Nahiusa sa Pagbantala sang Pulong ni Jehova

“Mangin isa kamo sing hunahuna suno kay Cristo Jesus, agod nga sa tingob mahimaya ninyo sa isa ka tingog ang Dios kag Amay sang aton Ginuong Jesucristo.”—ROMA 15:5, 6.

1. (a) Ano ang kahimusan ni Jehova sa pagpahiusa sa iya katawhan? (b) Ano ang ginapakita sang Kasulatan tuhoy sa kahim-ong sining paghiusa?

GINTIPON ni Jehova ang iya mga saksi pasulod sa hamili nga tugob-globo nga paghiusa. Nahisuno ini sa panimalay nga kahimusan sang Dios nga ginalaragway ni apostol Pablo sa Efeso 1:10: “Ang administrasyon tungod sa kabug-osan sang gintangdo nga mga panag-on, nga amo, sa pagtingob sang tanan nga butang kay Cristo, ang mga butang sa langit kag ang mga butang sa duta.” Una nga gintipon amo yadtong yara sa “diutay nga panong” sang hinaplas magapalangit nga mga Cristiano kag matapos yadtong yara sa “dakung kadam-an . . . gikan sa tanan nga kapungsoran” nga nagapaabot nga makalampuwas pasulod sa matarong nga “bag-ong duta” nga ginsaad sang Dios.—Lucas 12:32; Bugna 7:3, 4, 9, 13-17; 21:1, 5.

2. Ano ang nagapaposible sa mga Saksi ni Jehova nga maghambal “nga sa tingob”?

² “Nga sa tingob”—amo ina kon paano ginahambal sining mga saksi ni Jehova ang mensahe sang Ginharian. Ngaa nahimu nila ini? Bangod sa palibot sang aton globo, ginapasundayag nila “ang isa sing hunahuna suno kay Cristo” samtang yari pa sia sa duta. Indi sia bahin sining bugalon nga kalibutan. Sa baylo, ginpaubos niya ang iya kaugalingon sa paghimu sang kabubut-on sang Dios kag sa pagtukod sang mainit, mahigugmaon nga paghiusa sa tunga sang iya mga disipulo. Amo ina ang ginsugoran sang tugob-globo nga paghiusa nga nagapakilala sa matuod nga mga Cristiano sang siniglo nga nagsunod.—Filipos 2:5-8; Juan 13:34, 35; 17:14.

3. (a) Ano gid ang kabaliskaran nga makita sa duta karon? (b) Paano ang Kasulatan nagabulig sa pagpakilala sa tugob-globo nga katilingban sang matuod nga mga Cristiano?

³ Ining paghiusa sang organisasyon nakalab-ot sang iya pinakamatahom nga ekspresyon sa sining “katapusan nga mga adlaw,” kabaliskaran gid katama sa mga pagbinahinbahin nga nagakatabo sa sistema sang mga butang ni Satanas, diin ang dumot kag pagkamalinapason lapnag. (2 Timoteo 3:1-5, 13; Mateo 24:3, 12) Wala pa gid sa maragtas sang tawo nagluntad sa palibot sang duta, sa 203 ka kadutaan, ang organisasyon nga nagatingob tuhoy sa pagtuluohan, katuyoan kag hilikuton. Ining bug-os globo nga katilingban sang mga disipulo ni Jesus mahimu makilal-an paagi sa ila mga bunga.—Juan 15:8; Hebreo 13:15; Galacia 5:22, 23.

Paghiusa sang Hilikuton

4. (a) Ano nga sinuay ang nag-utwas sa nahaunang-siglo nga kongregasyon? (b) Suno sa Binuhatan 15:1-6, anong teokratikong aksion ang ginsugdan?

⁴ Ang paghiusa sang hilikuton sa organisasyon ni Jehova gin-ilustrar para sa aton sa Binuhatan kapitulo 15. Ilaragway sa imo hunahuna sang pagtipon sang hamtong nga mga saksi ni Jehova—sang 12 ka apostoles, sang iban pa nga mga tigulang sa kongregasyon sang Jerusalem kag nanday Pablo kag Bernabe, mga gulang gikan sa kongregasyon sang Antioquia. Sa Antioquia, kag subong man sa Jerusalem, ang iban nga mga nakombertir gikan sa tunga sang mga Judiyo nagpamilit nga ang mga tawo sang mga pungsod dapat sirkunsidahon kag dapat magtuman sang mga kasugoan ni Moises agod maluwas. Gani ang mga apostoles kag mga tigulang “nagtipon agod hambalan ining butang.”—Binuhatan 15:1-6.

