ginhingalanan ini para sa aton sa ulihi nga bahin sang tagna. Inang numero nga “pito” masami ginasulit sa Bugna. Nagakahulugan ini sing pagkakompleto, labi na may kaangtanan sa mga butang sang Dios kag sang iya hinaplas nga kongregasyon. Sanglit ang kadamuon sang mga kongregasyon sang katawhan sang Dios sa bug-os nga kalibutan nangin tignapulo ka libo sa tion sang adlaw sang Ginuo, mapat-od naton nga ang ginsiling para sa “pito ka kongregasyon” sang mga hinaplas naaplikar man sa tanan nga katawhan sang Dios karon. (Bugna 1:10) Huo, si Juan may importante nga mensahe para sa tanan nga kongregasyon sang mga Saksi ni Jehova kag sa tanan nga nagapakig-upod sa ila, bisan diin sa nawong sining duta.
3 “Dibagay nga kaluoy kag paghidait”—daw ano ka halandumon ini kag labi na kon apresyahon naton ang ginahalinan sini! Ang “Isa” nga gikan sa iya nagailig ini amo ang Soberanong Ginuong Jehova, “ang Hari nga dayon,” nga nagakabuhi “tubtob sa walay katubtuban.” (1 Timoteo 1:17; Salmo 90:2) Nadalahig man diri, “ang pito ka espiritu,” nga isa ka termino nga nagapakita sing pagkabug-os sang pagpanghikot sang aktibo nga puwersa sang Dios, ukon balaan nga espiritu, samtang nagadala ini sing paghangop kag pagpakamaayo sa tanan nga nagatalupangod sa tagna. Ang may yara man importante nga papel amo si “Jesucristo,” nga tuhoy sa iya si Juan sang ulihi nagsulat: “Puno sia sing dibagay nga kaluoy kag kamatuoran.” (Juan 1:14) Sa amo, ang panamyaw ni Juan may pareho nga mga bahin sa ginsambit ni apostol Pablo sa paghinakop sang iya ikaduha nga sulat sa kongregasyon sang mga taga-Corinto: “Kabay nga ang dibagay nga kaluoy ni Ginuong Jesucristo kag ang gugma sang Dios kag ang pagpakighiambit sang balaan nga espiritu mangin sa inyo tanan.” (2 Corinto 13:14) Kabay nga inang mga pulong naaplikar man sa tanan sa aton nga nagahigugma sa kamatuoran karon!—Salmo 119:97.
“Ang Matutom nga Saksi”
4 Masunod kay Jehova, si Jesus ang labing mahimayaon nga persona sa uniberso, nga ginakilala ni Juan, kag ginalaragway subong “ ‘ang Matutom nga Saksi,’ ‘Ang panganay sa mga patay,’ kag ‘Ang Manuggahom sang mga hari sang duta.’ ” (Bugna 1:5b) Kaangay sang bulan sa mga langit, sia malig-on nga natukod subong labing daku nga Saksi sa pagka-Dios ni Jehova. (Salmo 89:37) Sa tapos niya ginhuptan ang iya integridad tubtob sa mahalaron nga kamatayon, sia ang nahauna gikan sa katawhan nga ginbanhaw padulong sa dimamalatyon nga kabuhi subong espiritu. (Colosas 1:18) Karon sa presensia ni Jehova, ginabanhaw sia labaw sa tanan nga hari sang duta, kag ginhatagan sing “bug-os nga awtoridad . . . sa langit kag sa duta.” (Mateo 28:18; Salmo 89:27; 1 Timoteo 6:15) Sang 1914 ginpalingkod sia subong Hari sa paggahom sa mga pungsod sang duta.—Salmo 2:6-9; Mateo 25:31-33.
