‘Pagpalaba sang mga Banting’ sa Japan

“PALAPARA ang duog sang imo layanglayang. Kag ipahitad sa ila ang imo kumbong sa imo mga puluy-an. Dili pagpunggi. Palabaa ang imo mga banting, kag palig-ona ang imo mga palpal.”—Isaias 54:2.

Paagi sina nga pinamulong, gintudlo ni manalagna Isaias ang tion nga ang matuod nga pagsimba kay Jehova nga Dios madasig nga magauswag. Sa karon, sa lainlain nga mga pungsod sa bug-os nga kalibutan, nagasaksi kita sinang makatilingala nga teokratiko nga pag-uswag. Ayhan, labi ini nga makita sa Japan, diin kapin sa 96,000 ang nagasimba sa matuod nga Dios.

Pag-uswag sa mga Tinuig

Sang temprano sang ikaduha nga dag-on sini nga siglo nga ang maayong balita sang Ginharian sang Dios nakalab-ot primero sa Japan. Si ­Charles T. Rus­sell, ang nahauna nga presidente sang Watch Tower So­ci­ety, naghimu sing 700-milya (1,100-km) ka paglibot sa mga kapuloan sang Japan kag nakita ang kinahanglanon nga ibantala ang matuod nga Cristianismo. Sang 1926 gintangdo sa Japan ang isa ka Amerikano-Hapones subong ang nahauna nga misyonero sang Watch Tower So­ci­ety.

Sa sulod sang mga 20 ka tuig, madamu nga binhi sang kamatuoran ang ginsab-ug kag madamu nga mga tawo ang nakatuon nahanungod sa Ginharian ni Jehova. Madamu sa ila ang nakaagom sing grabe nga mga pagtilaw sang ila pagtuo sa mga kamut sang gobierno militar sadto nga panag-on sang 1933-45.a

Sang 1949 ang pagbantala nga hilikuton sa Japan may bag-o nga panugod. Ang nahanas sa Gilead nga mga misyonero nagsugod sa pag-abot. Sang Agosto, may yara pito ka misyonero nga nagapangabudlay sa Tokyo, kag, sa promedyo, siam ka tawo ang nagapakigbahin sa hilikuton nga pag-ebanghelyo kada bulan. Anum pa ka misyonero ang nag-abot sang Oktubre, ang lima sini sa ila nagsugod sa pagbantala sa Kobe. Paano pagabatunon ini nga pagbantala sa sining pungsod sang Budhista kag Shinto nga mga tumuluo, nga bag-o lang maulian gikan sa kakibang sang Inaway Kalibutanon II?

Sa wala pa ang napulo ka tuig, ang kadamuon sang mga manugbantala sang Ginharian nagdamu sing 1,000. Apang, ang ‘duog sang layanglayang dapat pa nga palaparon.’ Sang Nobiembre 1970 ang kadamuon sang mga Saksi nagmuad sing napulo ka pilo, kag tatlo ka tuig sang ulihi nakalab-ot na ini sa 20,000. Sang isa pa ka tatlo kag tunga ka tuig ina nga kadamuon nagdoble liwat—sa isa ka bag-o ka kataason nga 40,000 kag kapin pa ka manugbantala sang Ginharian! Apang, madamu pa ang katulad-karnero ang dapat pangitaon, kag si Jehova padayon nga nagabubo sang iya pagpakamaayo sa makugi nga pagpangabudlay sang iya katawhan sa Japan. Sa mga sulosobra pa sa anum ka tuig, sang Hunyo 1983, ang 40,000 nagdoble liwat sa 80,000, kag, sa sini nga report, ang kadamuon sang mga manugbantala sang Ginharian sa Japan nakalab-ot sa 97,305!

Yadtong Nagbantala sing Bug-os Tion

Sing maathag, si Jehova nga Dios amo ang Isa nga yara sa likod sang pag-uswag. Apang, ang makugi nga mga misyonero kag iban pa bug-os tion nga mga manugbantala nakatungod sing importante nga papel.

