Kapitulo 5

Nakita ni Juan ang Ginhimaya nga si Jesus

Palanan-awon

Bugna 1:​10–​3:​22

Tema: Ginausisa ni Jesus ang espirituwal nga Israel sa duta kag nagahatag sing pagpalig-on

Tion sang katumanan: Ini nga bahin sang adlaw sang Ginuo nag-umpisa sugod sang 1914 tubtob ang katapusan sang matutom nga mga hinaplas mapatay kag banhawon

Ang nahauna nga palanan-awon sa tulun-an sang Bugna nagasugod sa kapitulo 1, bersikulo 10. Ining palanan-awon, kaangay sang iban pa sa Bugna, ginapakilala sang pahayag nga si Juan nakabati ukon nakakita sing butang nga tumalagsahon. (Bugna 1:​10, 12; 4:​1; 6:1) Ining palanan-awon ginpresentar suno sa kahimtangan sang nahaunang siglo nga sa diin ang mga mensahe ginpatuhoy sa pito ka kongregasyon sang tion ni Juan. Apang ginapakita ni Juan ang tion sang matuod nga aplikasyon sini sang magsiling sia: “Paagi sa inspirasyon nagdangat ako sa adlaw sang Ginuo.” (Bugna 1:​10a) San-o ining “adlaw”? May kaangtanan bala ang dramatiko nga mga hitabo sining magamo nga ika-20 nga siglo sa sini? Kon may yara, dapat naton hatagan sing suod nga igtalupangod ang tagna, kay nagaapektar ini sang aton gid kabuhi​—sang aton kaluwasan.​—1 Tesalonica 5:​20, 21.

Sa Adlaw sang Ginuo

² Sa ano nga tion ginabutang sini ang katumanan sang Bugna? Ti, ano ang adlaw sang Ginuo? Ginapatuhuyan ini ni apostol Pablo subong tion sang paghukom kag sang katumanan sang mga saad sang Dios. (1 Corinto 1:​8; 2 Corinto 1:​14; Filipos 1:​6, 10; 2:16) Sa pag-abot sina nga “adlaw,” ang dakung mga katuyuan ni Jehova progresibo kag madinalag-on nga nagapadulong sa ila talipuspusan. Ina nga “adlaw” magasugod kon koronahan si Jesus subong langitnon nga Hari. Bisan sa tapos mahukman ni Jesus ang kalibutan ni Satanas, ang adlaw sang Ginuo nagapadayon, sa pagpasag-uli sang Paraiso kag sa pagpahimpit sa katawhan, tubtob sa ulihi ‘itugyan [ni Jesus] ang ginharian sa iya Dios kag Amay.’​—1 Corinto 15:​24-26; Bugna 6:​1, 2.

³ Ang katumanan sang iban nga mga tagna sa Biblia nagabulig sa aton sa paghibalo kon san-o nagsugod ang adlaw sang Ginuo. Halimbawa, ginlaragway ni Daniel ang pagpulod sa pagginahom sang linya ni Hari David; pagligad sang “pito ka panag-on” makilala “nga ang Labing Mataas amo ang Manuggahom sa ginharian sang mga tawo, kag nagahatag sini sa bisan kay sin-o nga maluyagan niya.” (Daniel 4:​23, 24, 31, 32) Ang daku nga katumanan sadto nga tagna nagsugod sang mahapay ang ginharian sang Juda, nga suno sa pamatuod sang Biblia natapos sang Oktubre 607 B.C.E. Ginapakita sang Bugna 12:​6, 14 nga ang 3 1/2 ka tion katumbas sa 1,260 ka adlaw; busa, ang pito ka panag-on (doble sina nga numero) dapat mangin 2,520 ka adlaw. Sa pag-isip sing “isa ka adlaw para sa isa ka tuig,” magaabot kita sa 2,520 ka tuig subong kalawigon sang “pito ka panag-on.” (Ezequiel 4:6) Busa, nagsugod si Cristo Jesus sa paggahom sa langit sang ulihi nga bahin sang 1914. Ang pagdabdab sang nahauna nga inaway kalibutanon sadto nga tuig nagtanda sang “pagsugod sang kasisit-an” nga nagpadayon sa pagpaantos sa katawhan. Sugod sang 1914, daw ano ka talalupangdon nga ginpamatud-an sang mga hitabo sa sining namantsahan sing dugo nga duta yadto nga tuig subong ang umpisa sang “adlaw” sang presensia ni Jesus!​—Mateo 24:​3-14.a

