Hulyo

Perpekto nga gin-ilog ni Jesus ang panghunahuna kag ginabatyag sang iya Amay. Makita ini sa tanan niya nga ginsiling kag ginhimo, lakip na sa iya mga milagro. (Juan 14:9) Ano ang matun-an naton sa mga milagro ni Jesus? Palangga gid kita ni Jesus kag sang iya Amay. Sang ari si Jesus sa duta, gingamit niya ang iya gahom sa paghimo sang milagro para buligan ang mga nagaantos. Paagi sa sini, ginpakita ni Jesus nga palangga gid niya ang mga tawo. Isa ka bes, nagpakiluoy kay Jesus ang duha ka tawo nga bulag. (Mat. 20:​30-34) “Naluoy gid” si Jesus sa ila, gani gin-ayo niya sila. Ang Griego nga tinaga nga gin-translate “naluoy gid” nagapakita nga nagalalain ukon nasakitan gid si Jesus kon may makita sia nga nagaantos. Bangod sa gugma ni Jesus sa mga tawo, nabatyagan niya ini nga klase sang kaluoy. Kag amo man ini nga klase sang kaluoy ang nagpalig-on sa iya nga pakaunon ang mga ginagutom kag ayuhon ang isa ka aruon. (Mat. 15:32; Mar. 1:41) Sigurado kita nga palangga gid kita ni Jehova, ang Dios nga may “mapinalanggaon nga kaluoy,” kag sang iya Anak. Nasakitan gid sila nga makita nga nagaantos kita. (Luc. 1:78; 1 Ped. 5:7) Gusto na gid nila nga dulaon ang tanan nga problema nga nagapaantos sa mga tawo. w23.04 3 ¶4-5

Dapat naton himuon ang aton bug-os nga masarangan para malikawan naton ang pagbasa, pagpamati, kag pagtan-aw sang sala nga mga ideya nga ginatudlo sang kalibutan ni Satanas. Para maayo nga mga impormasyon ang makaimpluwensia sa aton panghunahuna, dapat naton basahon kag tun-an ang Biblia. Makaamlig man sa aton panghunahuna ang pag-attend sa mga miting kag ang pagbantala. Kag nagapromisa si Jehova nga indi sia magtugot nga sulayon kita labaw sa aton masarangan. (1 Cor. 10:​12, 13) Dapat gid mangamuyo ang kada isa sa aton nga buligan kita ni Jehova nga magpabilin nga matutom sa iya sa sining mabudlay nga katapusan nga mga adlaw. Gusto ni Jehova nga ‘ipautwas naton sa iya ang aton ginabatyag.’ (Sal. 62:8) Dayawa si Jehova kag pasalamati sia sa tanan niya nga ginahimo para sa imo. Pangabaya sia nga buligan ka nga mangin maisog sa pagbantala. Pangabaya sia nga buligan ka nga mabatas ang mga problema kag madaug ang mga pagsulay. Regular nga mangamuyo kay Jehova, kag indi gid pagtuguti nga may makapugong sa imo nga himuon ini. w23.05 7 ¶17-18

Ngaa naga-attend kita sa mga miting sang kongregasyon? Ang panguna nga rason amo nga gusto naton dayawon si Jehova. (Sal. 26:12; 111:1) Naga-attend man kita sa mga miting kay gusto naton palig-unon ang isa kag isa sa sining mabudlay nga mga tion. (1 Tes. 5:11) Kon nagakomento kita sa mga miting, madayaw naton si Jehova kag mapalig-on naton ang isa kag isa. Pero posible nga may mga problema kita kon parte sa pagkomento. Posible nakulbaan kita magkomento, ukon posible nanamian kita magkomento kag gusto naton kuntani nga madamo nga beses kita matuksuan. Ano ang makabulig sa aton? Nagsiling si apostol Pablo nga dapat kita magpokus sa ‘pagpalig-unay sa isa kag isa.’ Para indi kita makulbaan nga magkomento, importante nga dumdumon naton nga kon ipabutyag naton ang aton pagtuo bisan sa simple lang nga komento, mapalig-on na naton ang iban. Kag kon indi naman posible nga makakomento kita sing madamo nga beses, dapat kita malipay kay may tsansa ang iban nga kauturan nga makakomento.​—1 Ped. 3:8. w23.04 20 ¶1-3

Setenta ka tuig na nga bihag ang mga Judiyo sa Babilonia, pero nagsiling ang hari nga puede na sila makabalik sa ila pungsod nga Israel. (Esd. 1:​2-4) Si Jehova lang ang puede magpahanabo sini. Kay man, wala ginahilway sang Babilonia ang mga bihag sini. (Isa. 14:​4, 17) Pero napierde ang Babilonia, kag ginsilingan sang bag-o nga hari ang mga Judiyo nga puede sila makahalin sa Babilonia. Gani kinahanglan magdesisyon ang kada Judiyo, ilabi na ang mga ulo sang pamilya. Mahalin bala sila sa Babilonia ukon indi? Posible nga indi mahapos himuon ini nga desisyon. Madamo sa ila ang tigulang na, gani mabudlayan gid sila sa malawig nga paglakat. Kag bangod sa Babilonia natawo ang kalabanan nga mga Judiyo, wala gid sila nakaistar sa iban nga lugar. Para sa ila, indi nila pungsod ang Israel, kundi pungsod ini sang ila mga katigulangan. Nagmanggaranon man ang pila ka Judiyo sa Babilonia, gani posible gid nga nabudlayan sila nga biyaan ang ila manami nga mga balay ukon mga negosyo para mag-istar sa lugar nga indi pamilyar sa ila. w23.05 14 ¶1-2

