Pagtukod Para sa Isa ka Dayon nga Palaabuton
“Ang tagsa ka balay may manunukod, kag ang Manunukod sang tanan nga butang amo ang Dios.”—HEBREO 3:4, Weymouth.
1, 2. (a) Sin-o ang nagdesinyo sang arka, kag daw ano ka detalyado ang mga instruksion nga ginhatag? (b) Ngaa importante nga magtuman kita, subong sang ginhimo ni Noe?
MGA 4,400 ka tuig na kutob sang ginsugo ni Jehova si Noe nga magtukod sing arka para sa kaluwasan sang kabuhi. Apang wala pagpabay-i sang Dios si Noe sa pagtukod sing bisan ano lang nga sahi sang tinukod nga makalutaw lamang. Sa baylo, naghatag sia sing espesipiko nga mga instruksion tuhoy sa mga materyalis, plano, kalabaon, kasangkaron, kataason, bentilasyon, kag sang hingapusan nga tikang sa sulod kag sa guwa. “Kag ginhimo ini ni Noe suno sa tanan nga ginsugo sang Dios sa iya. Amo ang ginhimo niya.”—Genesis 6:13-16, 22.
2 Daw ano ka maayong halimbawa para sa modernong-adlaw nga mga saksi ni Jehova! Kaangay ni Noe, gintugyanan kita sing isa ka nagaluwas kabuhi nga hilikuton apang sa sini nga tion pagluwas ini sa ‘minilyon nga nagakabuhi karon nga mahimo indi na mapatay.’ Daw ano ka importante nga magmatinumanon kita, subong ni Noe! Daw ano ka hilingagawon nga sundon naton ang sulundan sang Isa nga daku pa kay Noe, si Jesucristo, sa pag-alagad subong ‘mga manugbantala sang pagkamatarong’!—2 Pedro 2:5.
Isa ka Espirituwal nga Hilikuton sa Pagtukod
3. (a) Ano ang mangin resulta sang pagtukod pasad sa mga pulong ni Jesus? (b) Ngaa makatukod sing pagtuo ang pagbantala ni Jesus?
3 Sa karon 1,956 ka tuig na ang nagligad kutob sang ginkibot ni Jesus ang mga tawo sa ilaya sang Galilea sang iya ginsiling: “Hinulsol kamo, kay ang ginharian sang mga langit malapit na.” Ginpaangay niya ang bisan sin-o nga nagtuman sang iya mga pulong kag nagtukod sa sini sa “isa ka mainandamon nga tawo, nga nagtukod sang iya balay sa ibabaw sang igang.” Ang pagtuo sina nga tawo malig-on, indi mationg, indi matay-og. Indi ini matiphag sa idalom sang pag-ipit. Ang pagbantala ni Jesus nagtukod sing pagtuo. Nalab-ot sini ang mga tagipusuon sang mga tawo, bangod tuhay ini gikan sa daw nagapakabalaan nga mga panghambal sang Judiyo nga mga lider sang relihion. Ang kinaandan nga mga tawo natingala sa paagi sang pagpanudlo ni Jesus. Bisan ang mga soldado nga ginpadala sa pagdakop sa iya nagbalik nga indi sia dala, nga nagasiling: “Wala pa gid sing tawo nga nagpamulong subong sining tawo.”—Mateo 4:17; 7:24, 25, 28; Juan 7:46.
4. (a) Paano si Jesus nagtukod para sa palaabuton? (b) Anong daku nga pagtukod ang natabo sang Pentecostes sang 33 C.E.?
4 Si Jesus nagtukod para sa palaabuton. Nagtipon sia sing kaupod nga mga manugpangabudlay, subong ni Pedro, nga ginatawag man Cefas, nga buot silingon “isa ka bato.” Sa sini nga disipulo, si Jesus nagsiling: “Ikaw si Pedro, kag sa ibabaw sining igang tukuron ko ang akon kongregasyon.” Sang ulihi si Pedro nangin isa sang madamo nga “mga bato nga buhi” nga gintukod kay Jesus, ang “bato nga pamag-ang” sang kongregasyon. Yadto nga kongregasyon gintukod sang Pentecostes sang 33 C.E. sang ang ginbanhaw nga si Jesus, sa tuo sang Dios sa langit, nagbubo sing balaan nga espiritu sa nagahulat nga mga disipulo.—Mateo 16:18; 1 Pedro 2:4-6; Binuhatan 2:2-4, 32, 33.