⁴ Busa, ining nahauna nga palanan-awon kag ang laygay nga ginaunod sini, ginapatuhoy para sa adlaw sang Ginuo, kutob sang 1914. Ining pagsibu sang tion ginasakdag sang kamatuoran nga, sa ulihi nga bahin sang Bugna, ginalaragway sang rekord ang paghikot sang matuod kag matarong nga mga paghukom sang Dios​—mga hitabo nga sa diin talalupangdon gid ang papel ni Ginuong Jesus. (Bugna 11:​18; 16:​15; 17:​1; 19:​2, 11) Kon ang katumanan sang nahauna nga palanan-awon nagsugod sang 1914, san-o ini matapos? Subong ginapakita sang mga mensahe, ang organisasyon nga ginapatuhuyan amo ang kongregasyon sang mga hinaplas sang Dios sa duta. Busa, ang katumanan sining nahauna nga palanan-awon matapos kon ang katapusan nga matutom nga katapo sinang hinaplas nga kongregasyon mapatay kag banhawon sa langitnon nga kabuhi. Walay sapayan, ang Adlaw sang Ginuo, nga may mga pagpakamaayo sa iban nga mga karnero sa duta, magapadayon tubtob sa katapusan sang Isa ka Libo ka Tuig nga Paghari ni Jesucristo.​—Juan 10:​16; Bugna 20:​4, 5.

⁵ Sa sining nahaunang palanan-awon, sa wala pa sing nakita si Juan, may nabatian sia: “Kag nabatian ko sa akon likod ang daku nga tingog nga daw budyong, nga nagasiling: ‘Ang imo nakita isulat sa isa ka tulun-an kag ipadala sa pito ka kongregasyon, sa Efeso kag sa Smirna kag sa Pergamo kag sa Tiatira kag sa Sardis kag sa Filadelfia kag sa Laodicea.’ ” (Bugna 1:​10b, 11) Ang tingog nga may awtoridad kag sugo subong sang tunog sang budyong, nagsiling kay Juan nga magsulat sa “pito ka kongregasyon.” Magabaton sia sing isa ka serye sang mga mensahe kag ipahayag niya ang mga butang nga iya makita kag mabatian. Talupangda nga ang mga kongregasyon nga nasambit diri aktuwal nga nagluntad sang adlaw ni Juan. Sila tanan nahamtang sa Asia Minor, sa tabok sang Patmos. Madali sila kadtuan gikan sa isa kag isa paagi sa maayo nga mga dalan sang mga Romano sa sadto nga duog. Indi mabudlayan ang mensahero sa pagdala sang linukot gikan sa isa ka kongregasyon pakadto sa isa. Ining pito ka kongregasyon nagaanggid sa isa ka bahin sang isa ka sirkito sang mga Saksi ni Jehova sa karon.

⁶ Ang kalabanan nga tagna sa Bugna matuman sa tapos sang tion ni Juan. Nagpatuhoy ini sa “mga butang nga mahanabo sa ulihi.” Apang ang laygay sa pito ka kongregasyon nagapatuhoy sa “mga butang nga amo karon,” ang mga kahimtangan nga nagaluntad gid sadto sa pito ka kongregasyon. Ang mga mensahe mapuslanon nga mga bulig sa matutom nga gintangdo nga mga gulang sa sadtong pito ka kongregasyon, subong man sa tanan nga iban pa nga kongregasyon sang hinaplas nga mga Cristiano sadtong tion. Sanglit ang palanan-awon una nga naaplikar sa adlaw sang Ginuo, ang ginasiling ni Jesus isa ka paandam nga ang kaanggid sadto nga mga kahimtangan paabuton man sa kongregasyon sang hinaplas nga mga Cristiano sa aton adlaw.​—Bugna 1:​10, 19.

Sang nahaunang siglo, kon ang kongregasyon makabaton sing sulat gikan sa apostol, kinabatasan sadto nga ginapalibot ang sulat sa iban nga mga kongregasyon agod nga ang tanan makabenepisyo gikan sa laygay.​—Ipaanggid ang Colosas 4:16.

