Kahulugan sang Balita

AIDS—Pagbayad sa Bili

Ginabanta sang U.S. Federal Centers for Disease Control nga ang kinaandan nga ospital nagabayad kada adlaw sa pagbulong sa mga pasyente sang AIDS sing $830—doble sang sa iya sang iban nga mga pasyente. Kag ginabanta sang mga eksperto nga ang kabilogan nga gasto sa pagbulong sa kada pasyente magapromedyo sing kapin sa $100,000. Ini kag ang daku nga pagdugang sa kadamuon sang mga biktima sang AIDS nga nagapangabay nga bulngon nagpabalaka sa mga opisyal sang ospital kag seguro.

Ginatawag sang American Hospital Association ang madasig nga paglapnag sang AIDS nga “time bomb” para sa mga ospital sang pungsod, kay ang magasto nga dolyar magalab-ot sa ulihi sing linibo ka milyon kada tuig. Ang isa ka opisyal sang seguro nagpaandam: “Ginahangop ko ini nga ayhan ang pinakadaku nga katalagman sa pinansial nga naatubang sang negosyo sa kapagros kag seguro sa sining pungsod.” Sin-o ang magaabaga sang daku nga lulan sa kuwarta?

Madamong mga biktima sang AIDS ang mga agi kag mga nagiyan sa droga, nga bangod sang nagapatuyang sa kaugalingon nga estilo sang pagkabuhi natapikan sila sang balatian. Apang indi sila ang magabayad sa pinansial. Sa baylo, ginapakita sang mga opisyal sang pangulohan kag seguro nga ang mga nagpaseguro kag mga manugbayad sing buhis ang mapilitan sa pag-abaga sang lulan paagi sa mas mataas nga balayran. Dugang pa, “ang edukasyon, pagkawalay peligro sang publiko kag panguna nga mga kinahanglanon magaantos,” siling sang editoryal sang New York Post.

Sang una, ang mga biktima sang AIDS nga natapikan sang balatian bangod sang ila estilo sang pagkabuhi mahimo nga nagyaguta sa moralidad sang Biblia agod pakamatarungon ang ila pagpaayaw sa kaugalingon. Daku kuntani nga kasakit nila kag gasto sa iban ang nalikawan nila! Apang, indi pa tuman ka ulihi para sa kaangay nila nga magliso karon sa inspirado nga mga talaksan sa moral sang Biblia nga naghalin gikan “sa Isa nga nagatudlo sa imo sa imo kaayohan, sa Isa nga nagatuytoy sa imo sa dalanon nga dapat mo laktan.”—Isaias 48:17.

Paghidait kag Kalig-onan—Sa Dili Madugay?

Ang bantog nga sinulat sa dingding sang Plasa sang Nasyones Unidas mabasa: “Ang ila mga espada salsalon nila nga mga punta sang arado. Kag ang ila mga bangkaw nga mga galab nga inughagbas: Ang pungsod indi magbayaw sing espada batok sa pungsod. Indi na sila magtuon sing inaway.” Nagalaum nga magapamunga sa katumanan sinang matagnaon nga pulong, gindeklarar sang Nasyones Unidas ang 1986 nga mangin ang “Internasyonal nga Tuig sang Paghidait.” May rason bala sa pagpati nga ang NU magamadinalag-on sa iya ginahimud-osan nga tulumuron subong nagapahayag sang kaugalingon nga manugtatap sang “internasyonal nga paghidait kag kalig-onan?”

Kon ano man ang maamot sang NU sa nagahilapit nga pagsinggit sing “paghidait kag kalig-onan,” ang bisan anong hinimo-tawo nga paghidait pat-od nga nagasandig sa nagalupok nga sadsaran. (1 Tesalonica 5:3) Ang gasto sa militar ginabanta karon nga nagalab-ot sing isa ka trilyon ka dolyar kada tuig sa bug-os nga kalibutan. Kutob sang Inaway Kalibutanon II, wala labot ang kombensional nga mga hinganiban, ang bili sang pagtukod sing mga talagoan sang nuklear nga mga hinganiban ginbanta nga tatlo tubtob apat ka trilyon ka dolyar—halos indi mapaabot sa tion nga ang NU nagapanawag para sa dedikasyon sa bug-os kalibutan nga paghidait kag kalig-onan! Sa katunayan, siling ni Vernon Walters, embahador sang E.U. sa Nasyones Unidas, “ang Nasyones Unidas napahilayo gikan sa iya papel subong institution para sa paglubad sa inaway,” nagadugmok sa paglaum sang iban nga nagapati nga “ang N.U. magahimo sing labi pa sang sa paglubad sa inaway.”

Apang ang ginsulat nga pinamulong nga ginkutlo kaina gikan sa Isaias 2:4 may katumanan—apang indi sa 1986, ukon ano pa, paagi sa mga panikasog sang hinimo-tawo nga organisasyon. Sa baylo, ang matuod nga paghidait kag kalig-onan paluntaron sa dili madugay paagi sa langitnon nga pangulohan, nga ang dimakita nga pangulo amo gid ang “Prinsipe sang Paghidait.”—Isaias 9:6, 7.

Nuklear nga Pagbaslanay—Pagtimalus sang Dios?

Ang paggamit bala sang nuklear nga mga hinganiban makatarunganon bilang balus sa isa ka nuklear nga pagsalakay? Huo, siling sang Free Church sang Scotland sa ulihi nga guwa sang magasin sang ila iglesia, The Monthly Record. Ginasiling sang artikulo nga ina nga pagbalus magapamatuod sa ulihi sang “makatarunganon nga paghimo sang kaakig sang Dios” bangod sang “balaan nga sugo nga magkasingkal batok sa malaut.” Ginasiling man sang Record nga ang ila saksi nagalakip sa pagpahayag sang paghukom sang Dios sa “sinang pungsod . . . nga amo ang una nga nagasalakay sa nuklear nga inaway.”

Pat-od gid nga may yara “adlaw sang pagtimalus sang Dios.” (Isaias 61:1, 2) Apang ang pagtimalus sang Dios batok sa militaristiko nga mga pungsod ipabutyag sa panahon kag sa paagi nga ginapakamaayo niya. Sa baylo sang kaakig sang dutan-on nga mga pungsod, ang “kasingkal” sang Dios “magalaglag sa nagalaglag sang duta.” Paano? Paagi sa pagpadala sa “Hari sang mga hari,” si Ginuong Jesucristo, ‘sa paghukom kag pagpakig-away sa pagkamatarong.’ Ang iya langitnon nga Ginharian ‘magadugmok kag magatapos sang tanan sining mga ginharian.’—Bugna 11:18; 19:11-21; Daniel 2:44.