5 Si Juan nagpadayon sa pagpabutyag sing apresasyon kay Ginuong Jesucristo sa sining makalilipay nga mga pulong: “Sa iya nga nagahigugma sa aton kag naghugas sa aton gikan sa aton mga sala bangod sang iya dugo—kag naghimo sa aton nga ginharian, nga mga saserdote sa iya Dios kag Amay,—huo, sa iya ang himaya kag ang kagamhanan sing dayon. Kabay pa.” (Bugna 1:5c, 6) Ginhatag ni Jesus ang iya himpit nga kabuhi bilang tawo agod nga ang bisan sin-o sa kalibutan sang katawhan nga nagatuo sa iya mapasag-uli sa himpit nga kabuhi. Ikaw, nga mahal nga bumalasa, mahimo malakip sa sini! (Juan 3:16) Apang ang mahalaron nga kamatayon ni Jesus nagbukas sang dalan para sa pinasahi nga pagpakamaayo sa mga nangin hinaplas nga mga Cristiano kaangay ni Juan. Ini sila ginpahayag nga matarong pasad sa halad nga gawad ni Jesus. Ginbiyaan ang tanan nga posibilidad sa kabuhi sa duta, subong sang ginhimo ni Jesus, ang mga katapo sang diutay nga panong ginpanganak sang espiritu sang Dios, nga may paglaum nga banhawon agod mag-alagad subong mga hari kag mga pari upod kay Jesucristo sa iya Ginharian. (Lucas 12:32; Roma 8:18; 1 Pedro 2:5; Bugna 20:6) Daw ano ka dakung pribilehiyo! Indi katingalahan nga si Juan nagtuaw sing positibo gid nga ang himaya kag gahom mangin kay Jesus!
“Nagakari Kaupod sang mga Panganod”
6 Masunod, si Juan masadya nga nagpahibalo: “Yari karon! Nagakari sia kaupod sang mga panganod, kag ang tagsa ka mata makakita sa iya, kag ang mga naghandos sa iya; kag ang tanan nga tribo sang duta magahaya bangod sa iya. Huo, Kabay pa.” (Bugna 1:7) Wala sing duhaduha nga ginpahanumdom diri si Juan sang nauna nga tagna ni Jesus tuhoy sa katapusan sang sistema sang mga butang. Si Jesus nagsiling didto: “Nian magapahayag ang tanda sang Anak sang tawo sa langit, kag nian magakasubo ang tanan nga tribo sa duta, kag makita nila nga nagakari ang Anak sang tawo sa ibabaw sang mga panganod sa langit nga may gahom kag daku nga himaya.” (Mateo 24:3, 30) Sa amo, si Jesus ‘nagakari’ paagi sa pagliso sang iya igtalupangod sa paghikot sang mga paghukom ni Jehova sa mga pungsod. Magaresulta ini sa dalagku nga mga pagbalhin sa duta, kag sanglit “ang tanan nga tribo sa duta” wala magsapak sa katunayan sang pagkahari ni Jesus, maeksperiensiahan gid nila “ang kapintas sang kasingkal sang Dios nga Labing Gamhanan.”—Bugna 19:11-21; Salmo 2:2, 3, 8, 9.
7 Sang katapusan nga gab-i ni Jesus upod sa iya mga disipulo, ginsingganan niya sila: “Sa diutay pa nga tion kag ang kalibutan indi na makakita sa akon.” (Juan 14:19) Paano, nian, “ang tagsa ka mata makakita sa iya”? Indi naton dapat paabuton nga ang mga kaaway ni Jesus makakita sa iya paagi sa ila pisikal nga mga mata, kay si apostol Pablo nagsiling, sa tapos sang pagkayab ni Jesus sa langit, nga si Jesus karon “nagapuyo sa kapawa nga dimapalapitan,” kag “wala sing tawo nga nakakita ukon makakita” sa iya. (1 Timoteo 6:16) Sing maathag, ang buot silingon ni Juan sa “makakita” amo ang “paghantop,” subong nga kita makakita, ukon makahantop, sa dimakita nga mga kinaiya sang Dios paagi sa iya mga tinuga. (Roma 1:20) Si Jesus “nagakari kaupod sang mga panganod” bangod indi sia mangin kitaon sa mata subong sang adlaw kon natakpan ini sang mga panganod. Bisan pa ang adlaw ginatakpan sang mga panganod sa tion sang adlaw, nahibaluan naton nga yara gihapon ang adlaw bangod sang kapawa sa palibot naton. Sing kaanggid, bisan pa si Ginuong Jesus dikitaon, ipahayag sia kaangay sang ‘nagadabdab nga kalayo, samtang nagatimalos sia sa mga wala nagatuman sa maayong balita nahanungod sa iya.’ Ini man sila mapilitan sa ‘pagtan-aw sa iya.’—2 Tesalonica 1:6-8; 2:8.