Sang 1952 ang grupo sang mga misyonero nagdamu sing mga 50, kag madamu pa bag-o tumandok nga mga Saksi ang nagsugod sa hilikuton nga pagpayunir. Ang halimbawa sang makugi nga mga misyonero nagpalig-on sa dugang kag dugang pa sang ila bag-o nabawtismohan nga mga kaupdanan nga maghugod sang ila kaugalingon sing bug-os tion sa pag-alagad kay Jehova. Karon, 37 ka tuig sa tapos magsulod sa pungsod ang nahauna nga mga misyonero, halos 40 porsiento sang tanan nga mga Saksi sa Japan ang bug-os tion (payunir) nga nagapangabudlay kada bulan, nga may 36,118 ang nagareport bisan sa malip-ot nga tunga-tunga sang tigtulognaw nga bulan sang Pebrero 1985. Madamu sang mga misyonero nga nakigbahin sa sining pag-uswag kutob sang ginsugoran ang nagaalagad gihapon didto, apang ang karon nga grupo sang 76 ka mga misyonero daw kaangay lamang sang isa ka diutay nga ‘tulo sa oseano’ sang linaksa-laksa ka lokal nga mga payunir.

Luyag mo bala nga makilala ang pila sa sining mga makugi? Kilalahon naton ang pila sa ila, nga nagarepresentar sa laragway sining mga payunir.

Una, kilalaha ang pila ka dumaan na. Si Iwako Kono amo ang amon pinakatigulang nga espesyal payunir. Sa edad nga 70 nakaagom sia sini nga pribilehiyo sang pag-alagad sing mga 28 ka tuig kag nakabulig sing halos 50 ka tawo nga magdedikar kag magpabawtismo. Nian yara si Sadakichi Shimada. Sa edad nga 87 ka tuig sia amo ang pinakatigulang nga regular payunir sa Japan. Si Toyoko Umemoto 26 ka tuig ang edad sang magsugod sia sa pag-espesyal payunir. Karon, nga may kapin na sa 29 ka tuig sang matutom nga pag-alagad, sia ang may pinakamalawig nga naalagdan sa tunga sang tumandok nga Hapones nga espesyal payunir.

Sa pihak nga bahin, madamung mga pamatan-on ang naggamit sang ila pagkapamatan-on nga alagaron si Jehova. Si Meri Aida 14 anyos ang edad anay sang mabaton niya ang iya asayn­ment nga mag-alagad subong regular payunir. Antes sina nakigbahin sia sa auxiliary payunir nga pag-alagad sa sulod sang 41 ka bulan kutob sang matugmawan sia sa edad nga 11. Ginhimu niya ini samtang nagaeskwela pa.

Si Akiko Goto pito ka tuig ang edad sang ang iya iloy nagsugod sa pagregular payunir, walay sapayan nga alatipanon pa ang duha ka lapsag. Ginsunod ni Akiko ang maayo nga halimbawa sang iya iloy kag nagregular payunir sang mag-18 sia, kag nian duha ka tuig sang ulihi nangin pinakabata sia nga espesyal payunir sa Japan. Si Hisako Wakui 21 anyos sang magsugod sia anay sa pag-espesyal payunir. Karon, pagkatapos sang 28 ka tuig, may pribilehiyo sia nga mabuligan ang dili magkubos 37 ka mga tawo nga mangin mga sumilimba ni Jehova.

Madamu ang naghalin sa dalagku nga mga siudad pakadto sa magagmay nga mga banwa kag mga minuro agod dal-on ang “maayong balita sang ginharian” sa tanan nga nagakabagay. Sing makawiwili, mga 60 porsiento sang tanan nga regular payunir ang mga ginang sa puluy-an, kag ang kalabanan sa ila wala sing tumuluo nga mga bana. Ining makatilingala nga espiritu sa pagpayunir nagpadasig sa pagtubo sang intereses sang Ginharian sa Japan.

Ang Hilingagawon nga Pagkinahanglan sang mga Duog Tiliponan

Ang Hapones nga mga Saksi nagaapresyar sing bug-os sang sugo sang Biblia nga indi ‘pagpatumbayaan ang pagtipon sang aton kaugalingon sing tingob, kag labi pa samtang ginatan-aw naton nga ang adlaw nagahilapit.’ (Hebreo 10:25) Sang nagligad, ang kalabanan nga mga kongregasyon nagahiwat sang ila mga miting sa magagmay nga mga hulot sa mga tiliponan sang pangabudlay ukon sa mga awditoryum sibiko. Madamu sini ang gin-arkilahan sing semanal. Sing masami ang mga utod nagaabot para sa ila mga miting agod sugiran lamang nga ang hulot indi matigayon. Nagakahulugan ini sing gilayon nga pagpangita sing iban pa nga lugar kag nian, sa wala pa ang isa ka oras, sa paghanda sini para sa miting!