5. Anong modernong-adlaw nga mga hitabo ang nagadalahig sing daku sa Cristianong kongregasyon?
5 Sa karon, ang Cristianong kongregasyon nadalahig sing daku sa pagtuman sang mga katuyoan ni Jehova. Tion ini sang “apokalipsis,” ukon “kapahayagan,” tion nga ang “mga butang nga dapat mahanabo sa madali” ginapahayag sa “mga ulipon” sang Dios sa duta. (Bugna 1:1-3, Ref. Bi., footnote) Tion ini nga ining mga ulipon dapat ‘magbantala sing maayong balita sang ginharian sang Dios sa bug-os nga duta subong panaksi,’ antes niya hukman ang malauton nga sistema ni Satanas. Tion ini para sa Hari, si Jesucristo, nga karon nagalingkod na sa trono sa mga langit, nga painon ang mahagop, katulad karnero nga mga tawo gikan sa batinggilan, kandingkandingon nga mga tawo nga nagapamatok sa Ginharian, kag tipunon ining “mga karnero” sa iya kongregasyon sang espirituwal nga “mga kauturan” sa indi pa magbunal ang “dakung kapipit-an.”—Mateo 24:14, 21; 25:31-40.
6. Ano karon ang “arka,” kag paano kita maluwas?
6 Ano ang modernong-adlaw nga arka sang kaluwasan? Amo ini ang espirituwal nga kahimtangan nga sa diin nasapwan sang mga Saksi ni Jehova ang ila kaugalingon kutob sang 1919, isa ka espirituwal nga paraiso. Subong sang mga katapo sang pamilya ni Noe anay, ang nagkalabilin sang hinaplas nga mga Cristiano kag ang ila mga kaupod dapat magpabilin sa sulod sini, nagapanghikot sing matinumanon, sing bug-os tagipusuon, sa pagtapos sang dakung espirituwal nga proyekto nga gintuyo ni Jehova. Ining proyekto amo ang “pagtipon liwat sang tanan nga butang kay Cristo, ang mga butang sa langit [kutob sang 33 C.E. sa manugpalangit nga mga hinaplas] kag ang mga butang sa duta [kutob labi na sang 1935 sa internasyonal nga “dakung kadam-an” nga gintuyo para sa kabuhi nga walay katapusan sa duta].”—Efeso 1:10; Bugna 7:9, 14.
‘Pagpatindog kag Pagtanum’
7. Anong duha sing bahin nga hilikuton ang ginahimo karon, kag paano kita makapakigbahin nga may kalipay subong nanday Noe kag Jeremias?
7 Ginsugo ni Jehova ang nagkalabilin sang hinaplas nga mga Cristiano sa duta, subong sang ginsugo niya anay kay manalagna Jeremias, nga “mangin sa ibabaw sang mga pungsod kag sa ibabaw sang mga ginharian, sa paggabot kag sa pagguba kag sa paglaglag kag sa pagwagwag, sa pagpatindog kag sa pagtanum.” Gani ang duha sing bahin nga hilikuton ginahimo karon, (1) pagbantala sang paghukom ni Jehova batok sa malauton nga sistema sang kalibutan ni Satanas, kag (2) pagpatindog kag pagtukod sing isa ka katilingban sang katawhan sang Dios para sa kaluwasan. (Jeremias 1:10; 24:6, 7; Isaias 26:20, 21) Daw ano ka malipayon ang nagkalabilin sang mga hinaplas kag ang nagadamo nga panong sang ila mga kaupod samtang nagapakigbahin sila sa sining hilikuton karon! Amo ini nga sahi sang kalipay ang pat-od nga naeksperiensiahan sang mapisan nga si Noe kag sang iya pamilya sang ila adlaw.
