Ihanda ang Imo Kaugalingon!

“Ang imo katawhan nagahalad sang ila kaugalingon sing kinabubut-on . . . Yara sa imo ang hubon sang mga pamatan-on subong sang mga tun-og.”—SALMO 110:3.

1, 2. Nahisuno sa Salmo 110:3, ano karon ang ginahimu sang mga Saksi ni Jehova?

ANG Hari ni Jehova, si Jesucristo, nagagahom na karon! Kutob sang 1914 handa na sia sa pagpanghikot kag nagsugod na sa ‘paggahom sa tunga sang iya mga kaaway.’ (Salmo 110:2) Sa sining dramatikong ulihi nga mga adlaw sining nagatagumatayon nga sistema, tugoti ang tanan nga kinabubut-on nga mga boluntaryo nga ipresentar ang ila kaugalingon agod alagdon ang Hari, kag tugoti sila nga himuon ini nga wala sing pangalag-ag.

² Amo gid sini ang ginahimu sang mga Saksi ni Jehova. Nagadugang sa tunga nila ang lakas nga mga manugpangabudlay, nagabadlak kaangay sang tun-og. Karon mismo ining inspirado nga pinamulong sang salmista nagakatuman: “Ang imo katawhan nagahalad sang ila kaugalingon sing kinabubut-on sa adlaw sang imo kusog militar. Sa balaan nga pagpanapot, gikan sa tiyan sang kaagahon, may tun-og ka sang imo pagkapamatan-on.” (Salmo 110:3) Daw ano gid nga adlaw nga puy-an!

3. Nahanungod sa pag-alagad, ano nga espiritu ang pirme nga makita sa tunga sang mga alagad ni Jehova? Pamatod-i ini sa Kasulatan.

³ Ang masinakripisyuhon sa kaugalingon nga espiritu sang kinabubut-on nga pag-alagad amo pirme ang makit-an sa tunga sang maunungon nga mga alagad ni Jehova. Busa sang gintanyagan sing kahigayunan nga mag-alagad subong manugdala sing mensahe sang Dios, si manalagna Isaias gilayon nga nagsabat: “Yari ako! Ipadala ako.” (Isaias 6:8) Sadtong temprano sang ministeryo ni Jesus sa Galilea, nagkadto sia sa mahinadlukon sa Dios nga mga Judiyo kag naghatag sang pangagda: “Kari kamo, kag mangin sumulunod ko.” Nagsabat sila nga wala sing pangalag-ag, nagbiya sang palamugnan sa pagbuhis kag pagpangisda. (Mateo 4:18-22; Lucas 5:27, 28) Ang mabinuligon nga mga babayi nag-amot sing tion, kusog kag materyal nga manggad agod sakdagon ang mga kinahanglanon ni Jesus kag sang iya mga disipulo. (Marcos 15:40, 41; Lucas 8:1-3) Huo, sang mag-utwas ang mga kahigayunan para sa balaan nga pag-alagad, ginhanda nila ang ila kaugalingon.

Gintanyag Nila sing Kinabubut-on ang Ila Kaugalingon

4. Paano gintamod ni Pablo kag sang iya kaupdanan ang ‘panawag sa Macedonia’?

⁴ Ginhanda man sang Cristiano nga si apostol Pablo ang iya kaugalingon agod mag-alagad sa kadayawan ni Jehova. Sang isa ka bes may palanan-awon sia nahanungod sa isa ka tawo nga ang pangabay amo: “Tabok ka sa Macedonia kag tabangi kami.” Nagsabat bala ang apostol kag ang iya kaupdanan? Huo, kay aton mabasa: “Kag sang nakita niya ang palanan-awon, sa gilayon naghimulat kami sa pagkadto sa Macedonia, nga nagahangop nga ang Dios nagtawag sa amon sa pagwali sang maayong balita sa ila.” Ginhanda nila ang ila kaugalingon, kag ginpadyaan ni Jehova ang ila kinabubut-on nga pag-alagad sing kadalag-an.—Binuhatan 16:8-40.