⁷ Sa sining nahauna nga palanan-awon, nakita ni Juan ang makasililaw nga si Ginuong Jesucristo sa Iya langitnon nga himaya. Ano pa ang kapin ka nagakaigo sa isa ka tulun-an sang mga tagna nga nagapatuhoy sa dakung adlaw sining Ginuo nga ginpadala sang langit? Kag ano pa ang kapin ka importante sa aton, nga nagakabuhi karon sa sinang panahon kag nagasunod sa iya tagsa ka sugo? Dugang pa, daw ano ka makakulunyag para sa mga sumalakdag sang soberanya ni Jehova nga pasaligon sila nga ang Mesianikong Binhi, sa tapos makabatas sang mga pagtilaw kag mga paghingabot nga ginpahanabo ni Satanas kag sa tapos makaantos sang masakit nga kamatayon sang ang Iya “tikod” gindugmok sang nagligad nga 1,900 ka tuig, nagakabuhi karon sa langit, kag may gahom sa pagdala sang dakung katuyuan sang Dios sa madaugon nga katumanan!​—Genesis 3:15.

⁸ Maathag nga si Jesus nakahanda na karon sa paghikot subong nakalingkod sa trono nga Hari. Gintangdo sia ni Jehova subong Pangulo nga Manuglaglag sa pagtuman sang katapusan nga mga paghukom ni Jehova batok sa sining daan, malauton nga sistema sang mga butang kag sa iya yawan-on nga dios, si Satanas. Hukman man niya ang iya kongregasyon sang mga hinaplas kag sang dakung kadam-an nga ila mga kaupod, subong man ang kalibutan.​—Bugna 7:​4, 9; Binuhatan 17:31.

⁹ Nagliso si Juan sang mabatian ang mabaskog nga tingog, kag amo ini ang iya nakita: “Nagbalikid ako sa pagtan-aw sa tingog nga nagpakighambal sa akon, kag sang nakabalikid nakita ko ang pito ka kandelero nga bulawan.” (Bugna 1:​12) Sang ulihi, nahibal-an ni Juan kon ano ang ginasimbulo sining pito ka kandelero. Apang nakuha ang iya igtalupangod sang persona nga yara sa tunga sang mga kandelero. May yara ‘sa tunga sang mga kandelero isa nga kaangay sang anak sang tawo, nga napanaptan sing malaba nga panapton kag nawagkusan sa dughan sing wagkos nga bulawan.’ (Bugna 1:​13) Si Jesus, nga “anak sang tawo,” nagapresentar diri sang iya kaugalingon sa atubangan sang napunaw nga saksi, nga si Juan, subong isa ka mahimayaon kag nagabadlak nga persona. Nagpakita sia sa masanag nga himaya sa tunga sang nagadabdab nga mga kandelero nga bulawan. Ining tulad sa templo nga danyag nagpadaku kay Juan sang kamatuoran nga si Jesus nag-abot subong daku nga Mataas nga Saserdote ni Jehova, nga may gahom sa paghukom. (Hebreo 4:​14; 7:​21-25) Ang iya malaba kag matahom nga panapton nagakaigo sa iya palangakuan subong saserdote. Kaangay sang Judiyong mataas nga mga saserdote sang una, nawagkusan sia sing wagkos​—isa ka wagkos nga bulawan sa iya dughan nga nagatabon sang iya tagipusuon. Nagakahulugan ini nga tumanon niya sing tinagipusuon ang balaan nga katungdanan nga nabaton niya gikan kay Jehova nga Dios.​—Exodo 28:​8, 30; Hebreo 8:​1, 2.