8. (a) Ano nga pag-uswag sa mga manugbantala sa sulod sang nagligad nga 22 ka tuig ang talalupangdon? (b) Nagapatuhoy sa pahina 20-3, ano ang pila ka pungsod nga may talalupangdon nga pag-uswag sang 1985?
8 Makalampuwas ayhan ang minilyon sa adlaw sang kaakig ni Jehova? May maayo nga paglaum sa sina, subong ginapakita sang 1985 Tuigan nga Report sa Pag-alagad sang mga Saksi ni Jehova. Ang mga detalye sining report makita sa pahina 20-3. Makakulunyag gid talupangdon ang dalayawon nga pagdugang sa kadamuon sang mga nagapangabudlay sa latagon. Nag-uswag na ini karon sa kabug-osan nga 3,024,131 ka manugbantala sang Ginharian. Ang 1,000,000 nga marka una nga nalab-ot sang 1963, ang 2,000,000 sang 1974, kag karon kapin sa 3,000,000 sang 1985. Sa sulod sadtong 22 ka tuig, 200 porsiento ang pag-uswag. Pasalamatan gid naton si Jehova nga, paagi sa iya espiritu, nagapauswag sang mga butang!—Zacarias 4:6; 1 Corinto 3:6.
9. (a) Ngaa labi pa ka talalupangdon ang pag-uswag sang mga payunir? (b) Ano ang ginarekomendar sa tanan nga makasarang sini, kag ngaa?
9 Ang labi pa nga talalupangdon sa sulod sadtong tinuig amo ang pagdugang sang bug-os-tion nga mga manugbantala sang Ginharian. Walay sapayan sang nagalain nga mga kahimtangan sa ekonomiya sa bug-os nga kalibutan, ang kadamuon sining maisog nga grupo sang “mga payunir” nagtimbuok gikan sa binulan nga promedyo nga 38,573 sang 1963 tubtob sa 322,821 sang 1985—737-porsiento nga pag-uswag! Ano ang ginapakita sini! Ginapakita sini nga ang dalayawon nga espiritu sang pagsakripisyo sang kaugalingon nagaluntad sa katawhan sang Dios, nahisanto sa mga pulong ni Jesus sa Lucas 9:23. Sa masami, kinahanglan ang mahalungon nga pagplano kag pagdingot sa kaugalingon agod magmadinalag-on sa pagpayunir. Apang daku ang mga padya.—Roma 12:1, 2; Malaquias 3:10.
10. (a) Dapat dayawon ang mga manugbantala sang mga kongregasyon bangod sang ano? (b) Anong tatlo ka bag-ong kataason sa hilikuton ang matalupangdan diri, kag ano ang ginapakita sini nila?
10 Ang minilyon ka manugbantala sang kongregasyon dapat magpakig-away batok sa mga pag-ipit sa ila ni Satanas kag sang iya kalibutan. Apang sila man, nagahalad sa Dios sang ila “halad sang pagdayaw.” (Hebreo 13:15; Roma 10:9, 10) Ina nga mga oras, madamo man ukon diutay, nga ginareport ninyo matutom nga mga manugbantala kada bulan nangin bahin sang bag-ong kataason nga 590,540,205 ka oras sa pag-alagad sa latagon para sa 1985. Isa ini ka 16.8-porsiento nga pag-uswag sang sa 1984! Ang bag-ong mga kataason nga 224,725,918 ka pagduaw liwat kag 2,379,146 ka pagtuon sa Biblia sa mga puluy-an upod sa interesado nga mga tawo nagapakita nga ang mga manugbantala sang Ginharian bisan diin nagatinguha nga mangin maayong mga manunudlo subong man makugi nga mga manugbantala.—Mateo 28:19, 20.