8 Si Jesus ‘makita’ man sang “mga naghandos sa iya.” Sin-o ini sila? Sang ginpatay si Jesus sang 33 C.E. literal nga ginhandos sia sang Romanong mga soldado. Ang mga Judiyo naulamid sa sadto nga sala sa pagpatay, kay ginsingganan ni Pedro ang iban sa ila sang Pentecostes: “Ang Dios naghimo sa iya nga Ginuo kag Cristo, ining Jesus nga ginlansang ninyo.” (Binuhatan 2:5-11, 36; ipaanggid ang Zacarias 12:10; Juan 19:37.) Yadtong mga Romano kag mga Judiyo patay na karon sa halos 2,000 ka tuig. Gani ang mga ‘nagahandos’ sa iya karon mahimo gid nga nagarepresentar sa mga pungsod kag katawhan nga nagapakita sing amo man nga pagdumot nga ginpakita sang ginlansang si Jesus. Si Jesus wala na sa duta. Apang kon ginahingabot sang mga manugpamatok ang mga Saksi ni Jehova, nga nagapanaksi kay Jesus, ukon wala nagapamatok sa sina nga pagtratar, daw subong bala nga ina nga mga manugpamatok ‘nagahandos’ kay Jesus mismo.—Mateo 25:33, 41-46.
“Ang Alpha kag ang Omega”
9 Karon, ang kalatingalahan sa mga kalatingalahan! Ang Soberanong Ginuong Jehova mismo nagahambal. Daw ano ka nagakaigo ini subong introduksion sa mga palanan-awon nga buot na ipahayag, kay sia ang aton Dakung Instruktor kag katapusan nga Kuluhaan sing Bugna! (Isaias 30:20) Ang aton Dios nagasiling: “Ako ang Alpha kag ang Omega, . . . ang Isa nga amo karon kag amo anay kag nga magakari, ang Labing Gamhanan.” (Bugna 1:8) Amo ini ang nahauna sang makatlo nga paghambal mismo ni Jehova sa Bugna gikan sa langit. (Tan-awa man ang Bugna 21:5-8; 22:12-15.) Ang mga Cristiano sang nahaunang siglo madali nga makakilala sang alpha kag omega subong nahauna kag katapusan nga letra sang Griegong alpabeto. Ang pagtawag ni Jehova sa iya kaugalingon sa sadtong duha ka letra, nagapadaku nga una sa iya, wala sing labing gamhanan nga Dios, kag wala sing masunod sa iya. Sing madinalag-on, tapuson niya sing dayon ang hulusayon tuhoy sa pagka-Dios. Sia sing dayon ibindikar subong isa kag ang lamang nga labing gamhanan nga Dios, ang Supremo nga Soberano sa ibabaw sang tanan niya nga tinuga.—Ipaanggid ang Isaias 46:10; 55:10, 11.
10 Nagasalig nga tuytuyan ni Jehova ang resulta sang mga butang, ginsingganan ni Juan ang iya mga masigka ulipon: “Ako si Juan, inyo utod kag umalambit upod sa inyo sa kapipit-an kag sa ginharian kag sa pagpailob sa kay Jesus, didto anay sa pulo nga ginatawag Patmos bangod sa paghambal nahanungod sa Dios kag sa pagpamatuod kay Jesus.” (Bugna 1:9) Isa ka bilanggo sa Patmos bangod sa maayong balita, nagabatas sing mga kapipit-an upod sa iya mga utod, nagalaum sing malig-on nga makaambit sa nagapakari nga Ginharian, nakita karon sang tigulang na nga si Juan ang nahauna sa mga palanan-awon sang Bugna. Wala sing duhaduha nga napalig-on sia sing daku sining mga palanan-awon, subong nga ang Juan nga klase ginapapagsik karon sa pagtan-aw sang katumanan sini. Wala naton nahibal-an kon paano ginpadala ni Juan ang linukot sang Bugna sa mga kongregasyon, bangod bilanggo sia sadto nga tion. (Bugna 1:11; 22:18, 19) Mahimo gid nga ang mga anghel ni Jehova nagbulig sa paghimo sini, subong nga masami nila gin-amligan ang matutom nga mga saksi ni Jehova nga nagaalagad sa idalom sang mga pagdumili karon, amo kon ngaa ini sila nakadala sing sibu sa tion nga espirituwal nga pagkaon sa ila gutom sa kamatuoran nga kauturan.—Salmo 34:6, 7.
11 Pat-od nga gin-apresyar gid ni Juan ang iya pribilehiyo nga gamiton ni Jehova subong Iya alagyan sang pagpaalinton sa mga kongregasyon! Sing kaanggid, ginapakabahandi gid karon sang Juan nga klase ang ila pribilehiyo sa pag-aman sa panimalay sang Dios sing espirituwal nga “pagkaon sa nagakaigo nga tion.” (Mateo 24:45) Kabay nga isa ikaw sa mga ginapalig-on sining espirituwal nga aman agod nga malab-ot mo ang mahimayaon nga tulumuron nga kabuhi nga walay katapusan!—Hulubaton 3:13-18; Juan 17:3.
