Kari Kamo sa 1984 “Pag-uswag sang Ginharian” nga Distrito nga Kombension!

WALA sing nakahangop sing mas maayo pa sang sa kay Jehova nga Dios mismo nga kinahanglanon para sa iya mga alagad sa duta nga magtipon sa dalagku nga mga asambleya. Amo ina kon ngaa ginhimus niya para sa iya dumaan nga katawhan sang Israel nga magtipon tatlo ka beses sa isa ka tuig sa duog nga iya ginpili, ang Jerusalem. Didto nabatian nila ang kasugoan ni Jehova nga Dios nga ginbasa, nakabaton sing laygay kag walay duhaduha nalipay sa pagsugiray sa isa kag isa kon paano sila ginpakamaayo ni Jehova nga Dios.—Exodo 23:14-17; 34:23; Deuteronomio 16:16, 17; 2 Cronica 8:13.

Apang, ang mga Israelinhon nagtipon indi lamang tungod sining kapiestahan kundi sa pinasahi man nga mga okasyon, subong sang dedikasyon sang templo ni Hari Solomon, ang kapiestahan sini naglawig sing 14 ka adlaw, kag sang inagurasyon sang gintukod liwat nga kuta sang Jerusalem sang panahon ni Nehemias.—1 Hari 8:65, 66; Nehemias 12:27-43.

Busa may maayong sulondan sa Kasulatan nga ang modernong mga Saksi ni Jehova naghiwat sing kombension sing kapin na sa isa ka gatos ka tuig, sing aktuwal kutob sang 1879. Sa magkubos 37 ka tuig na karon, may yara kita, kaangay sang dumaan nga Israelinhon, pagtilipon tatlo ka beses isa ka tuig, makaduha para sa aton sirkito nga mga asambleya kag makaisa para sa aton distrito, nasyonal ukon internasyonal nga kombension.

Makalilipay gid ang mga report sang nagligad nga tuig nga “Paghiusa sa Ginharian” nga Distrito nga Kombension!a Nabatyagan sang mga kautoran ang ila tugob-globo nga paghiusa subong nga wala pa gid matabo anay. Sa madamung kadutaan ang tumalambong nagtimbuok sa bag-ong kataason. Halimbawa, ang Aprikano nga pungsod sang Zambia, diin 57,034 ang manugbantala, nagreport sing kabilogan nga tumalambong nga 417,122 sa 24 ka kombension. Ini nga tumalambong katumbas sa isa ka tawo sa kada 15 sang populasyon sina nga pungsod! Indi bala ang mga report kaangay sini nagapukaw sa sulod naton sang handum nga makatambong sa “Pag-uswag sang Ginharian” nga mga kombension sini nga tuig?

Kon Ngaa Kinahanglan ang Magtipon

Ngaa kinahanglan kita nga magtipon sing tingob sa tatlo kag tunga ka adlaw agod palig-unon ang aton kaugalingon sa espirituwal? Ginapahanumdum kita ni Pedro: “Sanglit ini tanan nga butang tunawon sa among bagay, ano bala nga sari sang mga tawo dapat mangin amo kamo sa balaan nga buhat sang pagginawi kag diosnon nga mga kabuhi, nga nagahulat kag nagapadali sang presensia sang adlaw ni Jehova.”—2 Pedro 3:11, 12.

Tuigtuig ang mga pagsulay kag mga pag-ipit nagadugang agod patalikdon kita gikan sa paghimu sining “balaan nga buhat sang pagginawi.” Mahimu isiling nga adlaw-adlaw ang kalibutan labi nga nagasingki, labi nga nagalain, labi nga nagausmod, labi nga nagalaut, labi nga naganubo kag labi nga nagaimoral. Kag ang media nagahatag sing pamatuod sini, ang mga pamantalaan, mga magasin, radyo, sine kag TV. Labi na yadtong sa tunga naton nga nagapakig-upod sa mga kalibutanon agod mangabuhi ukon mag-eskwela ang nakasapo nga ang aton espirituwalidad dalayon nga ginasalakay.

Dugang pa, madamu gid ang mga pag-ipit agod patalikdon kita gikan sa “mga buhat sang diosnon nga debosyon,” nga nagalakip sa duha ka hilikuton sang pagbantala sang maayong balita sang Ginharian kag sang paghimu sing Cristianong mga disipulo! Ang komersial nga kalibutan nagaipit kag nagasulay sa aton nga mangin materyalistiko—agod hatagan sing madamu nga tion, enerhiya kag paagi ang pagtigayon sang ginatawag nga maayong mga butang sa kabuhi amo kon ngaa diutay nga tion kag enerhiya ang nabilin para sa balaan nga pag-alagad. Nahanungod sini ang industriya sang kalingawan daw nagahatag sing daku pa nga katalagman sa katawhan sang Dios. Maayo gid nga ginpaandaman kita ni Jesus nahanungod sining mga butang, nga nagasiling: “Andam kamo sa inyo mga kaugalingon basi ang inyo mga tagipusuon mabug-atan sang patuyang kag kahulugbon kag mga paghimud-os sining kabuhi, kag yadtong adlaw magaabot sa inyo sing hinali subong sang siod. . . . Busa, magbantay kamo sa tagsa ka dag-on nga nagaampo nga makasarang kamo . . . sa pagtindog sa atubangan sang Anak sang tawo.”—Lucas 21:34-36.