Pagtukod Para sa Matuod nga Paghidait kag Kalig-onan
11. Paano ang matuod nga paglaum para sa paghidait kag kalig-onan ginapasalig, kag tubtob sa anong kasangkaron?
11 Sang talipuspusan sang 1985, ginproklamar sang Nasyones Unidas ang 1986 subong Internasyonal nga Tuig sang Paghidait. Sang nagligad nga mga tion, masami nga ginahambal sang NU ang paghidait kag kalig-onan. Apang ang labi ka importante nga proklamasyon, nga amo ang Makasulatanhon nga paglaum para sa paghidait kag kalig-onan, nakatigayon sing daku nga kusog sang 1985 sang ang mga Saksi ni Jehova nagpahamtang sa latagon sang kalibutan sing 38,805,561 ka Biblia, libro, kag mga polyeto, subong man sing 300,545,609 ka magasin, kag nakapakuha sing 1,719,930 ka suskripsion sa Ang Lalantawan kag Magmata! Paagi sa naimprinta nga pahina kag paagi sa pulong sang baba, nahatagan sing labing daku nga panaksi ang natukod nga Ginharian sang matuod nga “Prinsipe sang Paghidait.” Sa pagkamatuod, “nahanungod sa pagdugang sang iya pangulohan kag sang paghidait wala sing katapusan.”—Isaias 9:6, 7, King James Version.
12. Ang pagsangkad nagresulta sa anong daku nga kinahanglanon, kag paano ang katawhan ni Jehova nahiusa sa pagtinguha nga malab-ot ina nga kinahanglanon?
12 Ang daku nga pag-uswag sa latagon nagkinahanglan sing pag-uswag sa nagasakdag nga organisasyon. Sang 1985 ang kadamuon sang kongregasyon sang mga Saksi ni Jehova sa bug-os nga kalibutan nagdugang halin sa 47,869 tubtob sa 49,716. Nagkinahanglan ini sing ginatos ka bag-ong tiliponan. Daw ano katahom nga, sa madamo nga pungsod, ginpakamaayo ang panikasog sang mga Saksi sa pagpatindog sing mga Kingdom Hall! Sa mga duog diin kinahanglanon ini, ang mga indibiduwal kag mga kongregasyon dimakagud nga nagbuligay sa pagpatindog, agod nga may “pag-alalangay” sa tunga sang bug-os kalibutan nga pag-ululutod.—2 Corinto 8:14, 15.
13. Paano ang mga indibiduwal makaamot sa mga proyekto nga pagpatindog sing Kingdom Hall?
13 Sa mga pungsod nga sa diin maayo ang mga kahimtangan, ang mga sanga talatapan sang Watch Tower Society nagsakdag man sa Kingdom Hall nga mga proyekto. Sa Estados Unidos kag sa Canada, madamo nga indibiduwal ang nagaamot sa isa ka pinasahi nga Kingdom Hall Fund, nga nagpaposible sang pagpahulam para sa pagtukod sing dugang pa nga mga Kingdom Hall. Ang iban nag-amot sang ila kusog kag kalantip, amo kon ngaa ang madasig napatindog nga mga Kingdom Hall natapos sa sulod lamang sang talipuspusan sang semana. Paagi sa pagpangabudlay sa sina nga mga proyekto sing “bug-os-tagipusuon subong nga kay Jehova,” mahimo sang iya mga Saksi ang ginakabig nga imposible sang kalibutanon nga mga tawo.—Colosas 3:23.
14. Paano naatubang ang mga kinahanglanon sa pagpatindog sing Assembly Hall?
14 Sa pila ka pungsod, nangin daku nga problema ang kakulang sing mga pasilidad nga nagakaigo para sa makaduha sa tuig nga sirkito nga mga asambleya sang mga Saksi ni Jehova. Sa liwat, malipayon nga gin-atubang sang mga Saksi ang hangkat paagi sa mga programa sa pagpatindog, sa pareho nga espiritu nga ginpakita sang mga alagad sang Dios sang dumaan nga mga tion. Halimbawa, sang nangin kinahanglanon nga mangita sing materyales para sa pagtukod sing tabernakulo, ang katilingban sang Israel may paghiusa nga nagsunod sa sugo sang Dios: “Kuha kamo sa inyo sing dulot para kay Jehova. Padalha ang bisan sin-o nga may maalwan nga tagipusuon, padalha sia sing dulot kay Jehova.” Yadto nga katilingban naghatag sing kapin sa kinahanglanon, kag ang hilikuton madali nga natapos.—Exodo 35:5-19; 36:7.