5. Ano ang ginsiling sang iban nahanungod sa pag-alagad sang dumaan nga mga Cristiano?

⁵ Ang kinabubut-on nga pag-alagad isa anay ka tanda sang dumaan nga Cristianismo. Ginsiling anay: “Wala lamang pagsakdaga sang Dumaan nga Iglesia ang mga misyonero; misyonero ini. Ini [wala magbatyag] nga nahimu na ang iya bahin kon ginbayaran niya ang balayran kag ginpamatian sing dimapagsik ang mga sugilanon sang mga misyonero nga nagasugid sang ila kadalag-an. Ining magagmay nga mga iglesia tiliponan sang mga misyonero mismo. Ang tanantanan nagabatyag nga gintawag agod ibantala ang Maayong Balita.” (The Preaching Value of Missions, nagaunod sang mga lektura ni Helen Barrett Montgomery] Ang mga sumulunod ni Jesus aktibo nga mga ebanghelista. “Ang rekord sang dumaan nga iglesia sa Binuhatan pamatuod nga ginakabig nila sing hanuot ang ebanghelismo subong sang pagkabig nila sa sini sing literal. Ang ebanghelismo amo ang una.” [The idea of the Laity, ni David Haney] Kag ano ang nagresulta sa sining masinakripisyuhon sa kaugalingon nga buluhaton sang mga sumulunod ni Jesus? Naglakbay sila sang ulihi sa mga dalan sang Roma pakadto sa malayo nga mga siudad kag mga probinsia. Sang ulihi, ang bug-os nga Emperyo nangin tuboran sang bag-ong relihion.” (Imperial Rome, ni Moses Hadas) Huo, ang maayong balita ‘ginbantala sa tanan nga tinuga sa idalom sang langit’ bangod ginhanda sadtong dumaan nga Cristianong mga saksi ang ila kaugalingon!—Colosas 1:23; Mateo 28:19, 20; Binuhatan 1:6-8.

6. Paano ginabatyag pirme sang modernong-adlaw nga mga Saksi ni Jehova ang nahanungod sa hilikuton nga pagbantala sang Ginharian?

⁶ Nagapangibabaw man ina nga espiritu sa tunga sang modernong-adlaw nga mga Saksi ni Jehova. Sing nagakaigo, ang guwa sang Watch Tower sang Hulyo kag Agosto 1881 nagsiling: “Ikaw bala nagabantala? Ginapatihan namon nga wala ang mangin iya sang diutay nga panong luwas nga manugbantala. . . . Wala kita pagtawga, ni paghaplasa nga makabaton sing kadungganan kag daku nga manggad, kundi nga maghinguyang kag mahinguyang, kag nga magbantala sang maayong balita.” Ina man nga pagtamod nakit-an mga tinuig sang ulihi. Sa isa ka makalilipay nga kombension sa Cedar Point, Ohio, sang 1922, ang nagtipon nga mga sumalakdag sang Ginharian ginlaygayan: “Balik kamo sa latagon, O kamo nga mga anak sang labing mataas nga Dios! Iwagkus ang inyo hinganib! Magmatimbang, magmabinantayon, mag-aktibo, magmaisog. Magmatutom kag matuod nga mga saksi sa Ginuo. Mag-abante sa inaway agod ang tagsa ka agi sang Babilonia mahapay. Ipahibalo sing lapnag ang mensahe. Dapat mahibaloan sang kalibutan nga si Jehova amo ang Dios kag nga si Jesucristo amo ang Hari sng mga hari kag Ginuo sang mga ginuo. Amo ini ang adlaw sang tanan nga mga adlaw. Tan-awa, ang Hari nagagahom! Kamo ang iya mga manugbantala. Busa, ibantala, ibantala, ibantala, ang Hari kag ang iya Ginharian.” Sa sina nga pagbantala sang Ginharian, ginhanda sing malipayon, makugi kag padayon sang mga Saksi ni Jehova ang ila kaugalingon.

Nalubad ang Dakung Kinahanglanon

7. Ano ang eksperiensia sang bug-os tion nga mga manugbantala sang una nga panahon, kag ano ang ila balatyagon nahanungod sa ila pag-alagad kay Jehova?