Ginapalig-on kita sang Pulong sang Dios nga padayon nga ipakita ang pagbatas, kaluoy, kag gugma. Ang Lucas 21:19 nagasiling: “Paagi sa inyo pagbatas, matipigan ninyo ang inyo kabuhi.” Ang Colosas 3:12 nagasiling: “Isuksok ninyo ang . . . kaawa” ukon ang kaluoy. Kag ang 1 Tesalonica 4:​9, 10 nagasiling: “Kamo mismo gintudluan sang Dios nga maghigugmaanay. . . . Apang ginapalig-on namon kamo, mga kauturan, nga padayon ninyo nga himuon ini sing bug-os.” Nagapakita na nga daan sang pagbatas, kaluoy, kag gugma ang mga disipulo. Pero ginsulat ini nga mga teksto para palig-unon sila nga dapat padayon nila ini nga ipakita. Amo man sini ang dapat naton himuon. Para mabuligan ka nga mahimo ini, binagbinaga kon paano ginpakita sang mga Cristiano sang una ini nga mga kinaiya. Dayon binagbinaga kon paano mo sila mailog para mapakita mo nga handa ka sa dakung kapipit-an. Kon mag-abot na ang dakung kapipit-an, natun-an mo na kon paano magbatas, gani mapalig-on ka nga padayon nga magbatas. w23.07 2 ¶4; 3 ¶8

Hinaplas man kita ukon bahin sang “iban nga mga karnero,” dapat kita magpabilin sa “Dalan sang Pagkabalaan.” Makabulig ini sa aton nga padayon nga simbahon si Jehova asta sa tion nga mabaton na naton ang mga pagpakamaayo sang Ginharian sa palaabuton. (Juan 10:16) Sugod sang 1919 C.E., minilyon na ka lalaki, babayi, kag kabataan ang naghalin sa Babilonia nga Daku, nga amo ang bug-os kalibutan nga emperyo sang butig nga relihion, kag nag-umpisa sila sa paglakat sa “Dalan sang Pagkabalaan.” Ginkuha ni Jehova ang mga balagbag sa dalan nga agyan sang mga Judiyo nga naghalin sa Babilonia. (Isa. 57:14) Kamusta naman ang “Dalan sang Pagkabalaan” sa aton tion subong? Sa sulod sang ginatos ka tuig antes sang 1919, gingamit ni Jehova ang mga tawo nga may tudok nga pagtahod sa iya para buligan ang iban nga makagua sa Babilonia nga Daku. (Ipaanggid ang Isaias 40:3.) Bangod sa ila ginhimo nga paghanda sang dalan, nangin posible sang ulihi para sa sinsero nga mga tawo nga maghalin sa butig nga relihion kag simbahon si Jehova upod sa iya katawhan. w23.05 15-16 ¶8-9

Gusto ni Jehova nga alagaron naton sia sing malipayon kag sing kinabubut-on. (2 Cor. 9:7) Ti, padayon bala naton nga panikasugan ang aton tulumuron bisan pa daw wala kita nalipay sa sini? Binagbinaga ang halimbawa ni apostol Pablo. Nagsiling sia: “Estrikto nga ginadisiplina ko ang akon lawas kag ginahimo ini nga ulipon.” (1 Cor. 9:​25-27, footnote) Ginpuersa ni Pablo ang iya kaugalingon nga himuon ang husto bisan pa daw wala sia sang handum nga himuon ini. Nalipay bala si Jehova sa pag-alagad ni Pablo sa iya? Huo. Kag ginpadyaan sia ni Jehova bangod sa iya mga pagpanikasog. (2 Tim. 4:​7, 8) Nalipay man si Jehova kon ginapanikasugan naton ang aton tulumuron bisan pa daw wala kita sang gana nga himuon ini. Kabalo sia nga may mga tion nga daw wala kita nanamian sa aton ginahimo sa pag-alagad sa iya, pero nalipay sia kay ginahimo gihapon naton ini bangod palangga naton sia. Pakamaayuhon man ni Jehova ang aton mga pagpanikasog pareho sa ginhimo niya kay Pablo. (Sal. 126:5) Kag kon mabaton naton ang mga pagpakamaayo ni Jehova, posible gid nga magabaskog ang aton handum nga himuon ang aton tulumuron. w23.05 29 ¶9-10

Ginpaanggid ni apostol Pablo ang mga tawo nga indi maluwas sa adlaw ni Jehova sa mga tawo nga nagatulog. Wala sila kabalo sang nagakatabo sa ila palibot kag indi nila matalupangdan ang oras. Gani, wala gid sila sang reaksion kon may importante nga nagakatabo sa ila palibot. Subong, ang kalabanan nga tawo daw pareho sa mga tawo nga nagatulog. (Roma 11:8) Bisan pa sang mga ebidensia nga nagakabuhi na kita sa “katapusan nga mga adlaw” kag malapit na lang ang dakung kapipit-an, indi sila magpati sa sini. (2 Ped. 3:​3, 4) Pero, importante gid nga magpabilin kita nga nagamata kada adlaw. (1 Tes. 5:6) Gani, dapat kita mangin kalmado. Ngaa? Para makapabilin kita nga neutral sa mga isyu sa pulitika ukon sa mga isyu sa kalibutan subong. Samtang nagahilapit na gid ang adlaw ni Jehova, mas mangin mabudlay pa gid para sa aton nga magpabilin nga neutral. Pero, indi kita dapat mabalaka kon ano ang himuon naton. Buligan kita sang espiritu sang Dios nga mangin kalmado kag indi mag-panic para makahimo kita sang husto nga desisyon.​—Luc. 12:​11, 12. w23.06 9-10 ¶6-7