15. (a) Ano nga mga pagpasangkad ang nagakatabo sa mga sanga sang Watch Tower? (b) Paano nahimo ang hilikuton?
15 Samtang nagadugang ang pagkinahanglan sing mga Biblia kag napasad sa Biblia nga mga publikasyon, madamo sang 94 ka sanga sang Watch Tower sa bug-os nga kalibutan ang nagpasangkad sang ila mga pasilidad. Ang imprintahan sa Brooklyn kag sa Watchtower Farms amo pa sa gihapon ang pinakadaku, apang ang 36 ka mga sanga sang Sosiedad amo na karon ang nagaimprinta sang ila kaugalingon nga mga magasin, kag 6 ka sanga ang nasangkapan na man sa pag-imprinta kag pagbugkos sing mga libro. Sa sini, ang Alemanya, Italya, kag nagaimprinta sing mga Biblia. Ang bag-o nga pabrika sa Selters, Alemanya, nagapanikasog sa paghimo man sini. Sa Ebina, , may ginapatindog nga anum-ka-panalgan nga pabrika kag walo-ka-panalgan nga puluy-an Bethel agod puy-an sang 280 pa ka manugpangabudlay. Subong nga ginsakdag sang katawhan ni Jehova anay ang pagpatindog sing templo ni Solomon “sa bug-os nga tagipusuon,” sa karon man ang katawhan sang Dios sa nanuhaytuhay nga pungsod ‘kinabubut-on nga nagahalad kay Jehova,’ kag ginadugang niya ang iya pagpakamaayo amo kon ngaa ang hilikuton nagakatapos.—1 Cronica 22:14, 15; 29:7, 9, tan-awa ang Ref. Bi., footnotes.
16. Ngaa kinahanglanon ining dugang nga mga tinukod kag pag-organisar?
16 Kinahanglanon gid bala ining tanan nga pagpatindog kag pag-organisar? Huo, kon “ang matutom kag mainandamon nga ulipon” magpadayon sa pag-aman sing espirituwal nga “kalan-on sa nagakaigo nga tion.” Ina nga kalan-on kinahanglanon gid para sa pagtubo sang “panimalay sang Dios” kag para sa pagbantala sa bug-os nga globo sa kapin sa 200 ka hambal. (Mateo 24:45; Efeso 2:19; 4:15, 16) Ang katawhan ni Jehova nag-amot sang ila kalantip sa paghimo sing multilanguage electronic phototypesetting system (MEPS), nga karon ginpadala na sa 26 ka sanga sang Watch Tower. Bangod sini nahimo ang nahiusa nga offset printing sa bug-os nga globo kag nakabulig sa pagbantala sang mensahe sang Ginharian sing dungan sa madamo nga bahin sang duta.—Ipaanggid ang Isaias 52:7-9.
17. Ano ang kinahanglanon karon sa ulong-talatapan sa Brooklyn, kag paano ini ginaatubang?
17 Daw wala sing katapusan ang modernong adlaw nga pagpasangkad sang organisasyon ni Jehova. Bisan sa karon, ang panimalay Bethel sa Brooklyn, Nueva York, nga ulong-talatapan sang Sosiedad nagdugang tubtob sa kasangkaron nga ang tanan nga dalayonan puno na. Kon kabubut-on ni Jehova, ang mataas nga tinukod para sa isa ka libo ka dugang pa nga manugpangabudlay sa Bethel mahimo nga ipatindog sa lote sang Sosiedad sa Columbia Heights. Apang kon indi ini matuman, magahulat kita sa dugang nga pagtuytoy ni Jehova sa sini. Ang mga pangamuyo kag matutom nga pagsakdag sang bug-os kalibutan nga pag-ululutod may kaangtanan sa sining tanan nga pagpasangkad ginaapresyar.—Ipaanggid ang Binuhatan 21:14; 2 Tesalonica 3:1.