[Mga Pamangkot sa Pagtinuon]
1. Sa kay sin-o karon nagsulat si Juan, kag sin-o karon ang dapat mawili gid sa iya mensahe?
2. (a) Ano ang kahulugan sang numero nga “pito”? (b) Sang adlaw sang Ginuo, sa kay sin-o naaplikar ang mga mensahe sa “pito ka kongregasyon”?
3. (a) Sa panamyaw ni Juan, sa diin naghalin ang “dibagay nga kaluoy kag ang paghidait”? (b) Ano nga ekspresyon ni apostol Pablo ang kaanggid sa panamyaw ni Juan?
4. Paano ginlaragway ni Juan si Jesucristo, kag ngaa nagakaigo gid ining mga paglaragway?
5. (a) Paano si Juan nagpadayon sa pagpabutyag sing apresasyon kay Ginuong Jesucristo? (b) Sin-o ang nagabenepisyo sa pagdulot ni Jesus sang iya himpit nga kabuhi bilang tawo, kag paano ang hinaplas nga mga Cristiano nakaambit sa pinasahi nga pagpakamaayo?
6. (a) Ano ang ginapahibalo ni Juan nahanungod sa ‘pagkari [ni Jesus] kaupod sang mga panganod,’ kag mahimo nga ginpahanumdom si Juan sang ano nga tagna ni Jesus? (b) Paano si Jesus ‘nagakari,’ kag sin-o ang makaeksperiensia sing daku nga kasubo sa duta?
7. Paano ang “tagsa ka mata,” lakip ang mga dimatinumanon, “makakita” kay Jesus?
8. (a) Sin-o ang “mga naghandos sa iya” sang 33 C.E., kag sin-o ini sila karon? (b) Sanglit si Jesus wala na diri sa duta, paano sia ‘mahandos’ sang mga tawo?
9. (a) Sin-o karon ang nagahambal, kag makapila sia naghambal sa Bugna? (b) Sang ginatawag ni Jehova ang iya kaugalingon nga ‘Alpha kag Omega’ kag ‘Labing Gamhanan,’ ano ang buot niya silingon?
10. (a) Paano masunod ginlaragway ni Juan ang iya kaugalingon, kag sa diin sia ginbilanggo? (b) Ang linukot nga ginsulat ni Juan mahimo gid nga ginpadala sa mga kongregasyon sa bulig nanday sin-o? (c) Paano ang espirituwal nga pagkaon masami nga ginaaman karon?
11. Anong pribilehiyo, nga kaanggid sa gin-apresyar ni Juan, ang ginapakabahandi gid karon sang Juan nga klase?
[Tsart sa pahina 19]
Simbuliko nga mga Numero sa Bugna
Numero Simbuliko nga Kahulugan
2 Nagakahulugan sing bug-os nga pagpalig-on sa isa ka butang. (Bugna 11:3, 4; ipaanggid ang Deuteronomio 17:6.)
3 Nagapahangop sing pagpadaku. Nagapakita man sing kabaskugon. (Bugna 4:8; 8:13; 16:13, 19)
4 Nagakahulugan sing pagkabug-os uniberso ukon pagkahimpit sang porma. (Bugna 4:6; 7:1, 2; 9:14; 20:8; 21:16)
6 Nagakahulugan sing pagkadihimpit, butang nga indi normal, indi kinaugali. (Bugna 13:18; ipaanggid ang 2 Samuel 21:20.)
7 Nagakahulugan sing pagkakompleto nga ginpat-od sang Dios, subong sang sa mga katuyuan ni Jehova ukon ni Satanas. (Bugna 1:4, 12, 16; 4:5; 5:1, 6; 10:3, 4; 12:3)
10 Nagakahulugan sing pagkabug-os ukon pagkakompleto sa pisikal nga paagi, tuhoy sa mga butang sa duta. (Bugna 2:10; 12:3; 13:1; 17:3, 12, 16)
12 Nagakahulugan sang organisasyon nga ginpatok sang Dios sa langit ukon sa duta. (Bugna 7:5-8; 12:1; 21:12, 16; 22:2)
24 Nagakahulugan sing bugana (doble) nga pang-organisasyonal nga kahimusan ni Jehova. (Bugna 4:4)
Ang iban nga mga numero nga ginsambit sa Bugna hangpon sing literal. Sa masami, ang konteksto nagabulig sa paghibalo sini. (Tan-awa ang Bugna 7:4, 9; 11:2, 3; 12:6, 14; 17:3, 9-11; 20:3-5.)