5-7. (a) Sa ano nga kahulugan may yara “daku nga pagsinuay”? (b) Ano nga panaksi ang ginpresentar? (c) Paano gingamit ang Kasulatan may kahilabtanan sa sini? (d) Anong hamtong nga determinasyon ang ginhimu ni Santiago, nagdul-ong sa anong katapusan nga desisyon? (e) Ano nga sahi nga aksion ang nagsunod?

⁵ May yara wala ginadampigan nga paghinambalanay tuhoy sa problema, kag yadtong debotado nga mga tawo nagpabutyag sang tanan nga mga kaayohan kag kalainan. Wala sila magpamat-od sing una sang ila hunahuna. Handa sila nga usisaon ang bagay gikan sa tanan nga anggulo. May yara “daku nga pagsinuay,” apang sing maathag ginhuptan nila ang kahim-ong kag namati sing matinahuron sa mga pagtamod sang kada isa. Si apostol Pablo nagpanaksi sa katunayan nga ang Dios naghatag sang iya balaan nga espiritu sa wala masirkunsidar nga mga tawo sang mga pungsod—isa gid ka gamhanan nga pamatuod nga ang pisikal nga pagsirkunsidar indi na kinahanglan para sadtong maluwas. Sanday Bernabe kag Pablo nagdugang sa sining panaksi, nagalaragway sa madamung makatilingala nga mga butang nga nahimu sang Dios sa ila pagministeryo sa mga pungsod.—Binuhatan 15:7-12.

⁶ Masunod, ginkutlo ni Santiago ang mga kasulatan bilang pagsakdag sa argumento nga bag-o lang mapresentar. Ginpaathag niya nga ang Amos 9:11, 12 nagatudlo sa pagpasag-uli liwat sang kahamuot sang Dios sa idalom sang Mas Daku nga David, si Jesucristo, kag sa pagpasangkad sang indi bagay nga kaluoy ni Jehova sa “tanan nga mga pungsod nga ginatawag sa [iya] ngalan.” Nahangpan ni Santiago nga indi na kinahanglan nga gamuhon ang mga nakombertir gikan sa mga pungsod paagi sa pagpamilit nga dapat sila sirkunsidahon kag dapat nila tumanon ang mga kasugoan nga nasulod sa Kasugoan ni Moises. Apang, kinahanglan ang pila ka butang: Dapat sila maglihi gikan sa idolatriya, gikan sa pagkaon sang dugo sa bisan anong dagway kag gikan sa seksuwal nga imoralidad.—Binuhatan 15:13-21.

⁷ Ang nagagahom nga hubon sa Jerusalem nakahimu sing isa ka desisyon. Ginpadala sini ang mga mensahero sa kongregasyon sang Antioquia upod ang sulat nga nagahinakop paagi sa pagpalig-on: “Kon maglikaw kamo sa ila sini, mangin maayo sa inyo. Kabay nga may maayo kamo nga panglawas!”—Binuhatan 15:22-29.

Teokratiko nga Paagi

8. (a) Paano natuytuyan ang modernong-adlaw nga Nagagahom nga Hubon sa paghimu sing desisyon? (b) Ano ang iban nga mga bagay ang gin-athag sining karon lang?

⁸ Sa modernong panahon, ang Nagagahom nga Hubon sang mga Saksi ni Jehova, nga nagarepresentar sa “matutom kag mainandamon nga ulipon” sang Agalon sang duta, nagasunod sa amo man apostoliko nga talaksan. (Mateo 24:45-47) Busa, ang Cristianong eksperiensia, ang pagtuytuy gikan sa Biblia, kag ang pagdumala sang espiritu ni Jehova nagatuytuy sa sining grupo sang hinaplas nga mga saksi sa teokratikong mga paghinakop sa mga bagay nga may kahilabtanan sa kongregasyon. Halimbawa, sining ulihi nga tinuig, ang Nagagahom nga Hubon nagsunod sa Makasulatanhon nga paagi sa pag-athag subong sang pagtamod sang Biblia tuhoy sa “mga ministro,” sa hatag-Dios nga konsiensia, sa pagdala sang makamamatay nga mga hinganiban, kag kon tubtob diin ang tagna ni Isaias naaplikar sa palaabuton nga Paraiso sa duta.—Ipaanggid ang Juan 14:26; 1 Corinto 2:10.