¹⁰ Ang paglaragway ni Juan nagpadayon: “Dugang pa, ang iya ulo kag ang iya buhok maputi kaangay sang bulbol nga maputi, subong sang nieve, kag ang iya mga mata subong sang dabdab sang kalayo.” (Bugna 1:​14) Ang iya subong sa nieve kaputi nga buhok nagapakita sing kaalam bangod sang iya malawig nga kabuhi. (Ipaanggid ang Hulubaton 16:31.) Kag ang iya nagadabdab nga mga mata nagapakita nga sia masipat kag alisto samtang nagausisa sia, nagatilaw, ukon nagapabutyag sing kaakig. Bisan ang mga tiil ni Jesus nahulungan ni Juan: “Kag ang iya mga tiil kaangay sang saway nga ginpahining, linubos subong nga sa hurno; kag ang iya tingog subong sang daganas sang madamo nga tubig.” (Bugna 1:​15) Sa palanan-awon, ang mga tiil ni Jesus kaangay sang saway, mahining kag masanag​—nagakaigo gid para sa isa nga nagalakat sing makugi kag may maayo nga tindog sa atubangan ni Jehova nga Dios. Dugang pa, samtang sa Biblia ang balaan nga mga butang masami nga ginalaragway sang bulawan, ang mga butang nga tawhanon ginalaragway kon kaisa sang saway. Gani ang mahining nga mga tiil ni Jesus subong sang saway nagapahanumdom sa aton kon daw ano “katahom” ang iya mga tiil sang naglakat sia sa duta nga nagabantala sing maayong balita.​—Isaias 52:​7; Roma 10:15.

Ang mga dekorasyon kag mga kasangkapan sa sulod sang templo ni Solomon nahuman sa bulawan ukon nabalawan sini, samtang saway ang gingamit sa pagsangkap sa luwang.​—1 Hari 6:​19-23, 28-35; 7:​15, 16, 27, 30, 38-50; 8:64.

¹¹ Sa pagkamatuod, subong himpit nga tawo, si Jesus nakatigayon sing himaya nga kitaon gid sa mga anghel kag mga tawo. (Juan 1:14) Ang iya mahimayaon nga mga tiil nagapahanumdom man sa aton nga nagalakat sia sa balaan nga duta sa organisasyon ni Jehova, nga sa diin sia ang Mataas nga Saserdote. (Ipaanggid ang Exodo 3:5.) Dugang pa, ang iya tingog nagalanog sing mabaskog subong sang mabaskog nga daganas sang busay. Makadalayaw ini, makapulunaw, subong nagakaigo gid para sa isa nga gintawag Pulong sang Dios, ang isa nga nagkari “sa paghukom sa napuy-an nga duta sa pagkamatarong.”​—Binuhatan 17:​31; Juan 1:1.

¹² “Kag sa iya kamot nga tuo may pito ka bituon, sa iya baba nagaguwa ang isa ka espada nga matalom nga duha sing sulab, kag ang iya nawong subong sang adlaw nga nagasilak sa iya bug-os nga kasanag. Kag sang nakita ko sia, napukan ako nga daw patay sa iya tiilan.” (Bugna 1:​16, 17a) Ginpaathag ni Jesus mismo ang kahulugan sang pito ka bituon sang ulihi. Apang talupangda kon ano ang nagaguwa sa iya baba: “isa ka espada nga matalom nga duha sing sulab.” Daw ano ka nagakaigo nga butang! Kay si Jesus amo ang gintangdo sa pagpahayag sang katapusan nga mga paghukom ni Jehova batok sa Iya mga kaaway. Ang katapusan nga mga pulong gikan sa iya baba magaresulta sa kalaglagan sang tanan nga malauton.​—Bugna 19:13, 15.

¹³ Ang masanag kag nagasilak nga nawong ni Jesus nagapahanumdom sa aton sang nagasilak nga nawong ni Moises sa tapos nakighambal sa iya si Jehova sa Bukid sang Sinai. (Exodo 34:​29, 30) Dumduma, man, nga sang magbaylo-dagway si Jesus sa atubangan sang iya tatlo ka apostoles sang nagligad nga 1,900 ka tuig, “nagsilaw ang iya nawong subong sang adlaw, kag ang iya mga panapton nagputi subong sang kapawa.” (Mateo 17:2) Karon, sa paglaragway kay Jesus sa palanan-awon sa tion sang adlaw sang Ginuo, ang iya nawong kaanggid nga nagabanaag sang masanag nga himaya sang isa nga yara sa atubangan ni Jehova. (2 Corinto 3:18) Sa kamatuoran, ang kabilugan nga ideya nga ginpaalinton sang palanan-awon ni Juan amo ang daku gid nga himaya. Halin sa subong kaputi sa nieve nga buhok, nagadabdab nga mga mata, kag nagasilak nga nawong tubtob sa mahining nga mga tiil, isa ini ka superlatibo nga palanan-awon tuhoy sa Isa nga nagapuyo karon sa “kapawa nga dimapalapitan.” (1 Timoteo 6:16) Tuman gid kaathag ang pagkamatuod sini nga butang! Ano ang nangin reaksion ni Juan? Ang apostol nagasugid sa aton: “Sang nakita ko sia, napukan ako nga daw patay sa iya tiilan.”​—Bugna 1:17.