Ano ang ginahunahuna mo kon mabatian mo ang ngalan nga Samson? Posible nga ginahunahuna mo nga makusog gid sia nga tawo. Husto ang ginahunahuna mo. Pero nakahimo si Samson sang indi maayo nga desisyon nga nagresulta sa iya pag-antos. Bisan pa sini, nagpokus si Jehova sa tanan nga ginhimo ni Samson sa pag-alagad sa iya. Ginlakip pa gani niya sa Biblia ang parte sa mabakod nga pagtuo ni Samson para makabenepisyo kita sa iya halimbawa. Gingamit ni Jehova si Samson para maghimo sang tumalagsahon nga mga butang para buligan ang Iya pinili nga katawhan nga mga Israelinhon. Pagligad sang ginatos ka tuig pagkatapos mapatay si Samson, gintuytuyan ni Jehova si apostol Pablo nga ilakip ang ngalan ni Samson sa listahan sang Iya mga alagad nga may mabakod nga pagtuo. (Heb. 11:​32-34) Mapalig-on gid kita sang halimbawa ni Samson. Nagsalig sia kay Jehova sang nakaeksperiensia sia sang mabudlay gid nga mga sitwasyon. May matun-an kita kay Samson kag mapalig-on kita sang iya halimbawa. w23.09 2 ¶1-2

Kon hanuot kita pirme nga nagapangamuyo kay Jehova kag ginasugid naton sa iya ang tanan naton nga kabalaka, mapabakod naton ang aton pagbatas. (1 Tes. 5:17) Pero ano abi kon indi man gid mabudlay ang imo problema subong? Nagapangamuyo ka man bala kay Jehova kon nasubuan ka ukon daw indi ka kabalo sang dapat mo himuon? Kon pirme ka nagapangamuyo sa Dios para buligan ka bisan sa gamay nga mga problema kada adlaw, sigurado gid nga mangamuyo ka man sa iya kon may mabudlay ka nga mga problema sa ulihi. Kag magasalig ka nga kabalo sia kon san-o ka niya buligan kag kon paano niya ini himuon. (Sal. 27:​1, 3) Kon ginabatas naton ang aton mga problema subong, posible gid nga makabatas man kita sa dakung kapipit-an sa palaabuton. (Roma 5:3) Ngaa masiling naton ini? Madamo nga kauturan ang nagsiling nga sa kada tion nga mabatas nila ang mabudlay nga sitwasyon, nagabulig ini sa ila nga mangin mabakod para mabatas ang masunod nga problema. Bangod ginbuligan sila ni Jehova nga mabatas ang isa ka problema, nagabakod ang ila pagtuo nga buligan gid niya sila pirme. Kag bangod nagatuo sila kay Jehova, mabatas nila ang masunod nga pagtilaw.​—Sant. 1:​2-4. w23.07 3 ¶7-8

Bangod mapainubuson kag maluluy-on si Jehova, nangin makatarunganon sia. Halimbawa, sang tion nga laglagon na ni Jehova ang malain nga mga tawo sa Sodoma, ginpakita niya nga mapainubuson sia. Paagi sa iya mga anghel, ginsugo niya ang matarong nga si Lot nga magpalagyo sa bukid. Pero nahadlok si Lot nga magpalagyo didto. Gani nakitluoy sia nga sa Zoar lang sia malagyo upod sa iya pamilya. Ang Zoar isa ka gamay nga banwa nga laglagon man kuntani ni Jehova. Gani puede magsiling si Jehova nga dapat tumanon gid ni Lot ang ginasugo Niya sa iya. Pero ginpasugtan niya si Lot nga magpalagyo sa Zoar, kag wala niya ginlaglag ini nga banwa. (Gen. 19:​18-22) Pagligad sang ginatos ka tuig, ginpakita ni Jehova nga maluluy-on sia. Binagbinaga ang natabo sa Ninive. Ginpadala niya sa Ninive ang manalagna nga si Jonas para ipabalo sa malain nga mga pumuluyo sini nga laglagon sila kag ang ila siudad. Pero bangod naghinulsol ang mga taga-Ninive, naluoy si Jehova sa ila kag wala niya ginlaglag ang siudad.​—Jon. 3:​1, 10; 4:​10, 11. w23.07 21 ¶5

Ano ang matun-an naton kay Jehoas? Daw pareho sia sa kahoy nga manabaw ang gamot kag ginatukuran lang para indi matumba. Si Jehoiada daw pareho sa tukod nga nagasuporta kay Jehoas. Gani sang napatay sia, amat-amat nga nadala si Jehoas sang mga apostata amo nga ginbiyaan niya si Jehova. Ginatudluan kita sini nga para mapakita naton ang kahadlok sa Dios, indi bastante nga magsalig lang kita sa maayo nga halimbawa sang aton pamilya kag sang mga kauturan. Para padayon kita nga mangin suod kay Jehova, dapat naton pabakuron ang aton gugma sa iya kag dapat naton panikasugan nga mapakita pirme ang maayo nga sahi sang kahadlok sa iya. Mahimo naton ini paagi sa regular nga pagtuon, pagpamalandong, kag pagpangamuyo. (Jer. 17:​7, 8; Col. 2:​6, 7) Indi mabudlay ang gusto ni Jehova nga himuon naton. Mabasa naton sa Manugwali 12:13 ang gusto niya nga himuon naton. Nagasiling ini: “Kahadluki ang matuod nga Dios kag tumana ang iya mga sugo, kay amo ini ang bug-os nga katungdanan sang tawo.” Kon may kahadlok kita sa Dios, makapabilin kita nga matutom kay Jehova bisan ano pa ang maeksperiensiahan naton sa ulihi. Sigurado nga wala gid sing may makaguba sang aton kaangtanan kay Jehova. w23.06 18-19 ¶17-19