18. Ngaa kadamo gid karon sing mga proyekto sa pagpatindog, walay sapayan nga malapit na ang Armagedon?
18 ‘Apang ngaa,’ mahimo ipamangkot sang isa, ‘nga kadamo gid sing proyekto sa pagpasangkad samtang malapit na ang Armagedon?’ Ang sabat amo nga ang organisasyon ni Jehova indi magsira bangod malapit na ang Armagedon. Ina nga pagsira para lamang sa organisasyon ni Satanas. Ang organisasyon ni Jehova nagatukod para sa dayon nga palaabuton. Malaglag man ukon indi ang hinimo sang tawo nga mga tinukod sa Armagedon, nahibaloan naton nga ang organisasyon sang Dios magapadayon gihapon sa pagpanghikot kag gamiton ini ni Jehova kag sang matutom nga nagasakdag sa sini, nagatukod sing dayon nga paghidait kag kalig-onan sa mahimayaon nga dutan-on nga Paraiso nga ginsaad sang Dios.—Bugna 7:9, 14-17; 21:1, 4, 5.
Pagtukod nga May Katuyoan
19. Ano nga hangkat ang makita sa report sang Memorial sang 1985?
19 Si Noe nagtukod nga may katuyoan, kag amo man kita. Ang isa ka bahin sang 1985 Tuigan nga Report sang Pag-alagad nagahatag sing daku nga mabinagbinag. Amo ina ang dalayawon nga kadamuon sang nagtambong sa Memorial sang kamatayon ni Jesus sang Abril 4, 1985, nga 7,792,109—isa ka pagdugang sing 375,135 sang sa kabug-osan sang 1984. Makatilingala gid sa pagkamatuod! Apang may hangkat ina nga kadamuon. Upod sa kataason nga 3,024,131 ka manugbantala nga nagapakigbahin sa pag-alagad sa Ginharian, mga 4,000,000 pa ang nagapakig-upod sa aton, sa dimagkubos sa pila ka kasangkaron, nga dapat pa magtukod para sa palaabuton paagi sa pagpakigbahin sa Cristianong ministeryo. Paano naton sila mabuligan?
20. Ano ang hilingagawon nga kinahanglanon agod maatubang ang hangkat, kag paano naton mahimo ini sa isa ka praktikal nga paagi?
20 Ang kalabanan sining interesado nga mga tawo kilala naton sing personal. Mahimo nga sila mga katapo sang pamilya, mga tawo nga aton ginahiwatan sing pagtuon sa Biblia, mga suskritor sa aton mga magasin, ukon iban pa. Ang iban mahimo nga nangin interesado sang nagligad lamang nga Memorial. Makahimo bala kita sing pinasahi nga mga panikasog agod buligan ini sila, ginapalig-on sila paagi sa pagtuon sa Biblia, agod nga sila man makasapo sing dalangpan sa kahimusan ni Jehova “tubtob magligad ang mga kalalat-an”? (Salmo 57:1) Ang “dakung kapipit-an” mangin isa ka buhat sang pagbindikar ni Jehova, nga kapin ang kahulugan kag amo ang katapusan, sang sa Anaw sang adlaw ni Noe. Luyag naton tukuron ining mga interesado paagi sa nagahatag-kabuhi nga mga kamatuoran, agod nga sila “magapanawag sa ngalan ni Jehova” kag indi malaglag. (Mateo 24:21, 22, 39; Sofonias 2:3; 3:8, 9) Ton-an naton ang Biblia upod sa ila, nga ginagamit ang tolon-an nga You Can Live Forever in Paradise on Earth ukon ang iban pa sang makatukod sing pagtuo nga literatura sa Biblia.’