¹⁴ Sa karon, ang maduagon kag detalyado nga paglaragway sa palanan-awon ni Juan nagapuno sa katawhan sang Dios sing tinagipusuon nga apresasyon. Naagihan na naton ang kapin sa 70 ka tuig sang adlaw sang Ginuo, kag sa sulod sining tion ang palanan-awon padayon nga natuman sing makalilipay. Para sa aton, ang paggahom ni Jesus sa Ginharian isa ka buhi nga katunayan karon, indi isa ka paglaum sa palaabuton. Busa, nagakaigo para sa aton subong matutom nga mga sakop sang Ginharian nga magtulok sing padayon nga may katingala sa ginalaragway ni Juan sa sining nahauna nga palanan-awon kag tumanon ang mga pulong sang ginhimaya nga si Jesucristo.

[Mga Pamangkot sa Pagtinuon]

1. Paano ginpresentar ang nahauna nga palanan-awon, kag paano ginpakita ni Juan ang tion sang matuod nga aplikasyon sini?

2. San-o nagsugod ang adlaw sang Ginuo, kag san-o ini matapos?

3. (a) Paano ang tagna ni Daniel tuhoy sa “pito ka panag-on” nagabulig sa aton nga mahangpan kon san-o nagsugod ang adlaw sang Ginuo? (b) Ano nga mga hitabo sa duta ang nagpamatuod nga ang tuig 1914 amo ang umpisa sang adlaw sang Ginuo?

4. (a) Ano ang ginapakita sang mga pulong gid sang Bugna sa kon san-o natuman ang nahauna nga palanan-awon? (b) San-o matapos ang katumanan sang nahauna nga palanan-awon?

5. (a) Ano ang ginsugo sang tingog kay Juan? (b) Ngaa paborable ang lokasyon sang “pito ka kongregasyon” para sa pagpadala sang linukot sa ila?

6. (a) Ano ang buot silingon sang “mga butang nga amo karon”? (b) Ngaa mapat-od naton nga ang mga kahimtangan sa kongregasyon sang hinaplas nga mga Cristiano karon kaanggid sa mga kahimtangan sang adlaw ni Juan?

7. Sin-o ang nakita ni Juan sa sining nahauna nga palanan-awon, kag ngaa tuman ini ka importante kag makakulunyag para sa aton karon?

8. Handa karon si Jesus sa paghimo sing ano?

9. (a) Paano ginlaragway ni Juan ang ginhimaya nga si Jesucristo sa tunga sang bulawan nga mga kandelero? (b) Ano ang ginapakita sang tulad-templo nga danyag kag sang panapton nga ginasul-ob ni Jesus? (c) Ano ang kahulugan sang iya bulawan nga wagkos sa dughan?

10. (a) Ano ang ginapakita sang subong sa nieve kaputi nga buhok ni Jesus kag sang iya nagadabdab nga mga mata? (b) Ano ang kahulugan sang mga tiil ni Jesus nga subong sang mahining nga saway?

11. (a) Ano ang ginapahanumdom sa aton sang mahimayaon nga mga tiil ni Jesus? (b) Ano ang ginapakita sang kamatuoran nga ang tingog ni Jesus “subong sang daganas sang madamo nga tubig”?

12. Ano ang kahulugan sang “espada nga matalom nga duha sing sulab”?

13. (a) Ang masanag kag makasililaw nga nawong ni Jesus nagapahanumdom sa aton sang ano? (b) Anong kabilugan nga ideya ang makuha naton gikan sa paglaragway ni Juan kay Jesus?

14. Paano kita dapat maapektohan kon ginabasa naton ang palanan-awon ni Juan tuhoy sa ginhimaya nga si Jesus?