Bilang umpisa sang garantiya sang Dios, amo ini ang mabasa naton: “Ang Isa nga nagapungko sa trono nagsiling.” (Bug. 21:5a) Ginapakita sini nga mga tinaga nga si Jehova mismo ang nagahambal sa palanan-awon, kag tatlo ka beses lang nga mabasa sa libro sang Bugna nga ginhimo ini ni Jehova. Gani indi si Jesus ukon isa ka anghel ang naghatag sini nga garantiya, kundi si Jehova mismo. Ginapakita sini nga masaligan gid naton ang iya masunod nga mga ginsiling. Ngaa? Bangod “indi makabutig” si Jehova. (Tito 1:2) Gani masaligan gid ang mabasa naton sa Bugna 21:​5, 6. Binagbinaga ang mga tinaga nga “Yari karon!” Ang Griego nga tinaga nga gin-translate “yari karon!” sulitsulit nga gingamit sa libro sang Bugna. Ti, ano dayon ang ginsiling sang Dios pagkatapos niya magsiling sing “yari karon”? Nagsiling sia: “Ginahimo ko nga bag-o ang tanan nga butang.” Ngaa nagsiling si Jehova nga ginahimo na niya ini subong? Indi bala nga sa palaabuton pa niya ini himuon? Ginsiling ini ni Jehova bangod tumanon gid niya ang iya promisa.​—Isa. 46:10. w23.11 3-4 ¶7-8

May mga kaluyahon si apostol Pedro nga dapat niya pakigbatuan. Binagbinaga ang pila sa sini. Sang ginpaathag ni Jesus ang tagna sa Biblia nga paantuson sia kag patyon, ginsilingan sia ni Pedro nga indi gid ini matabo. (Mar. 8:​31-33) Madamo nga beses nga nagbaisay si Pedro kag ang iban pa nga mga apostoles kon sin-o ang pinakamataas sa ila. (Mar. 9:​33, 34) Sang gab-i antes ginpatay si Jesus, gin-utod ni Pedro ang dulunggan sang isa ka tawo. (Juan 18:10) Sadto man nga gab-i, hinadlukan si Pedro kag tatlo ka beses niya nga ginpanghiwala ang iya abyan nga si Jesus. (Mar. 14:​66-72) Bangod sini, naghilibion gid si Pedro. Wala ginsikway ni Jesus ang iya apostol nga naluyahan sang buot. Pagkatapos ginbanhaw si Jesus, ginhatagan niya sang tsansa si Pedro para ipakita nga palangga sia gihapon ni Pedro. Ginsilingan ni Jesus si Pedro nga mag-alagad sing mapainubuson kag bantayan niya ang iya mga karnero. (Juan 21:​15-17) Nagsiling si Pedro nga himuon gid niya ini. Gani sang adlaw sang Pentecostes, ara sia sa Jerusalem kag isa sia sa una nga ginhaplasan sang balaan nga espiritu. w23.09 22 ¶6-7

Ginapalig-on ni apostol Pedro ang pareho niya nga mga gulang nga ‘bantayan nila ang panong sang Dios.’ (1 Ped. 5:​1-4) Kon isa ikaw ka gulang, kabalo kami nga palangga mo ang imo mga kauturan kag gusto mo nga i-shepherding sila. Pero, posible may mga tion nga pamatyag mo indi mo ini mahimo bangod grabe sa imo kasako ukon kakapoy. Ano ang puede mo himuon? Isugid kay Jehova ang imo ginabatyag. Nagsulat si Pedro: “Kon nagaalagad ang isa, himuon niya ini suno sa kusog nga ginahatag sang Dios.” (1 Ped. 4:11) Posible nga wala sing permanente nga solusyon ang mga problema sang imo mga kauturan subong. Pero tandai nga mabuligan sila sang aton “puno nga manugbantay” nga si Jesucristo, kag mas labaw ini sangsa mabulig mo sa ila. Mabuligan niya sila subong kag sa bag-ong kalibutan. Gusto lang ni Jehova nga palanggaon sang mga gulang ang ila mga kauturan, i-shepherding nila ang ila mga kauturan, kag mangin “mga halimbawa [sila] sa panong.” w23.09 29-30 ¶13-14