9. Ano nga paagi ang dapat sundon sang mga gulang sa paglubad sa mga problema karon?

⁹ Ang paagi sang Binuhatan kapitulo 15 dapat man sundon sang mga gulang sa kongregasyon sa paglubad sa mga problema karon. Una, maathag nga ihambal ang problema kag ang may kahilabtanan nga katunayan. Masunod, pahanugoti ang masaligan nga mga saksi nga maghatag sing maathag, matuod nga mga ebidensia may kahilabtanan sa bagay. Usisaa ang kasulatan agod tigayunon ang punto-de-vista ni Jehova, nagagamit man sang bulig nga matigayon sa mga publikasyon sang ­Watch Tow­er So­ci­ety. Mapinangamuyuon nga mangabudlay padulong sa paglab-ot sa isa ka solusyon, nahisuno sa panudlo sang Pulong ni Jehova, nga magabenepisyo sa kongregasyon.—Isaias 48:17; 1 Corinto 14:33.

Pagkalipay—Sadto kag Karon

10. (a) Subong sang nahaunang-siglo nga kongregasyon, paano kita maapektohan karon sang teokratikong mga desisyon? (b) Paano ang modernong mga pag-uswag nagdul-ong sa pagpabakud kag sa pagdugang sang katawhan ni Jehova?

¹⁰ Sang mabatian nila ang desisyon sang nagadumala nga hubon, ang mga katapo sang kongregasyon sa Antioquia, “nagkalipay tungod sa laygay.” Amo man karon, ang mga Saksi ni Jehova nagakalipay sa paghibalo sa mga desisyon kag mga pagpaathag sang organisasyon sa doktrina nga nagapauswag sa espirituwal nga kapagros sang katawhan sang Dios kag sa pag-uswag sang hilikuton ni Jehova. (Ipaanggid ang Tito 2:1.) Apang indi na kinahanglan pa para sa Nagagahom nga Hubon nga isulat ang mga sulat sang instruksion paagi sa kamut kag palibuton ini paagi sa mga mensahero nga nagalakbay. Ang moderno nga mga paagi sang komunikasyon kag mga pasilidad sa pag-imprinta sa kapin sa 30 ka sanga sang ­Watch Tow­er sa palibot sang duta nagapaposible sa sini nga ipaalinton “ang maayong balita sang pulong ni Jehova” sa minilyon ka katawhan sang Dios sa pinakamalip-ot nga tion. Ginahimu ini labi na paagi sa magasin nga Ang Lalantawan. Busa, ang mga kongregasyon sa bug-os nga kalibutan padayon “nga naglig-on sa pagtuo kag nagdugang sa kadamuon sa adlaw-adlaw.”—Binuhatan 15:30-16:5.

11. Paano gingamit ni Jehova Ang Lalantawan sa pagtuman sa Isaias 30:18-21?

¹¹ Yadtong tinuig na nga nagabasa sang Ang Lalantawan nagkalipay man sa pagtan-aw sa iya nagadugang nga sirkulasyon. Sa 105 ka tuig nga pagkabalhag, nagdugang ini kutob sa 6,000 ka kopya sa Ingles makaisa sa isa ka bulan tubtob sa 11,150,000 ka kopya sa 102 ka pamulong. Ang tanan dalagku nga mga edisyon makaduha sa isa ka bulan. Sa indi mapangduhaduhaan, Ang Lalantawan gingamit sing gamhanan sang aton Daku nga Manunudlo, si Jehova nga Dios, sa pagtuman sa saad: “Malipayon tanan sila nga naghulat sa iya. . . . Ang imo mga igdulungog magapamati sang pulong sa likod nimo, nga nagasiling: ‘Ini amo ang dalan. Lakat kamo sa sini.’ Kon magliso kamo sa tuo nga kamut ukon magliso kamo sa wala.”—Isaias 30:18-21.