Ang programa sa aton “Pag-uswag sang Ginharian” nga Distrito nga Kombension gindesinyo agod hatagan ang tanan nga ministro sang Dios sing bulig nga kinahanglan nila agod magkabuhi gid sila sa matarong nga prinsipio ni Jehova kag agod masangkapan sila sing labi sang sa nagligad sa pagbantala sang Ginharian kag sa paghimu sing mga disipulo.

Planuha Karon nga Makatambong

Labi na gid nga luyag naton dumdumon nga ining mga kombension tatlo kag tunga ka adlaw kalawig, sugod sa Huebes sang hapon. Ang pag-alagad sa latagon sa sining tuig mangin sa Biernes sang hapon. Ang pagpaanggid sa kadamuon sang nagtambong sang Huebes sang nagligad nga tuig sa iya sang Domingo nagapautwas sing pamangkot sa kon bala ang iban sa aton makahimu sing dugang nga panikasog nga mangin yara sa kombension sugod sa Huebes sang hapon. Ang isa sang mga highlights sang kombension sang nagligad nga tuig amo ang pamulongpulong sang Huebes nga “Music That Praises Jehovah,” diin indi lamang makalilipay nga ginpahibalo ang nahanungod sa nagapakari nga bag-ong songbook kundi ginpatokar man ang bahin sang siam ka matahom nga melodiya, nagahatag sing una nga pagtilaw sa kon mangin subong sang ano ang bag-ong songbook. Daw ano ka makalilipay para sa madamu sa aton nga sa sining panag-on sang kombension makaamba kita kaupod sa aton mga kautoran samtang aktuwal nga ginagamit naton ang bag-ong Iningles nga songbook sa apat ka adlaw nga kombension!

Kalabanan sa aton nagabakasyon kada tuig. Indi bala ang iban sa aton makaplano nga ilakip ang bug-os nga kombension sa sina nga bakasyon? Ukon dili gani, indi bala masakripisyo naton ang sueldo sa duha ka adlaw tungod sa dakung espirituwal nga piesta? Sa Honduras ang iban nga kautoran nadulaan sing trabaho bangod lamang nga nangabay sila nga indi magtrabaho agod makatambong sa kombension. Ang isa ka utod nga babayi didto nangabay sing duha ka adlaw nga off agod makatambong sa “Paghiusa sa Ginharian” nga kombension kag ginpahog nga pahalinon. Ang isa ka abogado, nga ang asawa isa ka Saksi, nakabati sini kag naghatag sa iya sing trabaho nga may mas maayoayo nga sueldo pagkatapos sang kombension.

Ang 1984 Yearbook nagasugid tuhoy sa kapin sa 27,000 ka Espanyol kag Portuguese nga kautoran nga naglakbay halin pa sa Belgium para sa isa ka kombension, sa tion nga ang mga kombension indi mahiwat sa ila kaugalingon nga mga pungsod. Nagasugid man ini tuhoy sa mga kabudlayan nga gin-atubang sang taga-Alaska nga mga kautoran agod makatambong sa mga kombension. Nahanungod sa panikasog nga ginhimu sang isa nga taga-Samoa nga utod agod makatambong sa kombension sa Fiji, aton mabasa: “Indi na sia bata, apang tigulang na; indi mabaskog, kundi masakiton; indi mabakud sing batiis, kundi may nadeporma nga tiil; indi makakita sing maayo, kundi bulag ang isa ka mata. Agod makatambong sa kombension kinahanglan niya ang kuarta, kag agod matigayon ini dapat sia manipon sing mga lubi. Ginadala niya sa isa ka tion ang 15 sini duha ka milya sa kon diin panitan niya ini, kuhaon ang unod kag pamalhon, kag pagkatapos ibaligya niya ang unod sang lubi, ukon ang kopra.” Nagkinahanglan ini sa iya sing kapin sa apat ka semana agod makasupot nga bastante para ibayad sa iya paglakbay. Kabay nga subong kita ka determinado nga makatambong!

Dapat man naton dumdumon nga ang aton mga kombension wala lamang nagapalig-on sa aton sa espirituwal kundi sa masami nagaresulta sa dakung panaksi sa mga taga-guwa. Halimbawa, talupangda kon ano ang ginsiling sang isa ka reporter sa Nobiembre sang 1983 nga guwa sang Griegong magasin nga Galaxias nahanungod sa aton “Paghiusa sa Ginharian” nga kombension sa Atenas. Sa tapos makahatag sing daw maid-id nga pagtuptup sa programa kada adlaw, nagkomento sia:

“Batunon man ukon indi sang isa ang mga punto-de-vista sang mga Cristianong Saksi ni Jehova, ang pagduaw sa ‘Apollo’ Stadium sa mga sesyon sang Cristianong mga Saksi ni Jehova isa ka hitabo nga nagabilin sing matahom nga kahamuot sa bisita. . . . Wala sing makapanghiwala nga ang ila pagtuo nag-apektar gid sang ila personal nga kabuhi ukon, sa iban nga hambal, nga ginapakita nila ang ila pagtuo. Bisan nga may kakugi sila, indi sila panatiko. Ginahigugma nila ang Dios, apang ginahigugma man nila ang tawo.”

Kabay nga ang tagsa ka Cristianong saksi ni Jehova, kag ang tanan pa nga nagahigugma sang kamatuoran kag pagkamatarong, manikasog nga makatambong sa “Pag-uswag sang Ginharian” nga kombension—kag sugod sa umpisa tubtob sa matapos!

[Footnote]