1914—Maragtas Lamang? Ukon Apektado Ka Bala Sini?
SA BANWA sang Sarajevo sa Bosnia sang aga sang Hunyo 28, 1914, wala mahangpi sang tsuper ang iya instruksion, sayop nga nagliko, . . . kag bangod sina gindala ang iya mga pasahero sa isa ka punto diin ang nagahulat nga manugpatay indi na kinahanglan nga magpuntariya sang pusil agod tirohon sila.
“Duha ka lupok gikan sa isa ka pistola kag ang kalibutan gintay-ug. Ang krimen amo ang diutay nga bato nga, sang maghunga, nagtuga sing pagkatiphag. Dayon nagsunod ang apat ka tuig sang bug-os kalibutan nga kasingki. Minilyon ang nagkalapatay nga wala sa panahon.”—The American Heritage History of World War I.
Yadtong pagpatay kay Archduke Francis Ferdinand sang Austria kag sa iya asawa, si Sophie, nag-umpisa sang mga hitabo nga nagtanda sa 1914 subong ang punto sang pagbalhin sa maragtas sang katawhan. Kag yadto nga hitabo nag-apektar sa imo. Ngaa? Bangod ang “pagkatiphag” sang inaway kag kasingki wala mag-untat sa pagkalahulog.
Isa ka Gintandaan nga Kaliwatan
Nahanungod sa importansia sang Inaway Kalibutanon I, ang Ingles nga awtor nga si J. B. Priestly nagsulat: “Kon natawo ka anay sang 1894, kasubong ko, nakita mo sing hinali ang daku indi palareho nga litik sa salaming. Pagkatapos sina ang imo hunahuna indi makapalagyo gikan sa ideya nahanungod sa kalibutan nga natapos sang 1914 kag sa isa pa nga nagsugod sang mga 1919, nga may kamingawan sang aso kag kasingkal . . . sa ulot nila.”
Ang mga nakalampuwas sa “ginsakripisyo nga kaliwatan” sang 1914, subong sang pagtawag sini, nagkabuhi sa importante nga mga panahon nga ginsugdan sang mga trinsera kag mga kanyon kag nagatapos sa intercontinental ballistic missiles nga makasarang sa pagpahanabo sang bug-os kalibutan nga kalaglagan. Ini nga “hitabo” nahisanto sa matagnaon nga pinamulong ni Jesucristo: “Ang pungsod magatindog batok sa pungsod, kag ang ginharian batok sa ginharian; . . . kag sa duta kasisit-an sang kapungsoran kag kalisang bangod sang dinaguhub sang mga balud sa dagat. Ang kaisog sang tawo madula sing bug-os kon makita nila kon ano ang nagapahog sa kalibutan, kay ang mga kagamhanan sang mga langit uyugon.”—Lucas 21:10, Phillips.
Ining mga pinamulong ni Jesus bahin sang grupo nga tanda nga nagatanda sang “katapusan sang kalibutan.” Subong sang pirme ginpakita sa sini nga balasahon, kutob sang 1914 ini nga tagna masangkad nga nagakatuman. Apang nagdugang si Jesus sang pila ka butang nga labi ka importante nahanungod sa kaliwatan sang 1914. Ano ini? Nagsiling sia: “Kon makita ninyo nga nagakahanabo ining mga butang, makilala ninyo nga malapit na ang ginharian sang Dios. Sa pagkamatuod nagasiling ako sa inyo, indi magtaliwan ining kaliwatan tubtob nga ang tanan mahanabo.”—Mateo 24:3, Ph; Lucas 21:29-32.
Paano maaplikar ining pinamulong sa madasig mawala nga kaliwatan sang 1914? Ano nga mga hitabo ang ginahulat? Kag paano ini magaapektar sa imo?