Report sang mga Manugbantala sang Ginharian

“Indi Sila Magadaug sa Imo”

SA ISA ka pungsod sa Sentral Amerika, pilit nga ginkuha sang 15 ka naarmasan nga lalaki ang duha ka Saksi ni Jehova gikan sa ila balay kag gindala sila sa isa ka grupo sang 75 ka lalaki nga naarmasan sing mga batuta kag mga sundang. Ginbuyayaw nila ang mga Saksi kag gintugyan sila sa isa pa ka grupo sang mga 350 ka naarmasan man nga lalaki. Ginpaabot nila nga ang duha ka utod nga lalaki mahadlok kag magkompromiso sang ila Cristianong pagkawala sing nadampigan paagi sa pagbuylog sa ila patrolya. (Isaias 2:4) Apang malig-on nga nagtindog ang mga Saksi kag nagdumili sa pagbuylog sa militar nga palakat. Gani ginbilanggo sila, samtang ang mga katapo sang madamo nga iglesia nagkompromiso kag nagtaklad sa mga pukatod upod sa patrolya.

Sang masunod nga adlaw ang mga utod nga lalaki gindala sa daku nga banwa agod usisaon. Samtang nagalakat sila, ang mga guardia nagsiling sa ila nga ang ila hunahuna naluto lamang sang isa ka pagtuluohan. Ang mga utod nga lalaki nagsabat: “Matuod gid nga naluto ang amon panghunana! Karon wala na kami nagahalit sa bisan kay sin-o; indi kami kawatan, palahubog kag makilahion.” Ang opisyal nga nag-imbestigar sa ila, nagpakita sing kaayo kag nanginbulahan sa ila, nga nagasiling, “Kon ang tanan kasubong ninyo, ang mga butang mangin tuhay . . . kag kabay nga amligan kamo sang inyo Dios nga si Jehova.” Dayon ginbuhian sila.

Ngaa ginahingabot ang wala nagapanghalit kag mahidaiton nga mga Cristiano nga nagasakdag sang mga talaksan sang Dios sang pagkamatarong? Bangod sila “indi bahin sang kalibutan” kag sang politikal nga mga hilikuton. (Juan 17:16) Daw ano ka makapaumpaw nga mahibal-an nga bisan pa si Satanas kag ang iya kalibutan magapakig-away batok sa mga alagad ni Jehova, indi sila magadaug! (Jeremias 1:19) Napamatod-an ini sa sini nga pungsod, kag ang opisyal nga yara sa palangakoan ginadayaw gid bangod sang iya paghangop sa wala sing nadampigan nga tindog sang mga Saksi ni Jehova.

◻ Ang mga pulong ni Jeremias napamatod-an man nga matuod sa eksperiensia gikan sa isa ka pungsod sang Aprika nga sa diin ang hilikuton sang mga Saksi ni Jehova ginadumilian. Sa tapos malaragway ang mga kabudlayan nga gin-antos sang mga kauturan sa pagtinguha nga buligan ang mga tawo sa pagtuon sing dugang pa nahanungod sa dalayawon nga mga katuyoan ni Jehova, ang report nagasiling: “Bangod sang wala nadampigan nga tindog sang katawhan ni Jehova, madamo sang aton kauturan ang nabilanggo, sa masami sing paagisod. Sila mabaskog nga ginsakit, ginlatigo kag gin-ipit sa tanan nga paagi agod supakon ang ila Cristianong konsiensia. Sa isa ka kaso, sa tapos ang mapintas nga pagbakol napaslawan sa pagbungkag sang integridad sang isa ka utod, ang mga soldado naghimbon nga patyon sia. Sang mahibaloan sang superyor nga opisyal ang ila plano, sia personal nga naghilabot kag tago nga ginsaylo niya ang utod sa lain nga siudad, sa amo naluwas ang iya kabuhi.”

Ining paghingabot wala makapugong sa mga Saksi ni Jehova sa pagbantala sing maayong balita nga ginsugo sang Dios. (Mateo 24:14) Ginapabaskog sila ni Jehova paagi sa iya espiritu kag ginapakamaayo ang ila matutom nga tindog. Ang report gikan sa sini nga pungsod nagasiling man: “Walay sapayan sang sobra nga kabudlayan sa pisikal, gutom, balatian, mabangis nga inaway sibil, kag paghingabot, nag-uswag sing 17 porsiento ang promedyo nga kadamuon sang mga manugbantala.” Ang nagtambong sa Memorial nag-uswag sing 21 porsiento, kag 21 porsiento sang tanan nga manugbantala ang nagpayunir sang Abril 1984.

Gani ang aton kauturan malipayon bisan pa ginahingabot sila. Nagasalig sila kay Jehova kag ginapahanumdom sang mga pulong ni Jeremias: “Sila pat-od nga magapakig-away sa imo, apang indi sila magadaug sa imo, kay ‘ako nagaupod sa imo,’ siling ni Jehova, ‘sa pagluwas sa imo.’”—Jeremias 1:19.

[Laragway sa pahina 27]

Ginasakdag ni Jehova ang iya ginahingabot nga mga Saksi