Ginharian sang Dios—Ang Sigurado nga Solusyon

“GINAGAMHAN sang tawo ang tawo sa iya kasamaran.” Ining pinamulong, nga narekord sa Biblia sa Manugwali 8:9, napamatod-an nga matuod sa bug-os nga maragtas kag tubtob sa aton adlaw. Ngaa? Ngaa indi mapauswag sang tawo ang ital-ital nga tion nga iya ginaatubang karon?

“Ang diutay nga ihibalo tuhoy sa kinaugali sang tawo magakombinse sa aton,” sulat ni George Washington sang 1778, “nga, tubtob karon ang pinakadaku nga bahin sang katawhan, ang interes [sa kaugalingon] amo ang nagagahom nga prinsipio; kag nga halos sa magkubos ang tagsa ka tawo, napaidalom sa impluensia sini. . . . Pila lamang ang pirme nga makasakripisyo sang kaugalingon nga interes, ukon kaayohan, sa kaayohan sang iban. Bangod sini walay pulos ang maghambal batok sa kalautan sang tawo; ang katunayan amo sina, ang inagihan sang kada dag-on kag pungsod nagpamatuod sini kag dapat kita sa dakung kasangkaron, magabaylo sang konstitusion sang tawo, antes naton himuon ang kabaliskaran.”

Sang ang tanan nga tawo nabun-ag nga dihimpit kag makasasala, imposible para kay bisan sin-o nga tawo nga makig-angot sa himpit kag makatarunganon nga paagi upod sa iya isigkatawo. (Roma 5:12) Ang makagud personal nga intereses mahimu nga nagaduag ukon nagadominar sang iya paghukom kag aksion. Kag, mahimu man tinguhaan sang tawo nga maghimu sing kasugoan batok sining duna nga mga kaluyahon, indi ini mapahigad sang bisan anong tawhanon nga pangulohan. “Wala sing sistema sang pangulohan—ayhan paagi sa monarko, diktador, mapintas nga pangulo, aristokrasya, oligarkiya, republika, bug-os nga demokrasya, ukon Partido Komunista—ang ginplano nga magasiguro nga pirme tuytoyan sang mabuot kag maalam nga mga lider ang kahimtangan sang estado,” sulat ni Laurence Beilenson sa The Treaty Trap. “Amo sina bangod ang mga nagpili sa ila ukon nag-ugyon sa ila pagginahom mga tawo. . . . Wala paggamhi sang mga gumalahom ang mga tawo sing maayo kag maalamon. Kon higugmaon sang mga tawo ang ila isigkatawo subong sang ila kaugalingon, ang mga kasugoan nga nagadumili, ang mga polis nga nagapatuman sini, kag ang armado nga kusog nga nagaamlig indi na kinahanglan, kag amo man ang mga kasugtanan.”

Samtang ginbatyag ni Beilenson, subong sang madamu, nga inang “malipayon nga adlaw” “malapit na mahanabo,” wala ginabinagbinag sina nga pagtamod ang katuyuan sang Dios para sa duta. Ang kapaslawan sang tawo sa paggahom sing maalamon kag mahidaiton, bisan ano man nga paagi ang ginahimu, maathag nga nagapakita nga ang tawo indi makasarang sa paggahom sa kaugalingon. Ang lamang nga solusyon nasandig sa Ginharian sang Dios sa idalom sang pagginahom sang iya Anak nga si Jesucristo. Amo sina kon ngaa si Jesus, sang naghatag sa iya mga disipulo sing modelo nga pangamuyo, nagtudlo sa ila nga mangamuyo sa Dios: “Pakaria ang imo ginaharian. Himoa ang imo kabubut-on sa duta, subong man sa langit.”—Mateo 6:10.

Kabubut-on sang Dios nga ang iya Ginharian, nga natukod na sa langit, ang mangin paagi sa pagdala sing bug-os nga paghidait sa duta. Nahanungod sa pagginahom sang iya Anak, ang “Prinsipe sang Paghidait,” ang inspirado nga kasaysayan nagasiling: “Ang iya harianon nga gahom padayon nga magatubo; ang iya ginharian pirme nga mahidaiton. Magagahom sia subong salili ni Hari David, nagapasad sang iya gahom sa matarong kag katarungan, kutob karon tubtob sa katapusan. Determinado ang GINUO nga Labing Gamhanan sa paghimu sini tanan.”—Isaias 9:6, 7, Today’s English Version.

Indi lamang nga pahanabuon sina nga Ginharian nga palibutan sang matuod nga paghidait ang globo kundi himuon sini kon ano ang indi mahimu sang iban nga pangulohan: ang pagdula sa makagud nga huyog sang tawo bangod sang iya napanubli nga pagkadihimpit. Kay sa idalom sang pagginahom sang Ginharian ang katawhan, nga ginhilway na sa sala kag kamatayon, makaagom sang palaabuton nga magkabuhi sing himpit kag walay katapusan sa paraiso nga duta. (Roma 6:23) Bangod sini, ang Dios “magapahid sang tagsa ka luha gikan sa ila mga mata, kag ang kamatayon wala na, amo man ang kalisud ukon paghibi ukon kasakit pa. Ang nahaunang mga butang nagtaliwan.” Kag si Jehova nagapanaad: “Toloka! ginabag-o ko ang tanan nga butang.” (Bugna 21:4, 5) Amo sina ang sigurado nga solusyon para sa aton ital-ital nga tion.