Sing malipayon, ang kalabanan sina nagligad na. Ang kalabanan sang mga kongregasyon karon may ila kaugalingon na nga duog tiliponan. Ang iban nagaarkila sing tuigan samtang ang iban nagkay-o sang bakante nga mga tinukod ukon mga bodega. Apang ang presyo sang lote sa Japan tuman kataas—nga nagadalagan sing kutob sa $35 tubtob sa $50 (U.S.) kada kuadrado pie—amo kon ngaa pila lamang ka mga kongregasyon ang makasarang sa pagpanag-iya sing lote diin ginapatindogan sang ila mga King­dom Hall. Ang iban nga mga kautoran nga nagapanag-iya sing propiedad nagaguba sang ila mga balay kag nagapatindog liwat nga may isa ka King­dom Hall sa nahauna nga panalgan kag ang ila ilistaran sa ibabaw. Sa madamung dikinaandan nga mga kaso, ang mga tawo nga indi mga Saksi ni Jehova ukon indi gani interesado sa Cristianismo nagtanyag nga tukoran sing King­dom Hall ang ila propiedad kag ginapaarkilahan ini sa mga Saksi ni Jehova, nagapangabay pa gani sa mga Saksi nga maghatag sing mga plano para sa ila tiliponan. Nagresulta ini sa pila ka dikinaandan gid nga mga King­dom Hall.

Halimbawa, sa Yokohama, ang tag-iya sang isa ka lote nga palarkingan nagpasugot nga patindugan sing Kingdom Hall ang ibabaw sining lote nga palarkingan kag paarkilahan ini sa mga Saksi. Ang isa pa sa Tokyo yara sa ikaduha nga panalgan sang isa ka tinukod nga nahamtang sa ulot sang mga haligi sang ginpataas nga riles sang tren. Sa katapusan nga report, ang mga kautoran naanad na sa magahod nga mga tren sa ibabaw.

Samtang ang mga kongregasyon nagadugang, amo man ang sirkito nga mga asambleya. Samtang sang nagligad nga 20 ka tuig ang isa ka sirkito nga asambleya mahimu nga tambongan sang 300 tubtob 400 lamang, karon may yara na 1,500 tubtob 2,000, ukon kapin pa. Ang mga pasilidad para sa mga asambleya nga kasubong sini mabudlay pangitaon. Gani, sang 1975, ang isa ka nabangkarote nga bowlingan sa guwa sang Tokyo ginpaarendohan kag ginliwat agod mangin nahauna nga As­sem­bly Hall sa Japan, nga may kapasidad nga lingkoranan nga 1,200. Ang ikaduha, amo ang matahom ginpabakod nga konkreto nga tinukod, nagsunod sang 1982. Yari ini sa sentro (sa Kansai) nga duog sang Japan kag gintukod sing bug-os sang boluntaryo nga pagpangabudlay sang Saksi nga mga lalaki, mga babayi, kag mga kabataan. May lingkoranan ini nga 1,800. Ang ikatlo nga As­sem­bly Hall gintukod sang boluntaryo nga mga manugpangabudlay sa propiedad sang sanga talatapan sang Watch Tower So­ci­ety sa Ebina. May lingkoranan ini nga 3,000.

Ang katapusan nga tion nga ang tanan nga mga manugbantala sang Japan nagtipon sing tingob para sa isa ka asambleya amo yadto anay sa internasyonal nga kombension sa Ōsaka sang 1973, nga may nagtambong nga 31,263. Kutob sadto, bangod sang kakulang sing nagakaigo nga mga pasilidad, ang mas magagmay nga mga kombension napamatod-an nga mas praktikal, kag ang panaksi sa Ginharian sarang mahatag sa dugang nga mga duog. Duha ka pulo kag apat ka subong sina nga mga kombension ang ginhiwat sang 1984, nga may 179,439 ang nagtambong kag 3,236 ang ginbawtismohan.

Pagpasangkad sa Sanga

Agod pakigbagayan ang madasig nga pagdugang sa latagon, ang sanga talatapan sang Sosiedad ginpauswag sing daku sing tinuig na. Kutob sang 1949 tubtob 1962 ang opisina nahamtang anay sa duha ka panalgan estilo Hapones nga balay sa Minato Ward, Tokyo. Gintal-usan ini sang ulihi sang isa ka pito sing panalgan nga tinuig nga nagpangalagad subong ulong-talatapan tubtob 1972. Sadto anay nakita sang Sosiedad nga magpanag-iya sang iya kaugalingon nga imprintahan. Gani gintukod ang isa ka bag-o nga pabrika kag puluy-an Beth­el sa isa ka akre (0.4 ha) sang duta sa Numazu City, 75 ka milya (120 km) bagatnan-nakatundan sang Tokyo.