Indi kita dapat magpaimpluwensia sa panghunahuna sang mga tawo nga nagabalewala sang mga kasuguan ni Jehova. Kon ilugon naton ang panghunahuna sini nga mga tawo, posible gid nga balewalaon man naton si Jehova kag ang iya mga kasuguan. (1 Cor. 3:19) Sa masami, “ang kaalam sini nga kalibutan” nagaimpluwensia sa mga tawo nga indi pagtumanon ang Dios. Sang una, may pila ka Cristiano sa Pergamo kag sa Tiatira nga naimpluwensiahan sang mga tawo sa sini nga mga siudad. Mga imoral ini nga mga tawo kag nagasimba sila sa mga diosdios. Prangka nga ginlaygayan ni Jesus ining duha ka kongregasyon bangod ginakunsinti nila ang seksuwal nga imoralidad. (Bug. 2:​14, 20) Subong, posible nga piliton kita sang mga tawo nga patihan ang ila sala nga mga panghunahuna. Posible nga silingan kita sang mga miembro sang aton pamilya kag sang aton mga kilala nga sobra sa aton ka estrikto, kag puede lang nga indi naton pagtumanon ang mga kasuguan ni Jehova. Halimbawa, posible magsiling sila nga daan na katama ang sugo sang Biblia nga maglikaw sa seksuwal nga imoralidad, gani indi na importante kon bala ginasunod naton ini ukon wala. Kon kaisa, posible mahunahuna naton nga daw indi masyado maathag ang mga instruksion nga ginahatag ni Jehova. Posible pa gani nga masulay kita nga ‘magpasobra sa mga butang nga nasulat na.’—1 Cor. 4:6. w23.07 16 ¶10-11

Kinahanglan ni Maria nga iloy ni Jesus ang kabakod para mahimo niya ang kabubut-on ni Jehova. Magabusong sia bisan pa wala sia sing bana. Wala man sia sing eksperiensia kon paano magpadaku sang bata, pero sia ang magapadaku sang bata nga mangin Mesias sa ulihi. Kag kinahanglan niya ipaathag sa iya nobyo nga si Jose nga nagabusong sia bisan pa wala sia nakahulid sa lalaki. (Luc. 1:​26-33) Paano napabakod si Maria? Nagpabulig sia sa iban. Halimbawa, ginpangabay niya si Gabriel nga hatagan sia sang dugang nga impormasyon parte sa iya asaynment. (Luc. 1:34) Wala madugay pagkatapos sini, ginkadtuan niya ang iya paryente nga si Elisabet nga nagaistar sa “mabukid nga rehiyon” sang Juda. Gindayaw ni Elisabet si Maria. Gintuytuyan man ni Jehova si Elisabet nga isugid ang isa ka makapalig-on nga tagna parte sa mangin anak ni Maria. (Luc. 1:​39-45) Nagsiling si Maria nga “naghimo [si Jehova] sing gamhanan nga mga buhat paagi sa iya butkon.” (Luc. 1:​46-51) Paagi kay Gabriel kag kay Elisabet, ginpabakod ni Jehova si Maria. w23.10 14-15 ¶10-12

Ginhaplasan sang balaan nga espiritu ang limitado nga kadamuon sang mga disipulo sang Cristo, kag may pinasahi sila nga kaangtanan kay Jehova. Ining 144,000 magaalagad bilang mga saserdote sa langit kaupod ni Jesus. (Bug. 14:1) Samtang ari sila sa duta, ginhaplasan sila sang Dios sang iya espiritu kag gin-adoptar niya sila bilang iya mga anak. Ining pinasahi nila nga kaangtanan sa Dios amo ang ginarepresentar sang Balaan nga hulot sang tabernakulo. (Roma 8:​15-17) Ang Labing Balaan nga hulot sang tabernakulo nagarepresentar sa langit nga ginapuy-an ni Jehova. Ang “kurtina” nga nagaseparar sa Balaan kag Labing Balaan nagarepresentar sa lawas ni Jesus bilang tawo. Samtang may lawas sia bilang tawo, indi sia makasulod sa langit bilang daku nga Mataas nga Saserdote sa espirituwal nga templo. Paagi sa pagsakripisyo ni Jesus sang iya lawas bilang halad para sa katawhan, ginpaposible niya ang kabuhi sa langit para sa tanan nga hinaplas nga mga Cristiano. Dapat man nila isakripisyo ang ila lawas para mabaton nila ang ila padya sa langit.​—Heb. 10:​19, 20; 1 Cor. 15:50. w23.10 28 ¶13

Kalmado lang si Gideon sang ginpakalain sia sang mga lalaki sang Efraim. (Huk. 8:​1-3) Imbes nga mangakig, ginpakita niya nga mapainubuson sia paagi sa pagpamati sa ila kag pagsabat sa ila sing kalmado. Bangod sini, nagkalma man sila. Mailog sang mga gulang si Gideon paagi sa pagpamati sing maayo sa mga nagapakalain sa ila kag pagsabat sa ila sing kalmado. (Sant. 3:13) Kon himuon ini sang mga gulang, nagabulig sila para indi madula ang paghidait sa kongregasyon. Sang napierde ni Gideon kag sang iya mga soldado ang mga Midianhon, gindayaw sia sang mga tawo. Pero, ginpatalupangod niya sa ila nga si Jehova ang dapat dayawon. (Huk. 8:​22, 23) Paano mailog sang mga gulang si Gideon? Dapat nila panikasugan nga si Jehova ang dayawon sa tanan nila nga ginahimo. (1 Cor. 4:​6, 7) Halimbawa, kon dayawon ang isa ka gulang kay maayo sia magtudlo, puede niya pasalamatan ang Pulong sang Dios nga amo gid ang nagatudlo sa aton ukon ang paghanas sang organisasyon ni Jehova. Dapat man pamensaran sing maayo sang mga gulang kon bala ang ila pagtudlo nagadayaw kay Jehova ukon basi sila ang ginadayaw. w23.06 4 ¶7-8

