Ang Kabuhi kag Ministeryo ni Jesus
Ang Bata nga Ginsaad
SA BAYLO nga magpauli sa Nasaret, sanday Jose kag Maria nagpabilin sa Betlehem. Kag sang si Jesus walo ka adlaw ang edad ginpasirkunsidar nila sia, subong sang ginasugo sang Kasugoan sang Dios kay Moises. Kinabatasan man nga hatagan ang bata nga lalaki sang iya ngalan sa ikawalo nga adlaw. Gani ginhingalanan nila ang ila bata nga si Jesus, subong sang ginsugo sa ila sang una ni anghel Gabriel.
Kapin sa isa ka bulan ang nagligad, kag si Jesus 40 ka adlaw na ang edad. Diin sia karon gindala sang iya mga ginikanan? Sa templo sa Jerusalem, nga pila lamang ka milya sa kon diin sila nagaistar. Suno sa Kasugoan sang Dios kay Moises, 40 ka adlaw pagkatapos mabun-ag ang isa ka bata nga lalaki, ang iloy kinahanglan nga magpresentar sing halad sa pagpaputli sa templo.
Amo sina ang ginhimu ni Maria. Apang nagdala sia sing duha ka magagmay nga pispis subong iya halad. Nagapakita ini sang kahimtangan sa pangabuhi nanday Jose kag Maria. Ang Kasugoan ni Moises nagapakita nga ang isa ka bakiya nga kanding, nga mas hamili sang sa mga pispis, dapat ihalad. Apang kon ang iloy indi makasarang sini, ang duha ka pispis ukon maya puede na.
Sa templo gin-uyatan sang isa ka tigulang si Jesus. Ang iya ngalan amo si Simeon. Ginbuyagyag sang Dios sa iya nga indi sia mapatay antes niya makita ang ginsaad nga Cristo, ukon Mesias ni Jehova. Sang magkadto sa templo si Simeon sini nga adlaw, gintuytoyan sia sang balaan nga espiritu sa bata nga ginakugos ni Jose kag ni Maria.
Samtang ginauyatan ni Simeon si Jesus nagpasalamat sia sa Dios, nga nagasiling: ‘Gintuman mo ang imo saad, kay nakita ko sa akon kaugalingon nga mga mata ang paagi sang kaluwasan nga imo ginhanda.’ Natingala sanday Jose kag Maria sang mabatian nila ini. Nian ginpakamaayo sila ni Simeon kag ginsilingan si Maria nga ang iya bata “ginkulan para sa pagkapukan kag sa pagbangon liwat sa madamu sa Israel” kag ang kasubo, kaangay sang matalom nga espada, magapilas sang iya kalag.
Yara man sadto nga okasyon amo ang 84-anyos ang edad nga manalagna nga nagahingalan kay Ana. Sa katunayan, wala gid sia magpalya sa templo. Sadto mismo nga takna nagpalapit sia kag nagsugod sa pagpasalamat sa Dios kag naghambal nahanungod kay Jesus sa tanan nga nagapamati.
Nagpahalipay gid ini nga mga hitabo sa templo kanday Jose kag Maria! Sa pagkamatuod, nagapalig-on lamang ini sa ila nga ang bata amo ang Ginsaad sang Dios. Lucas 2:21-38; Levitico 12:1-8.
◆ San-o ang kinabatasan nga paghatag sa lapsag nga Israelinhon nga lalaki sang iya ngalan?
◆ Ano ang ginakinahanglan sang isa ka Israelinhon nga iloy kon ang iya bata nga lalaki 40 ka adlaw na ang edad, kag paano ginapakita sang pagtuman sini nga kinahanglanon ang sitwasyon sa pangabuhi ni Maria?
◆ Sin-o ang nakakilala kay Jesus sa sini nga okasyon, kag paano?