⁷ Ginhanda sang madamong mga alagad ni Jehova ang ila kaugalingon para sa bug-os tion nga hilikuton sa pagbantala. Sang nagligad nga tinuig, ang iban nag-alagad subong mga colporteur (ginatawag karon nga mga payunir), kag indi mahapos ang ila pagkabuhi. “Huo,” siling sang isa ka tigulang nga Saksi, “may mga colporteur kami nga nagatuptup sa mga banwa kag mga kaumahan sadtong dumaan nga adlaw. Kon kaisa ginabaylohan nila [ang literatura sa Biblia] sang mga patubas, mga manok, habon kag bisan ano lang, nga sarang nila magamit, ukon mabaligya sa iban. Kon kaisa, sa malaka sing pamalay nga lugar, nagatulog sila upod sa mga mangunguma kag mga rantsero, kag kon kaisa nagatulog sa mga kamalig . . . Ining mga matutom nagpadayon sing tinuig tubtob nga nagtigulang sila.” Ang iban mga bata pa sang magsugod sa sinang bug-os tion nga pag-alagad. Matuod, ang ila hilikuton makakalapoy, apang ginhanda nila ang ila kaugalingon kag nalipay sila sa pag-alagad. Subong sang ginsiling sang isa sa ila: “Mga bata pa kami kag malipayon sa pag-alagad, nalipay sa paggamit sang amon kusog sa pag-alagad kay Jah.”

8. Tungod sa anong pag-alagad ginhanda sang madamung katawhan ni Jehova ang ila kaugalingon?

⁸ Sing tinuig kag sa atubang sang dimatupongan nga mga inaway, mga gutom kag mga linog kag iban pa nga mga hitabo nga nagahuman sa “tanda” sang “presensia” ni Cristo nga nagagahom sa Ginharian kutob sang 1914, ang katawhan ni Jehova maisog nga nagabantala sang maayong balita. (Mateo 24:3-14) Sing malipayon, madamu ang naghanda sang ila kaugalingon para sa bug-os tion nga pag-alagad, kag daw ano kaayo nga ginhimu nila ina!

9. (a) Sang Pebrero 1, 1943, anong talalupangdon nga tikang ang natabo sa maragtas sang mga Saksi ni Jehova? (b) Paano posible ang pagtukod sang Gilead School kag sa paglubad sa pagkinahanglan sing internasyonal nga pagpasangkad sang hilikuton nga pagbantala sang Ginharian?

⁹ Ang inaway Kalibutanon II nagabalingaso sa bug-os niya nga kasingkal sang Pebrero 1, 1943. Apang sadtong matugnaw, mayelo nga adlaw sa Kingdom Farm malapit sa South Lansing, Nueva York, ginhimu ang isa ka talalupangdon nga tikang sa maragtas sang mga Saksi ni Jehova. Ginsugdan sadto sang kap-atan kag siam ka lalaki kag 51 ka babayi—ang tanan mga payunir—ang lima ka bulan nga kurso sang pagtuon sa Watchtower Bible School of Gilead. Ini nga paghanas magahanda sang ila kaugalingon para sa misyonero nga hilikuton sa iban nga pungsod. Kutob sang panahon sang inaway halos ginapaimposible sang mga kahimtangan nga ipadala ang mga misyonero sa Europa kag Asia, ang mga gradwado sang nauna nga mga klase sang Gilead School gintangdo sa Cuba, Mexico, Costa Rica, Puerto Rico, Canada kag Alaska. Ang paglubad sa pagkinahanglan sing internasyonal nga pagpasangkad sang hilikuton sang pagbantala sang Ginharian posible bangod ang mapisan nga mga payunir naghanda sang ila kaugalingon.

Mga Hinimoan sang Gilead School

10. Anong mga halimbawa sang pag-uswag sa Ginharian ang ginsitar kutob sang ang nahanas sa Gilead nga mga misyonero nag-abot primero sa pila ka kadutaan?