Apang, sa sulod sang lima ka tuig, ang mga pasilidad sa Numazu tuman na ka diutay. Sa amo, ang 18 ka akre (7 ha) ginbakal sa Ebina, kag gintukod ang isa ka matahom nga pabrika kag isa ka puluy-an Beth­el, nga tatlo ka pilo ang kadakuon sa mga pasilidad sa Numazu. Ini nga tinukod, nga gintukod sang mga Saksi lamang, gindedikahan sang Mayo 15, 1982.

Ang pagprodukto sang magasin ginsugdan paagi sa isa ka bag-o nga ro­ta­ry off­set print­ing ­press samtang ang konstruksion ginahimu pa. Sang matapos ang konstruksion, ang isa pa ka apat sing duag nga ro­ta­ry off­set ­press gindugang. Ang mga kautoran labi na nga nalangkag sang ang linaksa-laksa ka kopya sang Hapones nga New World Translation of the Holy Scrip­tures gin-imprinta sa prensa sang Sosiedad sang 1982. Agod makigdungan sa nagadugang nga pangabay para sa mga magasin kag sa iban pa nga mga literatura, ginbutang ang lima sing yunit nga ro­ta­ry off­set ­press sang Enero 1984. Makapatubas ini sing isa ka libo ka magasin sa isa ka minuto kag makaimprinta sing Ang Lalantawan kag Magmata! sing dungan.

Agod mahimu ining tanan nga pag-imprinta kag pagpadala kag pag-atipan sa mga kinahanglanon sang mga manugpangabudlay, ang panimalay Beth­el nagdamu sing tubtob 345 ka katapo. Dugang pa, 165 ang nagapangabudlay sa bag-o nga proyekto sa pagtukod. Sing makawiwili, may yara ka 19 ka paris ka undanon nga mag-ulutod sa sining panimalay.

Bisan pa nga tatlo lamang ka tuig ang nagligad nga ang mga pasilidad sa Ebina gindedikahan, ginahimu na karon ang pagtukod sang dugang pa nga kasugpon. Ginatukod sa amo man nga propiedad ang isa ka bag-o walo sing panalgan nga puluy-an Beth­el, nga magapaistar sa 250 ka tawo, kag dugang pa nga isa ka anum ka panalgan nga pabrika. Sa pagkamatuod, ang “mga banting” ginpalapad nga labaw sa tanan nga ginasigahom.

Palaabuton nga mga Paglaum

Sa sini nga duta sang Budhista kag Shinto nga pagtuluohan, madamu pa nga mga tawo ang nagapangita sing pila ka butang nga matuohan nila. Kon pila pa ang magakari sa “layanglayang” ni Jehova wala pa mahibaloi. Ang nagapakita sing dugang pa nga pag-uswag amo ang kamatuoran nga 224,696 ka tawo ang nagtipon sing tingob sang Abril 15, 1984 agod saulogon ang kamatayon ni Jesus. Kag ang nahiusa nga kusog ginahimu agod buligan ang mga interesado. Kada bulan, mga 142,000 ka pagtuon sang Biblia sa balay ang ginahiwat.

Sang mag-abot ang nahauna nga mga misyonero sang 1949, sin-o ang nakahunahuna nga pagkatapos sang 37 ka tuig may kapin na sa 97,000 ka aktibo nga mga dumalayaw kay Jehova sa sini nga pungsod? Apang, ginpahanabo ini ni Jehova. Matuod sa iya saad, iya ‘ginpahitad ang kumbong’ kag ‘ginpalapad ang banting’ para sa iya katawhan. Ang iya mga Saksi padayon nga magapangabudlay sing lakas kag magahulat sa iya nga pahanabuon ang tig-alani antes ang katapusan sining sistema sang mga butang.

[Footnote]

[Graph sa pahina 23]

(Para sa kabug-usan sang teksto, tan-awa ang publikasyon)

Ang pagdugang sang mga manugbantala sang Ginharian sa Japan sang nagligad nga 37 ka tuig

(Feb.)

1949 9

1958 1,000

1970 10,000

1973 20,000

1976 40,000

1983 80,000

1985 97,305

[Laragway sa pahina 24]

Si Toyoko Umemoto amo ang may pinakamalawig nga rekord sang pag-espesyal payunir

[Laragway sa pahina 25]

Si Sadakichi Shimada amo ang pinakatigulang nga regular payunir sa Japan