12. (a) Ngaa may yara kita dugang nga kabangdanan nga magkalipay? (b) Paano kita makabenepisyo sa sining bag-ong kahimusan?

¹² May yara pa gid dugang nga rason nga magkalipay. Sugod sang tuig 1985, Ang Lalantawan ginbalhag sing dulongan tuhoy sa mga kaundan sini, sa 23 ka pamulong!a Ining tanan nga mga edisyon may pareho nga panghapin. Nagaunod sila sing palareho nga mga serye sang nagabukas nga artikulo kag palareho nga mga artikulo agod ton-an. Nagaaman ini sing dulongan nga programa sa “pagpakaon” nga magapahiusa sa katawhan ni Jehova sa pagtubo sa espirituwal “tubtob nga makadangat kita tanan sa paghiusa sang pagtuo.” Dapat pa gid ini magapahulag sa aton nga ‘sa tingob kabay nga aton himayaon sa isa ka tingog ang Dios kag Amay sang aton Ginuong Jesucristo.’—Efeso 4:13; Roma 15:6.

13. (a) Daw ano kasangkad ini nga programa? (b) Busa ano nga aplikasyon sa 1 Corinto 1:10 ang sarang mahimu?

¹³ Sang imo ginauyatan ini nga magasin sa semanal nga pagtinuon sang kongregasyon sa Ang Lalantawan, wala bala ikaw malipay sa paghibalo nga ang kalabanan sang imo kautoran sa bug-os nga kalibutan mahiusa sa pagkaon sa sining palareho espirituwal nga pagkaon sa amo man nga adlaw? Huo, mahanabo ini sa bug-os nga Naaminhan kag Bagatnan nga Amerika, sa kalabanan nga Europa, sa Hapon kag sa madamu nga duog sa Nabagatnan nga Aprika! Ginabantabanta nga kapin na 90 porsiento sadtong nagatambong sa pagtinuon sa Ang Lalantawan sa palibot nga duta—mga 2,500,000 ka mga tawo kada semana—ang nagapakigbahin sa sining dulongan nga kahimusan sa “pagpakaon.” Sing tingob, sila “nahiusa sa nagakaigo sa isa ka hunahuna kag isa ka painoino.” (1 Corinto 1:10) Subong ginapahanugot sang mga kahigayunan, ang iban nga mga pamulong pagaidugang.

14. Paano makabenepisyo ang mga pamilya?

¹⁴ Tubtob karon, bangod sang mga kinatuhayan sa pamulong, ang mga katapo sang isa ka pamilya mahimu nga binulan nga malayo sa pagtuon sang partikular nga mga artikulo sa Ang Lalantawan. Apang karon sarang sila mahiusa sa sini nga bahin. Halimbawa, ang nagsaylo nga mga ginikanan nga naanad na sa isa ka pamulong mahimu magalingkod kaupod sa ila nagahambal sing Ingles nga kabataan agod ihanda sing tingob ang leksion sa Lalantawan sa pareho nga semana sa duha ka pamulong. Sa duha sing pamulong nga mga pamilya, ang mga ginikanan nasangkapan sing maayo nga tumanon ang instruksion sang Efeso 6:4 kag 2 Timoteo 3:14, 15.

15. (a) Sa aton pagministeryo sa publiko, ano ang sarang naton karon mahimu nahisuno sa Isaias 53:8, 9? (b) Ano ang ginpaposible sang temprano sang 1985, kag sa palaabuton?