¹⁰ Kapin na sa 6,000 ka estudyante ang naggradwar gikan sa 76 ka klase sang Gilead School, nga nahamtang na karon sa ulong talatapan sang mga Saksi ni Jehova sa Brooklyn, Nueva York. Indi gid masaypan ang pagkaepektibo sang eskwelahan. Halimbawa, sang ang nahaunang nahanas sa Gilead nga mga misyonero nag-abot sa Brazil sang 1945, 394 lamang ka indibiduwal ang nagapakigbahin sa hilikuton nga pagbantala sang Ginharian sadto nga pungsod. Karon ang kadamuon kapin na sa 148,000. Sadtong 1949 sang ang nahaunang mga gradwado sa Gilead nag-abot sa Japan, tatlo lamang ka lokal nga mga manugbantala sang Ginharian ang nagareport nga nagabantala sa sinang pungsod sa Sidlangan. Karon kapin na sa 86,000!

11. Kutob sang mabuksan ang Gilead School sang 1943, ano ang natabo nahanungod sa pag-uswag sang Ginharian sa bug-os nga kadutaan?

¹¹ Apang kamusta ang pag-uswag sang Ginharian sa bug-os nga kalibutan? Bueno, sang ang nahaunang klase sang Gilead School nakabaton sing paghanas sang 1943, 126,329 lamang ka manugbantala sang Ginharian ang aktibo sa 54 ka kadutaan sa bug-os nga kalibutan. Karon, isa ka kataason sang 2,652,323 ka manugbantala sang maayong balita ang nagabantala sa 205 ka kadutaan. Sa dalagku nga kadakuon, ining daku nga pag-uswag natabo bangod sang maayo nga binuhatan sang mga gradwado sa Gilead.

12. Paano natuman ang Zacarias 8:23?

¹² Sa madamung kadutaan dining ining mga gradwado ginpadala subong mga embahador kag pinadala nga tal-us kay Cristo, nasapwan nila ang mga latagon nga hustohusto na agod anihon. (Mateo 9:37, 38; 2 Corinto 5:20) Kutob sa pila lamang sa iban nga kadutaan, karon, ginatos, linibo, kag linaksa pa, ang nagbuylog sa hinaplas nga mga sumulunod ni Jesus kag nagsiling, sa katunayan: “Magaupod kami sa inyo, kay nabatian namon nga ang Dios kaupod ninyo.” (Zacarias 8:23) Huo, kag agod dugangan ang pag-uswag sang tugob-duta nga pagbantala sang Ginharian, ining nagadamu nga “dakung kadam-an” nagahanda sang ila kaugalingon.—Bugna 7:9.

Malipayon nga Ginhanda Nila ang Ila Kaugalingon

13. (a) Ano ang ginsiling sang isa ka misyonera nga naghanda sang iya kaugalingon para sa dugang nga pag-alagad kay Jehova? (b) Ano nga pamangkot ang nagakabagay nga binagbinagon?

¹³ Ginapakamaayo sing tunay ni Jehova yadtong nagapadayag sing kahanda kag espiritu sang pagsakripisyo sa kaugalingon, kag malipayon gid sila nga ginhanda nila ang ila kaugalingon para sa dugang nga hilikuton sa kadayawan sang Dios. Halimbawa, ang isa ka misyonera nagsulat: “Naghalin ako sa akon posisyon, dimabag-o nga namat-od, kag sang Septiembre, 1930, sa tunga mismo sang daku nga kaiwaton sa ekonomiya, nagsugod sa pagdalagan sa palumba sa kabuhi [subong payunir]. Malipayon gid ako nga ginhimu ko yadto . . . Nagkahulugan ini sang pagtilaw sang kaayo ni Jehova kag sang pag-amba sang pagdayaw sa iya adlaw-adlaw, busa nagaresulta sa kalinong sa painoino agod atubangon ang bisan ano man nga magaabot.” (Salmo 34:8) Mahanda mo bala anag imo kaugalingon para sa pribilehio nga mag-alagad ubong payunir ukon misyonero?

14. Ano ang ginsiling sang isa ka katapo sang Nagadumala nga Hubon nahanungod sa bug-os tion nga pag-alagad?

¹⁴ Pagkatapos sang iya nahaunang 21 ka tuig sa bug-os tion nga pag-alagad, ang isa sang nauna nga misyonero sang Gilead sa Japan nagsulat sang 1960: “Mga tinuig ini nga puno sang kasadya kag mga eksperiensia nga ang isa ka gatos ka ordinaryo nga pagkabuhi indi makasarang sa pag-unod!” Karon, mga 24 ka tuig sang ulihi, ang kasadya sini nga utod nagapabilin nga daku subong katapo sang Nagadumala nga Hubon sang mga Saksi ni Jehova.