Kon wala ginhatag sa aton ang aton ginapangabay, posible ipamangkot naton sa aton kaugalingon, ‘Husto bala ang akon ginapangamuyo?’ Sa masami, abi naton kabalo kita kon ano ang pinakamaayo para sa aton. Pero posible nga ang ginapangabay naton sa aton mga pangamuyo indi amo ang pinakamaayo para sa aton. Kon nangamuyo kita nga buligan kita sa isa ka problema, posible nga may mas maayo nga solusyon sangsa solusyon nga ginahunahuna naton. Kag posible nga indi suno sa kabubut-on ni Jehova ang pila sa mga ginapangabay naton. (1 Juan 5:14) Halimbawa, ibutang ta nga nangamuyo kay Jehova ang isa ka mag-asawa nga buligan ang ila bata nga padayon nga mag-alagad sa iya. Daw nagakaigo man ang ila pangabay. Pero, indi pagpiliton ni Jehova ang bisan sin-o sa aton nga mag-alagad sa iya. Gusto niya nga kita mismo ang magdesisyon nga simbahon sia. Gusto niya nga amo ini ang himuon naton tanan, lakip na sang aton kabataan. (Deut. 10:​12, 13; 30:​19, 20) Gani puede ipangamuyo sang mga ginikanan kay Jehova nga buligan sila nga malab-ot ang tagipusuon sang ila bata para mapalig-on sia nga higugmaon si Jehova kag mangin abyan Niya.​—Hulu. 22:6; Efe. 6:4. w23.11 21 ¶5; 23 ¶12

Ngaa isa ka importante nga paagi ang paglugpay sa iban para mapakita naton ang aton gugma sa ila? Suno sa isa ka reperensia sa Biblia, ang tinaga nga gingamit ni Pablo para sa “lugpay” nagakahulugan sing “pagtindog sa kiliran sang isa ka tawo nga may daku nga problema para palig-unon sia.” Gani, kon ginalugpayan naton ang aton utod nga may ginabatas nga problema, ginabuligan naton sia nga padayon nga mag-alagad sing matutom kay Jehova, kag ginapakita naton nga ginahigugma naton sia. (2 Cor. 7:​6, 7, 13) May koneksion ang pagbatyag sing kaluoy kag ang paghatag sing lugpay. Ngaa masiling naton ini? Kon naluoy kita sa isa ka tawo nga may ginabatas nga problema, gusto naton sia lugpayan kag buligan. Gani kon nagabatyag kita sing kaluoy, nagahatag kita dayon sing lugpay. Ginpaathag ni Pablo nga ginalugpayan ni Jehova ang mga tawo bangod naluoy Sia sa ila. Ginlaragway ni Pablo si Jehova bilang “Amay nga may mapinalanggaon nga kaluoy kag ang Dios nga nagahatag sang tanan nga sahi sang lugpay.”​—2 Cor. 1:3. w23.11 9-10 ¶8-10

Mapaabot gid sang tanan nga sumulunod sang Cristo ang mga kabudlayan. Binagbinaga ang halimbawa ni apostol Pablo. Nagsiling sia sa mga taga-Tesalonica: “Sang kaupod pa kami ninyo, ginsilingan na namon kamo nga magaantos kita sang kapipit-an, kag subong sang nahibaluan ninyo amo gid sina ang natabo.” (1 Tes. 3:4) Kag nagsulat sia sa mga taga-Corinto: “Mga kauturan, luyag namon nga mahibaluan ninyo ang kapipit-an nga naagihan namon . . . Indi gani kami sigurado kon malampuwasan namon yadto ukon indi.” ( 2 Cor. 1:8; 11:​23-27) Subong, mapaabot man naton ang mga kabudlayan. (2 Tim. 3:12) Bangod nagtuo ka kay Jesus kag ginsunod mo sia, posible nga ginpabudlayan ka sang imo mga abyan kag mga paryente. Ginhingabot ka bala sang imo boss ukon sang mga upod mo sa obra bangod honest ka? (Heb. 13:18) Ginpamatukan ka bala sang gobierno bangod ginbantala mo sa iban ang imo paglaum? Pero bisan ano pa nga kabudlayan ang aton maeksperiensiahan, nagsiling si Pablo nga dapat kita malipay. w23.12 10-11 ¶9-10

Ginbatas ni Jacob ang madamo nga problema. Ginpakahuy-an sang duha niya ka anak nga si Simeon kag si Levi ang ila pamilya kag ang ngalan ni Jehova. Dayon napatay ang iya pinalangga nga asawa nga si Raquel sang ginbun-ag niya ang ila ikaduha nga bata. Kag bangod sa grabe nga tiggulutom, napilitan si Jacob nga magsaylo sa Egipto bisan pa tigulang na sia. (Gen. 35:​16-19; 37:28; 45:​9-11, 28) Bisan pa sang tanan nga problema nga naeksperiensiahan ni Jacob, wala gid nadula ang iya pagtuo kay Jehova kag sa Iya mga promisa. Bangod sini, nalipay gid si Jehova sa iya, gani ginpakamaayo sia ni Jehova. Halimbawa, ginhatagan sia ni Jehova sang madamo nga pagkabutang. Imadyina man ang kalipay ni Jacob sang nakita niya liwat ang iya anak nga si Jose nga abi niya madugay na nga napatay. Sigurado nga nagapasalamat gid sia kay Jehova. Bangod suod si Jacob kay Jehova, nabatas niya ang iya mga problema. (Gen. 30:43; 32:​9, 10; 46:​28-30) Kon panikasugan naton nga padayon nga mangin suod kay Jehova, mabatas man naton ang aton mga problema nga wala naton ginapaabot. w23.04 15 ¶6-7