21. Paano kita makatukod sing pagtuo kaangay ni Noe sa aton kaugalingon kag sa iban?
21 Si Jehova nga Dios amo ang Batid nga Manunukod kag Daku nga Manug-aman para sa katawhan. (Salmo 127:1; 145:16; Manugwali 3:10-13) Sia ang nagtuytoy sadto kay Noe tuhoy sa desinyo kag pagtukod sing arka. Paagi sa kinabubut-on nga pagkooperar sang Daku pa nga Noe, si Jesucristo, ginhimus niya nga tubuson ang matinumanon nga mga tawo gikan sa sala kag kamatayon. Paagi sa sining Anak nagtukod man sia sing modernong-adlaw nga “arka,” ang nagauswag nga espirituwal nga paraiso nga sa diin ang mga lalaki kag mga babayi sang pagtuo mahimo maluwas, nga may paglaum sa kabuhi nga walay katapusan. (Mateo 20:26-28; Juan 3:16; 17:3) Kabay nga buligan naton ang madamo pa sa pagtukod sing suod nga kaangtanan kay Jehova kag sa iya Anak. Kabay nga buligan naton sila nga higugmaon ang pagkamatarong kag dumtan ang kalautan. (Hebreo 1:9) Sa amo, upod ang pagtuo nga kaangay sang kay Noe, makapadayon kita sa pagtukod sing tingob para sa isa ka dayon nga palaabuton.—1 Timoteo 4:15, 16.
PILA KA PAMANGKOT PARA SA REPASO—
◻ Paano si Jesus nagtukod para sa palaabuton?
◻ Ano ang imo nasapwan nga talalupangdon sa 1985 nga report?
◻ Ngaa kinahanglanon ang teokratiko nga mga programa sa pagtukod?
◻ Paano kita tanan makatukod nga may katuyoan?
[Kahon sa pahina 24]
Ang isa ka kongregasyon sa isa ka pungsod sa Aprika nga sa diin ang hilikuton ni Jehova ginadumilian may yara 95 ka manugbantala, tanan sila nagapakigbahin sa pag-alagad kada bulan. Nagapromedyo sila sing 130 sa ila mga miting apang 160 sa ila mga pamulongpulong publiko. Tatlo ang ila regular payunir kag sining karon lang walo ang nag-auxiliary payunir. Sa sulod lamang sang anum ka bulan, 21 ka bag-ong manugbantala ang nagsugod sa pag-alagad sa latagon.
[Kahon/Mga Laragway sa pahina 16, 17]
BUG-OS GLOBO NGA PAGTUKOD SANG MGA SAKSI NI JEHOVA
Sa bug-os nga kalibutan, 322,821 ka payunir ang nagareport kada bulan (24.7-porsiento nga pag-uswag)
Ang mga manugbantala sa bug-os nga kalibutan nag-uswag tubtob sa kataason nga 3,024,131 (6.4-porsiento nga pag-uswag)
Ang mga pagduaw liwat sa mga interesado may kabug-osan nga 224,725,918 para sa tuig (14.8-porsiento nga pag-uswag)
Ang ginahiwat nga mga pagtuon sa Biblia sa puluy-an kada bulan 2,379,146 (16.2-porsiento nga pag-uswag)
[Laragway]
Ang mga payunir nagapadulong sa pamalaybalay nga ministeryo, sa Brooklyn, Nueva York
Katorse sing hambal nga kombension, Montreal, Quebec, Canada
Pagpanaksi, Castle Comb, Wiltshire, Inglaterra
Pagtinuon sang grupo sa Yap, Micronesia
Iban sang mga tinukod nga ginagamit sa pagsakdag sang espirituwal nga hilikuton sa pagtukod sa bug-os nga globo.
Sa Brooklyn, ang pagpadala sing mga Biblia kag literatura sa Biblia ginatatap gikan sa sining 1,000,000-kuadrado-pie nga tinukod sa 360 Furman Street
Ining Kingdom Hall (Downpatrick, Naaminhan nga Irlandiya) gintukod sa sulod sang 31 ka oras
Ining Assembly Hall sa Roma isa sang madamo nga hall nga ginagamit sa bilog nga kalibutan
Ining dugang sa Puluy-an Bethel sang Hapon ginapatindog karon
[Tsart sa mga pahina 20-23]
REPORT 1985 NGA PAG-ALAGAD SANG MGA SAKSI NI JEHOVA SA BUG-OS KALIBUTAN
(Tan-awa ang tomo)
[Tsart sa pahina 25]
Walo ka pungsod nga nagreport sing kataason nga kapin sa 100,000 ka manugbantala sang 1985
E.U.A. 723,220
Brazil 177,904
Mexico 173,037
Italya 127,526
Nigeria 121,729
Alemanya 115,604
Britanya 103,522
Hapon 103,117