15. (a) Pagkatapos sang madamung tinuig nga pag-alagad sa Bethel, ano ang ginsiling sang iban? (b) Anong makapahunahuna nga pamangkot ang ginapautwas sini?

¹⁵ Pagkatapos sang madamung tinuig nga pag-alagad subong diminyo sa ulong-talatapan sang Watchtower Society, ang isa ka utod nagsiling: “Wala ko paghinulsuli ang dalanon nga ginpili ko sadtong manughamtong pa lang ako. . . . Ang kasadya nga makita ang minilyon ka magasin kag ang iban pa nga publikasyon nga nagadala sang mensahe sang Pulong sang Dios nga nagalapnag tubtob sa kaukbongan sang duta isa gid ka makatilingala mismo nga padya.” Ang isa ka utod nga babayi nga nag-alagad sa Brooklyn Bethel kutob sang katuigan 1920 nagsiling anay: “Indi bastante ang hambal agod ipabatyag ang kaayawan kag kalipay nga akon naeksperiensiahan.” Kag pagkatapos makahinguyang sing madamung tinuig sa pag-alagad sa bethel, ang isa ka utod nagsiling: “Nakaagom gid ako sing malipayon, makapaladya kag ginapakamaayo nga dalanon sang pagkabuhi.” Ginahanda man bala nimo ang imo kaugalingon para sa malipayon nga pag-alagad sa Bethel?

Sabta nga may Pagtuo si Jehova

16. Ano ang ginsiling sang duha ka tigulang nga utod nga lalaki nahanungod sa pagbaton sing mga asaynment gikan sa organisasyon ni Jehova?

¹⁶ Ang isa ka tigulang nga utod nga lalaki nga nagaalagad karon sa Papua New Guinea nagsulat anay: “Ining [tinuig sang bug-os tion nga pag-alagad] amo ang labing maayo nga tinuig, ang labing malipayon nga tinuig . . . Daw ano ka maalamon nga pamatian ang saad sang Ginuo sa Mateo 6:33! Daw ano kaayo nga sundon ang pagpanguna sang Ginuo nga ginpadayag sa iya organisasyon!” Ang isa ka utod nga lalaki gikan sa Britanya, nga isa ka bug-os tion nga alagad sa India kutob sang katuigan 1920, nagsiling: “Ang bug-os nga kalibutan daw isa na lamang karon ka diutay nga lugar. May [mga alagad ni Jehova] sa tagsa ka duta kag subong sila ka hiligugmaon sa lainlain nga pungsod. Ang isa nagakaanad sa ulihi sa mga kahimtangan sang mga kadutaan sa luwas. Isa lamang ini ka bagay sang pagpamat-od, kag nian sa pagpangayo sang espiritu ni Jehova agod malandas ang mga sablag. Ang akon laygay amo, Pirme batona ang asaynment gikan sa organisasyon ni Jehova kag malipayon nga mamat-od nga batunon ini.”

17. (a) Para sa mga manugbantala sang kongregasyon, ano ang mga kahigayunan para sa napauswag ukon dugang nga pag-alagad kay Jehova? (b) Paano nagsabat si Pablo sang mahibaloan niya nga ‘daku pa ang ganhaan sa pagpangabudlay’?