Ang Salmo 23 isa ka ambahanon nga ginsulat ni David. Ginpabutyag ni David nga kumbinsido gid sia nga palangga sia ni Jehova. Ginlaragway ni David ang ila suod nga kaangtanan ni Jehova, kag gintawag niya si Jehova nga iya Manugbantay. Nagpatuytoy sia kay Jehova kag bug-os gid ang pagsalig niya sa Iya. Kabalo si David nga pakitaan sia ni Jehova sang gugma sa bilog niya nga kabuhi. Ngaa kumbinsido gid si David sa sini? Pirme ginaamanan ni Jehova si David sang tanan niya nga kinahanglanon, gani nabatyagan ni David nga ginaatipan gid sia ni Jehova. Kabalo man si David nga abyan niya si Jehova kag nalipay sa iya si Jehova. Gani sigurado sia nga bisan ano man ang matabo sa palaabuton, padayon sia nga buligan ni Jehova. Bangod kumbinsido si David nga palangga sia ni Jehova kag indi Niya sia pagpabay-an, nakabulig ini sa iya nga mangin malipayon kag kontento kag indi magkabalaka.​—Sal. 16:11. w24.01 29 ¶12-13

Sugod sang Bug-os Kalibutan nga Inaway II, hilway nga nakabantala ang katawhan ni Jehova sa madamo nga pungsod. Gani nag-uswag gid ang aton pagbantala kag pagtudlo nga hilikuton. Subong, padayon nga nagapatuytoy sa Cristo ang mga miembro sang Nagadumala nga Hubon. Ginasigurado nila nga ang mga instruksion nga ihatag nila sa mga kauturan amo ang gusto ni Jehova kag ni Jesus nga himuon nila. Dayon ginagamit nila ang mga circuit overseer kag ang mga gulang para maghatag sang mga instruksion sa mga kongregasyon. Ara sa “tuo nga kamot” sang Cristo ang hinaplas nga mga gulang. (Bug. 2:1) Siempre, indi perpekto ang mga gulang kag makahimo sila sang sala. Halimbawa, may mga tion nga nakahimo sang sala si Moises kag si Josue, kag nakahimo man sang sala ang mga apostoles. (Num. 20:12; Jos. 9:​14, 15; Roma 3:23) Pero, ginatuytuyan gid sing maayo sang Cristo ang matutom nga ulipon kag ang gintangdo nga mga gulang, kag padayon niya ini nga himuon. Gani, may rason gid kita nga saligan ang iya mga panuytoy nga ginahatag niya sa aton paagi sa nagapanguna nga mga utod. w24.02 23-24 ¶13-14

Subong, malipay sa aton si Jehova kon ginasugid naton sa iban ang parte sa iya. Dapat mabatyagan sang mga tawo nga nagapasalamat gid kita kay Jehova kag palangga gid naton sia. Kon nagabantala kita, dapat naton tandaan nga ang panguna naton nga katuyuan amo ang pagbulig sa mga tawo nga mangin suod kay Jehova. Gusto naton nga makilala man nila ang aton pinalangga nga Amay pareho sa aton pagkakilala sa iya. (Sant. 4:8) Nalipay kita nga itudlo sa mga tawo ang ginasiling sang Biblia parte kay Jehova nga nagapakita sang iya gugma, katarungan, kaalam, gahom, kag iban pa niya nga dalayawon nga mga kinaiya. Madayaw man naton si Jehova kag malipay sia sa aton kon ginapanikasugan naton nga ilugon sia. Kon himuon naton ini, makita sang mga tawo nga lain gid kita sa sining malain nga kalibutan, kag posible matingala sila. (Mat. 5:​14-16) Sa aton adlaw-adlaw nga pagkabuhi, may kahigayunan kita nga mapaathag sa ila kon ngaa lain kita sa iban. Kon himuon naton ini, mapalig-on ang sinsero nga mga tawo nga kilalahon ang aton Dios. Kon ginadayaw naton si Jehova sa aton pagbantala kag sa aton adlaw-adlaw nga pagkabuhi, nalipay gid sia.​—1 Tim. 2:​3, 4. w24.02 10 ¶7

Para mangin hamtong ka nga Cristiano, dapat mo tun-an ang mga ikasarang nga makabulig sa imo. Makabulig ini sa imo nga batunon ang mga responsibilidad sa kongregasyon, makakita sang obra para masuportahan mo ang imo kaugalingon ukon ang imo pamilya, kag mangin maayo ang imo kaangtanan sa iban. Halimbawa, tun-i kon paano magbasa kag magsulat sing maayo. Ang Biblia nagasiling nga ang malipayon kag madinalag-on nga tawo nagabasa sang Biblia adlaw-adlaw kag ginapamalandungan niya ini. (Sal. 1:​1-3) Paagi sa pagbasa sang Biblia adlaw-adlaw, matun-an niya ang panghunahuna ni Jehova, nga amo ang makabulig sa iya nga maghunahuna sing maayo kag iaplikar ang iya natun-an. (Hulu. 1:​3, 4) Kinahanglan sang aton mga kauturan ang bulig sang mga brother nga may ikasarang nga magtudlo kag maglaygay nga nabase sa Biblia. Kon maayo ka magbasa kag magsulat, makahanda ka sang mga pamulongpulong kag mga komento nga makabulig sa iban kag makapalig-on sang ila pagtuo. Makahimo ka man sang mga notes nga makabulig sa imo nga mapabakod mo ang imo pagtuo kag para mapalig-on mo ang iban. w23.12 26-27 ¶9-11

