Mga Pamangkot Gikan sa mga Bumalasa

◼ Sanglit ang Salmo 37:29 ginbadbad “Ang matarong magapanubli sang duta, kag magapuyo diri tubtob sa walay katubtuban,” nagapatuhoy lamang bala ini sa permanente nga pagpuyo sang Israel sa Ginsaad nga Duta?

Indi, ina nga paghangop mangin isa ka wala sing sadsaran nga paglatid sa inspirado nga saad. Ang Salmo 37 nagatanyag sa mga matarong sing paglaum nga mabuhi sing dayon sa aton duta.

Ang pagbadbad sa ibabaw sa Salmo 37:29 ginkuha sa King James Version. Subong matuod sa madamo pa nga bersion, ginabadbad sini ang Hebreong ’eʹrets subong “duta.” Ang ’eʹrets mahimo nagapatuhoy sa isa ka rehiyon ukon sa teritoryo sang isa ka pungsod, subong sang “duta sang Sinar” ukon “duta sang Egipto.”—Genesis 10:10, 11; 21:21; Salmo 78:12; Jeremias 25:20.

Gani mahimo ginapakita sang Salmo 37:11, 29 nga ang mga Israelinhon mahimo kag dapat nangin permanente nga mga pumuluyo sang Ginsaad nga Duta. Nahisuno sa katipan sang Dios kay Abraham, dapat sila kuntani nagpabilin sa sadtong teritoryo nga ginhatag sang Dios sa ila, nga ginaagom ang iya mga pagpakamaayo sang nanuhaytuhay nga kaliwatan. Apang, indi nangin subong sini, kay ang mga Israelinhon wala magmatutom sa Dios.—Genesis 15:18-21; 17:8; Deuteronomio 7:12-16, 22; 28:7-14; 31:7; Josue 21:43-45.

Apang, wala sing Makasulatanhon nga rason nga latiran ang ’eʹrets sa Salmo 37:11, 29 sa duta lamang nga ginhatag sa mga Israelinhon.

Suno sa A Hebrew and English Lexicon of the Old Testament (Gesenius, Brown, Driver, kag Briggs; 1951) ang ’eʹrets nagakahulugan sing: “1. a. duta, (earth) bug-os nga duta ([indi] bahin) . . . b. duta, [indi] langit . . . c. duta=mga pumuluyo sang duta . . . 2. duta (land)=a. pungsod, teritoryo . . . b. distrito, rehiyon . . . 3. a. duta (ground), kadaygan sang duta . . . b. duta (soil), subong mabungahon.” Ang Old Testament Word Studies ni William Wilson nagasiling tuhoy sa ’eʹrets: “Ang duta sa pinakadaku nga kahulugan, lakip ang mapuy-an kag indi mapuy-an; upod sa pila ka nagalatid nga tinaga, ginagamit ini para sa pila ka bahin sang kadaygan sang duta, isa ka pungsod.” Gani ang una nga kahulugan sang Hebreong tinaga amo ang aton planeta, ukon globo, ang duta.

Talalupangdon nga sang ginbadbad ang Salmo 37:11, 29 sa Griego sa Septuagint, ang Hebreong ’eʹrets ginbadbad nga ge sa Griego, nga “nagakahulugan sing duta subong isa ka mapangumahan nga duta.” Ang ge amo ang tinaga nga gingamit sa importante nga tagna ni Jesus sa Mateo 5:5: ”Malipayon ang mga malum-ok sing hunahuha, kay panublion nila ang duta.”

Sa pagkamatuod, sang ginbalikwat ni Jesus ang saad sa Salmo 37:11, indi lamang ang Ginsaad nga Duta ang iya buot silingon. Ang iya hinaplas nga mga sumulunod mangin langitnon nga mga hari kag mga pari upod sa iya agod mag-ambit sa pagggahom sa ibabaw sang bug-os dutan-on nga globo. (Bugna 5:10) Sing kaanggid, ang malum-ok sing hunahuna nga mga tawo nga makatigayon sing kabuhi nga walay katapusan magabulig sa pagpasag-uli sang Paraiso nga mga kahimtangan sa bug-os nga duta. (Bugna 21:4; Genesis 1:28) Sa amo, mapaabot naton ang makatilingala nga katumanan sa palaabuton sang saad: “Kay panublion sang mga mabuot ang duta, kag magapuyo diri tubtob sa walay katubtuban.”—Salmo 37:29, Fenton.