Kahulugan sang Balita

Ano ang Kadalag-an?

Para sa madamu nga tawo karon, ang paglab-ot sa putokputokan sang hagdanan sang karera kag ang pag-agom sing manggad kag kabantogan amo ang kadalag-an kag kalipay. Apang amo bala? Indi suno sa U.S. News & World Report. Ini nagasiling nga ining “pagpakig-upod sa kadalag-an—kon ginahimud-osan nga may isa sing panghunahuna nga katuyoan—makahatag sing dakung problema sa dagway sang balatian, problema sa karera, napatumbayaan nga kabataan kag naguba nga panimalay.” Si Dr. Paul Rosch, presidente sang American Institute of Stress, ginkutlo nga nagsiling nga “ang pag-ipit nga maglabaw mas daku pa sang sa nagligad,” kag madamu ang nagabatyag nga dapat sila magmadinalag-on “bisan pa nagakahulugan ini sing pagkamang sa lawas sang mga masigkamanugpangabudlay ukon pagsakripisyo sa kon ano gid ang ila luyag.” Samtang ginaako nga indi tanan sang madinalag-on nga mga tawo nakasala, ginapalig-on sang artikulo nga madamu ang may problema sa balatyagon kag indi malipayon. “Nagaugyon ang mga awtoridad, ang matuod nga kadalag-an sa kabuhi ginapat-od indi pasad sa ginahanduraw nga titulo ukon anum sing numero nga sueldo,” hinakop sang artikulo.

Ang mga nagapangita sing matuod nga kadalag-an kag kalipay nakakita sini karon, indi sa pagtinguha nga lab-uton ang putokputokan sang hagdanan sang karera sa bisan ano nga bili, kundi sa pagpangita sa matuod nga Dios kag sa pagsapo sa iya. Subong sang ginasiling sang Salmo 144:15, “Malipayon ang mga tawo nga ang Dios amo si Jehova!” Si apostol Pablo nagpaandam batok sa paindis-indis, kag si Jesus nagsiling nga “mas labi ang kalipay sa paghatag sang sa pagbaton.” (Binuhatan 20:35; Galacia 5:26) Ang panikasog nga magmadinalag-on sa mata sang Dios paagi sa paghibalo kag sa paghimu sang iya kabubut-on, sa baylo nga tinguhaan nga makalab-ot sa putokputokan sang materalistiko nga hagdanan sining kalibutan, nagadala sing matuod nga mapinadayunon nga kalipay.

‘Kalimti ang Paandam nga Kalaglagan’

Si Jesus nagsiling nga ang mga tawo sang kaadlawan ni Noe ginlalag sa Anaw bangod “wala nila pagbantayi” ang mensahe sang pagpaandam sang Dios. Ang bantog nga tagna ni Jesus sa kon ano ang paabuton nga mahanabo sa iya “presensia” kag sa konklusion sang sistema sang mga butang ni Satanas (nga masapwan sa Mateo, kapitulo 24) nagakaigo nga paglaragway sa kon ano ang nakita naton kada adlaw sa kalibutan palibot naton. (Tan-awa man ang 2 Timoteo 3:1-5) Apang, walay sapayan sining makasulubo nga kahimtangan ginpiyong sang iban ang ila mga mata sa kahulugan sinang mga hitabo.

Halimbawa, sa The Hopeful Future, ang ulihi nga libro ni G. Harry Stine, nagahambal sia nahanungod sa masanag nga palaabuton diin ang atomiko nga inaway, polusyon kag kakulang sing kalan-on ukon gatong indi na pagkahadlokan. Maathag nga ginakabig ni Mr. Stine ang mga paandam nga indi gid mapamatod-an. Masinaligon sia nga nagapati sa sinang masanag nga pagtamod bangod ang tawo nakalampuwas sa nagligad nga mga krisis kag sa bisan paano makalampuwas sa karon.

Ginapakita sang Biblia nga magaabot ang tion nga wala na sing inaway, polusyon ukon kakulang sing kalan-on kag gatong. Apang indi ini magaabot paagi sa panikasog sang tawo kay “wala sa tawo nga nagalakat sa pagmando sang iya mga tikang.” Apang, si Jehova sarang kag magapaluntad sang mahidaiton nga kalibutan diin ang Paraiso indi na gid matapos. (Jeremias 10:23; Isaias 65:17, 18) Ang pagtigayon sang kabuhi nga dayon sa sinang Paraiso nagakahulugan sing matuod nga kadalag-an kag kalipay.

“Ginabaton sang Iglesia ang Pagkabuhi sa Sala”

Amo sina ang ulong dinalan sang isa ka balita sa Daily Express sang London sa 30-pahina nga polyeto, Foreword to Marriage, nga ginpaguwa sang Church of England. Tuhoy sa topiko sa wala pa ang kasal nga sekso, ang polyeto nagasiling tuhoy sa madamung bag-ong kasal sa panahon sang kasal: “May bug-os kag hilway nga pagtilaw sa pila ka tion. Ang iban mahimu nga nagapuy-anay na anay, kag gani indi bag-o ini nga eksperiensia. Ukon amo bala?” Ang artikulo sa pamantalaan nagakomento: “Inang katapusan nga pamangkot amo ang lamang nga panugda sa 30-pahina nga polyeto, nga ang sekso antes ang kasal indi maayo nga panugod.” Sa isa ka interbyu, ang awtor sang polyeto nagsiling nga ang iglesia nagaugyon ukon wala nagaugyon sa paghuliray sa sekso antes sang kasal, kag nagdugang sia: “Ang amon ginalauman amo nga sa relasyon antes sang kasal yara ang hanuot kag mapinadayunon nga higot nga nagahugpong sa baylo sang salimpapaw lamang nga relasyon.”

Daw ano ka tuhay ang moral nga mga talaksan sang Dios! Ang iya Pulong maathag nga nagasiling: “Maglihi sa pakighilawas.” (1 Corinto 6:18) Indi katingalahan nga ang talaksan sa moral sang kalibutan nagakadunot kon ang mga lider sang relihion mapaslawan sa pagsugid sa mga tawo sang mga kinahanglanon sang Dios. Ang Biblia maathag nga nagasiling sa 1 Corinto 6:9, 10 nga ang mga nagabuhat sing pakighilawas kag panghilahi “indi makapanubli sang ginharian sang Dios.” Makapalig-on mahibal-an nga ang mga Saksi ni Jehova wala nagakompromiso sa pagtudlo sang mga talaksan sa moral sang Dios kag sa paghimu sang bug-os nila nga masarangan sa pagtuman sini.