Sa kada tion nga nahadlok ka, pamalandungi ang mga himuon ni Jehova sa palaabuton kon wala na si Satanas. May isa ka demonstrasyon sang 2014 nga rehiyonal nga kombension. Sa demonstrasyon, ginbinagbinag sang isa ka amay sa iya pamilya ang 2 Timoteo 3:​1-5, kag nagsiling sia nga basahon niya ini sa paagi nga daw nagatagna ini sang kahimtangan sa Paraiso. Nagsiling sia: “Sa bag-o nga kalibutan, maeksperiensiahan naton ang pinakamalipayon nga mga tion. Kay ang mga tawo mangin mahigugmaon sa isigkatawo, mahigugmaon sa kamatuoran, maugdang, mapainubuson, nagadayaw sa Dios, matinumanon sa mga ginikanan, mapinasalamaton, mainunungon, mapinalanggaon sa ila pamilya, nagasugot sa kasugtanan, pirme nagahambal sing maayo sa iban, may pagpugong sa kaugalingon, malulo, mahigugmaon sa kon ano ang maayo, masaligan, nagapasakop, mapainubuson sing hunahuna, mahigugmaon sa Dios sa baylo nga mahigugmaon sa kinasadya, naimpluwensiahan sang matuod nga diosnon nga mga kinaiya; kag panikasugi nga mangin suod sa sini nga mga tawo.” Ginabinagbinag mo bala upod sa imo pamilya ukon sa imo mga kauturan ang parte sa kabuhi sa bag-o nga kalibutan? w24.01 6 ¶13-14

Makapalig-on gid mabal-an nga nalipay si Jehova sa iya katawhan bilang isa ka grupo. Ang Biblia nagasiling: “Si Jehova nahamuot sa iya katawhan.” (Sal. 149:4) Pero kon kaisa, grabe gid ang pagluya sang buot sang pila ka utod, gani nagaduhaduha sila kon bala nalipay sa ila si Jehova. Madamo nga matutom nga alagad ni Jehova sang panahon sang Biblia ang nakabatyag man sini. (1 Sam. 1:​6-10; Job 29:​2, 4; Sal. 51:11) Maathag nga ginapakita sang Biblia nga may puede himuon ang indi perpekto nga mga tawo para malipay sa ila si Jehova. Ano ang dapat naton himuon? Dapat kita magtuo kay Jesucristo kag magpabawtismo. (Juan 3:16) Paagi sa sini, ginapakita naton sa iban nga ginhinulsulan na naton ang aton mga sala kag nagpromisa kita sa Dios nga himuon naton ang iya kabubut-on. (Binu. 2:38; 3:19) Sang ginhimo naton ini bangod gusto naton mangin suod kay Jehova, nalipay gid sia sa aton. Kon padayon naton nga ginahimo ang aton bug-os nga masarangan para tumanon ang aton promisa kay Jehova, nalipay sia sa aton kag ginakabig niya kita nga suod niya nga mga abyan.​—Sal. 25:14. w24.03 26 ¶1-2

Mailog naton ang mga disipulo kon padayon kita nga magbantala bisan pa suguon kita sang gobierno nga mag-untat. Makasalig kita nga buligan kita ni Jehova sa aton pagbantala. Gani, puede kita makapangamuyo nga hatagan kita sang kaisog kag kaalam. Pangabaya si Jehova nga buligan ka nga mabatas ang imo mga problema. Madamo sa aton ang nagaantos bangod sang balatian ukon depresyon, pagkapatay sang pinalangga, problema sa pamilya, paghingabot, kag iban pa nga problema. Mas nagbudlay pa gid batason ang madamo sa sini nga mga problema bangod sang pandemic kag mga inaway. Gani isugid kay Jehova kon ano gid ang imo ginabatyag. Isugid sa iya ang imo sitwasyon nga daw pareho lang nga ginasugid mo ini sa imo suod nga abyan. Makasalig ka nga ‘buligan ka ni Jehova.’ (Sal. 37:​3, 5) Kon padayon kita nga mangamuyo, buligan kita sini nga ‘mabatas ang mga kabudlayan.’ (Roma 12:12) Kabalo si Jehova kon ano ang ginabatas sang iya mga alagad, kag “ginapamatian niya ang ila pagpangayo sing bulig.”​—Sal. 145:​18, 19. w23.05 5-6 ¶12-15

Kon kinahanglan naton maghimo sang importante nga mga desisyon, dapat naton hantupon “kon ano ang kabubut-on ni Jehova” kag dapat naton tumanon ang iya kabubut-on. (Efe. 5:17) Kon ginahibalo naton ang mga prinsipio sa Biblia nga maaplikar naton sa aton sitwasyon, ginapakita naton nga gusto naton mabal-an ang panghunahuna sang Dios. Kag kon iaplikar naton ang iya mga prinsipio, makahimo kita sang maayo nga mga desisyon. Gusto sang aton kaaway nga si Satanas, nga amo ang “isa nga malauton,” nga mangin masako kita sa mga butang sa kalibutan para wala na kita sing tion sa aton pag-alagad sa Dios. (1 Juan 5:19) Kon mas nagapokus ang isa ka Cristiano sa kuarta, edukasyon, ukon sa iya obra sangsa mga kahigayunan sa pag-alagad kay Jehova, ginapakita sini nga naimpluwensiahan sia sang panghunahuna sang kalibutan. Indi man sala ini nga mga butang, pero indi naton ini dapat pag-unahon sa aton kabuhi. w24.03 24 ¶16-17