¹⁷ Subong isa ka de-pamilya nga manugbantala sa kongregasyon kag may lainlain Makasulatanhon nga responsibilidad, mahimu ka mamangkot, ‘Daw ano kadaku ang sarang ko mahimu?’ Wala na sing iban pa ang makasugid sa imo. Apang sarang ikaw makapangamuyo kay Jehova, nagapangabay nga gamiton ikaw sa pinakadakung kasangkaron nga posible sa iya balaan nga pag-alagad. Ayhan sarang mo madugangan ang kadamuon sang tion nga ginahugod mo sing tayuyon sa pag-alagad sa latagon. Kon wala pa ikaw sing pagtuon sa Biblia sa balay upod sa isa ka interesado, ayhan mahimu ka makahimus nga makatigayon sing isa. Kag kita tanan sarang makapauswag sang kalidad sang aton pag-alagad kay Jehova kon iaplikar naton ang laygay sang iya Pulong kag organisasyon. Subong man, kon ikaw isa ka gintangdoan nga gulang, mahimu nga ang imo espirituwal nga pagbulig kinahanglanon sing daku sa isa ka kongregasyon. Kon ang imo pamilya magasaylo kon diin ang kinahanglanon daku gid, ikaw, ang imo asawa kag ang imo kabataan dugang nga magakasadya sa pagsapo kag pagbulig sa mga katulad-karnero. Sa ulihi, malipay ka sa pagbulig nga matukod ang isa ka bag-ong kongregasyon, ukon ayhan may madamu pa iban nga mga pagpakamaayo nga wala mo gid ginapaabot. Sang mahibaloan ni apostol Pablo nga ‘daku pa ang ganhaan sa pagpangabudlay,’ nalangkag sia sa pagpauswag sang iya pag-alagad sa kadayawan ni Jehova. (1 Corinto 16:9; 2 Corinto 2:12; Colosas 4:2-4) Amo man bala sina ang imo balatyagon?

18. (a) Ano ang ginarekomendar kon ang ganhaan sang dugang nga Cristianong hilikuton mabuksan sa imo? (b) Ano ang magaresulta kon ihanda mo ang imo kaugalingon?

¹⁸ Ti, ano ang himuon mo kon ang isa ka pribilehio sa pag-alagad kay Jehova ginpahamtang sa atubangan mo? Mangin makinaugalingon ka bala, ukon ipadayag mo bala ang espiritu sang pagsakripisyo sa kaugalingon? Sa pagkamatuod, sarang mo maisip ang bili. (Lucas 14:27-30) Apang kon ang ganhaan sang dugang nga Cristianong hilikuton ginbuksan sa imo, mangamuyo kay Jehova. Mangin espisipiko sa sina nga pangamuyo kag mangabay sang iya pagtuytuy. (Salmo 37:5; Filipos 4:6, 7) Nian, kon ginapahulag ka sang iya balaan nga espiritu nga batunon ang isa ka pribilehio, magpasakop sa sina nga pagpahulag kag pagpanghikot nga may pagtuo sa imo langitnon nga Amay. Para sa masinakripisyuhon sa kaugalingon nga dalanon sa pagpauswag sa intereses sang Ginharian pat-od gid nga ikaw pakamaayuhon. Kag dumduma, “Ang pagpakamaayo ni Jehova—amo ina ang nagapamanggad, kag wala sia nagadugang sing kasubo sa sini.” (Hulubaton 10:22; Malaquias 3:10) Huo, sa pagkamatuod, mangin imo ang daku kag wala ginapaabot nga mga pagpakamaayo kon ginahanda mo ang imo kaugalingon!

Paano Nimo Sabton?

□ Nahisuno sa Salmo 110:3, ano karon ang ginahimu sang mga Saksi ni Jehova?

□ Paano gintamod sang modernong mga alagad ni Jehova ang hilikuton nga pagbantala sang Ginharian?

□ Kutob sang mabuksan ang Gilead School sang 1943, ano ang natabo sa tugob-kalibutan nga pag-uswag sang Ginharian?

□ Ano ang mga kahigayunan para sa napauswag ukon dugang nga pag-alagad kay Jehova?

□ Kon ang ganhaan sa dugang nga pagbantala sa Ginharian ginbuksan sa imo, ano ang imo reaksion?

[Piktyur sa pahina 16]

Sang mabaton ni Pablo ang ‘panawag sa Macedonia,’ sia kag ang iya kaudanan naghanda sang ila kaugalingon nga mag-alagad sa kadayawan ni Jehova

[Piktyur sa pahina 18]

Ang nahaunang naggradwar nga klase sang Gilead School, Hunyo 1943. Ining mapisan nga mga payunir naghanda sang ila kaugalingon para sa dugang nga pag-alagad sa Ginharian