¹⁵ Binagbinaga, man, ang aton pagministeryo sa publiko paagi sa mga magasin. Sa sining dugang nga paagi, ang mga manugbantala sang Ginharian sa palibot sang globo sarang karon “sing tingob magaamba” subong nga sila naga­presentar sing pareho nga impormasyon sa publiko sa pareho nga panahon. (Isaias 52:8, 9) Kon nagapanaksi sa dalan nga dala ang magasin sa madamu sing pamulong nga mga teritoryo, ang mga manugbantala sarang makapakita sing mga magasin nga palareho sing tema sa panghapin sa duha ukon kapin ka pamulong. Hunahunaa ina! Sadtong temprano nga bahin sang 1985, ang mga manugbantala sang Ginharian sa bug-os nga duta magahatag sing makapulokaw, nahiusa nga panaksi nahanungod sa Armagedon! Sa ulihi, sa napat-od nga tion, pagatuytuyan ni Jehova ang iya katawhan nga maghimu sang isa pa ka gamhanan, nahiusa nga pagpahayag sa bug-os nga kalibutan samtang nagaalagad sila “sing tingob tungod sa pagtuo sa maayong balita.” (Filipos 1:27) Ang dulongan nga Ang Lalantawan sa madamu nga pamulong magapaposible sina nga pahibalo.—Ipaanggid ang Daniel 11:44.

Pagtan-aw sa Unahan

16. (a) Ano ang ginasugid sa aton sining Ang Lalantawan nahanungod sa hilikuton nga pagmagasin sa mga pahina 8, 9, kag 25? (b) Ngaa kinahanglan sang mga tawo ang aton magasin karon?

¹⁶ Sadtong tuig 1984, ang mga Saksi ni Jehova nakahatag sing masangkad nga pagpanagtag sa magkaupod nga magasin Ang Lalantawan kag Magmata! Ini nga hilikuton ginpakamaayo sing bugana ni Jehova, subong sang makita sa mga estadistika nga ginbalhag sa mga pahina 8 kag 9 kag 25 sining magasin. Sa bug-os nga kalibutan, ang napanagtag naton nga magasin sa latagon sadtong 1984 nagdugang sing 11.1 porsiento sa kabilogan sang 287,358,064, samtang ang napahamtang nga mga suskripsion sa magasin nagdugang sing 3.2 porsiento sa 1,812,221. Wala sing pagpangduhaduha nga dugang kag dugang nga mga tawo ang maluyag sa paghibalo kon ngaa ang mga pungsod nagakalisang, “nga wala makahibalo sang dalan paguwa.” (Lucas 21:25, 26) Luyag sang mga ginikanan ang malipayon nga palaabuton para sa ila kabataan—isa nga mas maayo pa sang sa duta nga masunog sa nuklear nga inaway. Ang aton mga magasin nagahatag sing buhi nga paglaum!—Mateo 12:18, 21; Roma 15:4.

17. Paano kita mabuligan sang aton mga magasin nga batoan ang Yawa?

¹⁷ Nian, kamusta sa 1985? Ang mensahe sang Ang Lalantawan kag Magmata! nangin labi ka prangka. Amo gid sini ang paabuton subong nga ang katapusan nga mga adlaw sang kalibutan ni Satanas nagadiutay. (Bugna 12:12) Indi magsayop! Luyag kita palas-ayon sang Yawa nga makigbahin sing regular sa pag-alagad kay Jehova. Huo, luyag ni Satanas nga pahilayuon kita gikan sa hubon sang katawhan sang Dios kag sa iya mga hilikuton, kag sa amo magalamon sa aton. (1 Pedro 5:8) Apang, mabatoan naton sia paagi sa tayuyon nga pagtipon agod makakuha sing sibu nga ihibalo, kag paagi sa paggamit sining nadugangan nga ihibalo sa pag-alagad kay Jehova.—Efeso 6:11, 14-16; Colosas 1:9-11.

18. (a) Daw ano ka daku ang imo responsabilidad subong manugbantala sang Ginharian? (b) Paano naton maaplikar ang laygay sa Roma 12:10, 11 kag 15:5, 6?

¹⁸ Isa bala ikaw ka manugbantala sang Ginharian? Kon amo, imo ginauyatan ang importante nga posisyon sa modernong-adlaw nga teokratikong katilingban. Subong dedikado nga Cristiano, mahimu nga may iban pa ikaw nga responsabilidad sa kongregasyon. Apang, sa pagpabilin sa ngalan ni Jehova, dapat ikaw mangin makugi nga ministro sa latagon. Nahiusa sa utudnon nga gugma kag sa malum-ok nga pagpalangga sa isa kag isa, kabay nga padayon kita nga magmainit sa espiritu samtang kita “nagapaulipon kay Jehova.” (Roma 12:10, 11) Walay sapayan kon bisan ano man nga mga pag-ipit ang aton naeks­periensiahan gikan kay Satanas kag sa iya kalibutan, dapat kita magpadayon subong isa ka hubon, huo, “nga sa tingob kag sa isa ka tingog” sa paghimaya kay Jehova paagi sa pagpahibalo sa katuyoan sang iya Ginharian.

19. (a) Paano naton madinalag-on nga maaway ang mga paghingabot kag ang iban nga mga problema? (b) Ano nga laygay ang ginahatag sa aton sang Sofonias 3:8, 9?

¹⁹ Madamu sa aton ang dapat makig-away sa mga paghingabot ukon magaatubang sa mga teritoryo nga wala nagahulag sa aton pagbantala. Apang, padayon naton nga ipakita ang isa sing hunahuna nga iya ni Cristo Jesus. (Juan 16:33; 1 Pedro 4:1, 2) Subong nahiusa nga hubon ipadayag naton ang matuod nga kaisog—ang nasulod espirituwal nga kusog nga nagabatas kag wala nagakapugday sa idalom sang mga pag-ipit. (Salmo 27:14; Filipos 1:14) Indi gid kita mag-uyaya sa pagpangita sa mga katulad-karnero. Padayon naton nga “hulaton” si Jehova kag ang iya adlaw sang paghusay, nagaalagad sa iya sing tingob samtang aton ginatawag ang iya ngalan kag ginahambal ang “putli nga pamulong” sang kamatuoran.—Sofonias 3:8, 9

20. (a) Paano kita makasapo sing matuod nga kalipay? (b) Ano ang talalupangdon nga katumanan sang Isaias 11:6-9?

²⁰ Sing nahiusa, kabay nga ang tanan nga nagahimaya sa Dios “magsuklob sang bag-ong personalidad nga gintuga suno sa kabubut-on sang Dios sa matuod nga pagkamatarong kag katutom.” (Efeso 4:24) Nagaresulta ini sa matuod nga kalipay. Ginailustrar ini sa Isaias 11:6-9, nga nagasugid tuhoy sa espirituwal nga paraiso nga nagaluntad karon sa tunga sang napasag-uli nga katawhan ni Jehova. Daw ano nga paghidait kag paghiusa! Wala na ang makagud, makahalalit nga mga batasan! Subong katapusan sining katulad-paraiso nga paglaragway, mabasa naton ining mga pulong: “Indi sila maghalit ukon maglaglag sa bug-os ko nga bukid nga balaan; kay ang duta matugob sang pagkilala kay Jehova subong nga ang mga tubig nagatabon sa dagat.” Ang “bukid nga balaan” sang nahiusa nga pagsimba kay Jehova gintukod sing malig-on karon sa bug-os nga duta. Ngaa? Bangod ginpahulag ni Jehova ang iya mga saksi nga himayaon ang iya ngalan “nga sa tingob kag sa isa ka tingog.” Busa “ang duta,” ang espirituwal nga kahimtangan sang Iya katawhan, napuno sang “pagkilala kay Jehova.”

21. Ngaa hatagan naton ang aton mga magasin sing pinakamasangkad sing posible nga pagpanagtag?

²¹ Kabay, nga sa kusog nga ginaaman ni Jehova, aton hatagan Ang Lalantawan kag ang iya kaupod nga magasin nga Magmata! sing pinakamasangkad sing posible nga pagpanagtag. Kag kabay nga himuon naton ini nga nagalaum nga ang tanan nga ukbong sang duta kag ang tanan nga panimalay sang pungsod, “magadumdom kag magaliso kay Jehova.”—Salmo 22:27; Bugna 15:4.

[Footnote]

Sa Pagrepaso Sining Artikulo—

◻ Paano nagpanghikot ang nahaunang siglo nga kongregasyon?

◻ Anong mga benepisyo ang magaresulta gikan sa dulongan nga Ang Lalantawan?

◻ Anong maayo nga panikasog sa pagmagasin ang ginhimu sang 1984?

◻ Paano kita magauswag sa espirituwal, bisan sa panahon sang pagtilaw?